1. Ke neng moo batlotšwa ka moka ba tla bego ba le legodimong?

 MENGWAGENG e fetilego, bahlanka ba Jehofa ba ile ba ipotšiša gore: ‘Batlotšwa ba mafelelo ba tlo ya neng legodimong?’ Re thomile re nagana gore go ka direga gore Bakriste ba bangwe ba tloditšwego ba dule ba le gona mo lefaseng la Paradeise nakwana e itšego ka morago ga ntwa ya Haramagedone, eupša ge re be re bala Morokami wa July 15, 2013, re ile ra ithuta gore batlotšwa ka moka bao ba šetšego mo lefaseng ba tlo ya legodimong pele ntwa ya Haramagedone e thoma.—Mat. 24:31.

2. Re ka ipotšiša potšišo efe, gona re tlo boledišana ka’ng sehlogong se?

² Ba bangwe ba rena re ka ipotšiša gore: Go tlo direga’ng ka “dinku tše dingwe” tša Kriste tšeo di tla bego di hlankela Jehofa ka go botega mo lefaseng nakong ya “masetlapelo a magolo”? (Joh. 10:16; Mat. 24:21) Lehono ba bangwe ba ka nagana gore ba tlo ikwa ba timetše goba ba lahlilwe ge bana babo bona le dikgaetšedi ba tloditšwego ba eya legodimong. A re boledišaneng ka dipego tše pedi tša Beibele tšeo ba ka naganago ka tšona. Ke moka re tlo kwa gore ke ka baka la’ng re sa swanela go tshwenyega.

SEO SE KA SE DIREGEGO

3-4. Batho ba bangwe ba ka ipotšiša’ng, gona ka baka la’ng?

³ Ba bangwe ba ka ipotšiša ge e ba ba dinku tše dingwe ba tla tšwela pele ba hlankela Jehofa ge bana babo rena ba tloditšwego ba Sehlopha se Bušago ba se sa le gona go ba hlahla. Dipego tše dingwe tša Beibele di ka dira gore ba ikwe ba tšhogile. A re boneng mehlala e mebedi ya dipego tšeo. Mohlala wa pele ke wa Moprista yo a phagamego Jehoyada. E be e le mohlanka yo  a botegago wa Modimo. Yena le mosadi wa gagwe Jehoshabeathe, ba ile ba šireletša mošemane yo monyenyane e lego Jehoashe ba mo thuša le gore e be kgoši e lokilego le e botegago. Nakong ya ge mokgalabje Jehoyada a sa phela, Jehoashe o be a hlankela Jehofa gabotse. Ka morago ga gore Jehoyada a hwe, Jehoashe o ile a thoma go dira dilo tše mpe. O ile a theetša dikgošana tše mpe gomme a tlogela go hlankela Jehofa.—2 Dikor. 24:​2, 15-19.

⁴ Mohlala o mongwe ke wa Bakriste ba lekgolong la bobedi la mengwaga. Moapostola yo a hwilego mafelelong e be e le Johane, nakong ya ge a be a sa phela, o ile a thuša Bakriste gore ba dule ba botega le go ba thuša go dula ba kgotleletše ge ba hlankela Jehofa. (3 Joh. 4) Yena gotee le baapostola ba bangwe ba botegago ba Jesu, ba ile ba šoma ka thata go leka go thibela bahlanogi gore ba se ke ba ruta Bakriste dithuto tša maaka. (1 Joh. 2:18; bona ntlha ya go ithuta go 2 Bathes. 2:7 ka Beibeleng ya Seisemane.) Ka morago ga gore Johane a hwe, bahlanogi ba ile ba kgeregela ka phuthegong ya Jehofa. Go se gokae, ke ge phuthego ya Bokriste e hlakahlakane.

