GANTŠI batho ba nyaka go thaba bophelong. Eupša mehleng ye ya bofelo batho ka moka ba na le mathata ao go lego “thata go lebeletšana le [ona.]” (2 Tim. 3:1) Dilo tša go swana le go se swarwe gabotse, go babja, go hloka mošomo, go hlokofalelwa ke motho yo o mo ratago, goba dipelaelo le go nyama, di ka dira gore batho ba bangwe ba se thabe bophelong. Gaešita le bahlanka ba Modimo ba ka ikwa ba se ba thaba. Ge e ba le wena o ikwa o se wa thaba, o ka dira’ng gore o boele o thabe?

E le gore re arabe potšišo ye, re swanetše go kwešiša pele gore lethabo la kgonthe ke’ng, le gore ba bangwe ba kgonne bjang go dula ba thabile le ge ba na le mathata. Ka morago re tlo kwa gore ke dilo dife tšeo re ka di dirago gore re dule re thabile.

Ga se ra swanela go nagana gore lethabo la kgonthe ke go no ikwa o thabile ka nakwana. Ka mohlala, ge motho a tagilwe a ka sega kudu, eupša ge bjala bjoo bo tšwele ga a sa sega ka gobane mathata a gagwe ka moka a sa le gona. Lethabo la gagwe e be e se la kgonthe, eupša e be e no ba la nakwana.​—Die. 14:13.

Go fapana le seo se hlalositšwego ka mo godimo, lethabo la kgonthe ke maikwelo a ka pelong ao re bago le ona ge re hwetša selo se sebotse seo re bego re se letetše. Lethabo la kgonthe le dula le le gona le ge dilo di sa go sepelele gabotse. (1 Bathes. 1:6) Ge e le gabotse, motho a ka dula a thabile le ge a nyamišitšwe ke selo se itšego. Ka mohlala, baapostola ba ile ba thaba le ge ba bethetšwe gore ba be ba botša batho ba bangwe ka Kriste. Beibele e re: “Ba tloga pele ga Sanhedrine ba thabile gobane ba be ba tšerwe e le ba ba swanelwago ke go hlomphollwa ka baka la leina la gagwe.” (Dit. 5:41) Go molaleng gore ba be ba se ba thabišwa ke go bethwa. Eupša ka ge e be e le bahlanka ba Modimo ba be ba thabišwa ke gore ba ile ba dula ba mmotegela le ge go be go le thata.

Ga re belegwe re na le lethabo la mohuta woo, e bile ga le no itlela. Ka baka la’ng? Ka gobane lethabo la kgonthe ke seka seo se enywago ke moya o mokgethwa wa Modimo. Moya o mokgethwa o ka re thuša gore re be le “semelo se sefsa,” e lego semelo seo se dirago gore re thabe. (Baef. 4:24; Bagal. 5:22) Go oketša moo, ge re thabile re ka kgona go lebeletšana le mathata a rena.

Jehofa o be a se a rera gore mo lefaseng go be le dilo tše mpe tšeo re di bonago matšatši a. Eupša le ge mo lefaseng go direga dilo tše mpe, Jehofa o sa dutše a thabile. Lentšu la Modimo le re: “Matla le lethabo di lefelong la gagwe.” (1 Dikor. 16:27) Go oketša moo, Jehofa o a thaba ge a bona dilo tše dibotse tšeo bahlanka ba gagwe ba di dirago.​—Die. 27:11.

Le rena re ka ekiša Jehofa ka go se tshwenyege kudu ge dilo di sa re sepelele gabotse. Go e na le go nagana kudu ka mathata a rena gomme a re tšeela lethabo, re swanetše go thabela dilo tše dibotse tšeo re nago le tšona gona  bjale gomme re letele Jehofa ka go se fele pelo gore a tle a lokiše dilo. *

