MEHLENG ya Paulo, gantši go be go se na dikepe tšeo di bego di dirišwa go rwala batho feela. E le gore motho a tšee leeto ka sekepe, o be a swanetše go botšiša ba bangwe ge e ba ba tseba sekepe seo se rwalago merwalo seo se yago moo a yago gona, le go botšiša ge e ba beng ba sekepe ba ka kgona go mo nametša. (Dit. 21:2, 3) Gaešita le ge motho yoo a be a ka namela sekepe seo se ka se fihlego moo a yago gona, ge sekepe seo se ema lefelong le itšego, motho yoo o be a ka fologa gomme a nyaka sekepe se sengwe seo se bego se ka mo fihliša kgauswi le moo a yago gona.—Dit. 27:1-6.

Mehleng ya kgale, dikepe di be di sepela ka dihla tše itšego mo ngwageng, le gona go be go se na nako ya maleba ya go re di sepela neng. Basesiši ba dikepe ba be ba ka diega go sesiša sekepe ka baka la maemo a leratadima ao a sa kgahlišego le ka baka la dilo tšeo ba bego ba di dumela. Ka mohlala, ba be ba ka diegiša sekepe ge ba be ba ka kwa legokobu le lla le le thapong yeo e thušago go sesiša sekepe, goba ge e ba ba be ba ka bona sekepe se sengwe seo se senyegilego. Basesiši ba dikepe ba be ba lebelela ge e ba diphefo di foka gabotse gomme ge e ba di foka gabotse ba be ba tloga. Ge motho a hweditše sekepe seo se bego se ka mo nametša, o be a eya boemakepeng le morwalo wa gagwe gomme a letele go kwa tsebišo ya gore sekepe seo se kgauswi le go tloga.

Radihistori yo a bitšwago Lionel Casson o re: “Motse wa Roma o be o na le tsela e bonolo ya go hweletša batho sekepe ge ba nyaka go ya lefelong le itšego e le gore ba se inyakele sekepe ka bobona. Boemakepe bja Roma bo be bo le kgauswi le Noka ya Tiber. Toropong ya Ostia yeo e bego e le kgauswi le boemakepe bjoo, go be go na le lefelo le legolo leo le bulegilego leo le bego le na diofisi ka mahlakoreng ka moka. Tše dintši tša diofisi tšeo, e be e le tša beng ba dikepe bao ba tšwago ditoropong tša go fapafapana tšeo di nago le maemakepe a magolo. Beng ba dikepe bao ba tšwago toropong ya Narbonne [yeo lehono e bitšwago France] ba be ba na le diofisi moo, beng ba dikepe ba go tšwa Carthage [yeo lehono e bitšwago Tunisia] le bona ba be ba na le diofisi moo, . . . le bao ba tšwago ditoropong tše dingwe ba be ba na le diofisi tša bona. Motho yo a bego a nyaka go ya lefelong le itšego o be a swanetše go ya diofising tšeo e le gore a hwetše sekepe seo se ka fetago kgauswi le moo a yago gona.”

Go tšea leeto ka sekepe go be go boloka nako eupša gape go be go le kotsi. Paulo o ile a senyagalelwa ke sekepe ka makga a mmalwa ge a be a le maetong a gagwe a boromiwa.—2 Bakor. 11:25.