1. Ke dilo dife tše dibotse tšeo bafsa ba bantši ba šetšego ba di fihleletše?

 NGWAGA o mongwe le o mongwe bafsa ba diketekete ba a kolobetšwa. Na le wena o šetše o kolobeditšwe? Ge e ba go le bjalo bana beno le dikgaetšedi ba a go thabela, e bile Jehofa le yena o thabile! (Die 27:11) Nagana ka dilo tše dibotse tšeo o šetšego o di fihleletše. Ka mohlala, o ka ba o ithutile Beibele ka mengwaga e mentšinyana, gomme dilo tšeo o ithutilego tšona tša go kgodiša gore Beibele ke Lentšu la Modimo gomme seo sa dira gore o rate mongwadi wa Beibele. Go rata Jehofa go dirile gore o nyake go ineela le go kolobetšwa gomme o be yo mongwe wa bahlanka ba gagwe. O dirile phetho e botse kudu!

2. Re tlo ithuta’ng sehlogong se?

 ² Ga go pelaelo gore pele o ka kolobetšwa tumelo ya gago e ile ya lekwa. Eupša ge o dutše o gola o tlo kopana le diteko tše dingwe. Sathane a ka thoma go go dira gore o se sa nyaka go rata le go hlankela Jehofa. (Baef. 4:14) O se ke wa dumelela seo se direga. O ka thušwa ke eng gore o dule o botegela Jehofa le go phelela keno ya gago ya gore o tlo mo hlankela? Re swanetše go šoma ka thata gore re “phegelele kgolong.” (Baheb. 6:1) Eupša re ka dira seo bjang?

3. Bakriste ba ka dira’ng ka morago ga gore ba kolobetšwe?

³ Ka morago ga gore re kolobetšwe ka moka ga rena re swanetše go diriša keletšo yeo moapostola Paulo a ilego a  e nea Bakriste ba Efeso. O ile a ba kgothaletša gore e be Bakriste ba godilego. (Baef. 4:13) Ye e be e le tsela e nngwe ya go ba botša gore ba be ba swanetše go dira tšwelopele. Paulo o ile a bapetša go gola moyeng le tsela yeo ngwana a golago ka yona. Lesea leo le sa tšwago go belegwa le dira gore batswadi ba lona ba thabe e bile ba le rate kudu. Eupša e ka se dule e le lesea go ya go ile. Ge nako e dutše e eya o tlo gola gomme a tlogela ‘mekgwa ya bongwana.’ (1 Bakor. 13:11) Ka mo go swanago le rena ka morago ga ge re kolobeditšwe re swanetše go gatela pele. A re boneng dintlha tše dingwe tšeo di ka re thušago go dira seo.

4. O ka thušwa ke eng gore o dire tšwelopele? Hlalosa. (Bafilipi 1:9)

⁴ Tšwela pele o rata Jehofa kudu. Ke therešo gore o šetše o mo rata, eupša o ka mo rata go feta ka tsela yeo o mo ratago ka yona gona bjale. Bjang? Moapostola Paulo o re nea karabo go Bafilipi 1:9. (Bala.) Paulo o ile a rapelela gore lerato la Bafilipi ‘le gole ka mo go oketšegilego.’ Ka gona le rena re swanetše go ratana. Re ka dira seo ka go ba le “tsebo e nepagetšego le temogo e tletšego.” Ge re dutše re ithuta ka Jehofa re tlo mo rata kudu gomme ra rata le tsela yeo a dirago dilo ka yona. Re dula re nyaka go mo thabiša e bile ga re nyake go dira selo seo se tlago go mo nyamiša. Re šoma ka thata go nyaka go kwešiša gore o nyaka re dira eng le gore re ka dira seo bjang.

5-6. Re ka dira ‘ng gore re rate Jehofa kudu? Hlalosa.

⁵ Re ka thoma go rata Jehofa kudu ge re ithuta ka bophelo bja Jesu ka gobane o ekiša dika tša gagwe. (Baheb. 1:3) Tsela e kaone ya go ithuta ka Jesu ke ka go bala ka yena pukung ya Mateo, Mareka, Luka le Johane. Ge e ba o se wa tšwa o thoma go ithuta Beibele ka mehla o ka thoma gona bjale. Ge o dutše o ithuta ka bophelo bja Jesu, lebelela kudu dika tšeo a di bontšhago. O be a rata batho e bile a rata le bana. (Mar 10:13-16) Barutiwa ba gagwe ba be ba lokologa go bolela dilo tšeo ba bego ba nyaka go di bolela pele ga gagwe. (Mat 16:22) Jesu o be a ekiša Tatagwe wa legodimong ka go ba yo a batamelegago. Re ka batamela go Jehofa ka thapelo. Ge re rapela Jehofa re ka mmotša seo se lego ka dipelong tša rena. Re a tseba gore a ka se re ahlole. O a re rata e bile o tshwenyega ka rena.—1 Pet. 5:7.

