MOLAO WA MOTHEO WA BEIBELE: “Tlogelang go belaelela meoya [goba, “bophelo”] ya lena.”—Mateo 6:25.

Seo se ra go re’ng? Jesu o boletše mantšu ao Thutong ya gagwe ya Thabeng. Go ya ka pukuntšu e nngwe ya Beibele, lediri la Segerika leo le fetoletšwego e le “go belaela” le ka šupa go “tsela ya tlhago yeo motho a itshwarago ka yona ge a welwa ke bodiidi, tlala le mathata a mangwe ao a mo welago bophelong bja gagwe bja letšatši le letšatši.” Gantši go belaela go akaretša go tshwenyega ka dilo tšeo di ka diregago nakong e tlago. Ke ga tlhago le mo go swanetšego go tshwenyega ka dinyakwa tša rena tša nama le bophelo bjo bobotse bja baratiwa ba rena. (Bafilipi 2:20) Eupša ge Jesu a be a re “le ka mohla le se ke la belaela,” o be a eletša balatedi ba gagwe gore ba pheme go tshwenyega kudu, e lego go tšhoga ka mo go feteletšego ka seo se tlago go direga gosasa, moo go ka amogago motho lethabo gona bjale.—Mateo 6:31, 34.

Na go a kgonega mehleng yeno? Ke gabohlale gore re latele keletšo ya Jesu. Ka baka la’ng? Dipuku tše dingwe tša ditšhupetšo di bontšha gore ge batho ba belaela kudu, tshepedišo ya bona ya megalatšhika ya go bontšha kwelobohloko e dula e šoma e bile boemo bjo “bo tswalanywa le mathata a tša maphelo ao a akaretšago dišo tša ka teng (di-ulcer), malwetši a pelo le bolwetši bja lefahla (asthma).”

Jesu o neile lebaka le le kwagalago la go phema go belaela kudu, le le rego: Ga go hole ka selo. Jesu o botšišitše gore: “Ke mang go lena yo ka go ba yo a belaelago, a ka oketšago tekanyo ya bophelo bja gagwe ganyenyane?” (Mateo 6:27) Go dula dipelaelong tša rena go ka se oketše bophelo bja rena le ka karolwana ya motsotswana, go se sa bolelwa ka go bo kaonefatša. Ka ntle le moo, gantši dilo ga di ke di direga go ya kamoo re bego re di tšhoga. Seithuti se sengwe se beile taba ka gore: “Go tshwenyega ka bokamoso ke go itapišetša lefeela, gomme gantši bokamoso e ba bjo bo kgahlišago go feta kamoo re bego re bo nagana.”

Re ka phema bjang go belaela? Sa pele, bota Modimo. Ge e ba Modimo a fepa dinonyana le go apeša matšoba ka botse, na a ka se nee batho bao ba etišago borapedi bja gagwe pele dinyakwa tša bophelo? (Mateo 6:25, 26, 28-30) Sa bobedi, tshwenyega ka tša lehono feela. Jesu o itše: “Le ka mohla le se ke la belaela ka letšatši le le latelago, gobane letšatši le le latelago le tla ba le dipelaelo tša lona.” Na ga o dumele gore “letšatši le lengwe le le lengwe le lekanwe ke bošula bja lona”?—Mateo 6:34.

Ka go latela keletšo ya Jesu e bohlale, re ka phema go gobala mmeleng. Ka godimo ga moo, re tla ba le khutšo ya ka gare—yeo Beibele e e bitšago “khutšo ya Modimo.”—Bafilipi 4:6, 7.