Batswadi ba ka ba ile ba ithuta therešo ka bo-1920, pele ga ge ba ka nyalana. Ke belegwe mathomong a ngwaga wa 1939. Ge ke be ke sa le yo monyenyane, ka gae re be re dula England. Ke be ke eya le batswadi ba ka dibokeng gomme ke rata Sekolo sa Bodiredi sa Pušo ya Modimo. Go fihla le lehono, ke sa gopola kamoo ge ke be ke nea polelo ya ka ya mathomo ke ilego ka namela lepokisi gore ke kgone go bona batheetši. Ke be ke na le mengwaga e tshela gomme ke tšhogile kudu, ke lebeletše batheetši bao e bego e le batho bao ba godilego.

Ge re be re eya tšhemong, tate o ile a nngwalela karata ya mantšu ao ke bego ke tla a bolela. Ke be ke na le mengwaga e seswai ge ke be ke thoma go ya tšhemong ke nnoši. Ke be ke thabile kudu ge mong wa ntlo a ile a amogela kapejana puku ya “Let God Be True” ka morago ga gore a bale karata ya ka. Ke ile ka kitima ka theogela fase seterateng seo gore ke yo botša tate. Go ya tšhemong le dibokeng go be go nthabiša kudu, e bile go ile gwa nthuša gore ke nyake go hlankela Jehofa ka nako e tletšego.

Ka morago ga gore tate a dire gore ke hwetše Morokami kgwedi e nngwe le e nngwe, therešo ya Beibele e ile ya thoma go nkgoma kudu. Ke be ke bala Morokami o mongwe le o mongwe gateetee ka morago ga gore ke o hwetše ka poso. Ke ile ka tshepa Jehofa kudu gomme seo sa dira gore mafelelong ke ineele go yena.

Ka 1950 lapa la gešo le ile la ya kopanong yeo e bego e swaretšwe kua New York ya Koketšego ya Pušo ya Modimo. Sehlogo sa ka Labone la di-3 tša August se be se re “Letšatši la Baromiwa.” Letšatšing leo, Ngwanabo rena Carey Barber yoo ka morago e ilego ya ba wa Sehlopha se Bušago o ile a nea polelo ya kolobetšo. Ka morago ga gore mafelelong a polelo ya gagwe a botšiše bao ba yago kolobetšong dipotšišo tše pedi, ke ile ka emelela gomme ka re “Ee!” Ke be ke na le mengwaga e 11 eupša ke be ke tseba gore ke dirile phetho e bohlokwa kudu. Ke be ke  tšhaba go tsena ka meetseng ka gobane ke be ke se ka tšwa ke ithuta go rutha. Rangwane o ile a tsena le nna ka meetseng gomme a nkgonthišetša gore dilo di tla sepela gabotse. Go ile gwa ba bjalo, ke ile ka kolobetšwa kapejana ntle le gore maoto a ka a kgwathe fase. Bana babo rena ba ile ba neeletšana ka nna, yo mongwe o ile a nkolobetša ke moka yo mongwe a nntšha ka meetseng. Ga e sa le go tloga lona letšatšing leo la bohlokwa, Jehofa o ile a tšwela pele a letliša ditsela tša ka goba a nthuša go sepela tseleng ya therešo.

Ke be ke nyaka go tšea bobulamadibogo ka morago ga gore ke fetše sekolo, eupša barutiši ba ka ba ile ba nkgothaletša gore ke ye yunibesithi. Ke ile ka theetša keletšo ya bona ke moka ka ya yunibesithi. Eupša go se go ye kae ke ile ka lemoga gore nka se kgone go tšwela pele ke le therešong e bile ka kgona go tšwela pele ka dithuto tša ka, ka gona ke ile ka tlogela go tsena yunibesithi. Ke ile ka rapela Jehofa ka taba ye, ke moka ka ngwala lengwalo la go hlalosetša barutiši ba ka gore ke be ke tlo tlogela go tsena yunibesithi ka morago ga ngwaga wa ka wa mathomo. Ka ge ke be ke tshepa Jehofa ka mo go feletšego, kapejana ke ile ka thoma go bula madibogo.

