Winston, re botše gore go tlile bjang gore o ithute ka Modimo.

Ka gae re be re sa tsene kereke. Re be re dula polaseng e nngwe kua Queensland, Australia. Ka ge re be re dula kgole le metse e mengwe, ke be ke sa phele le batho ba bantši, ntle le bao ke bego ke dula le bona ka gae. Go tloga ge ke be ke na le mengwaga e 12, ke ile ka thoma go nyaka go ithuta ka Modimo. Ke ile ka mo rapela, ka mo kgopela gore a nthuše go mo tseba. Ke ile ka feleletša ke tlogile polaseng ya gešo gomme ka hwetša mošomo toropong ya Adelaide, kua Australia Borwa. Ge ke be ke na le mengwaga e 21, ke ile ka kopana le Pam ge ke be ke le maikhutšong toropong ya Sydney. Pam o ile a mpotša ka sehlopha sa bodumedi bja British-Israel, seo se bego se dumela gore batho ba Brithania ke ditlogolo tša meloko yeo go thwego e timetše ya Isiraele. Sehlopha seo se re meloko yeo ke meloko e lesome ya mmušo wa ka leboa yeo e ilego ya išwa bothopša ka 740 B.C.E. Ka gona, ge ke boetše morago kua Adelaide, ke ile ka boledišana le monna yo mongwe yo ke bego ke šoma le yena ka taba ya meloko yeo. Monna yoo o be a ithuta Beibele le Dihlatse tša Jehofa. Ka morago ga gore ke bolele le yena diiri tše mmalwa ka dilo tšeo Dihlatse tša Jehofa di di dumelago, ke ile ka lemoga gore Modimo o be a araba thapelo ya ka ya go kgopela go mo tseba yeo ke ilego ka e rapela go tloga ke sa le yo monyenyane. Ke be ke ithuta therešo ka Mmopi wa ka le ka Mmušo wa gagwe! Ka nnete ke be ke hweditše ‘perela ya theko e kgolo.’—Mat. 13:45, 46.

Pam, le wena o ile wa thoma go tsoma perela yeo o sa le yo monyenyane kudu. O ile wa e hwetša bjang?

Ke goletše toropong ya Coffs Harbour, New South Wales. Ka gae re be re tsena kereke. Batswadi ba ka le batswadi ba mma ba be ba dumela dithutong tša sehlopha seo sa British-Israel. Nna, moratho wa ka wa mošemane le sesi gotee le bomotswala, re godišitšwe re tseba gore Modimo o rata kudu batho bao e lego ditlogolo tša Mabrithania. Eupša ke be ke sa tshepe taba yeo, le gona seo se be se ntira gore ke  se be le tswalano le Modimo. Ge ke be ke na le mengwaga e 14, ke ile ka ya dikerekeng tša go fapafapana, tše dingwe tša tšona ke kereke ya Anglican, Baptist le ya Seventh-day Adventist. Eupša ka moka ga tšona ga sa nka tša nthuša go tseba Modimo.

Ka morago, lapa la gešo le ile la hudugela toropong ya Sydney, moo ke ilego ka kopana le Winston ge a be a tlile maikhutšong. Ka ge Winston a šetše a boletše, ditaba tša bodumedi tšeo re bego re boledišana ka tšona di ile tša feleletša ka gore a ithute Beibele le Dihlatse tša Jehofa. Ka morago ga moo, mangwalo ao a bego a nngwalela ona ge re be re sa ratana, a be a tletše ka ditemana tša Beibele! Go bolela nnete, mathomong seo se be se ntshwenya e bile se nkwatiša. Eupša ganyenyane-ganyenyane ke ile ka lemoga gore seo a bego a se bolela ka Modimo e be e le nnete.

Ka 1962, ke ile ka hudugela toropong ya Adelaide gore ke be kgauswi le Winston. O be a nnyaketše madulo lapeng la banyalani ba bangwe ba Dihlatse tša Jehofa, e lego Thomas le Janice Sloman, bao e kilego ya ba baromiwa kua Papua New Guinea. Ka nako yeo ke be ke na le mengwaga e 18 feela gomme ba ile ba ntshwara ka botho kudu le go nthuša go ithuta ka Modimo. Ka gona ke ile ka thoma go ithuta Beibele, gomme go se go ye kae, ka kgodišega gore ke hweditše therešo. Ka morago ga gore nna le Winston re nyalane, re ile ra thoma go phela bophelo bjo bo thabišago re hlankela Jehofa. Le ge ka dinako tše dingwe re be re welwa ke mathata, tsela yeo re bego re phela ka yona e re thušitše gore re leboge kudu perela yeo re e hweditšego.

