1. Go ka direga’ng ka rena ge re nyamile?

LETŠATŠI le lengwe le le lengwe re welwa ke mathata gomme re dira sohle seo re ka se kgonago go a kgotlelela. Eupša nnete ke gore ga go bonolo go lebeletšana le mathata a rena ge re nyamile. Ka gona re swanetše go gopola gore go nyama go ka dira gore re ikwe re se na mohola e bile re se ra thaba. Diema 24:10 e re: “Na o ipontšhitše o nyamile letšatšing la tlalelo? Gona matla a gago a tla hlaela.” Ge re nyamile re ka ikwa re se na matla gomme seo sa dira gore re se ke ra kgona go kgotlelela mathata.

2. Ke dilo dife tšeo di ka dirago gore re ikwe re nyamile, gona re tlo ithuta ka eng sehlogong se?

² Go na le dilo tše dintši tšeo di ka dirago gore re ikwe re nyamile. Tše dingwe tša dilo tšeo di akaretša diphošo tšeo re di dirago, mafokodi a rena goba bolwetši. Mohlomongwe re ka nyamišwa ke gore ga re hwetše kabelo e itšego ka mokgatlong yeo re kganyogago go ba le yona, goba re ka nyamišwa ke gore batho ba bantši ba tšhemong ya gabo rena ga ba thabele go kwa ditaba tše dibotse. Sehlogong se re tlo ithuta ka tše dingwe tša dilo tšeo re ka di dirago ge re ikwa re nyamile.

3. Ke’ng seo se ka re thušago ge re nyamišwa ke diphošo tša rena?

³ Go bonolo kudu gore re nyamišwe ke diphošo tšeo re di dirago. Ka baka leo, re ka no nagana gore Jehofa a ka se nyake go re bona re phela lefaseng le lefsa ka baka la diphošo tše tša rena. Go kotsi kudu go nagana ka tsela yeo. Re swanetše go ikwa bjang ka diphošo tša rena? Beibele e re botša gore batho “bohle ba dirile sebe.” Ke Jesu feela yo a sa kago a dira sebe. (Baroma 3:23) Mongwadi wa Beibele e lego Jehofa ga a dule a lebeletše diphošo tša rena goba go letela gore re phethagale. Eupša ke Tatago rena yo a re ratago le yo a nyakago go re thuša. E bile ga a re felele pelo. O a tseba gore ba bantši ba rena re leka ka thata go dira se se nepagetšego  le go leka gore re se ke ra nyamišwa ke diphošo tša rena, e bile o ikemišeditše go re thuša.—Baroma 7:18, 19.

4-5. Go ya ka Johane wa Pele 3:19, 20, ke’ng seo se thušitšego dikgaetšedi tše dingwe tše pedi gore di se sa ikwa di nyamile?

⁴ Nagana ka mohlala wa Deborah le Maria. * Ge Deborah e be e sa le ngwana, ka gabo ba be ba sa mo sware gabotse gomme seo se ile sa dira gore a ikwe a inyatša. E bile ba be ba sa ke ba mo reta. Seo se ile sa dira gore le ge a godile a se ke a itshepa. Ge a dira phošo e nyenyane feela, o bona eka ga go na selo seo a ka se kgonago. Maria le yena o be a na le bothata bjo bo swanago le bja Deborah. Ba gabo ba ile ba dira gore a ikwe a inyatša. Ka baka leo o be a ikwa eka ga a na mohola. Le ka morago ga gore a kolobetšwe o be a ikwa eka ga a swanelwe ke go ba yo mongwe wa Dihlatse tša Jehofa.

⁵ Eupša Deborah le Maria ga se ba ka ba tlogela go hlankela Jehofa. Ba thušitšwe ke eng? Ba thušitšwe ke go lahlela maima a bona go Jehofa le go mo rapela go tšwa pelong. (Ps. 55:22) Ba ile ba ithuta gore Tatago rena yo a re ratago o a tseba gore dilo tše mpe tšeo di re diragaletšego nakong e fetilego di ka dira gore re ikwe re nyamile. Ba ile ba ithuta le gore Jehofa o kgona go bona dika tše dibotse tšeo re nago le tšona le ge rena re sa nagane gore re na le tšona.—Bala 1 Johane 3:19, 20.

