1-2. (a) Beibele e hlalosa Moshe bjang, gona o ile a dira’ng? (b) Re na le lebaka lefe la go ba boleta?

BEIBELE ge e hlalosa Moshe e re “e be e le motho yo boletaleta go feta batho bohle bao ba bego ba phela lefaseng.” (Num. 12:3) Na se se ra gore o be a fokola, a tšhaba go dira diphetho e bile a boifa go se dumelelane le batho ba bangwe? Batho ba bantši ba ka hlalosa motho yo boleta ka tsela yeo. Eupša seo ga se therešo. Moshe o be a sa fokole, a sa tšhabe go dira diphetho e bile e le mohlanka wa Modimo yo a nago le sebete. Jehofa o ile a mo thuša go ya go mmuši yo matla wa Egipita, a mo thuša go eta pele batho ba 3 000 000 go phatša leganateng le go thuša setšhaba sa Isiraele go fenya manaba a sona.

² Lehono ga re lebeletšane le ditlhohlo tšeo Moshe a ilego a lebeletšana le tšona, eupša letšatši le letšatši re dirišana le batho goba re lebeletšana le maemo ao a ka dirago gore go be thata go dula re le boleta. Lega go le bjalo, re na le lebaka le lebotse kudu la gore re be le seka se. Jehofa o holofetša gore “ba boleta . . . e tla ba beng ba lefase.” (Ps. 37:11) Na o ka re o motho yo boleta? Na ba bangwe ba ka re o boleta? Pele re ka araba dipotšišo tše tše bohlokwa, re swanetše go tseba gore go ba boleta go bolela eng.

3-4. (a) Re ka swantšha boleta le eng? (b) Ke dika dife tše nne tšeo re swanetšego go ba le tšona gore re be ba boleta, gona ka baka la’ng?

³ Re ka swantšha boleta * le seswantšho se sebotse. Bjang? Go  swana le ge motho yo a thalago seswantšho a kopanya mebala e sa swanego gore a thale seswantšho, re swanetše go ba le dika tše mmalwa tše dibotse e le gore re be ba boleta. Tše dingwe tša dika tšeo ke boikokobetšo, go kwa, go ba botho le go ba le sebete. Ke ka baka la’ng re swanetše go ba le dika tšeo ge re nyaka go kgahliša Jehofa?

⁴ Ke feela batho ba boleta bao ba ikokobeletšago go dira thato ya Modimo. Thato ya Modimo e akaretša gore re be ba boleta. (Mat. 5:5; Bagal. 5:23) Re galefiša Sathane ge re dira thato ya Modimo. Ka gona, gaešita le ge re ikokobeditše e bile re le ba boleta, batho ba bantši lefaseng le la Sathane ba re hloile. (Joh. 15:18, 19) Ka baka leo, re swanetše go ba le sebete e le gore re lwe le Sathane.

5-6. (a) Ke ka baka la’ng Sathane a sa rate batho ba boleta? (b) Re tlo araba dipotšišo dife?

⁵ Ge motho a se boleta o a ikgantšha, ga a kgone go laola kgalefo e bile ga a kwe Jehofa. Sathane o ka yona tsela yeo. Ke ka baka leo a sa ratego batho ba boleta. Ba bontšha gore ke yo mobe gakaakang ka ge ba na le dika tšeo yena a se nago tšona. Go feta moo, ba hlatsela gore Sathane o na le maaka. Ka baka la’ng? Ka gobane go sa šetšwe gore Sathane o bolela eng goba o dira eng, a ka se kgone go thibela batho ba boleta go hlankela Jehofa!—Jobo 2:3-5.

⁶ Ke neng moo go lego thata go ba boleta? Gona ke ka baka la’ng re swanetše go tšwela pele re eba ba boleta? E le gore re arabe dipotšišo tše, re tlo bolela ka mohlala wa Moshe, wa Baheberu ba bararo bao ba bego ba le bothopša Babilona le wa Jesu.

