1-2. Ke ka baka la’ng Jesu a be a gateletšegile?

LETŠATŠING la mafelelo la ge Jesu a be a le mo lefaseng, o be a tshwenyegile kudu. O be a le kgauswi le go tlaišwa le go bolawa ga sehlogo ke batho ba babe. Eupša Jesu o be a sa tshwenywe feela ke gore o be a tlo hwa e se kgale. O be a rata tatagwe kudu e bile a nyaka go mo kgahliša. Jesu o be a tseba gore ge a be a ka dula a botega le ge a be a tlaišwa, o be a tlo thuša gore leina la Jehofa le godišwe. Le gona Jesu o be a rata batho e bile o be a tseba gore e le gore batho ba tle ba hwetše bophelo bjo bo sa felego, o be a swanetše go dula a botegela Jehofa go fihlela a ehwa.

² Gaešita le ge Jesu a be a gateletšegile kudu, o be a na le khutšo ya monagano. O boditše baapostola ba gagwe gore: “Ke le nea khutšo ya ka.” (Joh. 14:27) O be a na le “khutšo ya Modimo,” e lego khutšo yeo motho a bago le yona ge a na le segwera se sebotse le Jehofa. Khutšo yeo e ile ya dira gore Jesu a se belaele ka selo.—Bafil. 4:6, 7.

3. Re tlo ithuta ka’ng sehlogong se?

³ Ga go na le o tee wa rena yo a ka gateletšegago go swana le ka tsela yeo Jesu a ilego a gateletšega ka yona, eupša batho ka moka bao ba latelago Jesu ba tlo lebeletšana le diteko. (Mat. 16:24, 25; Joh. 15:20) Le gona go swana le Jesu, re tlo fela re welwa ke mathata. Re ka dira’ng gore mathata ao a re welago a se ke a re tšeela khutšo ya monagano? A re boleleng ka dilo tše tharo tšeo Jesu a di dirilego nakong ya bodiredi bja gagwe bja mo lefaseng, gomme re bone kamoo re ka mo ekišago ge re welwa ke mathata.

4. O naganne ka Bathesalonika ba Pele 5:17, nea mehlala yeo e bontšhago gore Jesu o ile a rapela gantši letšatšing la mafelelo pele a ka hwa.

⁴ Bala 1 Bathesalonika 5:17. Jesu o ile a rapela gantši letšatšing la mafelelo ge a be a le mo lefaseng. Ge a be a bontšha barutiwa ba gagwe kamoo ba swanetšego go gopola lehu la gagwe ka gona, o ile a rapelela senkgwa le beine. (1 Bakor. 11:23-25) Pele ga ge ba ka tloga lefelong leo ba bego ba keteka Paseka go lona, Jesu o ile a rapela gotee le barutiwa ba gagwe. (Joh. 17:1-26) Ge yena le baapostola ba gagwe ba be ba fihla Thabeng ya Mehlware, o ile a rapela gantši. (Mat. 26:36-39, 42, 44) Le gona selo sa mafelelo seo Jesu a ilego a se dira pele a ka hwa, ke go rapela. (Luka 23:46) Ge Jesu a be rapela Jehofa letšatšing la mafelelo ge a be a le mo lefaseng, o ile a mmotša selo se sengwe le se sengwe seo diragetšego letšatšing leo.

5. Ke’ng seo se dirilego gore baapostola ba palelwe ke go bontšha sebete?

⁵ Selo se sengwe seo se ilego sa thuša Jesu go kgotlelela diteko ke go dula a rapela Tatagwe. Eupša baapostola ba gagwe bona ba ile ba palelwa ke go phegelela thapelong bošegong bja pele Jesu a ka bolawa. Ka gona ba ile ba palelwa ke go ba le sebete ge ba be ba lekwa bošegong bjoo. (Mat. 26:40, 41, 43, 45, 56) Ge re welwa ke diteko re tlo kgona go dula re botega ge feela re latela mohlala wa Jesu gomme re ‘rapela re sa kgaotše.’ Ke dilo dife tšeo re ka di rapelelago?

