1. Ka moka ga rena re swanetše go dira’ng?

NA O ka rata go kitima lebelong leo o tsebago gore le thata, kudukudu ge e ba o babja goba o lapile? Aowa. Eupša moapostola Paulo o itše Bakriste ka moka ba a kitima. (Baheb. 12:1) Le gona, ka moka ga rena, ba bagolo le ba banyenyane, bao ba nago le matla goba bao ba lapilego, re swanetše go kgotlelela go fihla mafelelong ge e ba re nyaka gore Jehofa a tle a re fe moputso.—Mat. 24:13.

2. Ke ka baka la’ng Paulo a ile a kgona go nea keletšo yeo e lego go Timotheo wa bobedi 4:7, 8?

² Paulo o ile a kgona go bolela ka go kitima lebelo la Bokriste, ka gobane yena o be a feditše go kitima lebelo leo. (Bala 2 Timotheo 4:7, 8.) Eupša ge e le gabotse, lebelo le leo Paulo a boletšego ka lona ke lefe?

3. Lebelo leo Paulo a boletšego ka lona ke lefe?

³ Paulo o be a fela a diriša dipapadi tšeo di bego di bapalwa Gerika ya bogologolo e le ge a nyaka go ruta batheetši ba gagwe dintlha tše itšego tše bohlokwa. (1 Bakor. 9:25-27; 2 Tim. 2:5) Ka makga a mantši o ile a swantšha go kitima lebelo la Bokriste le go kitima lebelo la mmarathone. (1 Bakor. 9:24; Bagal. 2:2; Bafil. 2:16) Motho o thoma go kitima lebelong le ka morago ga gore a ineele go Jehofa le go kolobetšwa. (1 Pet. 3:21) O fihla mafelelong a lebelo le ge Jehofa a mo fa moputso wa bophelo bjo bo sa felego.—Mat. 25:31-34, 46; 2 Tim. 4:8.

4. Sehlogong se re tlo bolela ka’ng?

⁴ Go kitima lebelo la mmarathone go swana bjang le go phela bophelo bja Bokriste? Go swana ka dilo tše dintši. A re boleleng  ka tše tharo tša tšona. Sa pele, re swanetše go kitima tseleng ya maleba, sa bobedi, re swanetše go dula re naganne ka moputso, le gona sa boraro re swanetše go kgotlelela ge re kopana le mathata.

5. Re swanetše go kitima tseleng efe, gona ka baka la’ng?

⁵ E le gore batho bao ba kitimago lebelo le itšego ba tla ba hwetše moputso, ba swanetše go kitima tseleng yeo barulaganyi ba lebelo leo ba e kgethilego. E le gore re tle re hwetše moputso wa bophelo bjo bo sa felego, re swanetše go kitima lebelong la Bokriste. (Dit. 20:24; 1 Pet. 2:21) Eupša Sathane le bao ba mo thekgago, ga ba nyake re kitima tseleng ye ya Bokriste. Ba nyaka re ‘tšwela pele re kitima le bona.’ (1 Pet. 4:4) Ba a re kwera ka ge re le Bakriste, e bile ba re tsela yeo bona ba phelago ka yona e kaone ka gore o kgona go itirela boithatelo. Eupša ba bolela maaka.—2 Pet. 2:19.

6. O ithuta’ng mohlaleng wa Brian?

⁶ Batho bao ba phelago go swana le batho ba lefase, go se go ye kae ba lemoga gore tsela yeo ba e kgethilego ga e ba fe tokologo yeo ba e nyakago, go e na le moo e ba dira makgoba. (Baroma 6:16) Nagana ka mohlala wa Brian. Batswadi ba gagwe ba ile ba mo ruta go phela ka tsela ya Bokriste. Eupša ge e be e le mofsa, o ile a thoma go belaela tsela yeo batswadi ba gagwe ba bego ba mo rutile yona. Brian o ile a kgetha go phela go swana le batho ba lefase. O re: “Ke ile ka lemoga e šetše e le kgale gore tsela yeo ke bego ke ipotša gore e tlo mpha tokologo, ge e le gabotse e be e ntira lekgoba la dilo tše mpe. E se kgale ke ge ke šetše ke diriša dihlaretagi ga mpe, ke itshwere gampe ka tša thobalano e bile ke le setagwa. Mengwageng e sego kae ya go latela, ke ila ka thoma go diriša dihlaretagi tše kotsi kudu gomme ka ba lekgoba la tšona. . . . Ke ile ka thoma go rekiša dihlaretagi gore ke kgone go hwetša tšhelete.” Mafelelong Brian o ile thoma go phela ka melao ya Jehofa. Brian o ile a fetoša tsela yeo a bego a phela ka yona gomme a kolobetšwa ka 2001. Ga bjale o phela a thabile ka gobane o phela ka tsela ya Bokriste. *

