1, 2. Ge re kgetha dilo tšeo re nyakago go di dira bophelong, ke ka baka la’ng e le gabohlale go theetša Mmopi wa rena? (Bona diswantšho tše di lego ka mo godimo.)

GE E BA o le mofsa, go ka direga gore batho ba bantši ba ile ba go eletša mabapi le seo o swanetšego go se dira ka bokamoso bja gago. Barutiši, batho bao ba neago dikeletšo, goba batho ba bangwe ba ka go eletša gore o swanetše go rutega gore o tle o šome mošomo wa go lefa tšhelete e ntši. Lega go le bjalo, Jehofa o go nea keletšo e fapanego. Ke nnete gore Jehofa o nyaka gore o šome ka thata sekolong gore o kgone go tlo itlhokomela. (Bakol. 3:23) Eupša e bile o a tseba gore ka ge o le mofsa, o swanetše go dira diphetho tše bohlokwa tšeo di tlago go ama bokamoso bja gago. Ka gona o go neile melao ya motheo ya Beibele yeo e tlago go go thuša gore o phele ka tsela yeo e tlago go mo thabiša mehleng ye ya bofelo.—Mat. 24:14.

² Gopola gore Jehofa o bona dilo ka moka. O a tseba gore go tlo direga eng nakong e tlago, le gona o tseba gabotse gore o kgauswiuswi le go fediša lefase le. (Jes. 46:10; Mat. 24:3, 36) Le gona Jehofa o a re tseba. O tseba gabotse seo se ka re kgotsofatšago le go re thabiša e bile o tseba seo se ka dirago gore re nyame goba re hlafelwe ke bophelo. Ka gona go sa šetšwe gore dikeletšo tša batho di bonagala di  kwagala gakaakang, ge e ba di se tša thewa Lentšung la Modimo, gona ga di bohlale le gatee.—Die. 19:21.

3, 4. Ka ge Adama le Efa ba ile ba theetša keletšo e fošagetšego, seo se bile le mafelelo afe go bona gotee le go bana ba bona?

³ Ga e sa le go tloga kgale dikeletšo tše di fošagetšego di le gona. Sathane e bile motho wa mathomo wa go nea batho keletšo e fošagetšego. Moeletši yo yo a bego a ikgodiša, o ile a botša Efa gore ge yena le monna wa gagwe ba ka kgetha go itirela dilo tšeo ba di nyakago bophelong, ba be ba tla thaba kudu. (Gen. 3:1-6) Eupša re a tseba gore Sathane o boletše se ka gobane o be a nagana ka yena feela. O be a nyaka gore Adama le Efa, gotee le bana bao ba bego ba tla ba le bona, ba rapele yena go e na le go rapela Jehofa. Eupša Sathane o be a ba diretše’ng? Go be go se na selo le setee seo a bego a ba diretše sona. Jehofa ke yena a bego a ba file dilo ka moka. O be a ba dirile gore ba be mmogo, a ba file legae le lebotse la Paradeise, e bile a ba neile mebele e phethagetšego yeo e bego e tla dira gore ba phele ka mo go sa felego.

⁴ Eupša ka manyami Adama le Efa ba ile ba se kwe Modimo, ba ikaroganya le yena. Ka ge re tseba, mafelelo e bile masetlapelo feela. Go etša ge matšoba ao a kgelwego sehlašaneng a pona, ganyenyane-ganyenyane ba ile ba tšofala gomme mafelelong ba hwa. Bana ba bona le bona ba tlaišwa ke sebe sa batswadi ba bona. (Baroma 5:12) Go swana le Adama le Efa, batho ba bantši lehono ga ba nyake go kwa seo Modimo a se bolelago. Ba itirela boithatelo. (Baef. 2:1-3) Mafelelo a ditiro tša bona a bontšha gabotse gore “go ganetša Jehofa ga go na bohlale.”—Die. 21:30.

