1-2. Ke ka baka la’ng Bakriste ka moka ba swanetše go ithuta ka tsogo ya bao ba tlago go tsošetšwa legodimong?

LEHONO batho ba bantši bao ba hlankelago Jehofa ba na le kholofelo ya go tlo phela mo lefaseng ka mo go sa felego. Eupša Bakriste ba sego kae ba tloditšwego ba na le kholofelo ya go yo phela legodimong. Bakriste bao ba nyaka go tseba gore bophelo bja bona bja legodimong bo tla ba bjang. Eupša ke ka baka la’ng bao ba nago le kholofelo ya go tlo phela mo lefaseng le bona ba swanetše go ithuta ka tsogo ya Bakriste bao ba tlago go phela legodimong? Re tlo ithuta kamoo tsogo ya bao ba yago go phela legodimong e tlago go hola bao ba nago le kholofelo ya go tlo phela mo lefaseng ka mo go sa felego. Seo se ra gore go sa šetšwe gore re na le kholofelo ya go tlo phela mo lefaseng goba ya go yo phela legodimong, re swanetše go ithuta ka tsogo ya bao ba yago go phela legodimong.

² Modimo o ile a laela ba bangwe ba barutiwa ba Jesu ba nakong e fetilego gore ba ngwale ka tsogo ya bao ba yago go phela legodimong. Moapostola Johane o ngwadile gore: “Bjale re bana ba Modimo, eupša ga se gwa tšwa go bonagatšwa seo re tlago go ba sona. Re tseba gore mohla a bonagatšwago re tla swana le yena.” (1 Joh. 3:2) Bakriste bao ba tloditšwego ga ba tsebe gore bophelo bja legodimong bo tlo ba bjang. Eupša ba tlo kgona go bona Jehofa ge ba hweditše moputso wa bona wa go yo phela legodimong. Beibele ga e re botše selo se sengwe le se sengwe ka bophelo bja legodimong, eupša go na le dilo tše dingwe tšeo moapostola Paulo a re botšago tšona. Bakriste ba tloditšwego ba tla be ba na le Kriste ge a “[fediša] mebušo ka moka le bolaodi ka moka le matla.” E bile ba tla be ba na le yena ge a fediša “lehu [e lego] lenaba leo le tlago go fedišwa mafelelong.” Mafelelong, ge dilo ka moka di beilwe ka tlase gaJesu, yena gotee le bao a tla bego a buša le bona  ba tla ipea ka tlase ga Jehofa. (1 Bakor. 15:24-28) Yeo e tla be e le nako e kgahlišago kudu! *   

3. Go Bakorinthe ba Pele 15:30-32, go dumela ga Paulo gore bahu ba tlo tsošwa go mo thušitše go dira’ng?

³ Ka ge Paulo a be a dumela gore bahu ba tlo tsošwa, seo se mo thušitše go kgotlelela mathata a mantši. (Bala 1 Bakorinthe 15:30-32.) O ile a botša Bakriste ba kua Korinthe gore: “Letšatši le letšatši ke lebeletšana le lehu.” Paulo o ngwadile le gore: “Ke lwele le dibata Efeso.” Mohlomongwe o be a bolela ka go lwa le diphoofolo tša nnete ge a be a le lefelong la dipapadi kua Efeso. (2 Bakor. 1:8; 4:10; 11:23) Goba o be a bolela ka Bajuda bao ba bego ba ganetša molaetša wa gagwe le batho ba bangwe bao ba bego ba itshwere bjalo ka “dibata.” (Dit. 19:26-34; 1 Bakor. 16:9) Le ge Paulo a ile a lebeletšana le mathata a mantši, o be a dumela gore mafelelong o tlo thabela bophelo.—2 Bakor. 4:16-18.

4. Kholofelo ya gore bahu ba tlo tsošwa e matlafaditše bjang Bakriste lehono? (Bona tlhaloso ya seswantšho sa letlakala la ka ntle.)

⁴ Lehono re phela lefaseng leo le lego kotsi. Ba bangwe ba bana babo rena ba kile ba hlaselwa ke dikebekwa. Ba bangwe ba dula moo go nago le dintwa gomme ga ba ikwe ba šireletšegile. Ba bangwe ba hlankela Jehofa dinageng tšeo modiro wa rena o thibetšwego, e bile seo se ka dira gore ba golegwe goba ba bolawe. Eupša bana babo rena bao ka moka le dikgaetšedi ba tšwela pele ba hlankela Jehofa, e bile ke mehlala e mebotse kudu go rena. Dilo tše ka moka ga di ba tšhoše ka gobane ba a tseba gore le ge ba ka bolawa, Jehofa o tshepišitše go tlo ba direla dilo tše dibotse nakong e tlago.