5. Ke’ng seo re sa swanelago go phetha ka sona ge re bala dipego tše tše pedi tša ka Beibeleng?

⁵ Na dipego tše tše pedi di bontšha gore selo se se swanago se ka diragalela dinku tše dingwe tša Kriste ge batlotšwa ba eya legodimong? Ka nako yeo, na Bakriste ba botegago bao ba lego mo lefaseng ba tla tlogela go hlankela Jehofa go swana le ge Jehoashe a dirile goba na e tla ba bahlanogi go swana le Bakriste ba bantšhi ba lekgolong la bobedi la mengwaga? Aowa! Re ka kgodišega gore ge batlotšwa ba tloga mo lefaseng, ba dinku tše dingwe ba tlo šala ba hlokometšwe e bile ba hlankela Jehofa gabotse. Ke ka baka la’ng re swanetše go kgodišega ka seo?

BAHLANKA BA JEHOFA BA TLO DULA BA MO HLANKELA KA TSELA YEO A E NYAKAGO

6. Re tlo boledišana ka dinako dife tše tharo?

⁶ Ke ka baka la’ng re ka kgodišega gore bahlanka ba Jehofa ba tlo dula ba mo hlankela le dinakong tše thata? Ka baka la seo re ithutilego sona ka Beibeleng mabapi le mehla yeo re phelago go yona lehono. Mehla ye e fapana kudu le ya Baisiraele ba kgale le ya Bakriste ba lekgolong la bobedi la mengwaga. Ka gona, a re boledišaneng ka dinako tše tše tharo: (1) Nakong ya Baisiraele ba kgale, (2) nakong ya ka morago ga gore baapostola ba hwe, le (3) mehleng ya rena, e lego “dinakong tša tsošološo ya dilo ka moka.”—Dit. 3:21.

7. Ke ka baka la’ng Baisiraele ba botegago ba be ba sa swanela go tshwenyega ge dikgoši le batho ba bangwe ba be ba dira dilo tše mpe?

⁷ Nakong ya Baisiraele ba kgale. Pele ga ge Moshe a ka hwa, o ile a botša Baisiraele gore: “Ke tseba gabotse gore ka morago ga ge ke hwile le tlo senya, gomme le tlo aroga tseleng yeo ke le laetšego yona.” (Doit. 31:29) Moshe o ile a ba a lemoša le gore ge setšhaba sa Isiraele se ka rabela, se tlo ikhwetša se le bothopša. (Doit. 28:​35, 36) Na mantšu ao a ile a phethagala? Ee. Mengwaga e makgolo ka morago, dikgoši tše dintšhi di ile tša thoma go dira dilo tše mpe le go dira gore batho ba se sa hlwa ba hlankela Jehofa. Se se ile sa dira gore Jehofa a fediše batho ba babe le go dira gore go se sa hlwa go e ba le dikgoši lefaseng. (Hesek. 21:​25-27) Baisiraele bao ba botegago ba ile ba kgothatšwa ke go bona dilo tšeo Modimo a di boletšego di phethagala.—Jes. 55:​10, 11.

8. Na re swanetše go makatšwa ke gore phuthego ya Bokriste ya lekgolong la bobedi la mengwaga e ile ya tlogela go hlankela Jehofa ka tsela yeo a nyakago ka yona? Hlalosa.

⁸ Nakong ya ka morago ga gore baapostola ba hwe. Na re swanetše go makatšwa ke gore Bakriste ba lekgolong la bobedi la mengwaga  ba ile ba tlogela go hlankela Jehofa ka tsela yeo a e nyakago? Le gatee. Jesu o ile a bolela e sa le pele gore go tlo ba le bahlanogi ba bantšhi. (Mat. 7:​21-23; 13:​24-30, 36-43) Baapostola ba bararo e lego Paulo, Petro le Johane, ba ile ba bontšha gore boporofeta bja Jesu bo be bo šetše bo thomile go phethagala lekgolong la pele la mengwaga. (2 Bathes. 2:​3, 7; 2 Pet. 2:1; 1 Joh. 2:18) Lekgolong la bobedi la mengwaga, Bakriste ba ile ba se sa hlankela Jehofa ka tsela yeo a bego a e nyaka. Bakriste ba bantšhi ba ile ba hlanogela phuthego, le gona ya ba karolo ya Babilona o Mogolo e lego mmušo wa lefase wa bodumedi bja maaka. Le gona mo, boporofeta bja Beibele bo be bo phethagala.

9. Mehla ye re phelago go yona e fapana bjang le ya Baisiraele ba kgale le ya phuthego ya Bokriste ya lekgolong la bobedi la mengwaga?

