Selo se Bohlokwa Kudu go Feta Bophelo bja Rena bja Gona Bjale

Ka ge go anega Murat Ibatullin

Ka 1987 Lekgotla la Kalafo la Russia le ile la nthomela Uganda, yeo e lego Afrika. Ke be ke dumetše go šoma ke le ngaka ya kalafo ka nywaga e mene. Ge e le gabotse, ke be ke sa nyake go boela Russia, eupša ke be ke holofela gore ke tla hwetša tlwaetšo yeo e tla nthušago go šoma dinageng tše bjalo ka Australia, Canada goba United States of America. Eupša ka 1991 dipakane tša ka di be di fetogile gomme ke ile ka boela Russia. E re ke hlalose lebaka.

KE BELEGWE ka 1953 motseng wa Kazan’, e lego motsemošate wa Repabliki ya Tatarstan kua Bogareng bja Russia. Batswadi ba ka ba bolela se-Tatar, mola bontši bja batho bao ba bolelago se-Tatar e le Mamoseleme. Ge ke be ke le ngwana, ke gopola ke bona bomakgolo ba khunama ba rapela Allah. Bana ba bona, go akaretša le batswadi ba ka, ba be ba re botša gore re se tshwenyane le bona gomme re tšwe ka phapošing. Batswadi ba ka ba be ba re lebelela ba bonagala ba lešwa dihlong ke seo, ka ge ba be ba kgomaretše Bokomanisi gomme ka nako yeo ba ikanne gore ke bailaModimo.

Ge ke be ke na le nywaga e mene, ke ile ka swarwa ke bolwetši bja polio bjo bo bego bo hlasetše kua Soviet Union. Ge ke be ke le ngwana ke be ke fo dulela go išwa sepetlele ke eya go hlahlobja. Ke gopola rakgolo a rapelela gore ke fole. Ke be ke nyaka go phela gabotse go swana le bana ba bangwe, ka gona go sa šetšwe gore ke be ke golofetše leoto, ke be ke bapala kgwele ya maoto, hockey le dipapadi tše dingwe.

Ge ke be ke dutše ke gola, ke ile ka rata go ba ngaka. Ke be ke sa tsene kereke, e bile ke be ke se moilaModimo. Ke be ke fo ba ke sa nagane ka Modimo. Ka yona nako yeo, ke be ke sa rate kgopolo ya Bokomanisi gomme gantši ke be ke ngangišana le tate le rangwane ka taba ye. Rangwane e be e le mohlahli yunibesithing a ruta tša filosofi gomme tate o be a šomela Komiti ya Tšhireletšego ya Naga, yeo e bego e tsebja e le KGB. Ge ke be ke fetša sekolo sa go ithutela bongaka, ke be ke ipeetše pakane ya go ba ngaka e botse ya go šoma ka bjoko le go hudugela nageng e nngwe.

 Go Tsomana le Bophelo bjo Bokaone

Ka 1984, ke ile ka hwetša mangwalo a ka a bongaka a go šomana le dirurugi tša bjoko. Ke moka ka 1987, ke ile ka romelwa Uganda sepetleleng seo se lego Mulago. Ke ile ka hudugela nageng ye e botse gotee le mosadi wa ka, Dilbar, le bana ba rena, Rustem le Alisa, bao ba bego ba na le nywaga e šupago le e mene. Go šoma kliniking go be go le thata gomme go be go akaretša le go bua balwetši bao ba bego ba na le twatši ya HIV. Gantši ke be ke tšea maeto a go ya dikliniking tše dingwe tšeo di lego nageng, ka ge ka nako yeo go be go na le dingaka tše pedi feela tša go šomana le bjoko kua Uganda.

Ka letšatši le lengwe, ge re le lebenkeleng la go rekiša dipuku kua Uganda, nna le Dilbar re ile ra bona Beibele ya se-Russia ka lekga la mathomo. Re ile ra reka dikopi tše mmalwa gore re kgone go di romela bagwera ba rena bao ba lego Soviet Union, ka ge ka nako yeo go be go le thata go reka Dibeibele nageng yeo. Re ile ra bala dikgaolo tše mmalwa ka Beibeleng eupša ra palelwa ke go di kwešiša moo re ilego ra ba ra kgaotša.