7. Mateo 7:13, 14 e bolela ka ditsela dife tše pedi?

⁷ Ruri go bohlokwa gore re kgethe tsela ya maleba! Sathane o nyaka gore re tlogele go kitima tseleng e pitlaganego yeo e ‘išago bophelong,’ eupša re kitime tseleng e phatlaletšego yeo batho ba bantši ba kitimago go yona. Batho ba rata tsela yeo, e bile go bonolo go kitima go yona. Eupša tsela yeo e ‘iša tshenyegong.’ (Bala Mateo 7:13, 14.) E le gore re dule re le tseleng ya maleba le gore re se aroge, re swanetše go tshepa Jehofa le go mo kwa.

8. Ge motho yo a kitimago a ka kgopša, o swanetše go dira’ng?

⁸ Batho bao ba kitimago mmarathone ba dula ba lebeletše mo ba yago e le gore ba se ke ba kgopša. Eupša ba ka thulana ka phošo le batho bao ba kitimago le bona goba ba wela ka meleteng yeo e lego moo tseleng. Ge e ba ba ka wa ba a tsoga gomme ba tšwela pele ka go kitima. Ga ba dulele go nagana ka seo se ba wišitšego eupša ba dula ba nagana ka go fihla mafelelong a lebelo leo le ka moputso wo ba tlago go o hwetša.

9. Ge e ba re ka kgopša lebelong la Bokriste, re swanetše go dira’ng?

⁹ Lebelong leo re le kitimago, re ka fela re kgopša gantši, ra dira diphošo ka seo re se bolelago goba ka seo re se dirago. Goba batho bao re kitimago le bona ba ka fela ba dira diphošo tšeo di ka re kwešago bohloko. Ge seo se direga ga se ra swanela go makala. Ka moka ga rena re belegwe re na le sebe e bile re kitima tseleng e pitlaganego yeo e išago bophelong bjo bo sa felego. Ka gona re tlo no fela re thulana. Paulo o ile a re ka dinako tše dingwe re tlo fela re e fa ba bangwe ‘mabaka a go ba le pelaelo.’ (Bakol. 3:13) Eupša go e na le gore re dule re naganne ka seo se dirilego gore re kgopše, re swanetše go dula re naganne ka moputso. Ge e ba re ka kgopša gomme ra wa, a re tsogeng gomme re tšwele pele ka lebelo. Ge e ba re ka ngala ge re wele e bile ra gana go tsoga, gona re ka se fetše lebelo leo le go hwetša moputso. Le gona ge re ka gana go tsoga re ka ba ra wiša le ba bangwe bao ba lekago go kitima tseleng ye yeo e pitlaganego.

10. Re ka dira’ng gore re se ke ra šitiša ba bangwe lebelong le?

¹⁰ Selo se sengwe seo se ka re thušago gore re se ke ra šitiša ba bangwe lebelong le, ke gore re ba dumelele gore ba dire dilo ka tsela ya bona go e na le go dula re nyaka gore dilo di dirwe ka tsela ya rena. (Baroma 14:13, 19-21; 1 Bakor. 8:9, 13) Ge re ka dira seo, re tla be re bontšha gore ga re swane le batho bao ba kitimago lebelong le itšego. Batho bao ba kitimago lebelong le itšego, ba phadišana le batho bao ba kitimago le bona. E bile motho yo mongwe le yo mongwe yo a kitimago, o lwela gore e be yena a fihlago pele. Batho bao ba kitimago lebelong  leo ba nagana ka bona feela, e bile ba ka leka go kgorometša bao ba kitimago le bona gore bona ba fetele pele. Eupša rena ga re phadišane le bao re kitimago le bona. (Bagal. 5:26; 6:4) Morero wa rena ke go thuša bao re kitimago le bona gore re fihle le bona mafelelong a lebelo. Ka gona re leka go diriša keletšo ya Paulo ya gore ‘re se kgahlegele ditaba tša rena feela, eupša re kgahlegele le tša ba bangwe.’—Bafil. 2:4.

11. Batho bao ba kitimago lebelong ba dula ba naganne ka’ng, gona ka baka la’ng?

¹¹ Le ge batho bao ba kitimago ba dula ba lebeletše tsela, eupša ba dula ba naganne le ka go fihla mafelelong a lebelo. Le ge ba ka ba ba sa bone mo lebelo la bona le felelago gona, eupša ba ipona ba feditše lebelo leo gomme ba amogela moputso. Go dula ba naganne ka moputso go dira gore ba kitime go fihla mafelelong.

