O IKWA bjang ge o amogela lengwalo le le kgothatšago leo le tšwago go mogwera wa gago yo mogolo? Morutiwa Timotheo o ile a hwetša lengwalo la mohuta woo go tšwa go moapostola Paulo, e lego lengwalo leo gona bjale re le tsebago e le puku ya Timotheo wa Bobedi. Ga go pelaelo gore Timotheo o be a fela pelo ya go hwetša lefelo le le homotšego moo a ka balago lengwalo leo a kwa gore mogwera wa gagwe o reng. Mohlomongwe Timotheo o be a ipotšiša gore: ‘Paulo o phela bjang? Na go na le keletšo yeo a nngwaletšego yona yeo e ka nthušago dikabelong tša ka? Na keletšo ya gagwe e tla nthuša gore ke botše batho ditaba tše dibotse le go ba ruta ka tsela e kaone?’ Re tlo bona kamoo Timotheo a ilego a kgona go hwetša dikarabo tša dipotšišo tše le tše dingwe lengwalong le leo le kgothatšago. Eupša sehlogong se re tlo bolela ka keletšo e botse yeo e lego lengwalong leo.

Ge Timotheo a be a bala mantšu a mathomong a lengwalo leo, gateetee o ile a kgona go bona gore yena le Paulo ba na le segwera se sebotse kudu. Paulo o mmitša ka gore ke “ngwana yo a rategago.” (2 Tim. 1:2) Le ge Timotheo a be a na le mengwaga ya ka godimo ga e 30 ge a be a amogela lengwalo le la Paulo mo e ka bago ka 65 C.E., o be a šetše a na le nakonyana e le mogolo ka phuthegong. O be a na le mengwaga ya ka godimo ga e lesome a šoma le Paulo gomme o be a ithutile dilo tše dintši go yena.

Timotheo o swanetše go ba a ile a kgothatšega kudu ge a ekwa gore Paulo o kgotleletše diteko e bile o tšwela pele a botegetše Modimo. Paulo o be a golegilwe kua Roma gomme a le kgauswi le go bolawa. (2 Tim. 1:15, 16; 4:6-8) Timotheo o ile a bona gore Paulo o be a na le sebete ka gobane o ile a re: “Ke tšwela pele ke kgotlelela dilo tšohle.” (2 Tim. 2:8-13) Go swana le Timotheo, le rena re ka matlafatšwa ke mohlala wa Paulo wa go kgotlelela.

Paulo o ile a kgothaletša Timotheo gore a lebelele kabelo ya gagwe yeo a nago le yona ya go hlankela Modimo e le bohlokwa kudu. Paulo o be a nyaka gore Timotheo a “kgohletše bjalo ka mollo mpho ya Modimo” yeo a e neilwego. (2 Tim. 1:6) Paulo o ile a diriša lentšu la Segerika khaʹri·sma go fetolela lentšu “mpho” leo le lego temaneng ye. Lentšu le la Segerika le šupa go mpho yeo motho a e hweditšego mahala, e lego selo seo a sego a se šomela. Timotheo o be a hweditše mpho ye ge a be a kgethwa go hlankela phuthego ka tsela yeo ba bangwe ba bego ba sa hlankele ka yona.—1 Tim. 4:14.

Paulo o be a kgothaletša Timotheo gore a dire’ng ka mpho ye a e neilwego? Ge Timotheo a  be a bala polelwana yeo e rego “o kgohletše bjalo ka mollo,” a ka ba a ile a nagana ka mollo woo batho ba bego ba o gotša ka gae woo ka dinako tše dingwe o bego o feleletša e le magala a tukago. Magala ao a be a swanetše go kgohletšwa gore a ntšhe mollo le phišo. Pukuntšu e nngwe e re lediri la Segerika (a·na·zo·py·reʹo) leo Paulo a le dirišitšego mo le bolela “go tsošološa, go kgohletša le go butšwetša gore go be le mollo.” Ka gona le be le e ra gore motho o be a e ba le “mafolofolo a go dira modiro o itšego.” Ka gona, Paulo o be a eletša Timotheo gore: ‘Ntšha ka ga Tšhwene!’ Le rena lehono re swanetše go dira se se swanago, re ntšhe ka ga tšhwene ge re hlankela Jehofa.