5. Ke kgopolo efe e kotsi yeo e ka dirago gore re se sa dumela tsogong ya bahu?

⁵ Paulo o ile a lemoša bana babo ka kgopolo e kotsi yeo ba bangwe ba bego ba na le yona. O boletše gore ba be ba re: “Ge e ba bahu ba ka se tsošwe, gona ‘a re jeng gomme re nweng, gobane gosasa re tla hwa.’” Batho ba bangwe ba be ba na le kgopolo yeo le pele ga mehla ya Paulo. Paulo a ka be a tsopotše mantšu ao a lego go Jesaya 22:13, ao a bolelago ka kgopolo yeo Baisiraele ba bego ba na le yona. Go e na le gore ba tiiše segwera sa bona le Jehofa, ba be ba nyaka go no ipshina ka bophelo. Kgopolo ye ya Baisiraele ya gore ba ipshine ka bophelo ka gobane ba ka no tsoga ba hwile, le lehono e sa le gona. Eupša Beibele e re botša ka ditlamorago tše di sa kgahlišego tšeo di ilego tša wela Baisiraele ka baka la ge ba be ba na le kgopolo yeo e fošagetšego.—2 Dikor. 36:15-20.

6. Go dumela gore bahu ba tlo tsošwa go ka re thuša bjang ge re kgetha bagwera?

⁶ Ka ge re tseba gore Jehofa o tlo tsoša bahu, seo se swanetše go re thuša ge re kgetha bagwera. Bana babo rena ba kua Korinthe ba be ba se ba swanela go gwerana le batho bao ba bego ba sa dumele gore go tlo ba le tsogo ya bahu. Re ithuta’ng tabeng ye? Re ithuta gore ge e ba re gwerana le batho bao ba se nago le taba le dilo tšeo Modimo a tshepišago go tlo re direla tšona eupša ba no nyaka go ipshina ka bophelo, le rena re ka feleletša re phela go swana le bona. Ge e ba Mokriste a gwerana le batho ba bjalo, se se ka dira gore mafelelong a se sa dira dilo ka tsela yeo e kgahlišago Jehofa. E bile bagwera bao mafelelong ba ka mo dira gore a dire sebe. Ka baka leo, Paulo o ile a lemoša Bakriste gore: “Hlaphogelwang ka tsela e lokilego gomme le se ke la itlwaetša sebe.”—1 Bakor. 15:33, 34.  

7. Go ya ka Bakorinthe ba Pele 15:35-38, ba bangwe ba be ba ka botšiša potšišo efe mabapi le tsogo ya bahu?

⁷ Bala 1 Bakorinthe 15:35-38. Motho yo a bego a nyaka gore batho ba bangwe ba se sa tshepa taba ya go tsošwa ga bahu o be a ka botšiša gore: “Bahu ba tla tsošwa bjang?” Re swanetše go nagana ka karabo ya Paulo ka gobane batho ba bantši lehono ba dumela dilo tša go se swane ka seo se diregago ka motho ka morago ga gore a hwe. Eupša Beibele yona e re ruta’ng ka taba ye?

8. Ke papišo efe yeo e ka re thušago go kwešiša tsogo ya bao ba yago go phela legodimong?

⁸ Ge motho a hlokofetše, setopo sa gagwe se a senyega. Eupša Modimo yo a bopilego legodimo le lefase a ka kgona go tsoša motho bahung a mo nea mmele wo o mo swanetšego. (Gen. 1:1; 2:7) Ge Paulo a be a bolela ka tsogo ya bao ba tlago go tsošetšwa legodimong, o dirišitše papišo e itšego go re bontšha gore ga go hlokagale gore Modimo a tsoše motho ka mmele wo a hlokofetšego ka wona. O boletše ka “thoro” goba ‘peu.’ O hlalositše gore ge peu e bjetšwe, e a gola ya fetoga sebjalo gomme sebjalo seo se fapana kgole le peu yela e bjetšwego. Paulo o dirišitše papišo yeo go bontšha gore Mmopi wa rena a ka kgona go nea motho ‘mmele kamoo a ratago ka gona.’