Ke thomile tirelo ya nako e tletšego ka July 1957 kua toropong ya Wellingborough. Ke moka ke ile ka botšiša bana babo rena ba Bethele ya London ge e ba go na le ngwanabo rena wa mmulamadibogo yoo nka šomago le yena. Ke ile ka šoma le Ngwanabo rena Bert Vaisey gomme a ntlwaetša. Ka ge a be a šoma ka thata e bile a na le mafolofolo, o ile a nthuša gore ke be le lenaneo le lebotse la go šoma tšhemo. Phuthegong yeo ke bego ke le go yona go be go na le dikgaetšedi tše tshela tše di godilego, Ngwanabo rena Vaisey le nna. Go lokišetša diboka le go tšea karolo go tšona ka moka go ile gwa nthuša gore ke tshepe Jehofa kudu le go bolela ka tumelo ya ka.

Ka morago ga gore ke be kgolegong ka nako e kopana ka ge ke be ke ganne go tsenela bošole, ke ile ka kopana le kgaetšedi yo e bego e le mmulamadibogo yo a kgethegilego e lego Barbara. Re ile ra nyalana ka 1959, gomme re be re ikemišeditše go ya kae le kae moo re bego re tla abelwa gona. Mathomong re ile ra abelwa go ya toropong ya Lancashire yeo e lego ka leboabodikela bja England. Ke moka ka January 1961, ke ile ka laletšwa Sekolong sa Bodiredi sa Mmušo seo se bego se tla tšea kgwedi kua Bethele ya London. Seo se ilego sa mmakatša ke gore ge sekolo seo se fela ke ile ka abelwa modirong wa bosepedi. Ke ile ka fetša dibeke tše pedi ke tlwaetšwa ke molebeledi wa tikologo yo a nago le phihlelo kua toropong ya Birmingham. Mokgatlo o ile wa dumela gore Barbara a sepele le nna. Ka morago ga moo re ile ra boela kabelong ya rena tikologong ya Lancashire le ya Cheshire.

Ge re be re le maikhutšong ka August 1962, re ile ra hwetša lengwalo la go tšwa ofising ya lekala. Ka gare ga lengwalo leo go be go na le difomo tša go ya Sekolong sa Gilead! Ka morago ga go rapela, nna le Barbara re ile ra tlatša difomo tšeo ke moka kapejana ra di bušetša ofising ya lekala. Ka morago ga dikgwedi tše hlano, re be re le tseleng ya go ya Brooklyn, New York, go yo tsena klaseng ya bo-38 ya Sekolo sa Gilead sa go ithuta Beibele seo se bego se tlo tšea dikgwedi tše lesome.

Bahlahli ba rena ba ile ba re ruta ka Lentšu la Modimo, mokgatlo wa gagwe le ka bana babo rena ba lefaseng ka moka. Ka nako yeo ke be ke na  le mengwaga e 24 gomme Barbara a na le e 23, eupša re ile ra ithuta dilo tše dintši go barutwana ba bangwe ka klaseng ya rena. Letšatši le lengwe le le lengwe ke be ke na le tokelo ya go šoma le Ngwanabo rena Fred Rusk, yoo e bego e le yo mongwe wa bahlahli ba rena. Se sengwe sa dilo tša bohlokwa tšeo a bego a di gatelela ka mehla ke gore ge o nea motho keletšo o dire seo ka toka, o diriše Beibele ge o nea motho keletšo. Ba bangwe ba bao ba bego ba nea dipolelo klaseng ya rena e be e le bana babo rena bao ba nago le phihlelo ba bjalo ka Nathan Knorr, Frederick Franz le Karl Klein. Le gona re ile ra ithuta dilo tše dingwe mohlaleng wa ngwanabo rena yo a ikokobeditšego e lego A. H. Macmillan, yoo a ilego a re ruta kamoo Jehofa a ilego a thuša batho ba gagwe nakong e thata yeo bana babo rena ba ilego ba ba le yona ka mokgatlong go tloga ka 1914 go ya mathomong a 1919!