Ka Beibeleng go na le mehlala ya batho ba bantši bao ba ilego ba dula ba thabile le ge ba be ba na le mathata. Aborahama o ile a dula a thabile le ge bophelo bja gagwe bo be bo le kotsing gotee le ge batho ba bangwe ba be ba mmakela mathata. (Gen. 12:10-20; 14:8-16; 16:4, 5; 20:1-18; 21:8, 9) Ke’ng se se mo thušitšego go dula a thabile? O ile a nagana ka kholofelo yeo a bego a na le yona ya go phela lefaseng le lefsa ka tlase ga pušo ya Mesia. (Gen. 22:15-18; Baheb. 11:10) Jesu o itše: “Aborahama tatago lena o ile a thabišwa kudu ke kholofelo ya go bona mehla ya ka.” (Joh. 8:56) Le rena re ka ekiša Aborahama ka go naganišiša ka lethabo leo re tlago go ba le lona lefaseng le lefsa.​—Baroma 8:21.

Go no swana le Aborahama, Paulo le Silase le bona ba be ba na le tumelo dikholofetšong tša Modimo. Ba ile ba dula ba thabile go sa šetšwe mathata ao ba bego ba na le ona. Ka mohlala, ka morago ga gore ba bethwe o šoro gomme ba lahlelwe kgolegong, “gare ga bošego Paulo le Silase ba be ba rapela gomme ba tumiša Modimo ka kopelo.” (Dit. 16:23-25) Ba ile ba kgona go kgotlelela go tlaišwa ka gobane ba be ba dula ba nagana ka dikholofetšo tša Jehofa. Le gona ba ile ba thabišwa ke go tseba gore ba be ba tlaišetšwa go ba balatedi ba Kriste. Le rena re ka ekiša Paulo le Silase ge re dula re nagana ka ditšhegofatšo tšeo di tlišwago ke go Hlankela Jehofa ka potego.​—Bafil. 1:12-14.

Lehono, go na le bana babo rena bao ba dulago ba thabile le ge ba na le mathata. Ka mohlala, ka November 2013 ledimo le matla leo le bitšwago Haiyan le ile la hlasela sehlakahlaka sa Philippines gomme la senya dintlo tše 1 000 tša Dihlatse tša Jehofa. George yoo a ilego a loba ntlo ya gagwe ka baka la ledimo leo, o itše: “Bana babo rena ba thabile go sa šetšwe masetlapelo ao a ba wetšego. Ga ke na mantšu a go hlalosa kamoo re thabilego ka gona.” Le rena re ka kgona go dula re thabile le ge re wetšwe ke mathata ge feela re naganišiša ka dilo tšeo Jehofa a re diretšego tšona e bile re di leboga. Jehofa o re neile dilo dife tše dingwe tšeo di re dirago gore re dule re thabile?

Go tseba gore Modimo ke Mogwera wa rena go a re thabiša. E no nagana ka taba ye: Re a tseba gore Mmuši wa legodimo le lefase ke Tatago rena, Modimo wa rena le Mogwera wa rena!​—Ps. 71:17, 18.

Le gona re leboga bophelo bjo Jehofa a re neilego bjona le dilo tšeo a re neilego tšona gore re ipshine ka bjona. (Mmo. 3:12, 13) Ka ge a re batameditše kgauswi le yena, re tseba thato ya gagwe le go phela ka go dumelelana le yona. (Bakol. 1:9, 10) Lega go le bjalo, batho ba bantši ga ba tsebe morero wa bophelo. Ge Paulo a be a gatelela kamoo re fapanego le batho bao, o ngwadile gore: “‘Leihlo ga se la di bona le tsebe ga se ya di kwa, le pelong ya motho ga se tša hlathwa. Gobane ke rena bao Modimo a re utolletšego tšona ka moya wa gagwe.’” (1 Bakor. 2:9, 10) Na ga re thabišwe ke go tseba merero ya Jehofa le thato ya gagwe?

Nagana ka selo se sengwe seo Jehofa a se diretšego bahlanka ba gagwe. Na ga re thabišwe ke gore Jehofa o re lebalela dibe tša rena? (1 Joh. 2:12) Ka ge Modimo a na le kgaugelo re na le kholofelo e tiilego ya gore lefase le lefsa le kgauswi kudu. (Baroma 12:12) Le mo nakong ye, re hlankela Jehofa re na le bana babo rena ba bantši bao a re neago bona. (Ps. 133:1) Lentšu la Modimo le re kgonthišetša gore Jehofa o re šireletša go Sathane le batemona ba gagwe. (Ps. 91:11) Ge re ka naganišiša ka ditšhegofatšo tše ka moka tšeo di tšwago go Jehofa, lethabo la rena le tlo oketšega gomme ra dula re thabile.​—Bafil. 4:4.

