PONO YA BEIBELE
Lehu
Bahu ba kae?
“O lerole gomme o tla boela leroleng.”—Genesi 3:19.
SEO BATHO BA SE BOLELAGO
Batho ba bangwe ba nagana gore ba tla phela ka morago ga lehu—legodimong, diheleng, pakatoring goba go Limbo. Ba bangwe ba dumela gore ba tla belegwa gape ka sebopego se sengwe. Ka lehlakoreng le lengwe, bao ba ganetšago dikgopolo tša bodumedi ba dumela gore lehu e fo ba ge motho a kgaotša go ba gona.
SEO BEIBELE E SE BOLELAGO
Mmoledi 9:10 e re “Bodulabahu mo o yago gona, ga go na modiro le ge e le maano goba tsebo.” Gape Beibele e hlalosa seo se diregago go batho le diphoofolo ka morago ga lehu. E re: ‘Ka moka ba ya felo gotee. Ka moka ba tšwa leroleng, gomme ka moka ba tla boela leroleng.’—Mmoledi 3:20.
Boemo bja bahu ke bofe?
“Moya wa gagwe o a tšwa, yena a boela mmung; letšatšing leo menagano ya gagwe e a fela.” —Psalme 146:4.
SEO BATHO BA SE BOLELAGO
Ba bantši ba rutilwe gore seo se diregago ka morago ga ge motho a hwile se e ithekgile ka seo a bego a se dira ge a sa phela mo lefaseng. Ge e ba a be a dira dilo tše dibotse, o be a tla putswa ka ditšhegofatšo tša ka mo go sa felego; ge e ba a be a dira dilo tše mpe, o be a tla tlaišega ka mo go sa felego. Go naganwa gore batho ba swanetše go hlwekišwa dibe pele ba ka iponagatša go Modimo ka morago ga lehu. Go thwe bao ba sa hlwekišwago ba ka se thabe le ka mohla.
SEO BEIBELE E SE BOLELAGO
Bahu ga ba kgone go thaba goba go tlaišega. Ke therešo gore ka ge ba sa phele, ga go na seo ba se kwago; ba ka se thuše goba go gobatša bao ba phelago. Mmoledi 9:5, 6 e re: “Bao ba phelago ba a tseba gore ba tlo hwa, eupša ge e le bahu ga ba tsebe selo le gatee . . . Le gona, lerato la bona, lehloyo la bona le lehufa la bona di fedile gomme ga ba sa na karolo le ka mohla selong le ge e le sefe seo se dirwago ka tlase ga letšatši.”
Na go na le kholofelo le ge e le efe ka bahu?
“Ge e ba monna a ehwa, na a ka buša a phela? Ke tla leta matšatšing a ka ka moka a ge ke sa gapeletšega go leta, go ba go fihla kimologo ya ka e etla.”—Jobo 14:14.
SEO BATHO BA SE BOLELAGO
Gantši go dumelwa gore ge motho a išwa diheleng, ga go sa na kholofelo bakeng sa gagwe. O tlo tlaišega ka mo go sa felego diheleng. Ka lehlakoreng le lengwe, go thwe bao ba lego pakatoring, ba tla thabela ditšhegofatšo tša legodimong ka morago ga ge ba hlwekišitšwe dibe tša bona mollong.
SEO BEIBELE E SE BOLELAGO
Ka morago ga go khutša lehung, Morwa wa Modimo o tla tsoša bahu goba a ba bušetša bophelong mo lefaseng. Beibele e re: “Le se ke la makatšwa ke se, gobane nako e a tla yeo ka yona bohle bao ba lego mabitleng ba tlago go kwa lentšu la gagwe gomme ba tšwa.” (Johane 5:26, 28, 29) Ka morago ga moo boitshwaro bja motho bo tla bontšha ge e ba o tla newa bophelo bjo bo sa felego. *
^ ser. 14 Bakeng sa tsebišo e oketšegilego ka tsogo, hle bona kgaolo 7 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.
You May Also Like
DIPOTŠIŠO TŠA BEIBELE DI A ARABJA
Hele ke Eng? Na ke Moo Batho ba Tlaišetšwago sa Ruri?
Na badiradibe ba otlwa mollong wa dihele? Na hele ke moputso wa sebe? Bala Mangwalo gore o hwetše dikarabo tša dipotšišo tše.
DIPOTŠIŠO TŠA BEIBELE DI A ARABJA
Na Thuto ya Mabapi le go Tswalwa Lefsa e tšwa ka Beibeleng?
Go direga’ng ge motho a ehwa?
DIPOTŠIŠO TŠA BEIBELE DI A ARABJA
Na Lentšu Pakatori le Gona ka Beibeleng?
O ka makatšwa ke go tseba gore thuto ye e tšwa kae.