6. Motho yo mongwe a ka ikwa bjang ge a bušeletša phošo yeo a kilego a e dira?

⁶ Motho yo mongwe a ka ba a leka ka thata go tlogela selo se itšego se se fošagetšego. Eupša a ka bušeletša phošo yeo gape gomme seo sa dira gore a ikwe a nyamile. Nnete ke gore gantši re a nyama ge re dirile sebe. (2 Bakor. 7:10) Eupša motho ga se a swanela go nyamišwa ka mo go feteletšego ke diphošo tša gagwe moo a feleletšago a nagana gore: ‘Ga ke na mohola. Jehofa a ka se tsoge a ntebaletše.’ Seo ga se therešo e bile se ka dira gore re tlogele go hlankela Jehofa. Gopola gore Diema 24:10 e re botša gore matla a rena a tla hlaela ge re nyamile. Ka gona re swanetše go ‘lokiša ditaba le Jehofa,’ re mo rapele gomme re kgopele gore a re lebalele. (Jes. 1:18) Ge Jehofa a bona gore o tloga o itshola go tšwa pelong, o tlo go lebalela. Go oketša moo, eya go bagolo. Ba tla go thuša ba sa go felele pelo gore o lokiše segwera sa gago le Jehofa.—Jak. 5:14, 15.

7. Ke ka baka la’ng re se ra swanela go nyama ge re thatafalelwa ke go dira se se lokilego?

⁷ Jean-Luc, e lego mogolo wa kua France o botša batho bao ba nyamišago ke mafokodi a bona gore: “Motho yo Jehofa a bonago a lokile ga se yo a sa kego a dira diphošo, eupša ke yo a itsholago ge a dirile diphošo gomme a dira sohle seo a ka se kgonago gore a se ke a bušeletša diphošo  tšeo.” (Baroma 7:21-25) Ka gona o se ke wa nagana gore ga o na mohola ge o thatafalelwa ke go dira selo se itšego se se lokilego. Ka ge ka moka ga rena re dira diphošo, re hloka gore Jehofa a re bontšhe botho bja gagwe bjo bogolo, gomme o dira seo ka sehlabelo sa Jesu sa topollo.—Baef. 1:7; 1 Joh. 4:10.

8. Re ka kgopela thušo kae ge re ikwa re nyamile?

⁸ Bana babo rena le dikgaetšedi ba tla re kgothatša! Ba tla re theetša ge re nyaka motho yo re ka bolelago le yena, e bile ba tla dira gore re ikwe re le kaone. (Die. 12:25; 1 Bathes. 5:14) Joy, e lego kgaetšedi wa kua Nigeria yo a bego a nyamile o re: “Nkabe ke le kae ge e se ka bana babo rena le dikgaetšedi? Tsela yeo ba nkgothaditšego ka yona e mpontšhitše gore Jehofa o araba dithapelo tša ka. Ba nthutile gore le nna nka kgothatša bjang batho ba bangwe bao ba nyamilego.” Eupša re swanetše go dula re gopola gore ga se ka mehla moo bana babo rena le dikgaetšedi ba tlago go tseba ge re hloka kgothatšo. Ka gona, re ka swanelwa ke go ya go ngwanabo rena goba kgaetšedi yo a beago mohlala, gomme re mmotše gore re hloka thušo.

9. Psalm 41:3 le 94:19 e re kgothatša bjang?

⁹ Kgopela Jehofa gore a go thuše. Ge re babja, kudukudu ge re na le nako e telele re babja, go ka ba thata gore re se ke ra nyama. Le ge gona bjale Jehofa a ka se re fodiše ka mohlolo, o a re kgothatša le go re nea matla ao re a hlokago e le gore re kgone go kgotlelela. (Bala Psalme 41:3; 94:19.) Ka mohlala, a ka dira gore bana babo rena le dikgaetšedi ba re thuše ka mediro e itšego ya ka gae goba ba ye go re rekela dilo tšeo re di hlokago. Le gona a ka dira gore bana babo rena le dikgaetšedi ba re rapelele. Goba a ka dira gore re gopole mangwalo a kgothatšago a swanago le ao a bolelago ka kholofelo ya go tlo phela go se na bolwetši le bohloko lefaseng le lefsa.—Baroma 15:4.