Ge Timotheo a be a dutše a bala lengwalo leo le tšwago go mogwera wa gagwe, o ile a bona selo se sengwe gape seo se bego se tla mo thuša kabelong ya gagwe. Paulo o ile a ngwala gore: “Hlokomela boikarabelo bjo bjo bobotse ka moya o mokgethwa wo o dutšego ka go rena.” (2 Tim. 1:14) Timotheo o be a neilwe boikarabelo bofe? Temaneng ya pele ga yeo Paulo o ile a bolela ka “mantšu a phedišago,” e lego therešo yeo e lego ka Mangwalong. (2 Tim. 1:13) Ka ge Timotheo e be e le modiredi wa Mokriste, o be a swanetše go ruta bana babo le dikgaetšedi ka phuthegong therešo le go e ruta batho ba bangwe bao e bego e se Bakriste. (2 Tim. 4:1-5) Le gona Timotheo o be a kgethilwe gore e be mogolo gore a diše mohlape wa Modimo. (1 Pet. 5:2) Timotheo o be a ka kgona go hlokomela boikarabelo bjo a bo neilwego, e lego ditherešo tšeo a bego a di ruta ba bangwe, ka go ithekga ka moya o mokgethwa wa Jehofa le ka Lentšu la gagwe.—2 Tim. 3:14-17.

Le rena lehono re neilwe therešo yeo re e rutago ba bangwe. (Mat. 28:19, 20) Ga se ra swanela go lebala gore therešo ye re e rutago ba bangwe e bohlokwa gakaakang, ka gona re swanetše go dula re rapela le go ithuta Lentšu la Modimo ka mehla. (Baroma 12:11, 12; 1 Tim. 4:13, 15, 16) Go ka direga gore re na le dikabelo tše dingwe tša go hlankela re le bagolo goba re le tirelong ya nako e tletšego. Kabelo e bjalo e botse e swanetše go re dira gore re dule re ikokobeditše gomme re ithekge ka Modimo gore a re thuše. Ka gona re ka kgona go hlokomela goba go šireletša boikarabelo bjo re bo neilwego ge e ba re ithekga ka Jehofa gore a re thuše go dira bjalo.

Dikabelo tšeo Timotheo a bego a di neilwe di be di sa akaretše yena a nnoši. O be a swanetše go tlwaetša ba bangwe go dira modiro wo a bego a o dira. Ke ka baka leo Paulo a ilego a kgothaletša Timotheo gore: “Dilo tše o di kwelego go nna . . .  o di gafele banna ba botegago bao le bona ba tlago go swanelegela gabotse go ruta ba bangwe.” (2 Tim. 2:2) Paulo o ile a gopotša Timotheo gore a rute bana babo dilo tše ka moka tšeo a ithutilego tšona. Go bohlokwa kudu gore lehono molebeledi yo mongwe le yo mongwe ka phuthegong ya Bokriste a leke go dira se se swanago. Molebeledi yo mobotse ga a fihle dilo tšeo a di tsebago ka mošomo o itšego goba kabelo e itšego. Go e na le moo o ruta ba bangwe gore le bona ba kgone go dira mošomo woo. Ga a tšhabe gore ba ka tla ba tseba mošomo woo go mo feta goba go o dira kaone go mo phala. Ka baka leo, molebeledi ga a no kga ka godimo ge a ruta motho yo a itšego mošomo. O nyaka go ruta bao a ba tlwaetšago gore ba lebelele dilo ka tsela e botse e bile ba be le temogo gomme mafelelong e be Bakriste bao ba beago mohlala. Ge a ka dira bjalo, “banna ba botegago” bao a ba tlwaeditšego ba tla kgona go hola phuthego kudu.

Ga go pelaelo gore Timotheo o ile a leboga lengwalo le le kgothatšago leo Paulo a bego a mo ngwaletše lona. Re ka nagana kamoo a ilego a bala gantši le gantši keletšo yeo e bego e le lengwalong leo le go naganišiša kamoo a ka e dirišago ka gona dikabelong tša gagwe.

Le rena re nyaka go diriša keletšo yeo. Re ka e diriša bjang? Re ka ekiša Timotheo ka go šoma ka thata gore re kgohletše bjalo ka mollo mpho yeo re e neilwego, re hlokomele kabelo ya rena le go ruta ba bangwe dilo ka moka tšeo re di tsebago. Ge re ka dira bjalo re tla kgona go dira seo Paulo a ilego a se botša Timotheo ge a be a re “o phethe bodiredi bja gago ka botlalo.”—2 Tim. 4:5.