Ge re be re le kgauswi le go fetša sekolo, Ngwanabo rena Knorr o ile a botša nna le Barbara gore re abetšwe go ya Burundi, Afrika. Re ile ra kitimela laeprari ya Bethele go yo lebelela ka gare ga Yearbook go bona gore go be go na le bagoeledi ba bakae Burundi ka nako yeo. Sa go re makatša ke gore ga se ra ka ra hwetša moo go bolelwago gore go be go na le bagoeledi ba bakae Burundi ka nako yeo. Re be re eya tšhemong yeo e bego e se ya ka šongwa, yeo e bego e le tikologong yeo re bego re sa tsebe mo gontši ka yona. Re be re tšhogile kudu! Eupša go rapela go ile gwa re thuša.

Kabelong ya rena e mpsha go be go se na selo seo re se tlwaetšego, boemo bja leratadima bja moo, setšo le leleme leo le bego le dirišwa. Re ile ra swanelwa ke go ithuta Sefora. Le gona go ile ga se be bonolo go hwetša moo re tlago go dula gona. Matšatši a mabedi ka morago ga gore re fihle, Harry Arnott yo re bego re na le yena klaseng ya Gilead, o ile a re etela a le tseleng ya go boela kabelong ya gagwe Zambia. O ile a re thuša go hwetša lefelo leo re bego re tla dula go lona leo e ilego ya ba legae la rena la pele la baromiwa. Eupša go se go ye kae re ile ra thoma go tlaišwa ke ba mmušo bao ba bego ba sa tsebe selo ka Dihlatse tša Jehofa. Eitše ge re thoma go ipshina ka kabelo ya rena, ba mmušo ba re botša gore go ka se kgonege gore re dule moo re se na mangwalo a go re dumelela go šoma. Sa go nyamiša ke gore re ile ra swanelwa ke go tloga re yo tlwaelana le maemo a nageng e nngwe, e lego ya Uganda.

Go tshepa Jehofa go ile gwa re thuša gore re se ke ra tšhoga kudu ge re be re fihla Uganda re se na di-visa. Ngwanabo rena yo a tšwago Canada yo a bego a le tlhokagalong Uganda o ile a re thuša ka go hlalosetša motho yo a šomago diofising tša batho bao ba  tšwago dinageng tše dingwe boemo bja rena. Motho yoo o ile a re dumelela go dula dikgwedi tše sego kae nageng yeo re sa letetše go hwetša tumelelo. Seo se ile sa re bontšha gore Jehofa o be a re thuša.

Maemo a kabelong ye e mpsha a be a sa swane le a kua Burundi. Modiro wa go bolela ditaba tše dibotse o be o šetše o thomile nageng yeo, le ge go be go na le Dihlatse tše 28 feela nageng yeo ka moka. Ge re be re le tšhemong re be re hwetša batho ba bantši bao ba bolelago Seisemane. Eupša re ile ra lemoga kapejana gore e le gore re tle re kgone go thuša batho bao ba thabelago gore ba dire tšwelopele, re swanetše go ithuta letee la maleme a mantši ao a bolelwago ke batho ba moo. Re ile ra thoma go bolela ditaba tše dibotse toropong ya Kampala, moo go bego go bolelwa Seluganda kudu. Ka gona re ile ra dira phetho ya go ithuta leleme leo. Go ile gwa re tšea mengwaga e mmalwa go ithuta go bolela leleme leo gabotse, eupša seo se ile sa re thuša modirong wa rena wa go bolela ditaba tše dibotse. Re ile ra thoma go kwešiša gakaone gore barutwana ba rena ba hloka eng gore ba kgone go dira tšwelopele. Ge barutwana bao ba be ba bona gore re a ba kwešiša, seo se ile sa dira gore ba lokologe gomme ba re botše kamoo ba ikwago ka gona ka seo ba ithutago sona.