9. Bakorinthe ba Pele 15:39-41 e bolela’ng ka mebele yeo e sa swanego?

⁹ Bala 1 Bakorinthe 15:39-41. Paulo o boletše gore Modimo o bopile dilo ka mebele e sa swanego. Ka mohlala, mebele ya dikgomo, ya dinonyana le ya dihlapi ga e swane. Paulo o boletše le gore re kgona go bona phapano magareng ga letšatši le ngwedi, le gore “dinaledi di fapana ka letago.” Seo ke nnete le ge re sa kgone go se bona ka mahlo a rena. Borasaense ba re botša gore dinaledi ga di swane, tše dingwe ke tše dinyenyane, tše dingwe ke tše dikgolo, tše dingwe ke tše dikhwibidu, tše dingwe ke tše tšhweu, tše dingwe ke tše kheri go swana le letšatši. Paulo o boletše le gore “go na le mebele ya legodimong le mebele ya lefaseng.” O be a e ra go re’ng? O be a e ra gore  mo lefaseng re na le mebele ya nama, eupša dibopiwa tša legodimong di na le mebele ya moya go swana le ya barongwa.

10. Bao ba tlago go tsošetšwa legodimong ba tlo tsošwa ka mebele ya mohuta mang?

¹⁰ Ekwa gore Paulo o ile a reng ge a be a dira papišo ka peu le sebjalo. O itše: “Go bjalo le ka tsogo ya bahu. Mmele o bjalwa e le o senyegago, o tsošwa e le o sa senyegego.” Re a tseba gore ge motho a hlokofala setopo sa gagwe se a senyega, a boela leroleng. (Gen. 3:19) Bjale motho a ka tsošwa bjang ka mmele “o sa senyegego”? Paulo o be a sa bolele ka batho ba go swana le bao ba ilego ba tsošwa ke Eliya, Elisha le Jesu. Paulo o be a bolela ka motho yo a tlago go tsošetšwa go yo phela legodimong, yoo a tlago go tsošwa ka “mmele wa moya.”—1 Bakor. 15:42-44.

11-12. Jesu o tsošitšwe ka mmele wa mohuta mang, gona bao ba tloditšwego ba tsošwa bjang go swana le Jesu?

¹¹ Ge Jesu a be a le mo lefaseng o be a na le mmele wa nama. Eupša ka morago ga gore a tsošwe bahung, o ile a ba “moya o neago bophelo” ke moka a ya a phela legodimong. Go swana le Jesu, Bakriste ba tloditšwego ba tsošwa ka mmele wa moya ke moka ba ya ba phela legodimong. Paulo o hlalositše gore: “Go etša ge re apere seswantšho sa yo a dirilwego ka lerole, re bile re tla apara seswantšho sa wa legodimong.”—1 Bakor. 15:45-49.

¹² Go bohlokwa go gopola gore Jesu ga se a tsošwa ka mmele wa nama. Ge Paulo a be a feleletša go re botša ka taba ya tsogo, o ile a hlalosa gore ke ka baka la eng Jesu a ile a tsošwa ka mmele wa moya. O ile a re: “Nama le madi di ka se rue mmušo wa Modimo” legodimong. (1 Bakor. 15:50) Baapostola le Bakriste ba bangwe ba tloditšwego ba be ba ka se tsošetšwe legodimong ka mebele yeo e senyegago ya nama. Ba be ba tlo tsošetšwa neng legodimong? Paulo o boletše gore ba be ba ka se tsošetšwe legodimong gateetee ka morago ga gore ba hlokofale. Ge Paulo a be a ngwala lengwalo la Bakorinthe ba Pele, ba bangwe ba barutiwa ba Jesu ba be ba šetše ba “robetše  lehung.” Yo mongwe wa bona ke moapostola Jakobo. (Dit. 12:1, 2) Eupša ba bangwe ba baapostola le Bakriste ba tloditšwego ba be ba sa phela.—1 Bakor. 15:6.

