1, 2. (a) Ke ka baka la’ng batho ba mehleng ya moapostola Paulo ba be ba dula ba bolela ka bokgoba le tokologo? (b) Paulo o ile a botša batho gore tokologo ya kgonthe e ka hwetšwa go mang?

BAKRISTE ba lekgolong la pele la mengwaga ba phetše nakong ya ge Mmušo wa Roma o be o buša. Mehleng yeo, batho ba be ba ikgantšha ka go ba ditsebi tša molao, tša toka le tokologo. Lega go le bjalo, e le gore mmušo woo o be matla le gore o hume, o be o šomiša makgoba go dira mešomo e thata. Nakong e nngwe, go badudi ba bangwe le ba bangwe ba bararo ba Roma, mo e ka bago motho o tee e be e le lekgoba. Ga go pelaelo gore batho ba bantši—go akaretša le Bakriste—ba be dula ba bolela ka bokgoba le tokologo.

² Mangwalo a moapostola Paulo gantši a be a bolela ka tokologo. Lega go le bjalo, ge Paulo a be a botša batho ditaba tše dibotse, o be a sa leke go kaonefatša maemo a dipolotiki goba go a fetoša, e lego selo seo batho ba bantši ba bego ba se nyaka mehleng yeo. Go e na le gore Paulo le Bakriste gotee le yena ba nyake tokologo go mebušo ya batho, ba ile ba šoma ka thata gore ba thuše batho ba bangwe gore ba ithute ditaba tše dibotse tša mmušo wa Modimo le go ba botša  kamoo topollo ya Kriste Jesu e lego bohlokwa ka gona. Paulo o ile a thuša Bakriste gotee le yena go bona gore tokologo ya kgonthe e tšwa go Jehofa. Ka mohlala, lengwalong la bobedi leo Paulo a le ngwaletšego Bakriste ba kua Korinthe, o itše: “Jehofa ke Moya; gomme moo moya wa Jehofa o lego gona, go na le tokologo.”—2 Bakor. 3:17.

3, 4. (a) Ke’ng seo se dirilego gore Paulo a bolele mantšu ao a lego go 2 Bakorinthe 3:17? (b) Re swanetše go dira’ng gore re kgone go ba le tokologo yeo e tšwago go Jehofa?

³ Lengwalong la bobedi leo a le ngwaletšego Bakorinthe, Paulo o ile a bolela ka letago la Moshe ge a be a theoga Thabeng ya Sinai. Ge Baisiraele ba be ba bona Moshe, ba ile ba tšhoga gomme Moshe a ikhupetša sefahlego ka lešira. (Ek. 34:29, 30, 33; 2 Bakor. 3:7, 13) Paulo o itše: “Eupša ge motho a retologela go Jehofa, lešira le a tlošwa.” (2 Bakor. 3:16) Paulo o be a e ra gore’ng?

⁴ Ka ge re ithutile sehlogong se se fetilego, Jehofa, yena Mmopi wa dilo ka moka, ke Yena a nnoši a nago le tokologo ya go dira selo se sengwe le sengwe seo a se nyakago. Ka baka leo, moo Jehofa a lego gona le moo “moya wa [Gagwe] o lego gona,” go na le tokologo. Ka gona e le gore re be le tokologo yeo re swanetše go ‘retologela go Jehofa,’ e lego go ba le segwera se sebotse le Yena. Ge Baisiraele ba be ba le lešokeng, ba be ba sa lebelele dilo ka tsela yeo Jehofa a bego a di lebelela ka yona. Go be go le bjalo ka ge eka ba khupeditše menagano ya bona le dipelo tša bona ka lešira. Ba be ba nyaka go diriša tokologo ya bona yeo ba bego ba sa tšwa go e hwetša go kgotsofatša dikganyogo tša bona.—Baheb. 3:8-10.

