“Ga se ka hwa”

“O se ke wa ema lebitleng la ka wa lla,

ga ke gona moo.

Ga se ka hwa.”

● Na o tseba sereto se? Na o kile wa kwa se opelwa? Nywagasomeng e sego kae e fetilego, sereto se se homoditše batho ba bantši lefaseng ka bophara. Ka nywaga e mentši, direti tše di fapafapanego di be di bolelwa e le tšona tše di hlamilego sereto se. Ba bangwe e bile ba boletše gore ke thapelo ya poloko ya setšhaba sa Manavajo. Ka Seisemane ga se tsebje ka mantšu a sona a go phetha ao a boletšwego ka mo godimo, eupša se tsebja ka mothaladi wa sona wa mathomo wo o rego: “O se ke wa ema lebitleng la ka wa lla.”

Sereto se e ile ya ba koša ya go tuma kudu kua Japane nywageng e sego kae e fetilego, eupša gape se tsošitše tlhakatlhakano e kgolo. Gantši Majapane a etela mabitla a batho ba gabo ona go boledišana le ba leloko bao go naganwago gore ba sa phela. Ka baka la ge koša ye e ruta thuto yeo e fapanego le seo ba se tsebago, ba bantši ba botšišitše gore: “Ge e le gabotse bahu ba kae?”

Majapane ao a lego bodumeding bja Bobuddha ke kgale a e ba le dipoloko, meletelo le ditirelo tša segopotšo. Eupša Mabuddha a mantši ga a kgone go araba potšišo yeo e rego: Bahu ba kae? E bile ga a kgone go araba dipotšišo tše dingwe tše bjalo ka: Na bahu ba madumedi a mangwe le ditšhaba tše dingwe le bona ba ya felo gotee? Ke ka baka la’ng bahu ba sa bolele?

Ba bantši ba nagana gore dipotšišo tše bjalo ga di arabege le gona go tsoma dikarabo e fo ba go senya nako. Lega go le bjalo, o ka ipotšiša gore: ‘Go direga’ng ge re ehwa?’ Ge e le gabotse dikarabo di ka hwetšwa kae? Beibele e re Modimo o bopile batho ba babedi ba mathomo ba phethagetše gomme a ba nea serapa se sebotse gore e be legae la bona. Ba be ba ka phela ka mo go sa felego Paradeiseng mo lefaseng ge nkabe ba kwele Modimo. Eupša ga se ba ka ba kwa.

Ka gona Modimo o ile a gata mogato. O ile a raka banyalani bao legaeng la Paradeise gomme a se sa ba hlokomela. O hlalositše ditlamorago tša go se kwe ga bona ka gore: “O lerole gomme o tla boela leroleng.” Motho o dirilwe ka lerole, gomme mafelelong—ge a ehwa—o boela leroleng.—Genesi 2:7; 3:19.

Monna wa kua Kofu, Japane, yoo a hlokomelago lebitla le legolo o itše: ‘Ke tsenya melora le marapo ka lebitleng. Ka morago ga nywaga e mehlano goba e lesome ga go sa na selo.’ Mebele ya rena e dirilwe ka dikarolwana tšeo di lego mmung gomme ge nako e dutše e eya di fetoga mmu. Ka gona, go šala’ng?

Gaešita le ge motho a sa kwe selo ge a hwile, Mmopi wa rena yo a šetšago gaešita le thaga e nngwe le e nngwe yeo e hwago, o re gopola ka lerato. (Mateo 10:29-31) Go etša ge a holofeditše, o tla re tsoša, ee, a re bušetša bophelong. O tla re bitša re robetše lehung.—Jobo 14:13-15; Johane 11:21-23, 38-44.

Ge e ba o ka rata go tseba ka mo go oketšegilego ka taba ye, ngwalela bagatiši ba makasine wo bao ba tlago go thabela go go nea tsebišo e oketšegilego, goba o ye Wepesaeteng ya www.watchtower.org.