1-3. (a) Go bonagala Psalme 147 e ngwadilwe neng? (b) Re ka ithuta’ng ka go ahlaahla Psalme 147?

GE MOTHO a dirile mošomo o itšego gabotse goba a bonagaditše seka se se rategago sa Bokriste, o swanelwa ke go retwa. Ge e ba batho ba swanelwa ke go retwa, gona go ra gore re swanetše go reta Jehofa Modimo kudu le go feta! Re ka mo reta ka baka la matla a gagwe a magolo, bjalo ka ge re a bona dilong tšeo a di bopilego, goba ka baka la tsela e lerato yeo a dirišanago le batho ka yona, go etša ge a re neile Morwa wa gagwe gore a hwele dibe tša rena.

² Mongwadi wa Psalme ya 147 o ile a tutueletšega go tumiša Jehofa. Le gona o ile a kgothaletša batho ba bangwe gore le bona ba mo tumiše.​—Bala Psalme 147:1, 7, 12.

³ Ga re tsebe gore psalme ye e ngwadilwe ke mang, eupša mopsalme yo o swanetše go ba a phetše nakong ya ge Jehofa a be a ntšha Baisiraele bothopša Babilona gomme a ba bušetša Jerusalema. (Ps. 147:2) Ga go pelaelo gore taba ya gore Modimo o ile a bušetša batho ba gagwe borapeding bja therešo kua Jerusalema le yona e ile ya dira gore mopsalme yo a tumiše Jehofa. Lega go le bjalo, mopsalme yo o ile a bolela mabaka a mangwe gape a gore a tumiše Jehofa. Mabaka ao e be e le afe? Wena o na le mabaka afe bophelong bja gago a go goeletša ka gore, “Tumišang Jah!”?​—Ps. 147:1.

4. Ge Kgoši Korese a be a lokolla Baisiraele Babilona, ba swanetše go ba ba ile ba ikwa bjang, gona ka baka la’ng?

⁴ Nagana kamoo Baisiraele bao ba bego ba le bothopša kua Babilona ba bego ba ikwa ka gona. Bababilona ba be ba ba kwera ba re: “Re opeleleng e nngwe ya dikopelo tša kua Tsione.” Ka nako yeo, Jerusalema, yeo e bego e le lebaka la bona le legolo la gore ba tumiše Jehofa, e be e sentšwe. (Ps. 137:1-3, 6) Bajuda ba be ba se na matla a go opela. Dipelo tša bona di be di kwele bohloko, gomme ba be ba hloka go homotšwa le go kgothatšwa. Se se thabišago ke gore Modimo o ile a phethagatša mantšu a gagwe a boporofeta gomme a romela kgoši ya Peresia e lego Korese gore a ba phološe. Korese o ile a fenya Babilona gomme a re: “Jehofa . . . o ntaetše gore ke mo agele ntlo Jerusalema . . . Anke mang le mang go lena, yo e lego wa setšhaba sa gagwe, Jehofa Modimo wa gagwe a be le yena. Anke a rotoge.” (2 Dikor. 36:23) Ruri diphetogo tšeo di swanetše go ba di ile tša homotša Baisiraele bao ba bego ba dula Babilona!

5. Ke’ng seo mopsalme a se lemogilego ka Jehofa?

⁵ Jehofa ga se a no homotša Baisiraele e le sehlopha, eupša o ile a homotša yo mongwe le yo mongwe wa bona. Go sa dutše go le bjalo le lehono. Mopsalme o ngwadile ka Modimo gore: “O alafa ba dipelo tše di kwelego bohloko, o tlema dintho tša bona tše bohloko.” (Ps. 147:3) Ee, Jehofa o hlokomela bao ba tlaišegago​— e ka ba mmeleng goba maikwelong. Lehono, Jehofa o dula a loketše go re homotša le go re alafa maikwelong. (Ps. 34:18; Jes. 57:15) O re nea bohlale le matla e le gore re kgone go kgotlelela mathata le ge e le afe ao a ka re welago.​—Jak. 1:5.

6. Taba ya gore mopsalme o ile a thoma go bolela ka dinaledi go Psalm 147:4 e re hola bjang? (Bona seswantšho seo se lego mathomong a sehlogo.)

⁶ Ga bjale mopsalme o bolela ka magodimo, gomme o re botša gore Jehofa “o bala palo ya dinaledi” e bile “ka moka ga tšona o di bitša ka maina.” (Ps. 147:4) Ke ka baka la’ng mopsalme yo a fetoša taba gomme a thoma go bolela ka dinaledi? Nagana ka se: Mopsalme o be a kgona go bona dinaledi, eupša o be a sa tsebe gore ke tše kae ka palo. Go theoša le mengwaga, palo ya dinaledi tšeo re ka kgonago go di bona e oketšegile kudu. Batho ba bangwe ba nagana gore go na le dinaledi tše dibilione sehlopheng sa rena sa dinaledi sa Milky Way feela. E bile go ka direga gore go na le dihlopha tša dinaledi tše dimilionemilione kua legodimong! Eupša rena re bona dinaledi di se na palo! Lega go le bjalo, Mmopi wa tšona o neile e nngwe le e nngwe ya tšona leina goba tsela ya go e hlaola. Se se re botša gore Jehofa o bona dinaledi di fapana. (1 Bakor. 15:41) Go thwe’ng ka batho bao a ba bopilego? Ka ge a tseba nako ya naledi e nngwe le e nngwe le moo e lego gona, le wena o go tseba gabotse—o tseba tlwaa moo o lego gona le kamoo o ikwago ka gona, e bile o tseba tlwaa dilo tše o di hlokago le nako yeo o di hlokago ka yona!