5. (a) Moya wa Modimo o dira gore re be le tokologo ya mohuta ofe? (b) Re tseba bjang gore motho a ka ba le tokologo gaešita le ge a golegilwe goba e le lekgoba? (c) Ke dipotšišo dife tšeo re swanetšego go di araba?

⁵ Tokologo yeo moya wa Jehofa o re neago yona e feta kgole tokologo ya ge lekgoba le lokollwa bokgobeng. Batho ba ka se tsoge ba kgonne go lokolla motho bokgobeng bja sebe le lehu, eupša ke moya wa Modimo wo o ka kgonago go dira bjalo. Le gona ke wona feela o ka kgonago go lokolla batho bokgobeng bja bodumedi bja maaka. (Baroma 6:23; 8:2) Ruri yeo ke tokologo ya go di phala ka moka! Motho a ka kgona go ba le tokologo yeo gaešita le ge a le kgolegong goba e le lekgoba. (Gen. 39:20-23) Re bona nnete ya taba ye mohlaleng wa Ngwanabo rena Harold King, yoo a ilego a kgotlelela mengwaga e mentši kgolegong ka baka la ge a ile a golegelwa tumelo ya gagwe. O ka hwetša phihlelo ya gagwe go Kgašo ya JW. (E lebelele ka tlase ga DIPOLEDIŠANO LE DIPHIHLELO > GO KGOTLELELA DITEKO.) Ga bjale, anke re arabeng dipotšišo tše: Re ka bontšha bjang gore re tšeela godimo tokologo yeo re nago le yona? Gona re ka dira’ng gore re šomiše tokologo ye gabotse?

6. Baisiraele ba ile ba bontšha bjang gore ga ba leboge tokologo yeo Jehofa a bego a ba neile yona?

⁶ Gantši ge re hwetša mpho e bohlokwa, re leboga motho yoo a re neilego yona. Baisiraele ga se ba leboga tokologo yeo Jehofa a bego a ba neile yona ge a be a ba ntšha bokgobeng kua Egipita. Dikgwedi tše sego kae ka morago ga gore Baisiraele ba lokollwe Egipita, ba ile ba thoma go gopola dijo tšeo ba bego ba di hwetša Egipita gomme ba ngongorega ka dilo tšeo Jehofa a bego a ba nea tšona. Ba ile ba ba ba nyaka le go boela Egipita. E no nagana feela, ba be ba bona ‘dihlapi, diphara, magapu, diliki, dieie le konofolo’ di le bohlokwa kudu go feta tokologo yeo Jehofa a bego a ba neile yona ya go mo hlankela. Ruri ga go makatše ge Jehofa a ile a ba galefela kudu. (Num. 11:5, 6, 10; 14:3, 4) Pego ye e re ruta thuto e bohlokwa kudu.

7. Paulo o ile a dira dilo bjang ka go dumelelana le keletšo ya gagwe yeo e lego go 2 Bakorinthe 6:1, gona rena re ka mo ekiša bjang?

 ⁷ Moapostola Paulo o ile a eletša Bakriste ka moka gore ba se ke ba nyatša tokologo yeo Jehofa a ba neilego yona a diriša Morwa wa gagwe, Jesu Kriste. (Bala 2 Bakorinthe 6:1.) Nagana ka bohloko bjo Paulo a ilego a bo kwa ka ge e be e le lekgoba la sebe le lehu. Le ge a be a ekwa bohloko, o ile a bolela gore: “A go lebogwe Modimo ka Jesu Kriste Morena wa rena!” Ke ka baka la’ng a ile a bolela bjalo? O ile a botša Bakristegotee le yena gore: “Gobane molao wa moya woo o neago bophelo boteeng le Kriste Jesu o le lokolotše molaong wa sebe le wa lehu.” (Baroma 7:24, 25; 8:2) Go swana le Paulo, le rena ga se ra swanela go lebala gore Jehofa o re lokolotše bokgobeng bja sebe le lehu. Sehlabelo sa Jesu se dira gore re kgone go hlankela Modimo wa rena ka letswalo le le se nago molato, gomme seo se a re thabiša.—Ps. 40:8.

