Ge re ithuta Beibele, re ka diriša dithulusi tše di fapafapanego go dira nyakišišo gore re kgone go kwešiša seo re se balago gakaone. Ga re no balela feela go oketša tsebo yeo re šetšego re na le yona ka Beibele. Re nyaka go ithuta ka semelo sa Jehofa gore re kgone go mo rata kudu. E le gore re kgone go dira se, re ka ipotšiša gore, ‘Karolo ye ya Beibele e nthuta’ng ka Jehofa?’

Re nyaka go ithuta ka mo go oketšegilego ka dika tša Jehofa, e lego lerato, bohlale, toka le matla. Lega go le bjalo, semelo sa Jehofa ga se hlaloswe ke dika tšeo feela. O na le dika tše dingwe tše dintši tšeo di kgahlišago. O ka ithuta kae ka dika tša Jehofa?

Lebelela tše dingwe tša dika tša Jehofa tše fetago tše 50 tšeo di hwetšwago ka go Watch Tower Publications Index, tlase ga sehlogo seo se rego “Jehovah” ke moka o lebelele sehlogwana seo se rego “Qualities by Name.” Nyakišiša ka seka seo se sepedišanago le temana yeo o e balago ka Beibeleng. (Ge e ba o na le puku ya Tlhahlo ya go Dira Nyakišišo ya Dihlatse tša Jehofa, o ka ya go sehlogo seo se rego, “Jehofa Modimo” ke moka wa ya ka tlase ga sehlogwana seo se rego “Dika tša Jehofa.”)