7-8. Moshe o ile a arabela bjang ge ba bangwe ba be ba sa mo hlomphe?

⁷ Ge re neilwe boikarabelo bja go etelela pele ba bangwe: Go ka ba thata kudu gore bao ba nago le boikarabelo ba dule ba le boleta, kudukudu ge motho yo mongwe yo ba mo okamelago a sa ba hlomphe goba a re ga ba dire diphetho tše dibotse. Na seo se kile sa go diragalela? O tla dira’ng ge e ba yo mongwe ka lapeng la geno a ka itshwara ka tsela yeo? O tla arabela bjang? Bona kamoo Moshe a ilego a swaragana le boemo bjo ka gona.

⁸ Jehofa o ile a kgetha Moshe gore e be moetapele wa Baisiraele gomme a mo nea le tokelo ya go ngwalela setšhaba seo melao yeo se bego se tla phela ka yona. Go be go le molaleng  gore Jehofa o be a thekga Moshe. Lega go le bjalo, kgaetšedi ya Moshe e lego Miriamo le morwarragwe Arone ba ile ba bolela gampe ka yena gomme ba re ga se a kgona go kgetha mosadi. Banna ba bangwe bao ba nago le maikarabelo a swanago le a Moshe ba ka ba ba ile ba galefa gomme ba leka go itefeletša, eupša Moshe ga se a ka dira bjalo. O ile a se kgopišege kapela. Le gona o ile a ba a kgopela Jehofa gore a tloše lephera leo a bego a šetše a otlile Miriamo ka lona. (Num. 12:1-13) Ke ka baka la’ng Moshe a ile a itshwara ka tsela yeo?

9-10. (a) Jehofa o ile a thuša Moshe go kwešiša’ng? (b) Dihlogo tša malapa le bagolo ba ka ithuta’ng go Moshe?

⁹ Moshe o be a dumeletše Jehofa gore a mo rute. Mengwaga e 40 pele ga moo, Moshe o be a se boleta ge a be a sa dula ka mošate wa kua Egipita. Ge e le gabotse, o be a fela pelo kudu moo a kilego a bolaya monna yoo a bego a re ga se a dira toka. Moshe o be a nagana gore Jehofa o be a tla dumelelana le ditiro tša gagwe. Jehofa o ile a fetša mengwaga e 40 a thuša Moshe go kwešiša gore o be a sa hloke sebete feela gore a etelele Baisiraele pele, eupša o be a hloka le go ba boleta. Le gona e le gore a be boleta, o be a swanetše go ikokobetša, a kwe Jehofa e bile a be botho. O ile a ithuta thuto yeo gabotse gomme a feleletša e le moetapele yo mobotse kudu.—Ek. 2:11, 12; Dit. 7:21-30, 36.

¹⁰ Lehono, dihlogo tša malapa le bagolo ba swanetše go ekiša Moshe. Ge batho ba bangwe ba sa go hlomphe, o se ke wa kitimela go kgopišega. Ikokobetše gomme o amogele diphošo tša gago. (Mmo. 7:9, 20) Ka boikokobetšo latela tlhahlo yeo Jehofa a re neilego yona mabapi le kamoo re ka rarollago mathata. Le gona ka mehla o arabe ba bangwe ka boleta. (Die. 15:1) Dihlogo tša malapa le bagolo bao ba arabelago ka tsela yeo ba kgahliša Jehofa, ba thuša gore go be le khutšo e bile ba re beela mohlala wa kamoo re ka bago ba boleta.

11-13. Baheberu ba bararo ba re beetše mohlala ofe?

¹¹ Ge re tlaišwa: Ke go tloga kgale kudu babuši ba tlaiša batho ba Jehofa. Ba ka re thomeletša ka melato e mentši yeo re sa kago ra e dira, eupša lebaka le legolo leo ba re tlaišago ke gore re kgetha go ‘kwa Modimo e le Mmuši go e na le go kwa batho.’ (Dit. 5:29) Re ka kwerwa, ra golegwa goba ra ba ra bethwa. Eupša ka thušo ya Jehofa, re ka se itefeletše, re tla no dula re išitše maswafo fase.