10. Ke ka baka la’ng Isang a ile a se dule a nyamile ka morago ga go hwetša kotsi?

¹⁰ Isang yo a dulago kua Nigeria o ile a hwetša kotsi yeo e ilego ya mo gobatša kudu moo a ilego a golofala. Ngaka ya gagwe e ile ya mmotša gore a ka se tsoge a kgonne go sepela gape. Isang o itše: “Ke be ke nyamile e bile ke kwele bohloko kudu.” Na o ile a dula a nyamile? Aowa! O thušitšwe ke’ng? Isang o re: “Nna le mosadi wa ka ga se ra ka ra tlogela go rapela Jehofa le go ithuta Lentšu la gagwe. E bile re be re ikemišeditše go dula re leboga dilo tše dibotse tšeo re nago le tšona, go akaretša le kholofelo ya go tlo phela ka mo go sa felego lefaseng le lefsa.”

11. Cindy o ile a kgona bjang go dula a thabile nakong ya ge a be a babja kudu?

¹¹ Ngaka e ile ya botša Cindy yo a dulago kua Mexico gore o na le bolwetši bjo bošoro bjoo bo ka mmolayago. O ile a dira’ng gore a kgone go kgotlelela? Ge a be a le sepetlele, o ile a ipotša gore o nyaka gore letšatši le lengwe le le lengwe a botše batho ka Beibele. O ngwadile gore: “Seo se ile sa nthuša gore ke nagane ka batho ba bangwe go e na le go dula ke naganne ka ophareišene yeo ke e dirilego, kamoo ke kwago bohloko ka gona le kamoo ke babjago ka gona. Ge ke be ke boledišana le dingaka le baoki, ke be ke ba botšiša ka ba malapa a bona. Ka morago ga moo ke be ke ba botšiša gore ke ka baka la eng ba kgethile mošomo o thata gakaaka. Ke moka go be go e ba bonolo go bona gore ke taba efe yeo e ka kgomago dipelo tša bona. Ba bantši ba bona ba ile ba bolela gore ga se gantši molwetši a ba botšiša gore ba tsogile bjang. E bile ba ile ba nteboga gore ke na le taba le bona. Ba bangwe ba bona ba ile ba ba ba nnea diaterese tša bona goba dinomoro tša bona tša founo. Ka gona nakong ye e thata kudu bophelong bja ka, Jehofa o ile a dira gore ke ikwe ke thabile ka tsela yeo le nna e ilego ya mmakatša!”—Die. 15:15.

12-13. Batho ba bangwe bao ba babjago goba ba tšofetšego ba ile ba kgona bjang go bolela ditaba tše dibotse, gona mafelelo e bile afe?

 ¹² Batho bao ba babjago goba bao ba tšofetšego ba ka ikwa ba nyamile ka ge ba sa kgone go fetša nako e ntši ba bolela ditaba tše dibotse. Eupša ba bantši ba kgonne go hwetša ditsela tša go bolela ditaba tše dibotse. Ka mohlala, kgaetšedi Laurel wa kua United States, o ile a swanelwa ke go fetša mengwaga e 37 a le ka gare ga motšhene woo o bego o mo thuša go hema! Le gona o be a na le kankere, a dirile diophareišene tše mmalwa e bile a na le bolwetši bja letlalo. Eupša mathata a a magolo ao a bego a ena le wona ga se a ka a mo dira gore a tlogele go botša ba bangwe ditaba tše dibotse. O be a bolela le baoki le bašomi ba bangwe ba sepetlele bao ba bego ba etla ka legaeng la gagwe. Mafelelo a seo e bile afe? O ile a kgona go thuša batho ba 17 gore e be Dihlatse tša Jehofa! *

¹³ Richard, e lego mogolo wa kua France, o na le tšhišinyo e botse yeo e ka thušago bao ba sa kgonego go tšwa ka gae goba bao ba dulago magaeng a batšofadi. O re: “Ke šišinya gore ba bee tše dingwe tša dipuku tša rena le dimakasine moo batho ba ka kgonago go di bona. Ge batho ba di bona ba tlo botšiša ka tšona. Se se ka kgothatša bana babo rena le dikgaetšedi bao ba se sa kgonago go ya ka ntlo le ntlo.” Le gona bao ba sa kgonego go tšwa ka gae ba ka botša ba bangwe ditaba tše dibotse ka go ba ngwalela mangwalo le go ba founela.