12. Jehofa o re tshepišitše’ng?

¹² Lebelong leo re le kitimago, Jehofa o re tshepišitše moputso o mogolo e lego wa go tlo phela ka mo go sa felego legodimong goba mo lefaseng. Beibele e re hlalosetša ka moputso wo, e le gore re kgone go bona ka leihlo la kgopolo gore bophelo bo tlo ba bose bjang. Ge re ka dula re naganne ka dilo tšeo Jehofa a re tshepišitšego gore o tlo re direla tšona, re tlo dula re kitima lebelong le.

13. Ke dilo dife tšeo re nago le tšona, tšeo batho bao ba kitimago lebelong le itšego ba se nago tšona?

¹³ Batho bao ba bego ba kitima mabelong a kua Gerika, ba be ba swanetše go kgotlelela go lapa le go kwa bohloko. Eupša ba be ba swanetše go itlwaetša e bile ba be ba tshepile matla a bona feela. Go swana le batho bao ba kitimago lebelong le itšego, le rena re hwetša tlwaetšo ya gore re kitime bjang lebelong la Bokriste. Eupša rena re phala bao ba kitimago lebelong le itšego. Bjang? Jehofa a ka re fa matla e bile o dula a re thuša. Ge re ka ithekga ka Jehofa, o re tshepiša gore o tla re tlwaetša a ba a re matlafatša!—1 Pet. 5:10.

14. Bakorinthe ba bobedi 12:9, 10 e re thuša bjang ge re na le mathata?

¹⁴ Paulo o ile a ba le mathata a mantši. Batho ba bangwe ba be ba mo tlaiša le go mo roga. Eupša ga se gwa felela moo, o be a fela a lapa e bile a na le bothata bjoo a bego a bo bitša “mootlwa nameng.” (2 Bakor. 12:7) Ga se a ka a lebelela mathata ao e le lebaka la gore a tlogele go hlankela Jehofa, eupša o ile a a lebelela e le lebaka la gore a kgopele thušo go Jehofa. (Bala 2 Bakorinthe 12:9, 10.) Ka ge Paulo a be a nagana ka tsela ye, Jehofa o ile a mo thekga mathateng ka moka a gagwe.

15. Ge e ba re ekiša Paulo, ke’ng seo re tlago go se bona?

¹⁵ Le rena, batho ba ka re roga goba ba re tlaiša ka baka la tumelo ya rena. Le gona re ka ba re babja goba re lapile kudu. Eupša ge re ka ekiša Paulo, re tlo bona kamoo Jehofa a re thušago ka gona go sa šetšwe gore re welwa ke bothata bofe.

16. Ke’ng seo o ka se dirago gaešita le ge o babja?

¹⁶ Na o palelwa ke go tsoga mpeteng ka baka la bolwetši, goba o sepela ka wheelchair? Na o tshwenywa ke matolo goba o na le bothata bja mahlo? Ge e ba go le bjalo, na o ka kitima lebelo la Bokriste le bao e sa le go ba bafsa e bile ba phetše gabotse mmeleng? Ee, o ka kgona! Batšofadi ba bantši le batho bao ba ba babjago ba kitima tseleng yeo e išago bophelong bjo bo sa felego. Ba ka se kgone go kitima lebelong leo ka bobona. Eupša Jehofa o ba fa matla ka go theetša diboka tšeo bana babo bona ba ba rekhotetšego tšona, goba tšeo ba ba taoneloutetšego tšona go JW streaming. Ba bolela ditaba tše dibotse ka go botša dingaka, baoki le ba meloko ya bona.

17. Jehofa o lebelela bjang botšofadi le batho bao ba babjago?

 ¹⁷ Ge e ba o tšofetše goba o babja o se ke wa dumelela seo se go dira gore o nagane gore o ka se kgone go tšwela pele o kitima lebelong la Bokriste. Jehofa o a go rata ka gobane o bontšha tumelo go yena e bile o kgotleletše mathata ka mengwaga e mentši. Ga bjale o hloka thušo ya gagwe go feta le ge e le neng pele, e bile a ka se go tlogele. (Ps. 9:10) Eupša o tlo go batamela le go feta. Nagana ka kgaetšedi yo mongwe yo a babjago. O re: “Ka ge malwetši a ka a oketšega, ke bona eka ga ke sa hwetša dibaka tše dintši tša go botša batho ditaba tše dibotse. Eupša ke a tseba gore maitekonyana ao ke a dirago a thabiša Jehofa e bile seo se dira gore le nna ke thabe.” Ge o ikwa o nyamile, dula o gopola gore Jehofa o na le wena. Nagana ka mohlala wa Paulo, o be o nagane le ka mantšu a gagwe a kgothatšago ao a a boletšego ge a be a re: “Ke thabišwa ke mafokodi, . . . gobane ge ke fokola, ke gona ke lego matla.”—2 Bakor. 12:10.

