Mary le monna wa gagwe e lego John, a ba dula nageng yeo batho ba go tšwa Philippines ba tlago go yona gore ba šome gomme ba kgona go bolela le bona ka ditaba tše dibotse. Nakong ya leuba la bolwetši bja COVID-19, Mary o ile a thoma go ithuta Beibele le batho ba nageng ya gabo gotee le bao ba tšwago dinageng tše dingwe. O thušitšwe ke eng?

Mary o be a botšiša batho bao a ithutago le bona gore: “Na o tseba batho ba bangwe bao ba ka ratago go ithuta Beibele?” Ge ba ka re ba gona, o be a ba kgopela gore ba mo kopanye le bona. Go botšiša potšišo ye e bonolo go ka ba le mafelelo a mabotse. Ka baka la’ng? Ka gobane batho bao ba ratago Lentšu la Modimo gantšhi ba rata go botša ba leloko le bagwera ba bona ka seo ba ithutago sona. Batho bao Mary a ithutago Beibele le bona ba mo arabile bjang ge a be a ba botšiša potšišo ye?

Jasmin yoo a bego a ithuta le Mary, o ile a mo kopanya le bagwera ba gagwe ba bane bao le bona ba bego ba nyaka go ithuta Beibele. Yo mongwe wa bona e lego Kristine, o be a thabela go ithuta moo a ilego a kgopela gore ba ithute gabedi ka beke. Ge Mary a be a botšiša ge e ba go na le batho bao a ba tsebago bao ba ka ratago go ithuta Beibele, Kristine o ile a re go yena: “Ke na le bagwera bao ba ka thabelago go ithuta.” Kristine ga se a tšea nako go kopanya Mary le bagwera ba gagwe ba bane bao ba bego ba nyaka go ithuta. Kristine o ile a kopanya Mary le bagwera ba gagwe ba bangwe bao le bona ba ilego ba mo kopanya le batho ba bangwe bao ba ba tsebago.

Kristine o be a nyaka gore batho ba gabo bao ba lego Philippines le bona ba ithute Beibele. Ka gona, o ile a botša morwedi wa gagwe e lego Andrea. Mathomong Andrea o be a nagana gore, ‘Dihlatse di gatelela batho, ga di dumele go Jesu ebile di diriša Testamente ya Kgale feela.’ Eupša ka morago ga gore a ithute gatee, o ile a lemoga gore o be a fošitše. Nakong ya ge a be a ithuta, o be a fela a bolela gore: “Ge e ba Beibele e rea’lo gona go ra gore ke nnete.”

Ge nako e dutše e eya, Andrea o ile a kopanya Mary le bagwera ba gagwe ba babedi le motho yo a šomago le yena gomme le bona ba thoma go ithuta. Le gona, Mary o be a sa lemoge gore ge a dutše a ithuta le Andrea, mmane wa gagwe e lego Angela yo a sa bonego, o be a ba theetša. Ka letšatši le lengwe, mmane wa Andrea o ile a mo kgopela gore a botšiše Mary ge e ba a ka kgona go ithuta Beibele le yena. Mmane wa Andrea o ile a thabela seo a bego a ithuta sona. Ka kgwedi feela, ke ge a šetše a swere Mangwalo ka hlogo ebile a nyaka go ithuta ka matšatši a  mane mo bekeng. Andrea o ile a mo thuša gore a be gona dibokeng ka mehla a diriša bidio.

Ge Mary a lemoga gore Joshua e lego monna wa Kristine o fela a ba theetša ge ba ithuta, o ile a mmotšiša ge e ba le yena a ka thabela go ithuta. Joshua o ile a re: “Ke tla no le theetša, eupša le se ke la mpotšiša dipotšišo ka gore ge le ka dira bjalo ke tlo le tlogela.” Ga se gwa mo tšea nako gore a thome go botšiša dipotšišo tše dintšhi go feta mosadi wa gagwe ebile a nyaka le go tšwela pele a ithuta Beibele.

Potšišo e bonolo feela, e ile ya dira gore Mary a ithute Beibele le batho ba bantšhi. Ge batho bao ba thoma go ba bantšhi, Mary o ile a kgopela Dihlatse tše dingwe gore di mo thuše. Mary o ile a ithuta Beibele le batho ba 28 bao ba tšwago dinageng tše nne.

Jasmin yo re boletšego ka yena mathomong a phihlelo ye, o kolobeditšwe ka April 2021. Kristine o kolobeditšwe ka May 2022, ebile o boetše gae Philippines gore a be le lapa la gagwe. Barutwana ba bangwe bao Kristine a ba kopantšego le Mary, le bona ba ile ba kolobetšwa. Mmane wa Andrea le yena o kolobeditšwe dikgwedi tše sego kae ka morago, ebile gona bjale ke mmulamadibogo wa ka mehla. Monna wa Kristine e lego Joshua le morwedi wa bona e lego Andrea, gotee le barutwana ba bangwe ba sa tšwela pele ba ithuta Beibele.

Lekgolong la pele la mengwaga, batho ba leloko le bagwera ba ile ba dira gore ditaba tše dibotse di phatlalale ka lebelo. (Joh. 1:41, 42a; Dit. 10:24, 27, 48; 16:25-33) O ka botšiša batho bao o ithutago Beibele le bona le bao ba nyakago go ithuta gore: “Na o tseba batho ba bangwe bao ba ka ratago go ithuta Beibele?” Potšišo ye e ka dira gore o be le batho ba bantšhi bao o ithutago Beibele le bona.