Winston, re botše tša mengwageng ya ge o be o thoma go hlankela Jehofa.

Nakwana ka morago ga gore nna le Pam re nyalane, Jehofa o ile a thoma go re bulela o mongwe wa ‘mejako e megolo’ e išago modirong. (1 Bakor. 16:9) Mojako wa mathomo re o bontšhitšwe ke Ngwanabo rena Jack Porter, yoo e bego e le molebeledi wa rena wa tikologo. (Ga bjale nna le yena re hlankela gotee Komiting ya Lekala la Australasia.) Jack le mosadi wa gagwe, Roslyn, ba ile ba re kgothaletša go bula madibogo, e lego tokelo yeo re ilego ra e thabela ka mengwaga e mehlano. Ge ke be ke na le mengwaga e 29, nna le Pam re ile ra abelwa go dira modiro wa tikologo Dihlakahlakeng tša South Pacific tšeo ka morago di ilego tša okamelwa ke ofisi ya lekala la Fiji. Dihlakahlaka tšeo e be e le American Samoa, Samoa, Kiribati, Nauru, Niue, Tokelau, Tonga, Tuvalu le Vanuatu.

Mehleng yeo, batho ba dihlakahlakeng tšeo ba be ba sa tshepe Dihlatse tša Jehofa, ka gona, re ile ra swanelwa ke go dira dilo ka šedi le ka temogo. (Mat. 10:16) Diphuthego e be e le tše dinyenyane, gomme bana babo rena ba diphuthegong tše dingwe ba be ba sa kgone go re nea marobalo. Ka gona re be re kgopela marobalo go batho ba bangwe ba moo motseng, gomme ba be ba dula ba re swara gabotse.

Winston, o rata mošomo wa bofetoledi. Ke’ng seo se dirilego gore o o rate?

Ge re be re thoma go hlankela sehlakahlakeng sa Tonga, bana babo rena ba be ba na le dipampišana le dipukwana tše sego kae tša Setonga, e lego leleme leo le bolelwago tikologong ya Polenesia. Tšhemong ba be ba badiša batho kgatišo ya Seisemane ya puku yeo e rego Therešo ye Išago Bophelong bjo bo sa Felego. Ka gona, nakong ya sekolo sa bagolo sa dibeke tše nne, bagolo ba bangwe ba bararo ba lefelong leo ba ile ba dumelelana gore ba tla fetolela puku yeo ya Therešo ka Setonga, gaešita le ge ba be ba sa tsebe Seisemane gabotse. Pam o ile a thaepa puku yeo, gomme ra e romela ofising ya lekala la United States gore e ye e phrinthiwe. Mošomo woo ka moka o tšere dibeke tše e ka bago tše seswai. Le ge bofetoledi bja puku yeo e be e se bja maemo a godimo kudu, e ile ya thuša batho ba bantši ba go bolela Setonga gore ba ithute therešo. Nna le Pam ga re bafetoledi, eupša seo bana babo rena ba se dirilego se ile sa dira gore re thome go rata mošomo wo.

Pam, bophelo bja dihlakahlakeng tšeo bo be bo le bjang ge o bo bapiša le bja Australia?

Bo be bo fapane kudu! Go ithekgile ka gore re kae, ka dinako tše dingwe re be re tshwenywa ke menang, phišo e sa kgotlelelegego le moya wa go ba le monolanyana, magotlo, go babja, e bile ka dinako tše dingwe re be re se na dijo tše di lekanego. Ka lehlakoreng le lengwe, ge letšatši le sobela, re be re thabela go bogela lewatle re le ntlong ya rena ya go rulelwa ka bjang yeo e bego e se na maboto yeo ka Sesamoa e bitšwago fale. Mašegong a mangwe, ngwedi o be o taga kudu moo re bego re kgona go bona mehlare ya dikhokhonate, le gona ngwedi o be  o bonala gabotse ka lewatleng. Dinako tšeo tše di kgahlišago di be di re thuša go rapela le go naganišiša ka dilo tše dibotse go e na le go nagana ka mathata a rena.

Re ile ra rata bana ba moo ka ge ba be ba kgahliša gomme ba rata go re lebelela kudu ka ge re be re le makgowa e bile ba be ba se ba tlwaela go bona makgowa ga gabo bona. Ka letšatši le lengwe ge re be re etetše sehlakahlakeng sa Niue, mošemane yo mongwe o ile a swaraswara letsogo la Winston leo le bego le tletše boya gomme a re: “Ke rata mafofa a gago.” Go be go le molaleng gore e be e le la mathomo a bona matsogo ao a nago le boya bjo bontši ka tsela yeo, ka baka leo o be a sa tsebe gore a bo bitše eng!