Re be re thabišwa ke go thuša batho bao ba bego ba nyaka go ithuta ka Modimo. E bile re ile ra thaba le go feta ge re be re hwetša tokelo e nngwe yeo re bego re sa e letela ya go hlankela modirong wa bosepedi nageng yeo ka moka. Ofisi ya lekala ya Kenya e ile ya re laela gore re nyake madulo a swanelegago ao babulamadibogo ba kgethegilego ba bego ba ka dula go ona gore ba kgone go šoma tšhemo moo go bego go na le tlhokagalo. Ka makga a mmalwa re ile ra amogelwa ka tsela e kgahlišago kudu ke batho bao ba bego ba se ba ka ba kopana le Dihlatse tša Jehofa. Ba ile ba dira gore re ikwe re le gae ga mahlaku, e bile ba re apeela le dijo.

Ke ile ka tšea leeto le lengwe leo ke bego ke sa nka ka le tšea. Go tloga Kampala ke ile ka sepela ka terene matšatši a mabedi go ya motseng wa Mombasa kua Kenya. Ke moka go tloga moo ka sepela ka sekepe go ya Seychelles, e lego se sengwe sa dihlakahlaka tša Lewatleng la India. Ka morago, go tloga ka 1965 go ya go 1972, Barbara o ile a thoma go sepela le nna ka mehla ge ke be ke eya go etela sehlakahlaka sa Seychelles. Ka morago bagoeledi ba babedi bao ba bego ba dula moo ba ile ba thoma sehlopha ke moka mafelelong ya ba phuthego. Ke ile ka tšea maeto a mangwe go yo etela bana babo rena Eritrea, Ethiopia le Sudan.

Kua Uganda maemo a dipolotiki a ile a fetoga kapejana ka morago ga gore mašole a thome go laola naga yeo. Maemo a thata ao a ilego a latela ka morago ga moo, a ile a nthuša go bona bohlale bja go kwa taelo ya gore re ‘nee Kesara sa Kesara.’ (Mar. 12:17) Nakong e nngwe batho ka moka bao ba bego ba etšwa dinageng tše dingwe bao ba bego ba dula Uganda ba ile ba laelwa gore ba yo ingwadiša maphodiseng a kgauswi le moo ba bego ba dula gona. Re ile ra dira seo ntle le go senya nako. Matšatši a sego kae ka morago, ge nna le moromiwa yo mongwe re be re sepela toropong ya Kampala, maphodisa ao a šomago ka sephiring a ile a tla go rena. Re be re tšhogile kudu! Maphodisa ao a ile a re bea molato wa gore re šoma le mmušo, gomme a re iša seteišeneng sa maphodisa moo re ilego ra a hlalosetša gore re no ba baromiwa bao ba sa lwego le motho. Ga se a ka a re theetša ge re be re a botša gore re šetše re ingwadišitše maphodiseng. Maphodisa ao a bego a itlhamile a ile a re tšea a re iša seteišeneng sa maphodisa seo se bego se le kgauswi le legae la baromiwa. Re ile ra imologa kudu ge lephodisa le lengwe leo le bego le tseba gore re be re sa tšwa go ingwadiša le re gopola, ke moka le laela motho yo a bego a re hlapeditše gore a re lokolle!

 Mehleng yeo, re be re tshwenyega kudu ge re kopana le mašole ao a thibilego tsela, kudukudu ge e le mašole ao a nwelego kudu. Eupša nako e nngwe le e nngwe re be re rapela gomme re ikwa re imologile ge a re dumelela gore re fete re šireletšegile. Ka manyami, ka 1973 baromiwa ka moka bao ba bego ba etšwa dinageng tše dingwe ba ile ba laelwa gore ba tloge Uganda.