6. Go ba le tumelo go tlo re thuša bjang gore re be le khutšo ya monagano?

⁶ Re ka rapela Jehofa gore a “re nee tumelo e oketšegilego.” (Luka 17:5; Joh. 14:1) Re swanetše go ba le tumelo ka gobane Sathane o leka batho ka moka bao ba ekišago Jesu. (Luka 22:31) Tumelo e ka re thuša bjang gore  re be le khutšo ya monagano ge re welwa ke mathata a go latelana? Ge re dirile sohle seo re ka se kgonago go lebeletšana le teko e itšego, tumelo ya gore Jehofa o tla re thuša e tla dira gore re se sa tshwenyega ka ge re tseba gore o tla re rarollela mathata ka nako ya maleba. Ka ge re tseba gore o kgona go re rarollela mathata go feta kamoo re ka itharollelago ka gona, seo se dira gore re be le khutšo ya monagano.—1 Pet. 5:6, 7.

7. O ithutile’ng go seo ngwanabo rena Robert a se boletšego?

⁷ Thapelo e re thuša gore re dule re na le khutšo ya monagano go sa šetšwe mathata ao re lebeletšanego le ona. Nagana ka mohlala wa Robert, yoo e lego mogolo yo a botegago yo a lego mengwageng ya bo-80. O re: “Keletšo yeo e lego go Bafilipi 4:6, 7 e nthušitše go lebeletšana le mathata a mantši bophelong. Ke ile ka ba le mathata a tša ditšhelete. Le gona ke ile ka se sa hlankela ke le mogolo ka nakwana.” Ke’ng seo se thušitšego ngwanabo rena Robert go dula a na le khutšo ya monagano? O re: “Gateetee ge ke ikwa ke tshwenyega, ke a rapela. Ke a tseba gore ge ke rapela gantši e bile ke lopa Jehofa gantši ke ba le khutšo ya monagano.”

8. Go ya ka Johane 8:29, ke lebaka lefe le lengwe leo le ilego la dira gore Jesu a be le khutšo ya monagano?

⁸ Bala Johane 8:29. Jesu o ile a ba le khutšo ya monagano gaešita le ge a be a tlaišwa, ka gobane o be a tseba gore o thabiša Tatagwe. O ile a dula a botegela Jehofa le ge go be go le boima. O be a rata Jehofa kudu e bile selo seo se bego se etla pele bophelong bja gagwe e be e le go mo hlankela. Pele Jesu a etla mo lefaseng,  e be e le “mošomi yo a nago le bokgoni” wa Modimo. (Die. 8:30) Le gona ge a be a le mo lefaseng o be a rata go ruta ba bangwe ka Tatagwe. (Mat. 6:9; Joh. 5:17) Mošomo wo o be o thabiša Jesu kudu.—Joh. 4:34-36.

9. Go dula re swaregile tšhemong go ka re thuša bjang gore re dule re na le khutšo ya monagano?

⁹ Re ka ekiša Jesu ka go kwa Jehofa le ka go dula “[re] na le mo gontši mo [re] go dirago modirong wa Morena.” (1 Bakor. 15:58) Ge re ‘dula re swaregile’ modirong wa go bolela ditaba tše dibotse, re tlo dula re nagana ka dilo tše dibotse go e na le go nagana ka mathata a rena. (Dit. 18:5) Ka mohlala, batho bao re kopanago le bona tšhemong ba lebeletšane le mathata a go feta a rena. Lega go le bjalo, ge ba ithuta go rata Jehofa le go diriša keletšo ya gagwe, maphelo a bona a a fetoga gomme ba thaba kudu. Ka mehla ge re bona se se direga, re ba le tumelo ya gore Jehofa o tlo re hlokomela. Le gona tumelo yeo e re thuša gore re dule re na le khutšo ya monagano. Kgaetšedi yo mongwe yo a ilego a fetša nako e telele a ikwa a se na mohola e bile a na le kgateletšego ya monagano, o ile a bona gore ge re fetša nako e ntši re bolela ditaba tše dibotse re ba le khutšo ya monagano. O re: “Ge ke dula ke swaregile tšhemong, ke kgona go laola maikwelo a ka e bile ke thaba kudu. Ke nagana gore lebaka ke gore ge ke le tšhemong ke ba kgauswi kudu le Jehofa.”

