“Ka dinako tše dingwe banenyana ba nkgopela dinomoro tša mogala gomme ba re ba nyaka ‘go fo ikutswa’ le nna. Ke a gana gomme ka sepela. Eupša ka monaganong wa ka ke fela ke ipotšiša gore, ‘Go be go tla direga’ng ge nkabe ke mo file nomoro ya ka?’ Therešo ke gore, ba bangwe ba banenyana bao ke ba babotse kudu. Go bonolo go ipotšiša gore, ‘Ke ganela’ng?’”—Carlos, * 16.

Na le wena o lwantšhana le teko go swana le Carlos? Ge e ba go le bjalo, o ka kgona go e fenya.

Diteko di wela batho ka moka—go akaretša le batho ba bagolo. Go ba gona, teko e ka tla ka ditsela tše dintši. Moapostola Paulo e be e se yo monyenyane ge a be a ngwala gore: “Ruri ke kgahlwa ke molao wa Modimo . . . , eupša mmeleng wa ka ke bona molao o mongwe woo o lwantšhanago le molao wa monagano wa ka gomme o ntira lethopša la molao wa sebe.” (Baroma 7:22, 23) Go sa šetšwe kgateletšo, Paulo o ile a ganetša maikwelo a go ineela—le wena o ka kgona! Le gona, ke ka baka la’ng o e ba lekgoba la diteko tša gago? (1 Bakorinthe 9:27) Go ithuta go lwantšha teko ge o sa le yo monyenyane go tla go thuša gore o se be le dipelaelo gona bjale gomme wa hlagolela bokgoni bjo o tlago go bo hloka ge o godile.

Diteko tšeo di gakatšwago ke tša dipapatšo. Beibele e bolela ka “dikganyogo tša bofsa” tšeo di lego matla. (2 Timotheo 2:22) Eupša difilimi, thelebišene, mmino le dipuku tšeo di hlametšwego bafsa gantši di gakatša dikganyogo tšeo ka go thekga kgopolo ya gore go ineela tekong go a amogelega. Ka mohlala, ge e ba babapadi ba babedi filiming ba ‘ratana,’ ga go pelaelo gore ba tlo ba le thobalano neng neng filiming yeo. Lega go le bjalo, Beibele e re banna le basadi ba kgonthe ba na le matla a go ‘tšwela pele ba ila dikganyogo tša nama.’ (1 Petro 2:11) Seo se bolela gore o ka kgetha go ganetša teko. Eupša bjang?

Tseba mafokodi a gago. Go tia ga ketane ga go na mohola ge e ba go na le moo e kgwehlago gona. Ka mo go swanago, maikemišetšo a gago a go dira se se lokilego gantši a tla palelwa maemong ao o fokolago go ona. O swanetše go itlhokomela maemong afe?—Molao wa motheo wa Beibele: Jakobo 1:14.

Letela teko. Nagana ka maemo ao a ka dirago gore o lebane le teko. Naganišiša e sa le pele gore o tla dira eng ge teko yeo e tšwelela.—Molao wa motheo wa Beibele: Diema 22:3.

Tiiša ditumelo tša gago. Beibele e re ge Josefa a be a lekwa gore a be le boitshwaro bjo bo gobogilego, o itše: “Nka dira bjang bobe bjo bjo bogolo gakaakaa gomme ka direla Modimo sebe?” (Genesi 39:9) Polelwana “nka dira bjang” e bontšha gore Josefa o be a na le ditumelo tše tiilego mabapi le se se nepagetšego le se se fošagetšego. Na go bjalo le ka wena?

Hwetša bagwera bao ba ka go thekgago. O ka efoga diteko tše dintši bophelong ka go gwerana le bao ditumelo tša bona tša boitshwaro di swanago le tša gago. Beibele e re: “Yo a sepelago le ba bohlale o tla hlalefa.”—Diema 13:20.

Phema maemo ao a ka dirago gore go be thata go ganetša teko. Ka mohlala:

• O se ke wa ba tee le motho wa bong bjo bo fapanego.

• Phema go diriša Inthanete nakong goba lefelong leo le ka go goketšago gore o bogele diswantšho tša batho bao ba sa aparago.

• Dula kgole le batho bao polelo le tsela ya bona ya go itshwara di dirago gore ditiro tše mpe di bonagale di kgahliša.

Ke melao efe yeo o ka ipeelago yona go go thuša go phema teko?—Molao wa motheo wa Beibele: 2 Timotheo 2:22.

Rapelela thušo. Jesu o boditše barutiwa ba gagwe gore: “Le rapele le sa kgaotše, gore le se tsene molekong.” (Mateo 26:41) Therešo ke gore, Jehofa Modimo o nyaka gore o ganetše teko gomme a ka go thuša go dira bjalo. Beibele e re: “A ka se le lese le lekwa go feta kamoo le ka kgonago go kgotlelela ka gona, eupša ge go etla moleko o tla bula tsela ya go tšwa e le gore le kgone go o kgotlelela.”—1 Bakorinthe 10:13.