8, 9. (a) Moapostola Petro o ile a nea temošo efe mabapi le kamoo re swanetšego go diriša tokologo ya rena? (b) Motho a ka diriša tokologo ya gagwe gampe bjang?

⁸ Ga se ra swanela go no bolela gore re leboga Jehofa, eupša re swanetše go ba šedi gore re se diriše tokologo ya rena gampe. Moapostola Petro o ile a lemoša Bakriste gore ba se diriše tokologo ya bona e le sehlare sa ntšhirela bakeng sa go dira dilo tše mpe. (Bala 1 Petro 2:16.) Na temošo ye ga e go gopotše seo se ilego sa diragalela Baisiraele kua lešokeng? Le mehleng ye, re sa dutše re hloka keletšo yeo go feta le ge e le neng pele. Sathane le batho ba gagwe ba tšweletša dilo tšeo di bonagalago di kgahliša. E ka ba dilo tša go swana le moaparo le go itokiša, dijo le dino, boithabišo le boitapološo gaešita le dilo tše dingwe tše dintši. Babapatši bao ba nago le bokgoni ba šomiša batho ba babotse gore ba dire eka re hloka dilo tšeo ba di bapatšago mola e le gore dilo tšeo ga se gore re a di hloka. Go ka ba bonolo gore batho ba ba re fore gomme seo sa dira gore re diriše tokologo ya rena gampe.

⁹ Keletšo ya Petro e ka re thuša maemong a mangwe a bohlokwa bophelong, go swana le go kgetha seo re tlago go ithutela sona sekolong goba mošomo wo re tlago go o šoma. Ka mohlala, bafsa ba bantši ba ikwa ba gapeletšega go šoma ka thata sekolong e le gore ba tle ba ye diyunibesithing tša maemo a godimo. Batho ba bangwe ba ba botša gore ge ba ka rutega ba tla hwetša mešomo ya go patela. Le gona ba ka ba bontšha bohlatse bjo bo bontšhago gore batho bao ba tšwago yunibesithing ba gola tšhelete e ntši go feta bao ba sa tšwego. Ka ge bafsa ba swanetše go dira diphetho tša go swana le tše, tšeo di kgomago maphelo a bona, ba ka ikwa ba gapeletšega go ya diyunibesithing. Eupša bafsa ba le batswadi ba bona ba swanetše go dula ba gopola’ng?

10. Re swanetše go dula re gopola’ng ge re dira diphetho?

¹⁰ Batho ba bangwe ba ka ipotša gore ka ge ba na le tswanelo ya go itirela diphetho ditabeng tša mešomo le thuto, gona ba na le tokologo ya go kgetha go dira selo se sengwe le se sengwe seo ba se ratago ge feela matswalo a bona a sa ba ganetše. Mohlomongwe ba ka ba ba naganne ka seo Paulo a se boditšego Bakriste ba Bakorinthe mabapi le dijo gore: “Ke ka baka la’ng tokologo ya ka e swanetše go ahlolwa ke letswalo la motho yo mongwe?” (1 Bakor. 10:29) Ke therešo gore re na le tokologo ya go itirela diphetho ditabeng tša thuto le mešomo, eupša re swanetše go dula re gopola gore tokologo ya rena e na le mo e felelago gona, le gore diphetho tšeo re di dirago di na le ditlamorago. Ke ka baka leo Paulo a itšego: “Dilo ka moka di dumeletšwe ke molao; eupša ga se dilo ka moka tšeo di holago. Dilo ka moka di dumeletšwe ke molao; eupša ga se dilo ka moka tšeo di agago.” (1 Bakor. 10:23) Mantšu a a Paulo a re thuša go bona gore go na le dilo tše bohlokwa kudu tšeo re swanetšego go nagana ka tšona go feta dilo tšeo rena re di ratago.