⁹ “Dinakong tša tsošološo ya dilo ka moka.” Mehla ye re phelago go yona e fapana le nakong ya Baisiraele ba kgale, e bile e fapana le nakong ya ge bohlanogi bo ata ka phuthegong lekgolong la bobedi la mengwaga. Mehla ye re phelago go yona e bitšwa’ng? Re ka e bitša gore ke “mehla ya bofelo” bja tshepedišo ya dilo. (2 Tim. 3:1) Beibele e bontšha gore nako ye ke kgale e thomile. Mehla ye e tlo dula e le gona go fihlela Mmušo wa Mesia o dira gore batho ba phethagale le go dira gore lefase e be paradeise. Mehla ye e bitšwa gore ke “[dinako] tša tsošološo ya dilo ka moka.” (Dit. 3:21) Mehla ye e thomile ka 1914. Go tsošološitšwe eng? Jesu o ile a bewa e le Kgoši legodimong. Jehofa o be a na le mmuši yo a mo emelago, e lego setlogolo sa Kgoši yeo e bego e botega, Dafida. Lega go le bjalo, Jehofa ga se a tsošološa bogoši feela. Ka morago ga moo, borapedi bja therešo le bjona bo ile bja tsošološwa! (Jes. 2:​2-4; Hesek. 11:​17-20) Na batho ba Jehofa ba tla tlogela go mo hlankela gape ka tsela yeo a e nyakago?

10. (a) Ke’ng seo Beibele e se boletšego e sa le pele mabapi le borapedi bjo bo hlwekilego mehleng ya rena? (Jesaya 54:17) (b) Ke ka baka la’ng diporofeto tšeo di kgothatša?

¹⁰ Bala Jesaya 54:17. Nagana ka boporofeta bjo bo rego: “Sebetša le ge e le sefe seo se rulelwago go lwa le wena se ka se atlege”! Mantšu ao a buduletšwego a a phethagala lehono. Mantšu ao a latelago le ao a kgothatšago le ona a phethagala mehleng ya rena, a re: “Bana ba gago ka moka e tla ba batho ba rutwago ke Jehofa gomme khutšo ya bana ba gago e tla ata. O tla ema ka go tia tokong. . . . o ka se boife selo gomme o tla ba kgole le selo le ge e le sefe seo se tšhošago.” (Jes. 54:​13, 14) Gaešita le “modimo wa tshepedišo ye ya dilo,” e lego Sathane,  a ka se kgone go thibela mošomo wa go ruta wo batho ba Modimo ba o dirago. (2 Bakor. 4:4) Borapedi bjo bo hlwekilego bo tsošološitšwe e bile batho ba Jehofa ba ka se tsoge ba tlogetše go mo hlankela. Bo tlo dula bo le gona ka mo go sa felego. Sebetša le ge e le sefe seo se rulelwago go lwa le rena se ka se atlege!

GO TLO DIREGA’NG?

11. Ke’ng seo se re kgodišago gore lešaba le legolo le ka se lahlwe ge batlotšwa ba eya legodimong?

¹¹ Go tlo direga’ng ge batlotšwa ba eya legodimong? Gopola gore Jesu ke Modiši wa rena. Ke hlogo ya phuthego ya Bokriste. Jesu o boletše ka mo go kwagalago gore: “Moetapele wa lena ke o tee, Kriste.” (Mat. 23:10) Kgoši ya rena e bušago e ka se palelwe ke go hlokomela balatedi ba yona. Balatedi ba Kriste bao ba lego mo lefaseng ba ka se boife selo ka ge e le yena a bušago. Ke nnete gore ga re tsebe dintlha ka botlalo mabapi le kamoo Kriste a tlago go etelela batho ba gagwe pele ka nako yeo. Ka gona, a re boledišaneng ka mehlala e mengwe ya ka Beibeleng yeo e re kgonthišetšago seo.

12. Jehofa o ile a hlokomela bjang bahlanka ba gagwe (a) ka morago ga gore Moshe a hwe? (b) ka morago ga gore Eliya a hwetše kabelo e nngwe? (Bona le seswantšho.)