13. Re be re tlo bona ka eng ge e le nako ya go ba gona ga Jesu?

¹³ Jesu le Paulo ba ile ba bolela gore go be go tlo ba le nako e bohlokwa kudu, e lego ya go ba gona ga Kriste. Ge e le nako yeo re be re tlo bona ka dintwa, ditšhišinyego tša lefase, malwetši le dilo tše dingwe gape tše mpe tšeo di diregago lefaseng ka moka. Re bone boporofeta bjo bja Beibele bo phethagala ga e sa le go tloga ka 1914. Go na le se sengwe gape sa bohlokwa seo re bego re tlo bona ka sona ge e le nako yeo. Jesu o boletše gore ditaba tše dibotse tša Mmušo wa Modimo di be di tla bolelwa “lefaseng ka moka gore e be bohlatse go ditšhaba tšohle, ke moka bofelo bo tla tla.” (Mat. 24:3, 7-14) Paulo o boletše gore “nakong ya go ba gona ga Morena,” Bakriste ba tloditšwego bao ba “robetšego lehung” ba be ba tlo tsošetšwa go yo phela legodimong.—1 Bathes. 4:14-16; 1 Bakor. 15:23.

14. Go direga’ng ka Bakriste ba tloditšwego bao ba hlokofalago nakong ye ya go ba gona ga Kriste?

¹⁴ Bakriste ba tloditšwego bao ba hlokofalago lehono, ba tsošetšwa legodimong gateetee. Seo se hlatselwa ke mantšu a Paulo ao a lego go Bakorinthe ba Pele 15:51, 52. O itše: “Re ka se robale ka moka lehung, eupša ka moka re tla fetošwa, ka nakwana, ka go ponya ga leihlo, nakong ya phalafala ya mafelelo.” Mantšu ao a Paulo ga bjale a a phethagala! Ka morago ga go tsošwa, bana babo Jesu ba tlo thaba ka mo go feletšego ka gobane ‘ka mehla ba tla be ba na le Morena.’—1 Bathes. 4:17.

15. Bakriste bao ba tlago go fetošwa “ka go ponya ga leihlo” ba tlo dira modiro ofe?

¹⁵ Beibele e re botša seo Bakriste bao ba tlago  go fetošwa “ka go ponya ga leihlo” ba yago go se dira legodimong. Jesu o ba boditše gore: “Yo a fenyago a ba a latela ditiro tša ka go fihla bofelong, ke tla mo nea matla godimo ga ditšhaba, o tla buša batho ka molamo wa tšhipi e le gore ba tle ba pšhatlaganywe go swana le dibjana tša letsopa, go etša ge ke amogetše seo go Tate.” (Kut. 2:26, 27) Ba tla latela Moetapele wa bona e lego Jesu gomme ba buša ditšhaba ka molamo wa tšhipi.—Kut. 19:11-15.

16. Ke bjang batlotšwa le batho ba bangwe bao ba botegago ba tlago go fenya lehu?

¹⁶ Go molaleng gore ge Bakriste bao ba tloditšwego ba tsošetšwa legodimong, ba fenya lehu. (1 Bakor. 15:54-57) Ka gona ba tlo kgona go thuša Jehofa le Jesu ge ba tloša bobe ka moka mo lefaseng nakong ya ntwa ya Haramagedone. Bakriste ba bantšintši ba tla ‘tšwa masetlapelong a magolo’ ke moka ba yo phela lefaseng le lefsa. (Kut. 7:14) Batho bao ba phologilego ba tlo bona lehu le fenywa gape ka tsela e nngwe ge batho ba bantšintši bao ba hlokofetšego nakong e fetilego ba tsošwa bahung. Re tlo thaba kudu go bona ge bahu ba tsošwa! (Dit. 24:15) Batho ka moka bao ba botegelago Jehofa ba tla kgona le go fenya lehu leo le tlišitšwego ke Adama. Ba tlo phela mo lefaseng ka mo go sa felego.

17. Bakorinthe ba Pele 15:58 e re kgothaletša gore re dire’ng gona bjale?

¹⁷ Mokriste yo mongwe le yo mongwe gona bjale o swanetše go leboga mantšu a kgothatšago ao Paulo a a ngwaletšego Bakriste ba Korinthe ao a bolelago ka tsogo ya bahu. Re na le mabaka a kwagalago a go diriša keletšo ya Paulo ya gore gona bjale re dire sohle seo re ka se kgonago “modirong wa Morena.” (Bala 1 Bakorinthe 15:58.) Ge re dira sohle seo re se kgonago modirong wa Morena, re ka kgodišega gore re tlo ipshina ka bophelo nakong e tlago. Bophelo e tla ba bjo bo kgahlišago go feta kamoo re naganago ka gona. Seo se tla re bontšha gore go šoma ga rena ka thata e be e se ga lefeela Moreneng.