Re ile ra hwetša kabelo e mpsha gape ya go ya Côte d’Ivoire, ka Bodikela bja Afrika. Ye e be e le phetogo e kgolo ka gobane re ile ra swanelwa ke go ithuta setšo seo re bego re sa se tsebe, re thome gape re bolele Sefora ka mehla e bile re tlwaele go dula le baromiwa bao ba bego ba etšwa dinageng tše dingwe. Eupša le gona moo re ile ra bona gore Jehofa o be a re thuša ge batho bao ba bego ba nyaka go ithuta ka yena tšhemong ba theetša ge re be re ba botša ditaba tše dibotse. Re ile ra bona kamoo go tshepa Jehofa go ilego gwa re thuša gore re atlege bophelong.

Re ile ra hwetša ditaba tšeo re bego re sa di letela tša gore Barbara o na le kankere. Re ile ra boela gae Yuropa ka makga a mantši gore Barbara a kgone go hwetša kalafo, gomme ka 1983 re ile ra lemoga gore re ka se sa kgona go hlankela kabelong ya rena Afrika. Bobedi bja rena re be re kwele bohloko kudu!

Bolwetši bja Barbara bo ile bja gola ge re be re le kua Bethele ya London, ke moka mafelelong a hlokofala. Lapa la Bethele le ile la nthekga kudu. Banyalani ba bangwe ba ile ba nthuša gore ke tlwaelane le maemo a ka gomme ke tšwele pele ke tshepile Jehofa. Ka morago ke ile ka kopana le kgaetšedi yo mongwe yo a bego a etla go šoma Bethele ka matšatši yo e bego e kile ya ba mmulamadibogo yo a kgethegilego yoo a bego a rata Jehofa kudu. Nna le Ann re ile ra nyalana ka 1989, gomme go fihla le lehono re sa hlankela Bethele ya London.

Go tloga ka 1995 go ya go 2018, ke ile ka etela dinaga tše 60 ke le moemedi wa ntlokgolo (yoo kgale a bego a bitšwa molebeledi wa makala). Nageng e nngwe le e nngwe yeo ke ilego ka e etela ke ile ka bona kamoo Jehofa a šegofatšago bahlanka ba gagwe maemong a fapafapanego.

Ka 2017, ke ile ka boela Afrika gape go yo etela. Ke ile ka thabela go iša Ann Burundi ka lekga la mathomo, gomme bobedi bja rena re be re makaditšwe ke go bona kamoo Dihlatse tša Jehofa di bego di oketšegile ka gona nageng yeo! Seterateng seo ke bego nkile ka šoma tšhemo go sona ka 1964, gona bjale go na le legae le lebotse la Bethele. E bile gona bjale go na le bagoeledi ba ka godimo ga ba 15 500 nageng yeo ka moka.

Ke be ke thabile kudu ge ke be ke hwetša lenaneo la dinaga tšeo ke bego ke tlo di etela ka 2018. E nngwe ya dinaga tšeo ke bego ke tlo di etela e be e le Côte d’Ivoire. Ge re be re fihla motsemošate wa moo e lego Abidjan, ke ile ka ikwa eka ke fihlile gae. Ge ke be ke lebeletše puku ya dinomoro tša difouno ya Bethele gore ke bone gore ke mang yo a bego a dula kgauswi le phapoši yeo re bego re dula go yona, ke ile ka bona leina la motho yo ke mo tsebago, e lego ngwanabo rena Sossou. Ke ile ka gopola gore e be e kile ya ba molebeledi wa motse ge ke be ke sa le Abidjan. Eupša ke be ke fošitše, e be e se yena, e be e le morwa wa gagwe.

Jehofa o ile a phethagatša tshepišo ya gagwe. Le ge ke ile ka welwa ke mathata a mantši, ke ile ka bona gore ge re tshepile Jehofa, ruri o tla re thuša go dula re sepela tseleng ya therešo. Gona bjale re nyaka go tšwela pele re sepela tseleng e išago bophelong bjo bo sa felego, yeo e tlago go phadima le go feta lefaseng le lefsa.—Die. 4:18.