¹² Moshe o ile a hwa pele Baisiraele ba tsena nageng ya kholofetšo. Go ile gwa direga’ng ka batho ba Modimo? Na ba ile ba ikhwetša ba le kgakanegong ka ge monna yo a botegago a be a se gona? Aowa. Jehofa o ile a ba hlokomela, ge feela ba be ba mmotegela. Pele Moshe a ka hwa, Jehofa o ile a mmotša gore a laele Joshua gore a etelele batho ba gagwe pele. Moshe o ile a tlwaetša Joshua ka mengwaga e mentšhi. (Ek. 33:11; Doit. 34:9) Go oketša moo, go be go na le banna bao ba bego ba na le bokgoni bja go etelela pele, e lego dikgošana tše dikete, tše makgolo, tše masomehlano le tše lesome. (Doit. 1:15) Batho ba Modimo ba ile ba hlokomelwa gabotse. Re bona mohlala o swanago le go Eliya. O ile a šoma ka thata ka mengwaga e mentšhi gore a thuše Baisiraele go hlankela Jehofa. Eupša go ile gwa fihla nako yeo Jehofa a ilego a mo nea kabelo e fapanego, e lego ya go hlankela kua borwa bja Juda. (2 Dikg. 2:1; 2 Dikor. 21:12) Na bahlanka ba botegago ba Jehofa, ba meloko e lesome ya Isiraele ba ile ba ikwa ba lahlilwe? Aowa. Eliya o ile a tlwaetša Elisha ka mengwaga e mentšhi. Le gona, go be go na le “barwa ba baporofeta” bao ba bego ba tlwaeditšwe. (2 Dikg. 2:7) Ka gona, go be go na le banna ba bantšhi ba botegago bao ba bego ba ka thuša go etelela batho ba Modimo pele. Morero wa Jehofa o ile wa tšwela pele, le gona  o be a hlokomela bahlanka ba gagwe ba botegago.

13. Lengwalo la Baheberu 13:5b le re kgodiša ka’ng? (Bona le seswantšho.)

¹³ Re sa dutše re naganne ka mehlala yeo, o nagana gore go tlo direga’ng ge batlotšwa ba mafelelo bao ba lego mo lefaseng ba išwa legodimong? Ga se ra swanela go belaela. Beibele e re kgonthišetša ka gore: Jehofa a ka se tsoge a lahlile batho ba gagwe bao ba lego mo lefaseng. (Bala Baheberu 13:5b.) Go swana le Moshe le Eliya, sehlopha se senyenyane sa Bakriste ba tloditšwego seo se etelelago pele lehono, se kwešiša bohlokwa bja go tlwaetša ba bangwe. Ke kgale Sehlopha se Bušago se tlwaetša banna ba dinku tše dingwe gore ba etelele pele. Ka mohlala, ba hlamile dikolo tše dintšhi tša go tlwaetša bagolo, balebeledi ba tikologo, ditho tša Dikomiti tša Makala, balebeledi bao ba lego Bethele le ba bangwe. Sehlopha se Bušago se tlwaetša le bathuši ba dikomiti tše fapafapanego tša Sehlopha se Bušago. Bathuši ba ba na le maikarabelo a mantšhi ka mokgatlong wa Jehofa lehono. Ba tlo kgona go tšwela pele ba hlokomela dinku tša Kriste gabotse.

14. Ke ntlha efe e bohlokwa yeo re boledišanago ka yona sehlogong se?

¹⁴ Ntlha e bohlokwa ke gore: Ge batlotšwa ba mafelelo ba eya legodimong pele masetlapelo a magolo a fela, borapedi bjo bo hlwekilego bo tlo ba bo dutše bo le gona mo lefaseng. Bahlanka ba Modimo ba ka se tlogele go mo hlankela ka go botega ka ge Jesu a tla be a ba etelela pele. Ke therešo gore ka nako yeo re tlo hlaselwa ke Gogo wa Magogo e lego ditšhaba tšeo di ipopilego ngatana e tee. (Hesek. 38:​18-20) Le ga go le bjalo, tlhaselo yeo e ka se atlege, e ka se šitiše bahlanka ba Jehofa gore ba tšwele pele ba mo hlankela. Ka kgonthe o tlo ba phološa! Moapostola Johane ponong ya gagwe o bone “lešaba le legolo” la dinku tše dingwe tša Kriste. Johane o ile a botšwa gore “lešaba le legolo” le tšwa “masetlapelong a magolo.” (Kut. 7:​9, 14) Ke nnete gore Jehofa o tla ba phološa!