Re be re ekwa bohloko kudu ge re be re bona kamoo batho ba bantši ba bego ba diila ka gona. Sehlakahlaka sa bona e be e le se sebotse eupša go se na dingaka, dipetlele le dihlare e bile go se na meetse a go nwa. Eupša bana babo rena ba be ba bonagala ba sa tshwenywe ke dilo tšeo. Bona ba be ba tlwaetše go phela ka tsela yeo. Ba be ba kgotsofatšwa ke go ba le malapa a gabo bona, go ba le lefelo la borapedi gotee le go kgona go hlankela Jehofa. Mohlala wa bona o ile wa re ruta go etiša pele dilo tše bohlokwa le go phela bophelo bja go se be le dilo tše dintši.

Pam, ka dinako tše dingwe o be o swanelwa ke go yo ga meetse le go šomiša mokgwa o mofsa go apea dijo. O be o kgona bjang?

Ke leboga tate ka gore o ile a nthuta dilo tše dintši. O ile a nthuta go gotša mollo wa fase le go apea ka ona, a nthuta le go phela ka dilo tše sego kae. Ka letšatši le lengwe ge re be re etetše Sehlakahlakeng sa Kiribati, re ile ra dula ka ntlong e nyenyane yeo e bego e ruletšwe ka bjang, e na le lebato la mobu le maboto ao a dirilwego ka mahlaka. Ke ile ka epa molete lebatong gore ke kgone go apea, ke moka ka gotša mollo ka dikgapetla tša dikhokhonate. Gore ke hwetše meetse, ke be ke eya petseng moo re bego re a ga ka go šiedišana le basadi ba moo sehlakahlakeng. Ba be ba šomiša phata e telele yeo mafelelong a yona ba bego ba tlemeletše thapo yeo e swanago le ya go rea dihlapi. Go e na le gore mafelelong a thapo yeo ba bofe lehuto, ba be ba tlemelela paketana. Ba be ba šiedišana ka go lahlela paketana yeo ka petseng gomme ka nako ya maleba ba e kgonamiša gore e kgone go ga meetse. Paketana yeo e be e kgona go ga meetse ya tlala. Ke be ke nagana gore go ga meetse ka tsela yeo go bonolo go fihlela ge nako ya ka ya go ga meetse e fihla. Ke ile ka lahlela paketana yeo ka makga a mmalwa ka petseng, eupša e be e no betha meetse ao gomme e phaphamala! Basadi bao ba ile ba ntshega, ke moka ge ba feditše go ntshega, yo mongwe wa bona o ile a nthuša. Batho ba moo ba be ba rata go thuša batho e bile ba le botho.

Ka moka ga lena le be le rata kabelo ya lena ya kua dihlakahlakeng. Na le ka re botša ka dilo tšeo le di ratilego kudu?

Winston: Go ile gwa re tšea nako e teletšana pele re ka tlwaela ditšo tše dingwe. Ka mohlala, ge bana babo rena ba be ba re fa dijo, gantši ba be ba re fa dijo ka moka tšeo ba bego ba na le tšona. Mathomong re be re sa tsebe gore re be re swanetše go ba šiela dijo tšeo. Ka gona re be re eja dijo ka moka tšeo ba bego ba re soletše tšona! Eupša ge re se na go tseba gore re swanetše go dira eng, re ile ra thoma go ba šiela tšona. Le ge re ile ra tšama re šaetša, bana babo rena ba be ba kwešiša. Le gona ba be ba thaba kudu ge ba re bona gape ka morago ga dikgwedi tše e ka bago tše tshela ge re etetše diphuthego tša bona. Ka nako yeo, ka ntle le rena, bana babo rena ba dihlakahlakeng ba be ba no tsebana feela le Dihlatse tša phuthegong ya gabo bona.

Ge re be re ba etela, seo se be se nea bohlatse le mo setšhabeng. Batho ba bantši ba sehlakahlakeng seo ba be ba nagana gore bana babo rena ba no ithomela bodumedi bja bona. Ka gona ge motho yo mongwe yo a tšwago mošewamawatle a be a tlile go etela bana babo rena, batho ba moo ba ile ba lemoga gore bjo e be e le bodumedi bja kgonthe bjoo ditho tša bjona di ratanago, gomme seo se ile sa ba kgahla kudu.

Pam: Se sengwe sa dilo tšeo nka se tsogego ke di lebetše se diragetše kua Kiribati, moo go bego go na le phuthego e nyenyane ya bana babo rena le dikgaetšedi. Ngwanabo rena Itinikai Matera, yo e bego e le mogolo a nnoši wa moo, o ile a dira sohle seo a ka se kgonago go re hlokomela. Ka letšatši le lengwe o ile a tla a swere manki wo o nago le lee letee ke moka a re: “Ke la lena.” Ka nako yeo re be re sa nke re eja mae gantši. Ka baka leo, seo a se dirilego se ile sa re kgoma kudu.