5. Ke’ng seo Modimo a bego a kgodišegile ka sona ka batho, gona re tseba bjang gore o be a nepile?

⁵ Gaešita le ge Adama le Efa ba ile ba se kwe Jehofa, Jehofa o be a kgodišegile gore go be go tla ba le batho bao ba bego ba tla nyaka go mo tseba le go mo hlankela, go akaretša le bafsa. (Ps. 103:17, 18; 110:3) Ruri Jehofa o rata bafsa bao kudu! Na le wena o ipala gare ga bona? Ge e ba go le bjalo, ga go pelaelo gore o thabela ‘dilo tše botse’ tšeo di tšwago go Modimo, gomme seo se dira gore o thabe le go feta. (Bala Psalme 103:5; Die. 10:22) Ka ge re tla bona sehlogong se, ‘dilo tšeo tše botse’ di akaretša dijo tša moya, bagwera ba kgonthe, dipakane tše dibotse le tokologo ya kgonthe.

6. Ke ka baka la’ng o swanetše go kgotsofatša kganyogo ya gago ya go nyaka go tseba Modimo, gona Jehofa o go neile’ng go go thuša go e kgotsofatša?

⁶ Go fapana le diphoofolo, batho ba na le kganyogo ya go nyaka go tseba Modimo. Kganyogo yeo e ka kgotsofatšwa feela ke Mmopi wa rena. (Mat. 4:4) Ge re theetša Modimo, re ba le temogo, bohlale le lethabo. Jesu o itše: “Go thaba bao ba lemogago gore ba nyaka dilo tša moya.” (Mat. 5:3) Modimo o re neile Beibele e bile o diriša “mohlanka yo a botegago le wa temogo” gore a re nee dikgatišo tšeo di tlago go re thuša go tia tumelong. (Mat. 24:45) Le gona re ipshina ka dijo tšeo tša moya tša go fapafapana!—Jes. 65:13, 14.

7. Re holega bjang ge re iphepa ka dijo tša moya tšeo Modimo a re neago tšona?

⁷ Dijo tša moya tšeo Modimo a re neago tšona di tla go thuša gore o be le bohlale le go kgona go nagana, e lego dika tšeo di tlago go go šireletša dilong tše dintši. (Bala Diema 2:10-14.) Ka mohlala, dika tše di go thuša gore o se dumele dithuto tša maaka, tše bjalo ka gore ga go na Mmopi. Di go šireletša maakeng ao batho ba a bolelago a gore tšhelete le mahumo ke tšona di dirago gore motho a thabe. Le gona di go thuša gore o lemoge dikganyogo tše di fošagetšego le go di gana, gotee le go lemoga mekgwa yeo e tlago go go gobatša. Ka gona, dira sohle seo o ka se kgonago gore o be le dika tšeo. Ge o ka ba le tšona, o tla  iponela ka bowena gore Jehofa o a go rata le gore o nyaka gore o phele gabotse.—Ps. 34:8; Jes. 48:17, 18.

8. Ke ka baka la’ng o swanetše go batamela kgauswi le Modimo gona bjale, gona seo se tlo go hola bjang bophelong?

⁸ Kgauswinyane, Modimo o tla fediša Sathane le lefase la gagwe ka moka. Ke Jehofa feela yo a tlago go kgona go re šireletša le go re nea dilo ka moka tšeo re di hlokago, tšeo di ka akaretšago le dijo. (Habak. 3:2, 12-19) Ee, ga bjale ke nako ya gore o batamele Tatago wa legodimong gomme o ithute go mmota kutšwanyana. (2 Pet. 2:9) Ge e ba o dira bjalo, go sa šetšwe gore o diragalelwa ke eng bophelong, o tlo ikwa go swana le mopsalme Dafida yo a ngwadilego gore: “Ke beile Jehofa pele ga ka ka mehla. Ka gobane o ka letsogong la ka la le letona, nka se šišinywe.”—Ps. 16:8.

9. (a) Go ya ka Johane 6:44, Jehofa o thuša batho bjang? (b) Go kopana le motho yo e lego Hlatse ya Jehofa le yo e sego Hlatse go fapana bjang?