¹² Ela hloko mohlala wa Hanania, Mishaele le Asaria, e lego Baheberu ba bararo bao ba ilego ba išwa bothopša Babilona. * Kgoši ya Babilona e ile ya ba laela gore ba khunamele seswantšho se segolo sa gauta. Ba ile ba hlalosetša kgoši ka boleta gore ke ka baka la eng ba ka se  rapele seswantšho seo. Ba ile ba dula ba ekwa Modimo le ge kgoši e be e ba tšhošetša ka go ba fiša sebešong seo se tukago mollo. Gateetee Jehofa o ile a kgetha go phološa banna bao, eupša ga se ba ka ba no ipotša gore Jehofa o tla ba phološa ka mohlolo. Go e na le moo, ba be ba ikemišeditše go amogela selo le ge e le sefe seo Jehofa a bego a ka se dumelela gore se direge. (Dan. 3:1, 8-28) Ba ile ba bontšha gore ruri batho ba boleta ba na le sebete. Ga go na kgoši, tšhošetšo le kotlo le ge e le efe yeo e ka dirago gore re tlogele go hlankela Jehofa a nnoši goba ‘go ineela go yena ka mo go feletšego.’—Ek. 20:4, 5.

¹³ Re ka ekiša bjang Baheberu ba ba bararo ge re lekwa gore re se sa botegela Modimo? Re swanetše go ikokobetša gomme re tshepe gore Jehofa o tla re hlokomela. (Ps. 118:6, 7) E bile re swanetše go araba ka boleta le ka tlhompho batho bao ba re latofatšago ka gore re dirile dilo tše mpe. (1 Pet. 3:15) Le gona re gana go dira selo le ge e le sefe seo se tla senyago tswalano ya rena le Tatago rena yo a re ratago.

14-15. (a) Go ka direga’ng ge re gateletšegile? (b) Go ya ka Jesaya 53:7, 10, ke ka baka la’ng re ka re Jesu ke mohlala o mobotse kudu wa motho yo a ilego a dula a le boleta le ge a be a gateletšegile?

¹⁴ Ge re gateletšegile: Ka moka ga rena re na le go ikwa re gateletšegile ka baka la mabaka a fapafapanego. Re ka ba re ile ra ikwa re gateletšegile pele re ka ngwala moleko sekolong goba pele re ka dira mošomo o itšego mošomong. Goba re ka ikwa re gateletšegile ge re nagana ka kalafo e itšego yeo re tlago go e diriša. Go thata kudu go ba boleta ge re gateletšegile. Dilo tšeo gantši re se nago bothata le tšona di ka thoma go re tena. Re ka bolela mantšu a go hlaba goba ra swara ba bangwe makgwakgwa. Ge e ba o kile wa ikwa o gateletšegile, nagana ka mohlala wa Jesu.

¹⁵ Dikgweding tše mmalwa pele Jesu a ka bolawa, o be a gateletšegile kudu. O be a tseba gore o tlo bolawa le gore o tlo tlaišega o šoro. (Joh. 3:14, 15; Bagal. 3:13) Yona nakong yeo, o ile a bolela gore o be a tlaletšwe kudu goba a gateletšegile. (Luka 12:50) Le gona matšatšinyana pele ga lehu la gagwe, Jesu o itše: “Moya wa ka o tshwenyegile.” Re kgona go kwa gore o be a ikokobeditše e bile a ekwa Modimo ge a be a mo tšhollela maikwelo a gagwe thapelong. O ile a re: “Tate, mphološe nakong ye. Lega go le bjalo, ke ka baka leo ke tlilego nakong ye. Tate tagafatša leina la gago.” (Joh. 12:27, 28) Ge nako ya gore Jesu a bolawe e be e fihlile, ka sebete o ile a ikgafela go manaba a Modimo ao a ilego a mo tlaiša le go mmolaya ka tsela e sehlogo kudu. Gaešita le ge Jesu a be a gateletšegile e bile a tlaišega, ka boikokobetšo o ile a dira thato ya Modimo. Ruri re ka bolela re kgodišegile gore Jesu ke mohlala o mogolo kudu wa motho yo a ilego a dula a le boleta le ge a be a gateletšegile!—Bala Jesaya 53:7, 10.

