Go Bakorinthe ba Bobedi 12:2, 3, Paulo o bolela ka monna yo mongwe yo a ilego a ‘išwa legodimong la boraro.’ Monna yoo e be e le mang? Ge Paulo a be a ngwalela phuthego ya Korinthe, o ile a gatelela taba ya gore Modimo o be a mo diriša e le moapostola. (2 Bakor. 11:5, 23) Ka morago ga moo o ile a bolela ka ‘dipono le dikutollo tša Morena.’ Ditemaneng tšeo, Paulo ga se a ka a bolela ka bana babo ba Bakriste. Ka gona ke mo go kwagalago go phetha ka gore ge a be a bolela ka monna yo a bonego dipono le dikutollo, o be a bolela ka yena.—2 Bakor. 12:1, 5.

Ka gona, Paulo ke yena yo a ilego a ‘išwa legodimong la boraro le paradeiseng.’ (2 Bakor. 12:2-4) O dirišitše lentšu “dikutollo,” leo le bolelago go utollelwa selo seo se tlago go direga nakong e tlago.

Ke’ng seo Paulo a ilego a se bona e le “legodimo la boraro”?

Ka Beibeleng, “legodimo” le ka bolela magodimo a kgonthe. (Gen. 11:4; 27:28; Mat. 6:26) Eupša lentšu “legodimo” le dirišwa ka ditsela tše dingwe. Ka dinako tše dingwe le dirišwa go šupa go mebušo ya batho. (Dan. 4:20-22) Goba le ka dirišwa go šupa go Mmušo wa Modimo.—Kut. 21:1.

Paulo ile a bona “legodimo la boraro.” Seo se be se era go re’ng? Ka dinako tše dingwe, Beibele e boeletša selo gararo bakeng sa go gatelela goba go bontšha matla. (Jes. 6:3; Hesek. 21:27; Kut. 4:8) Go bonagala ge Paulo a be a bolela ka “legodimo la boraro” a be a gatelela gore go tla ba le pušo ya maemo a godimo, e lego Mmušo wa Mesia wo kgoši ya wona e lego Jesu Kriste gotee le babušigotee le yena ba 144 000. (Bala Insight on the Scriptures, Bol. 1, matl. 1059, 1062.) Go etša ge moapostola Petro a boletše, re letetše “magodimo a mafsa” go ya ka seo Modimo a re holofeditšego sona.—2 Pet. 3:13.

Paulo o be a era go re’ng ge a be a bolela ka “paradeise”?

Lentšu “paradeise” le lona le ka bolela dilo tše dintši. Ka mohlala, (1) ge go bolelwa ka lefelo leo Adama le Efa ba bego ba dula go lona mathomong, lentšu “paradeise” le ka šupa go Paradeise ya kgonthe yeo Modimo a tlago go e tliša mo lefaseng. (2) Le ka šupa gape le go maemo a khutšo le a lethabo ao batho ba Modimo ba tlago go phela go ona lefaseng le lefsa. (3) Le gona, le ka šupa go maemo a kgahlišago kua legodimong, e lego ‘paradeise ya Modimo’ yeo go bolelwago ka yona go Kutollo 2:7.—Bala Morokami wa July 15, 2015, letl. 5. ser. 8.

Go ka direga gore go 2 Bakorinthe 12:4, ge Paulo a be a bolela ka maemo ao a mararo o be a hlalosa seo se mo diragaletšego.

Go akaretša taba ye re ka re:

“Legodimo la boraro” leo go bolelwago ka lona go 2 Bakorinthe 12:2 ke Mmušo wa Mesia woo Jesu a tla bego a laola go wona gotee le babušigotee le yena ba 144 000. Mmušo woo o emelwa ke “magodimo a mafsa.”—2 Pet. 3:13.

Ke “legodimo la boraro” ka gobane ke Mmušo wa go loka le wa maemo a godimo.

“Paradeise” yeo Paulo a ilego a “išwa go yona” ponong e swanetše go ba e le (1) Paradeise ya kgonthe yeo Modimo a tlago go e tliša mo lefaseng, (2) paradeise ya moya yeo e tla bego e le gona ka nako yeo, yeo e tlago go ba gona lefaseng ka moka go feta paradeise ya moya yeo re nago le yona gona bjale, le (3) ‘paradeise ya Modimo’ legodimong yeo e tlago go ba gona ka nako e tee le ya lefaseng le lefsa.

Ka gona, lefase le lefsa le tla dirwa ke magodimo a mafsa le lefase le lefsa. E tla ba e le tokišetšo e mpsha ya Mmušo wa Modimo wa legodimong gotee le batho bao ba tla bego ba hlankela Jehofa lefaseng la paradeise.