7, 8. (a) Ke’ng seo Jehofa a se gopolago ge a thuša batho ba gagwe? (b) Nea mohlala wo o bontšhago gore Jehofa o re kwela bohloko ge a re thuša.

⁷ Ga se feela gore Jehofa o a go rata, eupša gape o go kwela bohloko e bile o na le matla a go ka go thuša ge o na le mathata. (Bala Psalme 147:5.) O ka ikwa eka mathata a gago a boima kudu le gore ga o sa kgona go kgotlelela. Modimo o a go kwešiša, ka ge ‘a gopola gore o lerole.’ (Ps. 103:14) Ka ge re sa phethagala, re dira diphošo gantšintši. Ruri re a itshola ge re ile ra thelelwa ke leleme, ge re fela re bonagatša mediro ya nama goba mokgwanyana wa go jela ba bangwe mona! Jehofa ga a na mafokodi  a bjalo; lega go le bjalo, o re kwešiša go feta motho le ge e le ofe e bile kwešišo ya gagwe ga e fihlelelwe!​—Jes. 40:28.

⁸ Mohlomongwe o ka ba o šetše o bone kamoo Jehofa a go thušitšego ka gona go fenya teko e itšego. (Jes. 41:10, 13) Nagana ka mohlala wa kgaetšedi Kyoko, e lego mmulamadibogo yo a ilego a nyama kudu ka morago ga gore a hudugele lefelong le lefsa. Jehofa o ile a bontšha bjang gore o kwešiša kamoo Kyoko a bego a ikwa ka gona? Lefelong leo le lefsa, Kyoko o ile a hwetša gore batho ba bantši ba be kwešiša tsela yeo a bego a ikwa ka yona. O ile a ikwa okare Jehofa o re go yena: “Kyoko, ke a go rata, le gona ga ke go rate feela ka gobane o le mmulamadibogo, eupša ke go rata ka gobane o morwedi wa ka yo a nthatago kudu. Ke nyaka gore o thabele bophelo bja gago ka ge o le yo mongwe wa Dihlatse tša ka!” Go thwe’ng ka wena? Ramatlaohle o go bontšhitše bjang gore “kwešišo ya gagwe ga e hlalosege”?

9, 10. Ge Jehofa a re thuša, o thoma ka eng pele? Nea mohlala.

⁹ Ka dinako tše dingwe o ka hlaelelwa ke dilo tšeo re di hlokago gore re phele. Ka mohlala, o ka tshwenyega ka gore o tlo felelwa ke dijo. Lega go le bjalo, Jehofa ke yena a dirilego gore go be le dihla tša go bjala e le gore go be le dijo, e bile ke yena a fepago gaešita le magokobu a manyenyane ao a dulago a mo llela! (Bala Psalme 147:8, 9.) Ge e ba Jehofa a kgona go tšwela pele a fepa magokobu, go ra gore le wena o tla go nea dilo tšeo o di hlokago.​—Ps. 37:25.

¹⁰ Selo se bohlokwa le go feta ke gore Jehofa o re nea dijo tša moya, tšeo di re thušago go ba le “khutšo ya Modimo yeo e fetago kwešišo yohle.” (Bafil. 4:6, 7) Ka mohlala, nagana ka ngwanabo rena Mutsuo le mosadi wa gagwe bao ba ilego ba bona seatla sa Jehofa ka morago ga gore kua Japane go be le tsunami ka 2011. Ba ile ba namela ka godimo ga tlhaka ya ntlo ya bona gomme ba phologa tsunami yeo ka lešobana la nalete. Letšatšing leo ba ile ba loba mo e ka bago dilo ka moka tšeo ba bego ba na le tšona. Ba ile ba fetša bošego ka moka bja go tonya ba le ka phaphošing ya lebatong la bobedi la ntlo ya bona yeo e bego e senyegile o šoro. Ge bosele, ba ile ba tsomana le dilo tšeo di ka ba kgothatšago moyeng. Ba ile ba hwetša feela Puku ya Ngwaga ya Dihlatse tša Jehofa ya 2006 (ya Seisemane). Gateetee Mutsuo o ile a bona sehlogo seo se rego, “Tsunami Yeo e Bolailego Batho ba Bantši Kudu.” Sehlogo seo se be se bolela ka tšhišinyego ya lefase yeo e bego e diregile kua Sumatra ka 2004 yeo e ilego ya baka ditsunami tša go šiiša tšeo di sa kago tša bonwa. Mutsuo le mosadi wa gagwe ba ile ba lla ge ba dutše ba bala diphihlelo tšeo. Ba ile ba bona gore Jehofa o a ba rata ka go ba nea kgothatšo ya moya ge ba be ba tloga ba e hloka. Le gona Jehofa o ile a ba nea dilo tšeo ba bego ba di hloka gore ba phele. O ile a diriša bana babo rena go dira seo. Eupša ba ile ba kgothatšwa kudu ke baemedi ba mokgatlo wa Modimo bao ba bego ba etela diphuthego tša moo. Mutsuo o re: “Ke ile ka kwa gore Jehofa o re eme nokeng le go re hlokomela. Ruri o ile a re matlafatša!” Ee, Modimo o re thuša moyeng pele, ke moka ya ba gona a re neago dilo tšeo re di hlokago gore re phele.