Lega go le bjalo, ka nywaga e meraro, re ile ra tsena dikereke tše di fapafapanego kua Uganda gomme ra leka go kwešiša seo batho ba tikologong yeo ba se dumelago le seo se bego se ba tutuetša. Ke ile ka ba ka dira phetho ya go ithuta Koran ka leleme la yona la mathomong. Ge e le gabotse, nna le Rustem re ile ra ingwadiša sekolong sa go ithuta Searaba. Ka morago ga dikgwedi tše mmalwa, re be re kgona go bolela Searaba go swana le batho ba bangwe.

Mo e ka bago ka yona nako yeo, re ile ra gahlana le baromiwa bao e lego barutiši ba Beibele e lego Heinz le Marianne Wertholz, bao ba bego ba etšwa Jeremane le Austria. Poledišanong ya rena ya mathomo, ga se ra ka ra bolela ka bodumedi le gatee. Re be re swana le batho le ge e le bafe ba Yuropa bao ba bego ba kopana Afrika. Re ile ra ba botšiša gore ba bewa ke’ng mo Uganda gomme ba re botša gore e be e le baromiwa ba Dihlatse tša Jehofa le gore ba tlile mo nageng go tlo thuša batho go ithuta Beibele.

Ke moka ke ile ka gopola gore thutong ya filosofi kua yunibesithing yeo ke bego ke le go yona kua Russia, re ile ra botšwa gore Dihlatse ke sehlotswana sa bokgelogi le gore se dira dihlabelo ka bana gomme se nwa madi a bona. Ke ile ka botša Heinz le Marianne ka taba ye, ka ge ke be ke dumela gore ba ka se dire selo sa mohuta woo. Nna le Dilbar re ile ra amogela kopi ya puku ya O ka Phela ka mo go sa Felego Paradeiseng mo Lefaseng, ke moka bobedi bja rena re ile ra bala dikgaolo tše dintši ka diiri tše mmalwa. Ge ke kgaotša go bala gomme ke botšiša Dilbar gore o ikwa bjang, o ile a re o thabišwa ke seo a se balago moo a bego a sa tsebe gore a ka itira’ng! Ke ile ka mmotša gore le nna ke ikwa ka tsela yeo.

Ka morago ga seo, re be re fagahletše go boledišana le Heinz le Marianne gape. Ge re be re gahlana le bona, re ile ra boledišana ka ditaba tše dintši. Seo re ithutilego sona ka Beibele se kgomile dipelo tša rena kudu. Re ile ra tutueletšega go abelana le bagwera ba rena le bao re bego re šoma le bona seo re bego re ithuta sona. Ba ba akaretša motseta wa mo-Russia, moemedi wa Russia gotee le dinaga tše dingwe, gotee le moemedi wa Vatican. Moemedi yo o ile a re makatša ka go re botša gore Testamente ya Kgale ke “nonwane feela.”

Go Boela Nageng ya Gabo Rena

Kgwedi pele re ka boela Russia ka 1991, nna le Dilbar re ile ra phetha ka go ba Dihlatse tša Jehofa. Re be re nagana gore ge re boela Kazan’, kapejana re be re tla tšwela pele ka go ya dibokeng. Eupša go ile gwa direga mohlolo wa gore ka dikgwedi tše tharo re palelwe ke go hwetša moo Holo ya Mmušo e lego gona e bile ra se bone le tlhasenyana ya gore badumedigotee le rena ba kae! Ka gona re ile ra phetha ka go ya ka ntlo le ntlo, ka ge e le mokgwa wa Dihlatse tša Jehofa lefaseng ka bophara, le ge re be re dira bjalo re le  noši. Se se ile sa feleletša ka gore re thome dithuto tše mmalwa tša Beibele, go akaretša le go ithuta le mosadi yo mongwe yoo ka morago e ilego ya ba Hlatse.