⁹ Jehofa o gogela go yena bao a nyakago gore e be karolo ya lapa la gagwe la moya, ka botho o ba dira gore ba tle borapeding bja gagwe bja therešo. (Bala Johane 6:44.) Ge o thoma go kopana le motho yo a sa tsebego therešo, ke’ng seo o se tsebago ka yena? Go ka direga gore o no tseba leina la gagwe le ka mokgwa woo a lebelegago ka gona, ga o tsebe mo gontši ka yena. Eupša ga go be bjalo ge o thoma go kopana le motho yoo a tsebago Jehofa le go mo rata. Go sa šetšwe gore motho yoo o tšwa kae goba o godišitšwe bjang, o šetše o tseba mo gontši ka yena le gona le yena o tseba mo gontši ka wena!

10, 11. Dihlatse tša Jehofa di swana ka’ng lefaseng ka moka, gona seo se re hola bjang?

¹⁰ Ka mohlala, ge le thoma go kopana feela le šetše le bolela “leleme” letee, e lego “leleme le le sekilego” la therešo. (Tsef. 3:9) Ka moka ga lena le šetše le tseba gore le dumela go Modimo, le phela ka melao ya boitshwaro ya Beibele le gore le na le kholofelo ya go tlo phela lefaseng le lefsa la Paradeise. Go oketša moo, tše ke dilo tše bohlokwa kudu tšeo o swanetšego go di tseba ka motho, e lego dilo tšeo di tla dirago gore le tshepane. Le gona di tla dira gore le be le segwera se sebotse le seo se tiilego.

¹¹ Ka gona ge o hlankela Jehofa o ka bolela o  kgodišegile gore o na le bagwera ba kgonthe lefaseng ka moka. E no ba e le gore ba bantši ba bona ga se wa tšwa o kopana le bona! Ke bomang bao ba thabelago mpho ye ya bohlokwahlokwa ntle le Dihlatse tša Jehofa?

12. Ke dipakane dife tše dibotse tšeo o ka ipeelago tšona?

¹² Bala Mmoledi 11:9–12:1. Na o na le dipakane tša moya tšeo o nyakago go di fihlelela? Mohlomongwe o ipeetše pakane ya go bala Beibele letšatši le letšatši. Goba mohlomongwe o leka go kaonefatša bokgoni bja gago bja go bolela le batho ge o le tšhemong le go ba ruta. Go sa šetšwe gore o ipeetše pakane efe, ge o bona gore o dirile diphetogo goba ba bangwe ba bona seo gomme ba go reta, o ikwa bjang? Ga go pelaelo gore o thaba kudu. Ke ka baka la’ng o swanetše go thaba? Ka gobane o ekiša Jesu ka go dira thato ya Modimo go e na le go dira seo wena o nyakago go se dira.—Ps. 40:8; Die. 27:11.

13. Ke ka baka la’ng go hlankela Jehofa go phala go ipeela dipakane tša lefase?

¹³ Ge o dula o swaregile ka go hlankela Jehofa, o dira modiro woo o tlago go go thabiša le woo o tlago go go bontšha gore ge e le gabotse o phelela eng. Moapostola Paulo o ngwadile gore: “Ebang ba tiilego, ba ba sa šišinyegego, ka mehla le na le mo gontši mo le go dirago modirong wa Morena, le tseba gore boitapišo bja lena ga se bja lefeela Moreneng.” (1 Bakor. 15:58) Eupša ge batho ba ipeela dipakane tša lefase le, go swana le go dira tšhelete e ntši le go nyaka go tuma, ga ba thabe e le ka kgonthe. Gaešita le ge ba atlegile, ka gare ba ikwa e se selo. (Luka 9:25) Kgoši Solomone o ile a ikwa bjalo.—Baroma 15:4.