 Pam, ka morago ga mengwaga e itšego o ile wa hlokofalelwa ke lesea leo le sego la tšwa le belegwa. O thušitšwe ke eng go kgotlelela teko yeo?

Ka 1973 ge nna le Winston re be re le Dihlakahlakeng tša South Pacific, ke ile ka ima. Re ile ra dira phetho ya go boela Australia, gomme ka morago ga dikgwedi tše nne ngwana wa rena a hlokofala. Winston le yena o ile a kwa bohloko kudu, ka gobane le yena e be e le ngwana wa gagwe. Ge nako e dutše e eya, bohloko bjo ke bego ke bo kwa bo ile bja okobala, eupša ga se ka ka ka ikwa ke homotšegile ka mo go feletšego go fihlela ge re hwetša Morokami wa April 15, 2009. Sehlogo sa “Dipotšišo tše Tšwago go Babadi” ka go Morokami woo se be se na le potšišo yeo e rego: “Na go na le kholofelo le ge e le efe ya gore lesea leo le hwelago ka popelong ya mmago lona le tla tsošwa?” Sehlogo seo se ile sa re kgonthišetša gore phetho ke ya Jehofa gomme re a tseba gore ka mehla o dira se se lokilego. O tla re fodiša dintho ka moka tšeo re di baketšwego ke lefase le le lebe la Sathane, gomme ka lerato a hlahla Morwa wa gagwe gore a ‘fediše mediro ya Sathane.’ (1 Joh. 3:8) Le gona sehlogo seo se re thušitše go kwešiša le go feta gore ka ge re le batho ba Modimo, re hweditše “perela” ya bohlokwa kudu! Ruri go tseba ka kholofelo ya bokamoso go re thušitše kudu!

Ka morago ga gore ngwana wa rena a hlokofale, re ile ra boela tirelong ya nako e tletšego. Re ile ra hlankela dikgwedi tše mmalwa kua Bethele ya Australia ke moka mafelelong ra boela modirong wa tikologo. Ka 1981, ka morago ga go fetša mengwaga e mene re hlankela magaeng a kua New South Wales le Sydney, re ile ra bitšwa lekaleng la Australia, ka ge ka nako yeo le be le bitšwa bjalo, gomme ga e sa le re le moo go tloga ka yona nako yeo.

Winston, na phihlelo yeo o bilego le yona ge o be o le Dihlakahlakeng tša South Pacific e go thušitše kabelong ya gago ya go ba setho sa Komiti ya Lekala la Australasia?

Ee, e nthušitše ka ditsela tše dintši. Sa pele, lekala la Australia le ile la kgopelwa go hlokomela modiro wa sehlakahlakeng sa American Samoa le sa Samoa. Ke moka lekala la New Zealand le ile la kopanywa le la Australia. Gona bjale lekala la Australasia le hlokometše modiro wo o dirwago Australia, American Samoa le Samoa, Cook Islands, New Zealand, Niue, Timor-Leste, Tokelau le Tonga, e lego mafelo ao a mantši a ona ke ilego ka a etela ke le moemedi wa lekala. Phihlelo yeo ke bilego le yona ya go šoma le bana babo rena bao ba botegago le dikgaetšedi ba dihlakahlakeng tšeo, e nthušitše kudu ka ge gona bjale ke šoma le bona ke le mo ofising ya lekala.

Nka phetha ka gore, ke kgale nna le Pam re lemogile gore ga se batho ba bagolo feela bao ba nyakago go ithuta ka Modimo le go mo tseba. Re ithutile se go tšwa phihlelong ya rena. Bafsa le bona ba nyakana le ‘perela yeo ya theko e kgolo’ gaešita le ge go se na yo mongwe ka gae yo a nyakago go ithuta ka Modimo. (2 Dikg. 5:2, 3; 2 Dikor. 34:1-3) Ge e le gabotse, Jehofa ke Modimo yo a re ratago yo a nyakago gore batho ka moka, ba banyenyane le ba bagolo, ba hwetše bophelo bjo bo sa felego!

Ge nna le Pam re be re thoma go nyaka go ithuta ka Modimo mengwageng ya ka godimo ga e 50 e fetilego, re be re sa tsebe gore leeto leo la rena le tla re fihliša kae. Ga go na pelaelo gore therešo ya mabapi le Mmušo wa Modimo ke ya theko e kgolo kudu! Re ikemišeditše go dira sohle seo re ka se kgonago gore re se timetše perela ye ya bohlokwa!