16-17. (a) Bagwera ba Jesu ba ile ba dira’ng seo se ka bago se ile sa dira gore Jesu a thatafalelwe ke go bontšha boleta? (b) Re ka ekiša Jesu bjang?

¹⁶ Bošegong bja mafelelo pele Jesu a ka bolawa, bagwera ba gagwe ba bagolo ba ile ba dira selo seo se bego se ka dira gore go be thata gore Jesu a be boleta. Nagana gore Jesu o be a gateletšegile gakaakang bošegong bjoo. Na o be a tla dula a botega go fihlela a ehwa? Ge nkabe a se a botega, go be go ka se be le motho yo a bego a ka ba le kholofelo ya go tlo phela ka mo go sa felego. (Baroma 5:18, 19) Sa bohlokwa kudu ke gore leina la Tatagwe le be le akaretšwa tabeng ye. (Jobo 2:4) Ke moka ge a be a eja selalelo sa mafelelo le bagwera ba gagwe ba bagolo, e lego baapostola, go ile gwa tsoga “ngangišano e šoro go bona mabapi le gore ke ofe yo a bego a bonala e le yo mogolo go bona ka moka.” Jesu o be a kile a phošolla bagwera bao ba gagwe ka taba ye ka makga a mantši, go akaretša le bjona bošegong bjoo. Se  se makatšago ke gore Jesu ga se a ka a galefa. Go e na le moo, o ile a ba araba ka boleta. Jesu o ile a ba hlalosetša gape ka botho, eupša a tiišitše ka ganong, gore ba swanetše go itshwara bjang. Ka morago ga moo o ile a reta bagwera bao ba gagwe ka go mo thekga ka potego.—Luka 22:24-28; Joh. 13:1-5, 12-15.

¹⁷ O be o tla dira’ng ge o be o ka ikhwetša o le boemong bjo bo swanago le bjo? Re ka ekiša Jesu gomme ra dula re le boleta le ge re gateletšegile. Re swanetše go kwa taelo ya Jehofa ya gore re ‘tšwele pele re kgotlelelana.’ (Bakol. 3:13) Re tla kwa taelo ye ge re ka dula re gopola gore ka moka ga rena re fela re bolela le go dira dilo tšeo di tenago ba bangwe. (Die. 12:18; Jak. 3:2, 5) Le gona ka mehla reta batho ba bangwe bao ba bontšhago dika tše dibotse.—Baef. 4:29.

18. Jehofa o thuša bjang batho ba boleta go dira diphetho tše dibotse, eupša bona ba swanetše go dira’ng?

¹⁸ Re tla dira diphetho tše dibotse. Ge re lebeletšane le go dira diphetho tše boima bophelong, Jehofa o tla re thuša go dira diphetho tše dibotse ge feela re le ba boleta. O re holofetša gore o tla kwa “tšeo di kganyogwago ke ba boleta.” (Ps. 10:17) Le gona a ka se ke a no re fa feela dilo tšeo re di kganyogago. Beibele e re holofetša gore: “O tla sepediša ba boleta ka dikahlolo tša gagwe, e bile o tla ruta ba boleta tsela ya gagwe.” (Ps. 25:9) Jehofa o re ruta ka go diriša Beibele le dikgatišo * tša rena gotee le ka mananeo a mangwe ao a rulaganywago ke “mohlanka yo a botegago le wa temogo.” (Mat. 24:45-47) Re swanetše go amogela thušo ya Jehofa ka gore re ikokobetše gomme re lemoge gore re hloka thušo gomme re bale dikgatišo tšeo Jehofa a re neago tšona le ka go dira sohle seo re ka se kgonago go diriša seo re ithutago sona.