14. O ka ithuta’ng phihlelong ya Solomone?

¹⁴ Solomone, yoo a bego a humile le dinala, o ile a nyaka go iponela ka boyena ge e ba mahumo a thabiša. O ile a ipotša gore: ‘E re ke thabiše pelo ya ka gomme ke bone dilo tše dibotse tšeo di tlago go tla.’ (Mmo. 2:1-10) O ile a aga dintlo tša maemo, a dira dirapa le diphaka tše dibotse kudu gomme a dira dilo le ge e le dife tšeo a bego a nyaka go di dira. O ile a ikwa bjang ka morago ga moo? Na o ile a thaba? Na o ile a kgotsofala? Se ikopiše hlogo ka go nyaka karabo. Solomone ka boyena o itše: ‘Ge ke retologela medirong ya ka ka moka yeo e dirilwego ke diatla tša ka, ke bone tšohle e le lefeela le go kitimiša phefo, gomme go be go se seo se holago.’ (Mmo. 2:11) Ruri ye ke thuto e bohlokwa go rena! Na o tla ithuta se sengwe go Solomone?

15. Go ya ka Psalme 32:8 ke ka baka la’ng go ba le tumelo go le bohlokwa, gona mehola ya seo ke efe?

¹⁵ Jehofa ga a nyake gore o ithute go tšwa lebading. Ka gona, o swanetše go ba le tumelo e le gore o mo kwe le go dira gore thato ya gagwe e tle pele bophelong bja gago. Ge o bontšha tumelo yeo, o ka se tsoge o itshotše. Ee, Jehofa a ka se tsoge a lebetše “lerato leo [o] le bontšhitšego leineng la gagwe.” (Baheb. 6:10) Ka gona, šoma ka thata gore o be le tumelo e tiilego. Seo se tla go thuša gore o dire diphetho tše dibotse bophelong gomme o iponele ka bowena gore Tatago wa legodimong o go nyakela tše dibotse.—Bala Psalme 32:8.

16. Ke ka baka la’ng re swanetše diriša tokologo ya rena gabotse le go e lebelela e le bohlokwa?

¹⁶ Paulo o ngwadile gore: “Moo moya wa Jehofa o lego gona, go na le tokologo.” (2 Bakor. 3:17) Ee, Jehofa o rata tokologo, le gona o nyaka gore le wena o e rate. Lega go le bjalo, o nyaka gore o diriše tokologo yeo gabotse ka gobane e tla go šireletša. Mohlomongwe o tseba bafsa bao ba lebelelago diswantšho tša batho bao ba sa aparago, bao ba itshwarago ka tsela e sa hlwekago, bao ba ralokago dipapadi tšeo di beago bophelo kotsing goba bao ba dirišago dihlaretagi gampe le go nwa kudu. Ke therešo gore ba ka bonagala ba ipshina ka bophelo. Eupša gantši ba feleletša  ka masetlapelo. Ba ka babja, ba lemalela dilo tšeo goba ba se kgone go di tlogela goba ba hwa. (Bagal. 6:7, 8) Bafsa ba bjalo ba ka ipotša gore ba na le tokologo, eupša go molaleng gore ba a iphora.—Tito 3:3.

17, 18. (a) Go kwa Modimo go re lokolla bjang e le ka kgonthe? (b) Tokologo yeo Adama le Efa ba bego ba na le yona mathomong e fapana bjang le yeo batho ba nago le yona lehono?

¹⁷ Ka lehlakoreng le lengwe, o tseba batho ba bakae bao ba ilego ba babja ka ge ba ile ba kwa melao ya Beibele? Go molaleng gore go kwa Jehofa go dira gore re phele gabotse e bile go dira gore re lokologe e le ka kgonthe. (Ps. 19:7-11) Sa bohlokwa le go feta, ge o diriša tokologo gabotse, ke gore, ge o kgetha go latela melao ya Modimo le melao ya gagwe ya motheo, o bontšha Modimo le batswadi ba gago gore o na le boikarabelo. Batswadi ba gago ba tla go tshepa kutšwanyana gomme ba go fa tokologo e oketšegilego. Ge e le gabotse Jehofa o re holofetša gore kgauswinyane o tla nea bahlanka ba gagwe ka moka tokologo ya kgonthe yeo Beibele e e bitšago “tokologo ya letago ya bana ba Modimo.”—Baroma 8:21.