Ka morago ga se, re ile ra etelwa ke Hlatse e nngwe e tšofetšego yeo e bego e hweditše aterese ya rena go Dihlatse tša Uganda. Ke moka re ile ra thoma go kopana le sehlopha sa batho ba 15 bao ba bego ba swarela diboka ka phapošing e nyenyane. Heinz le Marianne ba be ba fela ba ikgokaganya le rena gomme ba ile ba ba ba re etela kua Kazan’. Ka morago, re ile ra ba etela kua Bulgaria, e lego naga yeo ba bego ba abetšwe go yo hlankela go yona le moo gona bjale ba sa hlankelago gona e le baromiwa.

Naga ya Gešo e Enywa Dienywa tše Dibotse

Nako le nako ge go bulega sebaka, ke abelana ditherešo tša Beibele le bašomigotee le nna sepetleleng moo ke šomago gona kua Russia. Ge nako e dutše e eya, ba bantši ba ile ba arabela gabotse gomme ba ba Dihlatse tša Jehofa, go akaretša le bašomi ba mmalwa bao ke šomago le bona sepetlele. Ka 1992, ngwaga ka morago ga ge re fihlile mo nageng, sehlopha sa Dihlatse tša Kazan’ se ile sa gola sa ba le batho ba 45; gomme ngwageng woo o ilego wa latela, sa ba batho ba ka godimo ga 100. Lehono kua Kazan’, go na le diphuthego tše šupago tša Dihlatse—tše hlano ke tša se-Russia, e tee ke ya se-Tatar gomme e nngwe ke ya polelo ya diatla. E bile go na le sehlopha seo se dirišago se-Armenia le seo se dirišago Seisemane.

Ka 1993, ke ile ka ya sebokeng sa dingaka kua New York City, moo ke ilego ka ba le sebaka sa go yo bona ntlokgolo ya Dihlatse tša Jehofa kua Brooklyn. Ke ile ka gahlana le Lloyd Barry, yo a bego a thuša ka go lomaganya modiro wa boboledi wa Dihlatse tša Jehofa lefaseng ka bophara. Go sa šetšwe gore o be a dula a swaregile, o ile a ipha nako ya go boledišana le nna.

Re ile ra boledišana ka go nyakega ga dikgatišo tšeo di theilwego Beibeleng ka leleme la se-Tatar. Nywaga e sego kae ka morago, go ile gwa rulaganywa gore go thome go ba le sehlopha sa go fetolela se-Tatar kua Russia gomme dikgatišo di ile tša thoma go ba gona ka se-Tatar. Ge nako e dutše e eya, re ile ra thaba kudu ge re be re thoma go hwetša Morokami wa ka mehla, e lego makasine wo o reretšwego go ithuta Beibele! Nakwana ka morago ga moo, go ile gwa ba le phuthego ya pele ya leleme la se-Tatar.

Go Diriša Mekgwa ya go Alafa Ntle le Tšhelo ya Madi

Ke boloka melao ka moka ya Modimo ya boitshwaro, go akaretša le wo o hwetšwago go Ditiro 15:20 moo Modimo a laelago bahlanka ba gagwe go ‘ila madi.’ Temana 29 e oketša ka gore bahlanka ba Modimo ba swanetše go “ila dilo tšeo di hlabetšwego medingwana ya diswantšho, madi, diphoofolo tše di kgamilwego le bootswa.”

Ka gona ge Dihlatse tša Jehofa di nyaka go alafša, di kgopela dingaka go hlompha boemo bja tšona ka mekgwa ya go alafša go sa dirišwe madi. Ke ile ka šoma ka nakwana le Komiti ya go Hloma Kwano le Dipetlele ya Dihlatse tša kua Kazan’. * Ka 1997, ge Pavel wa ngwaga o tee yo a tšwago motseng wa Novosibirsk a be a nyaka go buiwa kapelapela, mmagwe o ile a ikgokaganya le rena bakeng sa thušo. Ka morago ga moo, go ile gwa ba le dingaka tše mmalwa tše di nago le phihlelo kua Russia tšeo di bego di ikemišeditše go bua batho ntle le go diriša madi. Re ile ra dumela go tsoma ngaka yeo e bego e tla diriša mekgwa yeo e sa akaretšego madi.

