Pono ya Beibele

Na o Swanetše go Lefišwa Bakeng sa Ditirelo tša Bodumedi?

DINAGENG tše dintši, baetapele ba madumedi a ipolelago gore ke a Bokriste le ba madumedi ao e sego a Bokriste ba lefiša batho bakeng sa ditirelo tša bodumedi. Ditirelo tše di ka akaretša dikolobetšo, manyalo goba dipoloko. Tefo e ka ba diranta tše makgolo goba tše dikete.

Baruti ba bangwe ba lefša ke mmušo bakeng sa go swara meletlo le mediro ya boruti gotee le go bula dikopano tša makgotla ka thapelo. Batho ba ka thabela dipokano tše bjalo, e bile dikereke di na le ditshenyagalelo tšeo di swanetšego go di lefa. Eupša na Beibele e thekga mekgwa e bjalo ya go lefiša batho bakeng sa ditirelo tša bodumedi goba gaešita le go dira gore batho ba ikwe ba gapeletšega go di lefelela?

Na ke “Ntlo ya Thekišetšo”?

Ge Jesu Kriste a be a le lefaseng, bahlankedi ba bodumedi ba Bajuda le ba bangwe ba ile ba diriša dinako tša borapedi e le dibaka tša go ikhola, kudu-kudu nakong ya Paseka. Na Jesu o ile a kgahlwa ke mokgwa wo? Le gatee! Ge e le gabotse, Beibele e re botša gore o ile a “tšholla ditšhelete tša tšhipi tša baananyi ba ditšhelete le go thenola ditafola tša bona.” O itše: “Tlogelang go dira ntlo ya Tate ntlo ya thekišetšo!”—Johane 2:14-16.

Boemo bjo bo swanago le bjo bo ile bja direga mehleng ya moporofeta Mika, yo a bego a phela lekgolong la seswai la nywaga B.C.E. Beibele e bega gore, baetapele ba bodumedi ba Isiraele, ba be ba ‘ila toka’ gomme baperisita ‘ba be ba ruta ba nyaka moputso.’ Lega go le bjalo, ka nako e swanago, ba be ba ipolela gore ba thekgwa ke Modimo, ba re: “A Jehofa ga a gare ga rena?” (Mika 3:9, 11, PK) Eupša Jehofa Modimo o be a se gare ga bona. Go e na le moo, o ile a ila boitshwaro bja bona gomme ka moporofeta wa gagwe a pepentšha se.

Lehono baetapele ba bantši ba bodumedi ba diriša maano a swanago a megabaru, ka go rialo ba dira mafelo a bona a borapedi ‘dintlo tša thekišetšo.’ Ge e le gabotse, mekgatlo ya bodumedi ka moka e dira kgwebo, gantši e dira kgwebo e atlegago kudu ka go rekiša diswantšho tša bodumedi le dibopego tše dingwe tša ditlabakelo tša bodumedi. *—1 Johane 5:21.

“Le Amogetše feela, Neang Feela”

Ge a be a roma baapostola ba gagwe go yo bolela ditaba tše dibotse, go fodiša balwetši gotee le go tsoša bahu, Jesu o itše: “Le amogetše feela, neang feela.” (Mateo 10:7, 8) Ee, balatedi ba gagwe  ba kgonthe ba be ba sa swanela go lefiša batho bakeng sa ditirelo tša bona. Go feta moo, Jesu ka boyena o ile a bea mohlala ka go hlankela ba bangwe ntle le go ba lefiša.

A latela mohlala woo o beilwego ke Jesu, moapostola Paulo o ile a dira bodiredi “ntle le tefo.” (1 Bakorinthe 9:18) Ge a be a nyaka tšhelete, o be a šoma mošomo wa boiphedišo e le modiri wa ditente. (Ditiro 18:1-3) Ka gona, o be a ka bolela ka yena gotee le badirišani ba gagwe ba baromiwa gore: “Ga re babapatši ba lentšu la Modimo go etša ge ba bantši ba le bapatša.” (2 Bakorinthe 2:17) Eupša go thwe’ng ka go nyaka ditšhelete bakeng sa phuthego, mohlomongwe bakeng sa go reka goba go hiriša lefelo la borapedi?

“Modimo o Rata Monei yo a Neago ka go Hlalala”

Dihlatse tša Jehofa di hwetša tšhelete e nyakegago ka meneelo ya boithatelo. Di diriša molao wa motheo wo o rego: “Anke yo mongwe le yo mongwe a dire feela kamoo a phethilego ka gona pelong ya gagwe, e sego ka go kgokgona goba ka go gapeletšwa, gobane Modimo o rata monei yo a neago ka go hlalala.” (2 Bakorinthe 9:7) Ka baka leo, Dihlatse ga di lefiše bakeng sa dikgatišo tša tšona goba go lefiša bakeng sa ditirelo tša bodumedi tše bjalo ka dikolobetšo, manyalo goba dipoloko. Ga di ntšhe karolo ya lesome goba go fetiša poleiti ya koleke dibokeng tša tšona. Motho le ge e le ofe yo a nyakago go neela bakeng sa modiro wa tšona wa boboledi wo o dirwago lefaseng ka bophara a ka dira bjalo a sa bonwe ke motho ka go o tsenya ka mapokising a moneelo ao a beilwego mafelong a tšona a borapedi.

Lefaseng ka bophara, Dihlatse tša Jehofa di thekga Diholo tša tšona tša Mmušo, Diholo tša Kopano, diofisi tša makala le bogatišetšo gotee le mananeo a tša tlhakodišo, di diriša meneelo ya boithatelo. Tše dingwe, go swana le mohlologadi wa mohloki yoo Jesu a ilego a mo reta, di ka kgona go ntšha moneelo o monyenyane feela. (Luka 21:2) Tše dingwe di ka kgona go ntšha moneelo o montši. Go sa šetšwe gore boemo ke bofe, tšeo di latelago melao ya motheo yeo e ngwadilwego ka Beibeleng gomme di neela go ya kamoo di kgonago di ba le kgotsofalo, tšhegofatšo e humilego ya Modimo le lethabo la kgonthe.—Ditiro 20:35; 2 Bakorinthe 8:12.

[Mongwalo wa tlase]

NA O KILE WA IPOTŠIŠA?

● Ke’ng seo Jesu a se boditšego bao ba bego ba gweba ka tempeleng?—Johane 2:14-16.

● Na moapostola wa Mokriste Paulo o ile a amogela tefo bakeng sa ditirelo tša bodumedi?—2 Bakorinthe 2:17.

● Jehofa o kgahlwa ke mohuta ofe wa go nea?—2 Bakorinthe 9:7.

[Ntlhakgolo go letlakala 15]

“Tlogelang go dira ntlo ya Tate ntlo ya thekišetšo!”—Johane 2:14-16