11. Ke ka baka la’ng Jehofa a re lokolotše sebeng le lehung?

¹¹ Ge Petro a be a lemoša gore re se diriše tokologo ya rena gampe, o ile a bolela gore tsela e botse ya go diriša tokologo ya rena ke ka go ba “bahlanka ba Modimo.” Ka gona, lebaka le legolo la gore Jehofa a re lokolle sebeng le lehung a diriša Jesu e be e le gore re ineele go yena gomme re be ‘bahlanka ba Gagwe.’

12. Noa le lapa la gagwe ba re beetše mohlala ofe?

¹² Tsela e kaone ya go diriša tokologo ya rena ke ka go šomiša nako ya rena le matla a rena go hlankela Jehofa ka botlalo. Go dira bjalo, go tla re thuša gore re se dumelele dilo tša lefase le le dikganyogo tša rena di etla pele maphelong a rena. (Bagal. 5:16) Ka mohlala, mopatriareka Noa le lapa la gagwe ba be ba phela le batho ba bašoro le bao ba se nago boitshwaro. Lega go le bjalo, ba ile ba dula ba itshwere gabotse le ge ba be ba phela le batho ba se nago boitshwaro. Ba kgonne bjang go dula ba itshwere gabotse? Ba ile ba dula ba swaregile ka mošomo woo Jehofa a bego a ba file wona, e lego wa go aga areka, go tsenya dijo tša bona le tša diphoofolo ka gare ga areka le go botša batho gore Meetsefula a a tla. Beibele e re: “Noa a dira tšohle tšeo Modimo a mo laetšego tšona. A dira tšona tšeo.” (Gen. 6:22) Ka morago ga moo go ile gwa direga’ng? Noa le lapa la gagwe ba ile ba phologa Meetsefula.—Baheb. 11:7.

13. Jehofa o re laetše gore re dire’ng?

¹³ Lehono Jehofa o re laetše gore re dire’ng? Ka ge re le barutiwa ba Jesu, re a tseba gore Modimo o nyaka re bolela ditaba tše dibotse. (Bala Luka 4:18, 19.) Lehono Sathane o foufaditše batho ba bantši, gomme ga ba lemoge gore ke makgoba a bodumedi bja maaka, dipolotiki le mahumo. (2 Bakor. 4:4) Go swana le Jesu, re na le tokelo ya go thuša batho go tseba Jehofa le go mo hlankela, yena Modimo wa tokologo. (Mat. 28:19, 20) Eupša go dira seo ga go bonolo. Dinageng tše dingwe batho ga ba thabele molaetša wa Mmušo wa Modimo, e bile ba bangwe ba a re galefela ge re ba botša ka wona. Yo mongwe le yo mongwe wa rena o swanetše go  ipotšiša gore: ‘Na nka šomiša tokologo ya ka go thuša batho ba bangwe gore ba tsebe ka Mmušo wa Modimo?’

14, 15. Bahlanka ba bantši ba Jehofa ba kgethile go dira’ng? (Bona seswantšho seo se lego mathomong a sehlogo.)

¹⁴ Go thabiša kudu go bona gore bana babo rena ba bantši ba ile ba kgetha go phela bophelo bjo bonolo e le gore ba kgone go tsenela tirelo ya nako e tletšego. (1 Bakor. 9:19, 23) Ba bangwe ba bona ba hlankela diphuthegong tša gabo bona, mola ba bangwe ba hudugela moo go nyakegago bagoeledi ba oketšegilego. Mengwageng e mehlano e fetilego go bile le bana babo rena ba fetago ba 250 000 bao ba tsenetšego tirelo ya bobulamadibogo, gomme ga bjale go na le babulamadibogo ba ka godimo ga ba 1 100 000 lefaseng ka moka. Ruri go thabiša kudu go bona bana babo rena ba bantši ba šomiša tokologo ya bona go hlankela Jehofa ka tsela ye!—Ps. 110:3.