14. Kgoši Dafida o re beetše mohlala ofe o mobotse?

¹⁴ Go na le mabaka a mantši ao a ka dirago gore re se ke ra hwetša kabelo yeo re e kganyogago ka mokgatlong wa Jehofa. Ka mohlala, re ka ba re tšofetše, goba re babja goba go na le mabaka a mangwe ao a dirago gore re se ke ra hwetša kabelo yeo. Ge e ba re le boemong bjo, re ka ithuta se sengwe mohlaleng wa Kgoši Dafida. Ge Modimo a be a mmotša gore a ka se mo dumelele go aga tempele, e lego selo seo a bego a tloga a nyaka go se dira, o ile a thekga yoo Jehofa a bego a mo kgethile go aga tempele. Le gona Dafida o ile a ntšha moneelo o montši kudu go thekga modiro woo wa go aga tempele. Ruri Dafida o re beetše mohlala o mobotse kudu!—2 Sam. 7:12, 13; 1 Dikor. 29:1, 3-5.

15. Ngwanabo rena Hugues o ile a dira eng gore a se ke a dula a nyamile?

¹⁵ Hugues e lego ngwanabo rena wa kua France, o ile a tlogela go hlankela e le mogolo ka baka la ge a be a babja. Le gona o be a se sa kgona go dira le mediro e menyenyane ya ka ntlong. O ngwadile gore: “Mathomong ke ile ka ikwa ke se na mohola e bile ke nyamile kudu. Eupša ka moragonyana ke ile ka bona gore go bohlokwa kudu gore ke tlogele go nyamišwa ke dilo tšeo ke se sa kgonago go di dira. Seo se ile sa dira gore  ke thabele seo ke bego ke sa dutše ke kgona go se dira go hlankela Jehofa. Ke ikemišeditše gore ke se ke ka tlogela go hlankela Jehofa. Ke tla tšwela pele ke elwa go swana le Gideone le banna ba gagwe ba 300 bao ka moka ga bona ba bego ba lapile!”—Baa. 8:4.

16. Re ka ithuta’ng mohlaleng wa barongwa?

¹⁶ Barongwa bao ba botegago ba re beetše mohlala o mobotse kudu. Ka mohlala, Jehofa o kile a kgopela barongwa ditšhišinyo tša kamoo ba ka dirago Kgoši Ahaba lešilo. Barongwa ba mmalwa ba ile ba nea ditšhišinyo tša bona. Eupša Modimo o ile a kgetha morongwa o tee feela gomme a mmotša gore tšhišinyo ya gagwe e tla šoma. (1 Dikg. 22:19-22) Na barongwa ba bangwe ba botegago ba ile ba nyama, mohlomongwe ba ipotšiša gore, ‘Ke ka baka la’ng re itshenyeditše nako?’ Ga go bonagale ba ile ba dira bjalo. Barongwa ba tloga ba ikokobeditše e bile ba nyaka gore go tumišwe Jehofa.—Baa. 13:16-18; Kut. 19:10.

17. Re swanetše go dira’ng ge re ikwa re nyamile ka ge re sa hwetše dikabelo tše itšego ka mokgatlong?

¹⁷ O se ke wa lebala gore tokelo e kgolokgolo yeo re nago le yona ke ya go bitšwa ka leina la Jehofa le go botša ba bangwe ka Mmušo wa gagwe. Dikabelo tšeo re di hwetšago re ka se dule re na le tšona. Eupša ga se tšona di dirago gore re be bohlokwa go Modimo. Selo seo se dirago gore Jehofa le bana babo rena le dikgaetšedi ba re rate, ke ge re na le boikokobetšo. Ka gona rapela Jehofa gomme o mo kgopele gore a go thuše gore o dule o ikokobeditše. Nagana ka mehlala ka moka e mebotse ya bahlanka ba Jehofa bao ba ikokobeditšego bao go bolelwago ka bona ka Beibeleng. Ikemišetše go hlankela bana beno ka tsela le ge e le efe yeo o ka kgonago.—Ps. 138:6; 1 Pet. 5:5.