⁶ Jesu o be a šokela batho. Moapostola Mateo o ngwadile gore: “Ge a bona mašaba a a šokela, gobane a be a šokiša gomme a gašane go swana le dinku tše di se nago modiši.” (Mat 9:36) O boletše le kamoo Jehofa a ikwago ka gona gore, “Tate yo a lego legodimong ga a rate gore gaešita le yo mongwe wa ba banyenyane ba a lobe.” (Mat 18:14) Mantšu a a a re thabiša ka gobane a re bontšha gore Jehofa o re rata kudu! Ge re dutše re ithuta ka Jesu le go mo tseba re tlo rata Jehofa kudu.

7. Go fetša nako o na le banabeno le dikgaetšedi go ka go thuša bjang?

⁷ Go tlwaelana le bana beno le dikgaetšedi ka phuthegong ke tsela e nngwe yeo e ka go thušago gore o rate Jehofa kudu e bile o dire tšwelopele. Bona kamoo ba thabilego ka gona le gore ga ba itsholele phetho yeo ba e dirilego ya go hlankela Jehofa. Ba kgopele gore ba go botše diphihlelo tšeo ba bilego le tšona tirelong ya Jehofa. Ba kgopele keletšo ge o nyaka go dira phetho. Ka gobane, moo go nago le “baeletši ba bantši go na le phološo.”—Die 11:14.

8. O ka dira’ng ge e ba o belaela seo Beibele e se bolelago?

 ⁸ Re ka kgona go fenya dipelaelo. Bjalo ka ge re boletše go  serapa 2, Sathane o tlo leka go go thibela gore o be le tumelo e tiilego le segwera se sebotse le Jehofa. A ka leka go re dira gore re belaele ge e ba dilo tšeo re ithutilego tšona ka Beibeleng e le therešo. Ka mohlala, batho ba bantši ba ka leka go go kgodiša gore Modimo ga se a re bopa, re bile gona ka baka la gore dilo di itirile. Ge o be o sa le o monyenyane o ka ba o be o sa nagane ka taba ye, eupša ga bjale o ka ba o rutwa ka yona sekolong. O ka thoma go bona dilo tšeo morutiši wa gago a di bolelago ka thuto ya gore dilo di itirile o ka re ke nnete. Eupša ga se ba ka ba naganišiša gore Mmopi o gona. Gopola molao wa motheo wo o lego go Diema 18:17 wo o rego: “Yo a bolelago pele tshekong o bonala a nepile go fihlela ge wa gabo a etla gomme a mmotšološiša.” Go e na le go dumela dilo ka moka tšeo o di rutwago sekolong, o swanetše go bala Lentšu la Modimo ka mo go tseneletšego. Dira nyakišišo dikgatišong tša rena. Boledišana le bana babo rena bao ba bego ba dumela gore dilo di itirile nakong e fetilego. Ba botšiše gore ke eng seo se ba kgodišitšego gore Mmopi o gona le gore o a re rata. Poledišano yeo e ka go thuša go hwetša bohlatse bja gore go na le Mmopi.

9. O ithutile’ng phihlelong ya Melissa?

⁹ Kgaetšedi yo a bitšwago Melissa o ile a holwa kudu ke go dira nyakišišo ka tlholo. * O re: “Kua sekolong thuto ya gore dilo di itirile e hlaloswa ka tsela e kgodišago. Mathomong ke be ke sa nyake go dira nyakišišo ka gobane ke be ke boifa gore nka hwetša thuto ya gore dilo di itirile e le therešo. Eupša ke be ke tseba gore Jehofa o nyaka gore re be le mabaka a kwagalago a go mo hlankela. Ke ile ka thoma go dira dinyakišišo. Ke ile ka bala puku ya Is There a Creator Who Cares About You? le poroutšha ya Na Dilo tše di Phelago di Bopilwe? le ya Bophelo bo Thomile Bjang?—Ekwa Dikarabo tša Dipotšišo tše Hlano. Se ke seo ke bego ke se hloka. Ke be ke duma o ka re nkabe ke ile ka dira se ka pela.”