Na go a kgonega gore Mokriste yo a thabilego a oketše lethabo la gagwe? Jesu o itše:  “Ke le boditše dilo tše gore lethabo la ka le be go lena gomme lethabo la lena le tlatšwe.” (Joh. 15:11) Ruri mantšu a a bontšha gore re ka kgona go oketša lethabo la rena. Re ka swantšha lethabo la rena le go kgohletša mollo. Ge e ba re nyaka gore mollo o tuke le go feta re swanetše go bešeletša dikgong. Ka mo go swanago e le gore re oketše lethabo la rena re swanetše go iphepa moyeng kutšwanyana. Gopola gore moya o mokgethwa wa Modimo o re thuša go oketša lethabo. Ka baka leo, lethabo la gago le tla oketšega ge e ba o dula o kgopela moya wa Jehofa gomme o naganišiša ka seo o se balago ka lentšung la gagwe e lego Beibele.​—Ps. 1:1, 2; Luka 11:13.

Re swanetše go oketša lethabo la rena ka go dula re swaregile ka go dira dilo tša Jehofa. (Ps. 35:27; 112:1) Ka baka la’ng? Ka baka la gore re bopetšwe gore re “[boife] Modimo wa therešo gomme [re] lote ditaelo tša gagwe. Ka gobane se ke sohle seo motho a tlamegilego go se dira.” (Mmo. 12:13) Ka mantšu a mangwe re bopetšwe gore re dire thato ya Modimo. Ka gona, ge re hlankela Jehofa lethabo le tlo no itlela. *

Ge re dutše re oketša lethabo la rena re tlo holega kudu. Ka mohlala, re tlo thabiša Tatago rena wa legodimong ge re dutše re mo hlankela, gaešita le ge re na le mathata. (Doit. 16:15; 1 Bathes. 5:16-18) Le gona, ka ge re le batho bao ba thabilego, re ka se etiše dilo tše di bonagalago pele. Go e na le moo re tlo leka ka matla gore re thekge Mmušo wa Modimo. (Mat. 13:44) Ge re bona maiteko a rena a go thekga Mmušo wa Modimo a atlega, re tlo thaba le go feta le gona re tla thuša le batho ba bangwe gore le bona ba thabe.​—Dit. 20:35; Bafil. 1:3-5.

Ka morago ga gore monyakišiši yo mongwe wa Yunibesithing ya Nebraska kua United States a dire dinyakišišo tše mmalwa ka tša maphelo, o ile a ngwala gore: “Ge e ba gona bjale o thabile e bile o kgotsofetše, go na le kgonagalo e ntši ya gore le nakong e tlago o tšwele pele o thabile e bile o phetše gabotse.” Mantšu a monyakišiši yo a dumelelana le seo Beibele e se bolelago ge e re: “Pelo e thabilego e etša sehlare se se fodišago.” (Die. 17:22) Ee, ge o dutše o oketša lethabo la gago, seo se ka dira gore o phele gabotse mmeleng.

Ka gona go sa šetšwe gore re phela mehleng e thata, re ka kgona go dula re thabile e le ka kgonthe. Lethabo leo le tlišwa ke ge re kgopela moya o mokgethwa ka thapelo, ge re ithuta ka Jehofa le ge re naganišiša ka Lentšu la gagwe. Le gona, re ka oketša lethabo la rena ge re naganišiša ka ditšhegofatšo tšeo Jehofa a re neago tšona gona bjale, ge re ekiša tumelo ya ba bangwe le ge re dira thato ya gagwe. Ke moka le rena re tla kgona go bolela mantšu ao a lego go Psalme 64:10 ao a rego: “Moloki o tla thabela Jehofa gomme o tla tšhabela go yena.”