15-16. Go ya ka Kutollo 17:​14, ke’ng seo batlotšwa ba Kriste ba tla bego ba se dira nakong ya ntwa ya haramagedone, gona ke ka baka la’ng seo se kgothatša?

¹⁵ Ba bangwe ba ka ipotšiša gore: ‘Go tlo direga’ng ka batlotšwa le gore ba tlo dira’ng ge  ba tloga mo lefaseng?’ Beibele e araba potšišo yeo ka go lebanya. E utolla gore mebušo ya lefase le ya dipolotiki e tlo “lwa le kwana.” Eupša e ka se fenye. Re bala gore: “Kwana e tla di fenya.” Ke mang a tla bego a thuša kwana? Temana ye e re nea dikarabo. E re, bao ba “biditšwego,” bao ba “kgethilwego,” le bao ba “botegago.” (Bala Kutollo 17:14.) Ke bomang bao go bolelwago ka bona? Ke batlotšwa bao ba tsošitšwego! Ge batlotšwa ba mafelelo ba išwa legodimong pele masetlapelo a magolo a fela, e nngwe ya dikabelo tša bona tša mathomo e tlo ba go lwa. Ye e tlo ba kabelo e kgahlišago kudu! Bakriste ba bangwe ba tloditšwego ba be ba elwa le batho ba bangwe pele e eba Dihlatse tša Jehofa. Ba bangwe e be e le mašole. Eupša ka morago ya ba Bakriste ba therešo gomme ba ithuta tsela ya khutšo. (Bagal. 5:22; 2 Bathes. 3:16) Ba ile ba se sa thekga dintwa. Ka morago ga gore ba tsošetšwe legodimong, ba tla thekga Kriste le barongwa ba gagwe ba bakgethwa gomme ba lwa ntwa ya mafelelo kgahlanong le manaba a Modimo.

¹⁶ Nagana ka se, gona bjale batlotšwa ba bangwe bao ba lego mo lefaseng ba tšofetše e bile ba a fokola. Eupša ka morago ga gore ba tsošetšwe legodimong ba tlo ba le matla e bile e le dibopiwa tša moya, gomme ba thuša Kgoši ya Mohlabani e lego Jesu Kriste ntweng. Ka morago ga ntwa ya Haramagedone ba tlo šoma gotee le Jesu Kriste ge a tla be a thuša batho gore ba phethagale. Re kgodišegile gore ge ba tla be ba le legodimong, ba tlo direla bana babo bona le dikgaetšedi dilo tše dibotse go feta tšeo ba ba diretšego tšona ge e be e le batho bao ba sa phethagalago!

17. Re tseba bjang gore nakong ya ntwa ya Haramagedone bahlanka ba Modimo ka moka ba tla be ba bolokegile?

¹⁷ Na o yo mongwe wa dinku tše dingwe? Gona o swanetše go dira’ng ge ntwa e kgolo ya Haramagedone e thoma? Dira se: Tshepa Jehofa gomme o latele tlhahlo ya gagwe. Seo se ka akaretša’ng? Beibele e re botša gore: “Le tsene diphapošing tša lena tša ka gare, le tswalele mejako ya lena. Ikuteng ka nakonyana go fihlela kgalefo e feta.” (Jes. 26:20) Bahlanka ba Modimo bao ba botegago ka moka legodimong le lefaseng, ba tlo ba ba bolokegile ka nako yeo. Go swana le moapostola Paulo, re kgodišegile gore “mebušo goba dilo tše di lego gona gona bjale goba dilo tše di tlago go tla . . . di ka se kgone go re aroganya le lerato la Modimo.” (Baroma 8:​38, 39) Dula o gopola gore Jehofa o a go rata, e bile le ka mohla a ka se go lahle!