10-11. O ka thušwa ke’ng gore o dule o itshwere gabotse? (1 Bathesalonika 4:3, 4)

 ¹⁰ Gana boitshwaro bjo bobe. Ge o sa le mahlalagading, maikwelo a thobalano e ka ba a matla gomme ba bangwe ba ka leka go go hlohleletša gore o dire boitshwaro bjo bobe. Se ke seo Sathane a nyakago gore o se dire. O ka thušwa ke eng go gana diteko tšeo? (Bala 1 Bathesalonika 4:3, 4.) Rapela Jehofa gomme o mmotše kamoo o ikwago ka gona. Mmotše seo se lego pelong ya gago gomme o mo kgopele gore a go fe matla. (Mat 6:13) Dula o gopola gore Jehofa o nyaka go go thuša, a ka se go ahlole. (Ps. 103:13, 14) O ka bala le Beibele gore e go thuše. Melissa yo re boletšego ka yena pejana, o be a na le bothata bja go nagana ka boitshwaro bjo bobe. O re: “Go ithuta Beibele ka mehla go nthušitše gore ke lwantšhane le dikgopolo tše tše mpe. Beibele e nthušitše go gopola gore ke mohlanka wa Jehofa le gore ke nyaka go tšwela pele ke mo hlankela.”—Ps. 119:9.

¹¹ O se ke wa nyaka go itharollela mathata. Bolela le batswadi ba gago ka seo se go tshwenyago. Ke nnete gore ga go bonolo go dira bjalo eupša go bohlokwa. Melissa o re: “Ke ile ka rapela Jehofa gore a mphe sebete gomme ka bolela le tate ka bothata bja ka. Ka morago ga moo, ke ile ka ikwa ke imologile. Ke be ke tseba gore Jehofa o ikgantšha ka nna.”

12. O ka dira bjang diphetho tše dibotse?

¹² Dumelela melao ya motheo ya Beibele gore e go hlahle. Ge o dutše o gola o tlo swanelwa ke go itirela diphetho eupša go sa na le dilo tše dintši tšeo o sa di tsebego. O ka thušwa ke eng gore o se ke wa senya segwera sa gago le Jehofa? (Die 22:3) Kgaetšedi yo a bitšwago Kari o hlalosa seo se ilego sa mo thuša gore a dire diphetho tše dibotse. O ile a lemoga gore ge o le Mokriste yo a nago le tsebo ga go hlokagale gore go be le molao wa selo se sengwe le se sengwe bophelong bja gago. O boletše le gore: “Re swanetše go kwešiša melao ya motheo ya Beibele go e na le go ithekga fela ka melao.” Ge o bala Beibele, ipotšiše gore: ‘Se ke se balago se nthuta eng ka Jehofa? Na seo ke se balago se na le melao ya motheo yeo e ka nthušago? Ge e ba go le bjalo, ke tlo holega bjang ge ke e diriša?’ (Ps. 19:7; Jes. 48:17, 18) Go bala le go naganišiša ka melao ya motheo ya Beibele go tlo go thuša gore o dire diphetho tšeo di thabišago Jehofa. Ge o dutše o dira tšwelopele o tlo lemoga gore ga o hloke melao maemong ka moka ka gobane o tla be o kwešiša tsela yeo Jehofa a naganago ka yona.

13. Bagwera ba babotse ba ka go thuša bjang? (Diema 13:20)

¹³ Kgetha bagwera bao ba ratago Jehofa. Bjalo ka ge re boletše pejana, bagwera bao o ba kgethago ba tlo go thuša gore o be Mokriste yo mokaone. (Bala Diema 13:20.) Kgaetšedi yo a bitšwago Sara o be a se sa na lethabo, eupša go ile gwa direga selo se sengwe seo se ilego sa mo thuša gore a thabe gape. Sara o re: “Ke hweditše bagwera ba babotse ka nako ya maleba. Nna le kgaetšedi yo mongwe wa mofsa re be re kopana beke le beke gore re ithute Morokami. Mogwera yo mongwe wa ka o nthušitše gore ke thome go araba dibokeng. Bagwera ba ka ba ile ba nthuša gore ke tšeele godimo thuto ya motho ka noši le thapelo. Ke ile ka thoma go ba le segwera se sebotse le Jehofa gomme se sa dira gore ke thabe gape.”

14. Julien o dirile bagwera ba babotse bjang?

 ¹⁴ Ke eng seo se tlago go go thušago gore o be le bagwera bao ba tlago go go thuša gore o be le bophelo bjo bobotse? Julien yo ga bjale a hlankelago e le mogolo o re: “Ge ke be ke sa le mofsa ke ile ka kgona go dira bagwera ba babotse tirelong ya tšhemo. Ba e be e le bagwera ba mafolofolo bao ba nthušitšego gore ke thome go thabela tšhemo. Ke ile ka thoma go nyaka go tsenela tirelo ya nako e tletšego. Ke ile ka lemoga gore ke be ke se na bagwera ba ba botse ka ge ke be ke dira segwera le dithaka tša ka feela. Ka morago ke ile ka ba le bagwera ba babotse kua Bethele. Mohlala wa bona o nthušitše gore ke kgone go kgetha boithabišo gabotse gomme seo sa dira gore ke be le segwera se sebotse le Jehofa.”

