DIANA o na le mengwaga e fetago e 80. Monna wa gagwe yo a bego a na le bolwetši bja Alzheimer o be a dula lefelong leo go hlokomelwago batšofadi mengwaga e mmalwa pele a ka hlokofala. Le gona, Diana o ile a swanelwa ke go kgotlelela kankere ya matswele gotee le bohloko bja go hlokofalelwa ke barwa ba babedi. Lega go le bjalo, ge ditho tša phuthego yeo Diana a kopanelago go yona di mmona a tlile dibokeng goba tšhemong, di lemoga gore o dula a thabile.

John e bile molebeledi wa mosepedi ka mengwaga e fetago e 43. O be a rata mohuta woo wa tirelo. Modiro wo wa bosepedi o be o šetše o le mading go yena! Gaešita le ge a be a rata modiro woo, o ile a swanelwa ke go o tlogela e le gore a yo hlokomela wa leloko yoo a bego a babja. Ga bjale o hlankela phuthegong ya moo a dulago gona. Ge batho bao ba tsebilego John go tloga kgale ba kopana le yena dikopanong tše dikgolo le tše dinyenyane, ba no mmona a sa swana le peleng. Ba re o dula a thabile.

Go kgonega bjang gore Diana le John ba dule ba thabile? Go tla bjang gore motho yo a kwago bohloko mmeleng le maikwelong a thabe? Le gona, go kgonega bjang gore motho yo a se sa dirago kabelo yeo a bego a e rata a thabe? Beibele e araba ka gore: “Moloki o tla thabela Jehofa.” (Ps. 64:10) Re ka kgona go kwešiša gakaone therešo ye e bohlokwa ge e ba re tseba seo se dirago gore motho a thabe e le ka kgonthe le seo se dirago gore a se thabe.

Re tseba gabotse gore go na le dilo tše dingwe tšeo di dirago gore re thabe. Ke dilo tša go swana le ge baratani ba nyalana, go ba le ngwana goba go hwetša tokelo e itšego ka phuthegong. Dilo tše bjalo di dira gore re thabe ka gobane ke dilo tšeo di thomilwego ke Jehofa. Ke yena a thomilego lenyalo, a dirilego gore batho ba kgone go ba le bana e bile o nea Bakriste dikabelo ka phuthegong.—Gen. 2:18, 22; Ps. 127:3; 1 Tim. 3:1.

Eupša dilo tše dingwe di ka dira gore re thabe ka nakwana. Ka manyami, molekane wa gago a ka thoma go se sa go botegela goba a ka hwa. (Hesek. 24:18; Hos. 3:1) Bana ba bangwe ba ka thoma go se sa kwa batswadi ba bona le Jehofa, mohlomongwe ba ba ba kgaolwa ka phuthegong. Barwa ba Samuele ba ile ba se sa kwa Jehofa. Le gona dilo tšeo Dafida a ilego a di dira di ile  tša feleletša ka masetlapelo ka lapeng la gagwe. (1 Sam. 8:1-3; 2 Sam. 12:11) Ditiragalo tše bjalo di baka bohloko le manyami. Ga di re thabiše le gatee.

Ka mo go swanago, motho a ka no se sa ba le ditokelo tšeo a bego a na le tšona ka phuthegong. Mohlomongwe seo se ka direga ge a thoma go babja kudu, a eba le maikarabelo ka lapeng goba ge go eba le diphetogo mokgatlong wa Jehofa. Ba bantši ba batho bao ba kgomilwego ke diphetogo tše, ba re ba sa gopola lethabo leo ba kilego ba ba le lona ge ba be ba phetha dikabelo tša bona.

Ka gona, go molaleng gore dilo tša mohuta woo di ka re thabiša ka nakwana. Eupša go na le mohuta o mongwe wa lethabo, e lego lethabo leo le dulago le le gona gaešita le ge maemo a ka fetoga re se ra letela. Ka mohlala, Samuele, Dafida le ba bangwe ba ile ba ba le lethabo la mohuta woo gaešita le ge ba be ba na le mathata.

Jesu o be a tseba gore lethabo la kgonthe ke eng. Pele a ka tla lefaseng, o be a ‘dula a thabile pele ga Jehofa ka mehla.’ (Die. 8:30) Lega go le bjalo, ge a be a le mo lefaseng, o be a fela a lebana le mathata a boima. Eupša Jesu o be a thabišwa ke go dula a dira thato ya Tatagwe. (Joh. 4:34) Go thwe’ng ka diiri tša mafelelo tša pele ga ge a ka hwa? Beibele e re: “Ka baka la lethabo leo le bego le beilwe pele ga gagwe o ile a kgotlelela kota ya tlhokofatšo.” (Baheb. 12:2) Ka gona, re na le lebaka le le kwagalago la go hlahloba tše pedi tša dilo tšeo Jesu a ilego a bolela ka tšona mabapi le lethabo la kgonthe.

Ka letšatši le lengwe, barutiwa ba Jesu ba 70 ba ile ba boa ba thabile modirong wa go ruta batho ka Mmušo wa Modimo. Ba be ba thabišitšwe ke gore ba be ba kgonne go dira mehlolo, gaešita le go raka batemona. Eupša Jesu o ile a re go bona: “Le se ke la thabišwa ke gore le laola meoya e mebe, eupša thabang gobane maina a lena a ngwadilwe magodimong.” (Luka 10:1-9, 17, 20) Ee, selo se bohlokwa e be e le gore ba amogelwe ke Jehofa, e sego go hwetša kabelo e kgethegilego.

