GO THWE’NG ge e ba ka lapeng la gago go bonagala go dula go lwewa? Mohlomongwe dikgakgano di fetogile selo sa ka mehla e bile e ba tše di tseneletšego kudu. Go ka direga gore ga o tsebe le gore go se kwešišane go thomile bjang. Lega go le bjalo, le a ratana e bile ga le nyake go kwešana bohloko.

Go bohlokwa go gopola gore go fapana ka dikgopolo ga go bolele gore bophelo bja lapa la gago bo a senyega. Dingangišano ga se tšona di bakago bothata eupša tsela yeo di rarollwago ka yona ke yona e dirago gore go be le khutšo goba bonaba ka lapeng. Ela hloko megato yeo e ka thušago go fediša diphapano.

Gantši go ngangišana batho ba babedi, eupša ge yo mongwe a thoma go theetša go e na le go bolela, go jana ka meno go a okobala. Ka baka leo, phema go nyaka go itefeletša ge o rumolwa. Kgomarela seriti sa gago ka go itshwara. Gopola gore khutšo ya ka lapeng e bohlokwa kudu go phala go fenya ngangišanong.

“Moo go sego dikgong mollo o a tima, gomme moo go sego mothomeletši ditshele di a fela.”—Diema 26:20.

Go theetša ka šedi le ka kwelobohloko o sa tsene ba bangwe ganong goba go ba ahlola e sa le pele, go ka thuša kudu go fediša bogale le go tsošološa khutšo. Go e na le go naganela motho yo mongwe dilo tše mpe, hlompha maikwelo a gagwe. O se ke wa tšea seo se ka bakwago ke go se phethagale e le lehloyo. Polelo e gobatšago e ka ba e bakilwe ke go se naganele ga motho goba pelo e kwelego bohloko go e na le go bakwa ke go hloka botho goba moya wa go itefeletša.

“Aparang lerato leo le bonagatšago lešoko, botho, boikokobetšo, boleta le go se fele pelo.”—Bakolose 3:12.

Ge e ba o tlalelane, e ka ba gabohlale gore o tloge ka botho ka lebakanyana gore o iše maswafo fase. Mohlomongwe o ka ya phapošing e nngwe goba wa sepelasepela go fihlela o theošitše maswafo. Se ga se go tšhabela taba, ke gore go hloka tirišano, e bile ga se go gana go boledišana le ba bangwe. Go e na le moo, mohlomongwe ye ke nako e botse ya go rapela Modimo gore a go nee go se fele pelo, temogo le kwešišo.

“O tloge pele ga ge ntwa e ka thoma.”—Diema 17:14.

Maemo a ka se kaonefale ge e ba o dulela go loutša mantšu a go kweša motho yo mongwe bohloko. Go e na le moo, leka go hwetša mantšu ao a ka fodišago moratiwa wa gago maikwelong. Le gona, go e na le go bolelela maikwelo a gagwe, mo kgopele ka boikokobetšo gore a go hlalosetše ona gomme o leboge thušo goba temogo yeo o e hwetšago.

“Go na le yo a bolelago a sa naganišiše bjalo ka ge eka o hlaba ka tšhoša, eupša leleme la ba bohlale le a fodiša.”—Diema 12:18.

Go fela pelo ga setho se sengwe sa lapa go ka galefiša se sengwe. Phema go gegea, go rogana goba go hlaboša lentšu go sa šetšwe gore o ka ba o kgopišegile gakaakang. Phema ditatofatšo tše di hlabago, tše bjalo ka “Ga o na taba le nna” goba “Ga o ke o theetša.” Go e na le moo, botša molekane wa gago ka boleta kamoo boitshwaro bja gagwe bo go kgomilego ka gona (o ka re: “Ke kwa bohloko ge o . . . ”). Go kgorometšana, go itiana, go ragana goba mohuta le ge e le ofe wa bošoro ga o ke o lokafatšwa. Go bjalo le ka go kwera, dipolelo tša lenyatšo goba ditšhošetšo.

“Tlošang go lena mohuta o mongwe le o mongwe wa go boloka sekgopi, bogale, pefelo, mašata le polelo e gobošago gotee le selo se sengwe le se sengwe se se gobatšago.”—Baefeso 4:31.

O se ke wa dumelela maikwelo a fošagetšego a go palediša go phetha morero wa gago o mogolo, e lego wa go dira khutšo. Gopola gore ge e ba o elwa le motho yo mongwe, bobedi bja lena le a lahlegelwa gomme ge e ba o dira khutšo, bobedi bja lena le a fenya. Ka gona, amogela gore o bile le karolo ngangišanong. Gaešita le ge o kgodišegile gore ga o molato, o sa dutše o ka kgopela tshwarelo ka gore o ile wa tenega, wa araba ka tsela yeo o arabetšego ka yona goba wa mo galefiša o sa ikemišetša. Ditswalano tša khutšo di bohlokwa kudu go phala boikgogomošo le go fenya ntweng. Le gona, ge e ba motho a go kgopela tshwarelo, mo lebalele ka pela.

“Eya o ikokobetše go wa geno o phophothe go yena.”—Diema 6:3.

Ge ngangišano e fedile, o ka dira’ng go kgothaletša khutšo ka lapeng? Taba ye e tla ahlaahlwa sehlogong se se latelago.