15. Paulo o ile a eletša Timotheo gore a dire’ng? (2 Timotheo 2:20-22)

¹⁵ O tlo dira eng ge o ka lemoga gore o phela le batho bao ba ka senyago segwera sa gago le Jehofa ka phuthegong? Paulo o be a tseba gore go na le Bakriste ba mehleng ya gagwe bao ba bego ba dira dilo o ka re ga se bona Bakriste, gomme o ile a eletša Timotheo gore a se ke a gwerana le bona. (Bala 2 Timotheo 2:20-22.) Segwera sa rena le Jehofa se bohlokwa kudu. Ga se ra swanela go dumelela motho a senya segwera sa rena le Modimo seo re se šometšego ka thata.—Ps. 26:4.

16. Ke dilo dife tše o nyakago go di fihlelela tše o ka ipeelago tšona?

¹⁶ Ipeele dilo tšeo o nyakago go di fihlelela. Kgetha dilo tšeo di tlago go tiiša tumelo ya gago le go go thuša gore o dire tšwelopele. (Baef. 3:16) Ka mohlala, o ka kaonefatša tsela yeo o dirago thuto ya motho ka noši le go bala Beibele ka yona. (Ps. 1:2, 3) Goba o ka leka go rapela ka mehla go tšwa pelong. Mohlomongwe o ka swanelwa ke go kgetha boithabišo bjo bo holago le go diriša nako ya gago gabotse. (Baef. 5:15, 16) Jehofa o tlo thaba ge a bona o šoma ka thata go dira tšwelopele.

17. O ka holega bjang ge o thuša ba bangwe?

 ¹⁷ O tlo ba Mokriste yo mokaone kudu ge o thuša batho ba bangwe. Jesu o itše: “Go na le lethabo le legolo go neeng go feta go amogeleng.” (Dit. 20:35) O tlo thaba kudu ge o diriša matla a gago le nako ya gago go thuša batho ba bangwe. Ka mohlala, o ka thoma go thuša bao ba godilego le bao ba lwalago ka phuthegong ya geno. Mohlomongwe o ka ba thuša ka go ya mabenkeleng le go ba ruta didirišwa tša elektroniki. Ngwanabo rena a ka šomela go ba mohlanka wa bodiredi, gore a tle a kgone go thuša bana babo rena le dikgaetšedi. (Bafil. 2:4) E bile o ka bontšha gore o rata batho bao e sego Bakriste ka go ba botša ditaba tše dibotse. (Mat 9:36, 37) Ge e ba go kgonega, o ka tšea karolo tirelong ya nako e tletšego.

18. Go ba tirelong ya nako e tletšego go ka go thuša bjang go gola moyeng?

¹⁸ Tirelo ya nako e tletšego e ka go nea dibaka tše dintši tša go dira tšwelopele ya moya. Go ba mmulamadibogo go go nea sebaka sa go ya Sekolong sa Baebangedi ba Mmušo, go hlankela Bethele le go šoma meagong ya mokgatlo. Kgaetšedi wa mofsa e lego Kaitlyn o re: “Go ba tirelong ya nako e tletšego le bana babo rena le dikgaetšedi bao ba nago le phihlelo go ile gwa nthuša gore ke gole moyeng ka morago ga gore ke kolobetšwe. Mohlala wa bona o ile wa nthuša gore ke be le tsebo e tseneletšego ya Beibele le go kaonefatša tsela ya ka ya go ruta.”

19. O tlo hwetša ditšhegofatšo dife ge o dutše o leka ka thata go hlankela Jehofa?

¹⁹ Jehofa o tlo go šegofatša kudu ge o dutše o mo hlankela gomme o ka se itshenyetše nako ka go dira dilo tšeo di se nago mohola. (1 Joh. 2:17) O ka se be le ditlamorago tšeo di tlišwago ke diphetho tše mpe. Eupša o tlo atlega gomme wa thaba. (Die. 16:3) Mohlala wa gago o mobotse o tlo kgothatša bana beno le dikgaetšedi, e ka ba ba banyenyane goba ba bagolo. (1 Tim. 4:12) Sa bohlokwa le go feta, o tlo ba le khutšo e bile wa kgotsofala ka go hlankela Jehofa e bile o na le segwera se sebotse le yena.—Die. 23:15, 16.