Nakong e nngwe ge Jesu a be a ruta lešaba, mosadi yo mongwe wa Mojuda o ile a bolela gore mmago Jesu o swanetše go ba a thabile. Eupša Jesu o ile a mo phošolla ka gore: “Aowa, go e na le moo, go thaba bao ba kwago lentšu la Modimo  gomme ba le boloka!” (Luka 11:27, 28) Ke therešo gore motswadi a ka thabišwa ke go bona ngwana wa gagwe a itshwere gabotse, eupša a ka thaba e le ka kgonthe ge yena a na le tswalano ya kgauswi le Jehofa.

Ke therešo gore ge o tseba gore Jehofa o a go amogela, o thaba e le ka kgonthe. Le ge diteko di sa re thabiše, ga di fetoše tsela yeo Jehofa a re amogelago ka yona. Ge re kgotlelela diteko e bile re botega, re tlo kgona go di fenya gomme seo sa dira gore re thabe. (Baroma 5:3-5) Go oketša moo, Jehofa o nea batho bao ba mmotago moya wa gagwe o mokgethwa, le gona lethabo ke se sengwe sa dika tšeo di enywago ke moya wa gagwe. (Bagal. 5:22) Seo se re thuša go kwešiša Psalme 64:10, ge e re: “Moloki o tla thabela Jehofa.”

Ke ka baka leo Diana le John, bao go boletšwego ka bona pejana, ba ilego ba kgona go dula ba thabile gaešita le ge ba be ba na le mathata. Diana o re: “Ke ile ka ithekga ka Jehofa go no swana le ge ngwana a ithekga ka motswadi wa gagwe.” Diana o bona bjang gore Jehofa o a mo amogela? O re: “Jehofa o nthušitše gore ke kgone go tšwela pele ke eya tšhemong ka mehla ke thabile.” John, yo a ilego a tšwela pele a le mafolofolo tšhemong ka morago ga gore a se sa ba molebeledi wa mosepedi, o hlalosa seo se mo thušitšego kudu. O itše: “Ga e sa le go tloga ka 1998 ge ke be ke abelwa go ba mohlahli wa Sekolo sa Tlwaetšo ya Bodiredi, ke bile le thuto ya motho ka noši go feta le ge e le neng pele.” Ge a bolelela yena le mosadi wa gagwe o re: “Mengwageng ka moka e fetilego re be re dutše re hlankela Jehofa go sa šetšwe moo a re abelago gona, gomme seo se re thušitše gore re amogele phetogo ye gabonolo. Ga re itshole le ganyenyane gore re hlankela Jehofa.”

Batho ba bangwe ba bantši le bona ba ile ba bona nnete ya Psalme 64:10. Ka mohlala, banyalani ba bangwe bao ba bego ba hlanketše Bethele ya United States ka mengwaga e fetago e 30, ba ile ba hwetša kabelo e mpsha ya go yo ba babulamadibogo ba kgethegilego. Ba itše: “Ke ga tlhago go lla ge o loba selo seo o se ratago, eupša o ka se llele sa ruri.” Kapejana ba ile ba thoma go dula ba eya tšhemong le phuthego. Banyalani bao ba itše: “Re ile ra rapelela dilo tše dingwe ka go lebanya. Ke moka ge re bona Modimo a araba dithapelo tša rena re ile ra kgothatšega le go thaba. Nakwana ka morago ga gore re fihle phuthegong e mpsha, ba bangwe ka phuthegong le bona ba ile ba tšea bobulamadibogo, gomme ra šegofatšwa ka go ba le dithuto tše pedi tša Beibele tšeo di tšwelago pele gabotse.”

Ke therešo gore ga go bonolo go dula re thabile ka gobane go fela go eba le dilo tšeo di re nyamišago. Eupša Jehofa o re nea kgothatšo yeo e lego go Psalme 64:10. Gaešita le dinakong tšeo re ikwago re nyamile, re ka tshepa gore “[baloki] ba tla thabela Jehofa” ka go dula ba botega le ge ba na le mathata. Go oketša moo, re ka lebelela pele nakong ya ge Jehofa a tlo phethagatša kholofetšo ya gagwe ya gore o tlo hlola “magodimo a mafsa le lefase le lefsa.” Ka nako yeo batho ka moka ba tla be ba phethagetše. Batho ba Modimo ka moka ba tlo ‘hlalala gomme ba thaba ka mo go sa felego’ ge ba bona dilo ka moka tšeo a di dirago le go ba nea tšona.—Jes. 65:17, 18.

Nagana gore go tlo thabiša gakaakang ge batho ba phetše gabotse e bile ba thoma letšatši le lengwe le le lengwe ba na le mafolofolo. Go sa šetšwe gore ba kile ba kwa bohloko gakaakang nakong e fetilego, ba ka se sa gopola selo. Jehofa o re kgonthišetša gore “dilo tša pele di ka se sa gopolwa, e bile di ka se sa rotoga pelong.” Jehofa o tlo dira mohlolo wa go tsoša bahu gomme ba kopana gape le batho ba gabo bona. Batho ba dimilione ba tlo ikwa go swana le batswadi ba ngwanenyana yo a bego a na le mengwaga e 12, yoo Jesu a ilego a mo tsoša bahung. Beibele e re batswadi bao ba ile “ba thaba wa go se kgone go itshwara.” (Mar. 5:42) Mafelelong, motho yo mongwe le yo mongwe lefaseng e tla be e le “moloki” ka mo go feletšego, o tla “thabela Jehofa” ka mo go sa felego.