¹⁸ Adama le Efa ba kile ba latswa tokologo e bjalo. Ke dilo tše kae tšeo Modimo a bego a ba thibetše gore ba se ke ba di dira kua serapeng sa Edene? Ke selo setee feela. Ba be ba se ba swanela go ja dienywa tša sehlare setee feela. (Gen. 2:9, 17) Na wena o be o ka lebelela thibelo yeo e tee e le e sehlogo goba e gatelela? Aowa! Bapiša seo le melao e mentšintši yeo batho ba itiretšego yona yeo ba gapeletšago ba bangwe gore ba e tsebe le go e latela.

19. Jehofa le Jesu ba re ruta dilo dife tšeo di tla re thušago gore re be le tokologo ya kgonthe?

¹⁹ Jehofa o dirišana le rena gabotse. Go e na le gore a re nee melao e mentšintši ya go se fele, ka go se fele pelo o re ruta gore re latele molao wa lerato. O nyaka gore re phele ka melao ya gagwe ya motheo gomme re hloye se se sebe. (Baroma 12:9) Thuto ya Jesu ya Thabeng ke mohlala o mobotse wa thuto yeo, ka gobane e re thuša go kwešiša gore ke ka baka la eng batho ba dira dilo tše mpe. (Mat. 5:27, 28) Ka ge Kriste e le Kgoši ya Mmušo wa Modimo, o tla tšwela pele a re ruta lefaseng le lefsa e le gore re tsebe se sebotse le se sebe go swana le yena. (Baheb. 1:9) Le gona o tla re dira gore re phethagale mmeleng le monaganong. Nagana gore go tla ba bjang ge re tla be re sa lekege go dira dilo tše mpe e bile re sa tlaišwe ke go se phethagale. Ka gona, mafelelong o tlo thabela “tokologo ya letago” yeo Jehofa a go tshepišitšego yona.

20. (a) Jehofa o diriša tokologo ya gagwe bjang? (b) O ka holwa bjang ke mohlala wa gagwe?

²⁰ Ke therešo gore gaešita le lefaseng le lefsa tokologo ya rena e tla dula e na le moo e felelago gona. Ke ka baka la’ng re re’alo? Ke ka gobane ka mehla tokologo ya rena e tlo laolwa ke go rata Modimo le batho. Ge e le gabotse, Jehofa o kgopela feela gore re mo ekiše. Gaešita le ge yena a na le tokologo e feletšego, o kgetha gore a hlahlwe ke lerato ge a dira dilo ka moka, le ge a dirišana le rena. (1 Joh. 4:7, 8) Ka gona ke mo go kwagalago gore re tla lokologa e le ka kgonthe ge feela re ekiša Modimo.

21. (a) Dafida o ile a ikwa bjang ka Jehofa? (b) Re tlo ithuta ka’ng sehlogong se se latelago?

²¹ Na o leboga dilo ka moka “tše botse” tšeo Jehofa a go neilego tšona? O go neile dijo tša moya, bagwera ba kgonthe, dipakane tše dibotse, go ba le kholofelo ya go tlo ba le tokologo ya kgonthe lefaseng le lefsa le dilo tše dingwe tše dintši tše dibotse. (Ps. 103:5) Go ka direga gore o ikwa go swana le Dafida ge a be a rapela ka gore: “O . . . ntsebiša tsela ya bophelo. Sefahlego sa gago se sepedišana le go thaba ka botlalo; ka seatleng sa gago sa le letona go bose ka mo go sa felego.” (Ps. 16:11) Sehlogong se se latelago re tlo ithuta ka matlotlo a mangwe a moya ao re a hwetšago go Psalme 16. A tlo re thuša go bona kamoo re ka bago le bophelo bjo bo kgotsofatšago e le ruri.