18-19. O ka dira’ng gore o thabele go botša batho ditaba tše dibotse le ge batho ba tšhemong ya gabo lena ba sa thabele?

¹⁸ Na o kile wa ikwa o nyamile ka ge batho ba tšhemong ya gabo lena ba sa thabele, goba ka ge le hwetša batho ba sego kae feela ba le gona ka magaeng a bona? Ge e ba go le bjalo, o ka dira’ng gore o dule o thabile goba gore o thabe kutšwanyana? Go na le ditšhišinyo tše dibotse ka lepokising leo le rego, “ Kamoo o ka Kaonefatšago Tsela Yeo o Bolelago Ditaba tše Dibotse.” Le gona go bohlokwa gore o be le pono e botse ka modiro wo wa go bolela ditaba tše dibotse. Seo se ra go re’ng?

¹⁹ Dula o gopola gore lebaka le legolo la gore re bolele ditaba tše dibotse ke gore re thuše batho go tseba leina la Modimo le go ba botša ka Mmušo  wa gagwe. Jesu o ile a bolela ka mo go kwagalago gore ke batho ba sego kae feela bao ba tlago go hwetša tsela e išago bophelong bjo bo sa felego. (Mat. 7:13, 14) Ge re botša ba bangwe ditaba tše dibotse, re šoma gotee le Jehofa, Jesu le barongwa. (Mat. 28:19, 20; 1 Bakor. 3:9; Kut. 14:6, 7) Jehofa o gogela go yena batho bao ba nyakago go mo hlankela. (Joh. 6:44) Ka gona ge e ba gona bjale motho a sa nyake go re theetša ge re bolela le yena ditaba tše dibotse, go ka direga gore nakong e tlago a tle a re theetše.

20. Jeremia 20:8, 9 e re ruta’ng mabapi le seo re ka se dirago ge re nyamile?

²⁰ Go na le dilo tše dintši tšeo re ka ithutago tšona go moporofeta Jeremia. Batho bao a bego a laetšwe gore a yo ba botša molaetša wa Modimo, ba be ba sa mo theetše. Ba be ba mo kwera le go mo roga “letšatši ka moka.” (Bala Jeremia 20:8, 9.) Ka nako e nngwe Jeremia o be a lapile kudu moo e bile a bego a nyaka go tlogela go botša batho molaetša wa Modimo. Eupša ga se a ka a tlogela. Ka baka la’ng? Ka gobane “lentšu la Jehofa” le be le swana le mollo ka gare ga Jeremia, a sa kgone go le kgotlelela! Le rena re ka swana le Jeremia ge e ba re ithuta Lentšu la Modimo letšatši le letšatši e bile re naganišiša ka seo re ithutilego sona. Ge re ka dira bjalo re tlo thaba kutšwanyana e bile batho ba bantši tšhemong ba ka re theetša.—Jer. 15:16.

21. Re ka dira’ng gore re se ke ra dula re nyamile, go sa šetšwe gore seo se bakwa ke’ng?

²¹ Deborah yo re boletšego ka yena pejana o re: “Sathane o diriša maikwelo a go nyama e le sebetša se segolo kudu go lwa le rena.” Eupša Jehofa Modimo o na le matla kudu go feta Sathane le dibetša tša gagwe ka moka tšeo a di dirišago. Ka gona go sa šetšwe gore o nyamišwa ke eng, kgopela Jehofa gore a go thuše. O tla go thuša ge o nyamišwa ke diphošo tšeo o di dirilego le mafokodi a gago. Le gona a ka se go tlogele ge o babja. E bile o tla go thuša gore o be le pono e botse ka dikabelo tšeo re di hwetšago ka mokgatlong wa gagwe. O tla go thuša le gore o thabele go botša batho ditaba tše dibotse. Sa bohlokwa le go feta, rapela Jehofa gomme o mmotše kamoo o ikwago ka gona. O tla go thuša gore o se sa ikwa o nyamile.