10. O ithutile’ng go seo kgaetšedi Brenda a se boletšego?

¹⁰ Nagana le ka mohlala wa kgaetšedi yo a bitšwago Brenda. Yena le morwedi wa gagwe ba be ba na le bolwetši bjo šoro bjo bo bitšwago multiple sclerosis. Brenda o sepela ka setulo sa digole e bile ga a na matla. O ya tšhemong ka ntlo le ntlo letšatšing leo a kgonago, eupša gantši o nea bohlatse ka go ngwala mangwalo. O re: “Ge ke se no amogela gore bolwetši bja ka bo ka se tsoge bo fodišitšwe tshepedišong ye, ke ile ka kgona go swarega kudu ka go bolela ditaba tše dibotse. Ge e le gabotse, ge ke bolela ditaba tše dibotse ga ke nagane ka bolwetši bja ka. Se se nthuša gore ke nagane kudu ka go thuša bao ke ba botšago ditaba tše dibotse. Le gona ge ke bolela ditaba tše dibotse ke dula ke nagana ka kholofelo yeo ke nago le yona ya go tlo phela ka mo go sa felego.”

11-13. (a) Baapostola ba Jesu le batho ba bangwe ba ile ba bontšha bjang gore ke bagwera ba Jesu ba kgonthe? (b) Bagwera ba Jesu ba ile ba dira gore Jesu a ikwe bjang?

¹¹ Nakong ka moka ya bodiredi bja Jesu, baapostola ba gagwe ba ile ba dula e le bagwera ba gagwe ba kgonthe. E be e le bagwera bao ba hlaloswago ke Diema 18:24 yeo e rego: “Go na le mogwera yo a kgomarelago motho go phala ngwanabo.” Jesu o be a rata bagwera bao kudu. Nakong ya bodiredi bja gagwe, bana babo ga se ba ka ba dumela go yena. (Joh. 7:3-5) E bile metswalo ya gagwe e be e nagana gore o hlakane hlogo. (Mar. 3:21) Eupša bošegong bja pele Jesu a tlo bolawa, o ile a botša baapostola ba gagwe bao ba botegago gore: “Ke lena bao le swareletšego le nna melekong ya ka.”—Luka 22:28.

¹² Baapostola ba Jesu ka dinako tše dingwe ba be ba fela ba mo nyamiša, eupša Jesu o be sa šetše diphošo tša bona. O be a bona gore ba na le tumelo go yena. (Mat. 26:40; Mar. 10:13, 14; Joh. 6:66-69) Bošegong bja pele Jesu a ka bolawa, o ile a botša banna ba bao ba botegago gore: “Ke le biditše bagwera gobane dilo ka moka tšeo ke di kwelego go Tate ke le tsebišitše tšona.” (Joh. 15:15) Bagwera ba Jesu ba be ba mo kgothatša e le ruri. Tsela yeo ba ilego ba mo thekga ka yona e ile ya dira gore Jesu a thabe kudu.—Luka 10:17, 21.

 ¹³ Ntle le baapostola, Jesu o be a na le bagwera ba bangwe e lego banna le basadi bao ba bego ba mo thuša go bolela ditaba tše dibotse e bile ba mo thuša le ka ditsela tše dingwe. Ba bangwe ba be ba mo amogela ka magaeng a bona gore a tle a je le bona. (Luka 10:38-42; Joh. 12:1, 2) Ba bangwe ba be ba sepela maeto le yena gomme ba mo fa dilo tša bona. (Luka 8:3) Jesu o be a na le bagwera ba babotse ka gobane le yena e be e le mogwera yo mobotse go bona. O be a ba direla dilo tše dibotse e bile o be a sa letele gore ba dire dilo tšeo ba ka se di kgonego. Jesu o be a phethagetše eupša o be a tšeela godimo thekgo yeo bagwera ba gagwe bao ba bego ba se ba phethagala ba bego ba mo nea yona. Le gona re ka kgodišega gore bagwera bao ba ile ba mo thuša gore a dule a na le khutšo ya monagano.

14-15. Re ka dira’ng gore re be le bagwera ba babotse, gona ba ka re thuša bjang?

