Pono ya Beibele

Na Basadi e Swanetše go ba Badiredi?

MOSADI yo mongwe wa Mokatholika o ile a ngwalela kuranta ya USA Today gore: “Ke makaditšwe le go befedišwa ke taba ya gore ga go na selo seo se fetogilego mabapi le go kgethelwa ga basadi maemong a itšego.” Batho ba bantši ba ikwa ka tsela e swanago. Go ba gona, madumeding a mangwe basadi ba hlankela e le badiredi, baruti, bapišopo le bo-rabi.

Madumedi ao a lego ka mahlakoreng ka bobedi a ngangišano ye—ao a ganetšago basadi go ba badiredi le ao a ba dumelelago go ruta sethaleng—a ipolela gore a kgomarela Mangwalo. Lega go le bjalo, Beibele ga e thekge le ge e le efe ya dipono tšeo. Seo se bjalo bjang? E le gore re arabe potšišo yeo, sa pele re swanetše go ela hloko kamoo Beibele e dirišago lentšu le la “modiredi.”

Badiredi ba Lekgolong la Pele la Nywaga

Lentšu le la “modiredi” le bolela eng go wena? Ba bantši gatee-tee ba tla nagana ka moetapele wa bodumedi, wa monna goba mosadi, yoo a etelelago phuthego pele bakeng sa borapedi. Eupša Beibele e diriša lentšu le ka tsela e nabilego. Ela hloko mosadi wa Mokriste yo a bitšwago Fibe, yoo moapostola Paulo a ilego a mo tsebiša e le “kgaetšedi ya rena go lena, yo e lego modiredi wa phuthego yeo e lego Kenkerea.”—Baroma 16:1.

Na o nagana ka Fibe a eme pele ga phuthego ya Kenkerea, a eteletše pele tirelo ya bodumedi? Ge e le gabotse, ke bodiredi bofe bjoo Fibe a ilego a bo dira? Lengwalong la gagwe leo le yago go Bafilipi, Paulo o ngwala gore basadi ba itšego ‘ba ile ba katana le nna ditabeng tše dibotse.’—Bafilipi 4:2, 3.

Tsela e kgolo yeo ka yona Bakriste ba lekgolong la pele la nywaga ba ilego ba phatlalatša ditaba tše dibotse e bile ka go dira bjalo “phatlalatša le ka ntlo le ntlo.” (Ditiro 20:20) Bao ba bego ba dira modiro woo e be e le badiredi. Ba be ba akaretša basadi ba bjalo ka Perisila. Yena gotee le monna wa gagwe, ba ile ba ‘hlatholla tsela ya Modimo ka mo go nepagetšego kudu’ go Monna yo a boifago Modimo yo a bego a se a tšwa a kolobetšwa gore e be Mokriste. (Ditiro 18:25, 26) Ka go swana le Fibe, go bonagala Perisila e be e le modiredi yo a atlegago, go etša ge go be go le bjalo ka basadi ba bangwe ba bantši.

Modiro o Hlomphegago

Na bodiredi bja phatlalatša e be e le kabelo e sa rego selo, modiro o sego bohlokwa woo o bego o swanetše go newa basadi mola banna bona ba dira modiro o bohlokwa wa go okamela phuthego? Le gatee-tee. Go bjalo ka baka la mabaka a mabedi. La pele, Beibele e bolela ka go lebanya gore Bakriste ka moka—go akaretša le banna bao ba nago le boikarabelo bjo bogolo ka phuthegong—ba be ba swanetše go tšea karolo bodireding bja phatlalatša. (Luka 9:1, 2) La bobedi, bodiredi bja phatlalatša e be e le modiro o mogolo e bile e sa dutše e le modiro o mogolo woo ka wona Bakriste ba banna le ba basadi ba phethagatšago  taelo ya Jesu ya gore ba “dire batho ba ditšhaba ka moka barutiwa, . . . le [go] ba ruta.”—Mateo 28:19, 20.

Go na le modiro o mongwe o bohlokwa woo basadi ba itšego ba nago le wona ka phuthegong. Paulo o ngwadile gore: “Basadi ba godilego e be . . . bao ba rutago se sebotse; gore ba gakolle basadi ba bafsa gore ba rate banna ba bona, ba rate bana ba bona.” (Tito 2:3, 4) Ka go re’alo, basadi bao ba godilego bao ba nago le phihlelo tseleng ya bophelo bja Bokriste ba na le tokelo ya go thuša basadi ba bafsa le bao ba se nago phihlelo gore ba gole. Le wona woo ke modiro o hlomphegago le wa bohlokwa.

Go Ruta ka Phuthegong

Lega go le bjalo, ka Beibeleng ga go na moo basadi ba botšwago gore ba eme pele ga phuthego e le gore ba rute. Go e na le moo, moapostola Paulo o ba laetše gore “ba homole diphuthegong.” Ka baka la’ng? O ngwadile gore lebaka le lengwe ke gore dilo di dirwe “ka bothakga le ka thulaganyo.” (1 Bakorinthe 14:34, 40) E le gore phuthego e šome gabotse, Modimo o abetše modiro wa go ruta go sehlopha setee feela. Eupša ela hloko gore motho ga a fo newa tokelo ya go okamela phuthego ka gobane e le motho yo motona; tokelo yeo e newa feela banna bao ba tlogago ba swanelega. *—1 Timotheo 3:1-7; Tito 1:5-9.

Na modiro woo Modimo a o abetšego basadi ke wo o nyatšegago? Aowa. Gopola gore Jehofa Modimo o ba kgetha gore ba dire modiro o bohlokwa, e lego wa go nea bohlatse ka yena phatlalatša. (Psalme 68:11) Gare ga Dihlatse tša Jehofa lehono, banna le basadi bao e lego badiredi ba phatlalatša ba thušitše batho ba dimilione gore ba itshole gomme ba tle ba phologe. (Ditiro 2:21; 2 Petro 3:9) Ba tloga ba fihleletše selo sa bohlokwa kudu!

Tokišetšo ya gore banna le basadi ba šome gotee e dira gore go be le khutšo mola e bontšha go hlompha batho ba bong bjo bongwe le bjo bongwe. Ka mohlala: Mahlo le ditsebe di šoma gotee go thuša motho yo a sepelago ka dinao go tshela mmila wo o nago le dikoloi tše dintši kudu. Ka mo go swanago, ge banna le basadi ba phetha thato ya Modimo go ya ka mediro yeo yo mongwe le yo mongwe a e abetšwego, Modimo o šegofatša phuthego ka khutšo.—1 Bakorinthe 14:33; Bafilipi 4:9. *

[Mengwalo ya tlase]

NA O KILE WA IPOTŠIŠA?

● Basadi ba ka phuthegong ya Bokriste ya lekgolong la pele la nywaga ba be ba ruta bjang?—Ditiro 18:26.

● Ke bomang bao ba kgethelwago go okamela phuthego?—1 Timotheo 3:1, 2.

● Modimo o lebelela bjang bodiredi bja basadi ba Bakriste lehono?—Psalme 68:11.

[Ntlhakgolo go letlakala 15]

“Jehofa yena o ntšha lentšu; basadi bao ba bolelago ditaba tše dibotse ke lekoko le legolo.”—PSALME 68:11, NW.