18. Ke bothata bofe bjo bogolo bjoo batho ba bangwe ba nago le bjona?

¹⁸ Batho ba bangwe bao ba kitimago lebelong la Bokriste ba na le bothata bjo bongwe bjo bogolo. Ba na le malwetši a mangwe ao batho ba bangwe ba ka se kgonego go a bona le go a kwešiša. Ka mohlala, ba bangwe ba gateletšegile monaganong mola ba bangwe ba na le bolwetši bja go tshwenyega le go belaela. Ke ka baka la’ng re ka re bahlanka ba ba Jehofa ba lebane le bothata bjo bogolo? Ke ka gobane, ge motho a robegile letsogo goba a sepela ka wheelchair, batho ba bangwe ba kgona go mmona gomme ba mo thuša. Eupša bao ba gateletšegilego, go ka no se be bonolo go bona gore ba na le bothata. Bothata bja bona bo swana le bja motho yo a robegilego letsogo, eupša batho ba bangwe ba ka no se ba kwele bohloko go swana le ge ba kwela bohloko yola a robegilego letsogo.

19. Re ithuta’ng go Mefiboshethe?

¹⁹ Ge e ba o babja goba o nagana gore batho ba bangwe ga ba go kwešiše, mohlala wa Mefiboshethe o ka go thuša. (2 Sam. 4:4) O be a golofetše e bile nakong e itšego, Kgoši Dafida o ile a se mo sware gabotse. Mefiboshethe ga se yena a ilego a ipakela mathata a. Ga se a ka a galefa eupša o ile a dula a leboga dilo tše dibotse tšeo a bego a di hwetša. O ile a leboga tsela e botse yeo Dafida a ilego a mo swara ka yona. (2 Sam. 9:6-10) Eupša Mefiboshethe o ile a dira’ng ge Dafida a be a sa mo sware gabotse? Ga se a ka a dumelela tsela yeo Dafida a bego a mo swere ka yona e mo nyamiša. Le gona ga se a ka a sola Jehofa ka baka la seo Dafida a bego a mo dirile sona. Mefiboshethe o ile a dira sohle seo a ka se kgonago go thekga Kgoši Dafida yo Jehofa a bego a mo kgethile. (2 Sam. 16:1-4; 19:24-30) Jehofa o le a kgonthišetša gore mohlala wo wa Mefiboshethe o  a ngwalwa ka mo Beibeleng e le gore rena re tle re ithute go yena.—Baroma 15:4.

20. Go tshwenyega le go belaela go ka dira gore ba bangwe ba ikwe bjang, eupša ba ka kgodišega ka eng?

²⁰ Ka ge bana babo rena ba bangwe le dikgaetšedi ba na le bolwetši bja go tshwenyega le go belaela, ga ba lokologe go ba le batho. Ba ka thatafalelwa ke go ba ka gare ga batho ba bantši, eupša ba leka ka thata gore ba be gona dibokeng, dikopanong tša tikologo le tša selete. E bile ba ka thatafalelwa ke go bolela le batho bao ba sa ba tsebego eupša ba a ya tšhemong. Ge e ba le wena o ikwa bjalo, kgodišega gore ga o noši. Batho ba bantši ba ikwa go swana le wena. Gopola gore Jehofa o leboga maiteko ka moka ao o a dirago go mo hlankela. Taba ya gore o kgona go kgotlelela e bontšha gore Jehofa o a go šegofatša e bile o go nea matla ao o a hlokago. * (Bafil. 4:6, 7; 1 Pet. 5:7) Ge e ba o tšwela pele o hlankela Jehofa le ge o babja goba o gateletšegile, o ka kgodišega gore o a mo thabiša.

21. Ge e ba Jehofa a re thuša ka moka ga rena re ka kgona go dira’ng?

²¹ Re leboga gore lebelo la rena, leo Paulo a boletšego ka lona, ga le swane le la batho ba go kitima mmarathone. Dipapading tša mabelo tša mehleng ya kgale, moputso o be o hwetšwa ke motho o tee feela. Eupša lebelong la rena la Bokriste, motho yo mongwe le yo mongwe yo a kgotlelelago go fihla mafelelong, o tlo hwetša moputso wa bophelo bjo bo sa felego. (Joh. 3:16) Le gona dipapading tšeo tša mabelo, motho yo mongwe le yo mongwe yo a kitimago, o be a swanetše go ba a phetše gabotse mmeleng ka gore ntle le moo, o be a ka se kgone go wina. Ka lehlakoreng le lengwe, ba bantši ba rena, re na le mathata a itšego eupša re tšwela pele re kgotleletše lebelong le la Bokriste. (2 Bakor. 4:16) Ge Jehofa a re thuša, ka moka ga rena re tlo kgona go kitima lebelo le go fihla mafelelong!