¹⁴ Bagwera ba kgonthe ba tlo re thuša gore re dule re botegela Jehofa. Le gona e le gore re be le bagwera ba babotse le rena re swanetše go ba bagwera ba babotse. (Mat. 7:12) Ka mohlala, Beibele e re kgothaletša gore re diriše nako le matla a rena go thuša ba bangwe, kudukudu bao ba “hlokago” thušo. (Baef. 4:28) Na go na le motho yo mongwe ka phuthegong ya geno yo o ka mo thušago? Na o ka yela motho yo a sa kgonego go tšwa ka gae ka baka la bolwetši goba botšofadi mabenkeleng? Na o ka fa lapa le itšego dijo ge e ba le se na tšhelete? Ge e ba o kgona go diriša wepesaete ya jw.org^® goba lenaneo la JW Library^®, na o ka thuša ba bangwe ka phuthegong ya geno go di diriša. Ge re dula re swaregile ka  go thuša ba bangwe, re tlo thaba kudu.—Dit. 20:35.

¹⁵ Bagwera ba rena ba tlo re thuša ge re na le mathata e bile ba tla re thuša gore re be le khutšo ya monagano. Go no swana le ge Elihu a ile a theetša ge Jobo a be a mmotša ka mathata a gagwe, bagwera ba rena ba tla re theetša ka go se fele pelo ge re ba botša kamoo re ikwago ka gona. (Jobo 32:4) Ga se ra swanela go letela gore bagwera ba rena ba re direle diphetho, eupša re tla holega kudu ge re theetša keletšo ya bona yeo e theilwego Beibeleng. (Die. 15:22) Go no swana le ge Dafida a ile a ikokobetša gomme a amogela thušo ya bagwera ba gagwe, le rena ga se ra swanela go lewa ke dihlong tša go amogela thušo ya bagwera ba rena. (2 Sam. 17:27-29) Ruri bagwera ba bjalo ba babotse ke dimpho tšeo di tšwago go Jehofa.—Jak. 1:17.

16. Go ya ka Bafilipi 4:6, 7, ke tsela efe e nnoši re ka bago le khutšo ya monagano? Hlalosa.

¹⁶ Bala Bafilipi 4:6, 7. Ke ka baka la’ng Jehofa a re re ka hwetša khutšo ya monagano yeo a e neago a diriša “Kriste Jesu”? Ka gobane re ba le khutšo ya monagano ge feela re kwešiša tema yeo Jesu a e kgathago mererong ya Jehofa. Ka mohlala, sehlabelo sa Jesu sa topollo se ka re thuša gore dibe tša rena ka moka di lebalelwe. (1 Joh. 2:12) Ruri ge re nagana ka se re a homotšega. Bjalo ka Kgoši ya legodimong, Jesu o tlo fediša mathata ka moka ao Sathane le batho ba gagwe ba re baketšego ona. (Jes. 65:17; 1 Joh. 3:8; Kut. 21:3, 4) Se se re nea kholofelo e kgahlišago ka bokamoso! Gaešita le ge Jesu a re neile mošomo wo o sego bonolo, o na le rena ka go re thekga modirong wo wa rena mehleng ye ya bofelo. (Mat. 28:19, 20) Ruri se se re thuša gore re be le sebete! E le gore re be le khutšo ya monagano, re swanetše go ba le kholofelo le sebete.

17. (a) Mokriste a ka dira’ng gore a dule a na le khutšo ya monagano? (b) Go etša ge Johane 16:33 e re holofetša, ke’ng seo re tlago go kgona go se dira?

¹⁷ O ka dira’ng gore o be le khutšo ya monagano le ge o lebeletšane le mathata a magolo? O ka dira dilo tšeo Jesu a ilego a di dira. Sa pele, rapela gomme o phegelele thapelong. Sa bobedi, ekwa Jehofa gomme o bolele ditaba tše dibotse ka mafolofolo gaešita le ge go le boima go dira bjalo. Sa boraro, dumelela bagwera ba gago gore ba go thuše ge o le mathateng. Ke moka khutšo ya Modimo e tlo diša monagano wa gago le pelo ya gago. Ka gona go etša Jesu, o tlo kgona go fenya teko le ge e le efe.—Bala Johane 16:33.