¹⁵ Ke’ng seo se thušitšego bana babo rena ba le dikgaetšedi go diriša tokologo ya bona ka bohlale? Ekwa seo se bolelwago ke John le Judith bao ba hlanketšego dinageng tše dintši mengwageng e 30 e fetilego. John le Judith ba re ge Sekolo sa Tirelo ya Bobulamadibogo se be se thoma ka 1977, barutwana ba ile ba kgothaletšwa go yo hlankela mafelong ao go nyakegago bagoeledi ba bantši. Ka gona, e le gore ba dire seo se bego se kgothaletšwa, John o re o ile a fetoša mešomo gantši e le gore ba kgone go dula ba phela bophelo bjo bonolo. Mafelelong, ba ile ba kgona go yo hlankela nageng e šele. Ba thušitšwe ke’ng gore ba fenye dilo tšeo di bego di ka ba fetša matla, tše bjalo ka go ithuta leleme le lefsa, go tlwaela setšo sa moo le boemo bja leratadima? Ba thušitšwe ke go rapela Jehofa le go ithekga ka yena. Ba ikwa bjang ka mengwaga e mentši yeo ba e feditšego ba le tirelong ya nako e tletšego? John o re: “Ga go na mošomo o thabišago go phala mošomo wa go hlankela Jehofa ka nako e tletšego. Mošomo wo, o dirile gore ke tsebe Jehofa gakaone, Jehofa o bile bjalo ka Tate yo lerato go nna. Ga bjale ke kwešiša Jakobo 4:8 ge e re: ‘Batamelang Modimo gomme o tla le batamela.’ Ke be ke bona gore ke hweditše selo seo ke bego ke se nyaka bophelong, e lego bophelo bjo bo kgotsofatšago, le bjo bo nago le morero.”

16. Bana babo rena ba bangwe bao maemo a bona a sa ba dumelelego go tsenela tirelo ya nako e tletšego ba ile ba diriša tokologo ya bona bjang?

¹⁶ Go fapana le John le Judith, ba bangwe ba bana babo rena le dikgaetšedi ga ba kgone go tšea nako e telele ba le tirelong ya nako e tletšego ka ge maemo a sa ba dumelele. Lega go le bjalo, ba bantši ba bona ba thuša medirong ya go aga mafelo a pušo ya Modimo lefaseng ka moka. Ka mohlala, ge ntlokgolo ya rena e be e agwa kua Warwick, New York, bana babo rena le dikgaetšedi ba e ka bago ba 27 000 ba ile ba ithaopela go yo thuša. Ba bangwe ba ile ba ithaopela go yo thuša ka dibeke tše pedi, dikgwedi tše sego kae goba ngwaga le go feta moo. Ba bantši ba bona ba ile ba tlogela dilo tše ba bego ba di dira e le gore ba yo thuša moo. Ruri ba re beetše mohlala o mobotse wa go diriša tokologo yeo Jehofa a ba neilego yona gore ba mo tumiše!

17. Bao ba dirišago tokologo ya bona ka bohlale ba letetšwe ke ditšhegofatšo dife?

¹⁷ Re leboga kudu gore re tseba Jehofa le gore ga bjale re na le tokologo yeo re e hwetšago feela borapeding bja therešo. Eka diphetho tša rena di ka bontšha gore re tšeela godimo tokologo yeo Jehofa a re neilego yona. Go e na le go diriša tokologo ye gampe, anke re e dirišeng go hlankela Jehofa ka mo re ka kgonago ka gona. Ge e ba re dira bjalo, re tlo fela pelo ya go tlo thabela ditšhegofatšo ka moka tšeo Jehofa a re tshepišitšego tšona ge a be a re: “Tlholo ka boyona le yona e lokollwe bokgobeng bja tshenyego gomme e be le tokologo ya letago ya bana ba Modimo.”—Baroma 8:21.