19-21. Moshe o ile a dira phošo efe kua Kadeshe, gona re ka ithuta’ng phošong yeo?

¹⁹ Re tla phema go dira diphošo. Nagana gape ka Moshe. O ile a fetša mengwaga e mentši a le boleta e bile a kgahla Jehofa. Eupša ka morago ga gore Baisiraele ba ralale lešokeng mengwaga e ka bago e 40, Moshe o ile a palelwa ke go bontšha boleta. Kgaetšedi ya gagwe, yoo go ka diregago gore ke yena a ilego a phološa bophelo bja gagwe kua Egipita, o be a sa tšwa go hlokofala gomme a bolokwa Kadeshe. Le gona mo Baisiraele ba ile ba thoma go ngongorega ka gore ba be ba se ba hlokomelwa gabotse. Mo lekgeng le ba be ba “omanya Moshe”  ba re ga ba na meetse. Le ge batho ba ba ile ba bona Jehofa a dira mehlolo a diriša Moshe e bile Moshe a ile a ba eta pele ka tsela e botse ka mengwaga e mentši, ba ile ba no ngongorega. Ga se ba no ngongorega ka gore ga ba na meetse, eupša ba ile ba ngongorega le ka yena Moshe, go le bjalo ka ge eka ge ba nyorilwe ke phošo ya gagwe.—Num. 20:1-5, 9-11.

²⁰ Moshe o ile a befelwa o šoro gomme a se sa ba boleta. Go e na le gore ka tumelo a bolele le leswika, go etša ge Jehofa a be a mo laetše, Moshe o ile a bolela le batho a galefile gomme a re o tla ba direla mohlolo. Ke moka o ile a itia leswika leo gabedi gomme gwa tšwa meetse a mantši. Boikgogomošo le go galefa di ile tša mo dira gore a dire phošo yeo e kgolo. (Ps. 106:32, 33) Ka ge Moshe a ile a palelwa ke go bontšha boleta ka nakwana, Jehofa o ile a se mo dumelele go tsena Nageng ya Kholofetšo.—Num. 20:12.

²¹ Re ithuta dithuto tša bohlokwa mohlaleng wo. Sa pele, re swanetše go dula re šoma ka thata gore re dule re le ba boleta. Ge re ka palelwa ke go ba boleta ka nakwana, re ka thoma go ikgogomoša gomme ra bolela le go dira dilo tša bošilo. Sa bobedi, ge re gateletšegile re ka nolega moko, ka gona re swanetše go šoma ka thata gore re dule re le boleta gaešita le ge re gateletšegile.

22-23. (a) Ke ka baka la’ng re swanetše go tšwela pele re bontšha boleta? (b) Mantšu ao a lego go Tsefanya 2:3 ao a rego “Mohlomongwe le ka šireletšwa” a bontšha’ng?

²² Re tla šireletšwa. Go se go ye kae Jehofa o tla fediša batho ka moka ba babe mo lefaseng, gomme go tla šala batho ba boleta feela. Ke moka lefaseng go tla ba le khutšo e le ka kgonthe. (Ps. 37:10, 11) Na o tla ba gare ga batho bao ba boleta? O tla ba gare ga bona ge o ka dira seo Jehofa a go kgothaletšago gore o se dire mo lengwalong la Tsefanya 2:3. (Bala.)

²³ Ke ka baka la’ng Tsefanya 2:3 e re: “Mohlomongwe le ka šireletšwa”? Mantšu a ga a re gore Jehofa a ka se kgone go šireletša batho bao ba nyakago go mo kgahliša le bao ba mo ratago. Go e na le moo, a bontšha gore re swanetše go dira selo se itšego e le gore re šireletšwe. Re ka tla ra phologa “letšatšing la bogale bja Jehofa” gomme ra phela ka mo go sa felego ge e ba gona bjale re dira maiteko a go ba ba boleta le go kgahliša Jehofa.