Ka morago re ile ra hwetša kliniki ya go šomana le go buiwa ga pelo kua Kazan’ moo dingaka tša gona di ilego tša dumela go bua Pavel yo monyenyane. Ka March 31, 1997, dingaka di ile tša kgona go mmua ka ntle le mathata di sa diriše madi gore di lokiše bothata bjo bogolo bja pelo bjo bo bitšwago tetralogy of Fallot. Ka April 3, kuranta  ya Vechernyaya Kazan e ile ya bega gore: “Mošemanyana yo o phetše gabotse e bile ga a sa hloka dihlare tša go alafa pelo . . . Mmago Pavel ga se a ka a ikwa a thabile ka tsela ye dikgweding tše lesometee tše di fetilego.” Ka morago ga nako e sa fedišego pelo, Pavel o ile a fola dihlabi tša go buiwa gomme a thoma go sepelasepela meagong ya sepetlele.

Ga bjale Pavel o phetše gabotse gomme o swana le batho ba bangwe. O rata go rutha, go bapala lehlweng le go bapala kgwele ya maoto. O mphatong wa botshelela sekolong gomme yena le mmagwe ke barapedi bao ba bopago phuthego ya Dihlatse tša Jehofa tša kua motseng wa Novosibirsk. Ka morago ga tiragalo ye, dingaka tša gona kliniking yeo di ile tša se diriše madi ge di bua balwetši ba bangwe ba Dihlatse tša Jehofa bao ba bego ba na le mathata a pelo. Maemo a kalafo kua Tatarstan a tšwela pele a kaonefala gomme go bua batho ntle le tšhelo ya madi ke selo se se tlwaelegilego.

Mošomo wa ka Lehono

Nna le mosadi wa ka gotee le Dihlatse tše dingwe, re šoma kliniking yeo e nago le mekgwa ya maemo a godimo ya go alafa balwetši bao ba nago le mathata a bjoko le a pelo. Re bua balwetši ka ditsela tše dintši, kudukudu bao ba sa nyakego go tšhelwa madi. Ke ngaka e šomago ka mathata a bjoko gomme ke sa ithutela go bua batho bjoko ke sa diriše madi. Ge ke be ke šoma ke le moprofesara Lefapheng la Neurology le la Neurosurgery kua Yunibesithing ya tša Kalafo Motseng wa Kazan’, ke be ke ruta bao ba ithutelago tša kalafo le bongaka gomme ke leka go ba thuša go bona bohlokwa bja go alafa go sa dirišwe madi. *

Mosadi wa ka o šoma le nna kliniking e le setsebi sa ultrasound. Re thabela mešomo ya rena ka gobane re kgona go thuša batho. Eupša re thaba kudu ge re bona kamoo ditherešo tša Beibele di alafago batho moyeng. Dipelo tša rena di phophoma ka lethabo ge re botša batho ka kholofetšo ya Modimo ya gore kgauswinyane mo lefaseng go ka se be le “modudi yo a tla rego: ‘Ke a babja.’”—Jesaya 33:24.

[Mengwalo ya tlase]

[Seswantšho go letlakala 26]

Ke šoma ke le ngaka kua Afrika

[Seswantšho go letlakala 27]

Ge nna le mosadi wa ka re thoma go ithuta Beibele le Dihlatse tša Jehofa ka 1990

[Seswantšho go letlakala 28]

Ge ke be ke na le Lloyd Barry nakong ya ge ke etetše Brooklyn, New York ka 1993

[Seswantšho go letlakala 29]

Pavel le mmagwe lehono

[Seswantšho go letlakala 29]

Ke le tšhemong le mosadi wa ka, Dilbar