11. Ke’ng seo bao ba nyakago go holwa ke matla a Modimo ao a phološago ba swanetšego go se dira?

¹¹ Jehofa o dula a itokišeditše go “imolla ba boleta” le go ba thuša. (Ps. 147:6a) Eupša re swanetše go dira’ng gore le rena a re thuše? Re swanetše go ba le tswalano e botse le yena. Gore go be bjalo, re swanetše go hlagolela boleta. (Tsef. 2:3) Batho ba boleta ba letela Modimo gore a rarolle mathata le ge e le afe le go fediša  tlaišego ya bona. Jehofa o amogela batho ba bjalo.

12, 13. (a) Ke’ng seo re sa swanelago go se dira e le gore Modimo a re thuše? (b) Jehofa o thabišwa ke batho ba mohuta mang?

¹² Ka lehlakoreng le lengwe, Beibele e re Modimo “ba kgopo o ba kokobeletša fase.” (Ps. 147:6b) Mantšu a a swanetše go re phafoša borokong! E le gore Jehofa a dule a re rata le go se re galefe, re swanetše go hloya seo a se hloilego. (Ps. 97:10) Ka mohlala, re swanetše go hloya boitshwaro bjo bo gobogilego bja tša thobalano. Seo se ra gore re pheme selo se sengwe le se sengwe seo se ka re wetšago sebeng seo, go akaretša le diswantšho tša batho bao ba sa aparago. (Ps. 119:37; Mat. 5:28) Go ka ba thata go dira bjalo, eupša maiteko le ge e le afe ao re swanetšego go a dira ga se selo ge a bapišwa le go amogelwa ke Jehofa.

¹³ Ge re elwa ntwa ye, re swanetše go ithekga ka Jehofa, e sego ka matla a rena. Na Jehofa o tla thaba ge re ka leka go iphološa ka “matla a pere,” e lego dilo tšeo batho ba nyakago thušo go tšona? Aowa! Le gona ga se ra swanela go ithekga ka “lebelo la maoto a monna,” ke gore ra itira tše okarego rena goba batho ba bangwe ba ka re thuša. (Ps. 147:10) Go e na le moo, re swanetše go ya go Jehofa, re kgopele thušo go yena. Ka go se swane le baeletši ba batho, ga a lapišwe ke go theetša ditopo tša rena, gaešita le ge re mo kgopela thušo gantšintši. Beibele e re “Jehofa o kgahlwa ke bao ba mmoifago, o kgahlwa ke bao ba letetšego botho bja gagwe.” (Ps. 147:11) Re ka kgodišega gore ka ge a re rata, o tla dula a na le rena gomme a re thuša go fenya dikganyogo tša rena tše mpe.

14. Mopsalme o ile a kgothatšwa ke go tseba eng?

¹⁴ Jehofa o re neile lebaka la go kgodišega gore o tla re thuša ge re hloka thušo. Ge mopsalme yo mongwe a be a nagana ka go tsošološwa ga Jerusalema, o ile a opela ka Jehofa gore: “O tiišitše mapheko a dikgoro tša gago; o šegofaditše bana ba gago ba lego mo go wena. O tliša khutšo seleteng sa gago.” (Ps. 147:13, 14) Ruri mopsalme yo o ile a kgothatšwa ke go tseba gore Modimo o be a tla tiiša dikgoro tša Jerusalema e le gore a šireletše barapedi ba gagwe!

15-17. (a) Mathata a rena a ka dira gore re fele re ikwa bjang, eupša Jehofa o diriša bjang Lentšu la gagwe go re thuša? (b) Ke ka kgopolo efe ‘lentšu la Modimo le kitimago ka lebelo’? Nea mohlala.

¹⁵ O ka ba le mathata ao a dirago gore o tshwenyege. Jehofa a ka go nea bohlale bja go lebeletšana le mathata ao. Mopsalme o boletše ka Jehofa Modimo wa gagwe gore “o romela polelo ya gagwe lefaseng; lentšu la gagwe le kitima ka lebelo.” Ke moka ge mopsalme yoo a be a bolela ka Modimo gore ‘o neša kapoko; o gašanya šobane [le gore] o lahlela lehlwa,’ o botšišitše gore: “Ke mang a ka emago ge a tlišitše go tonya?” O okeditše ka gore Jehofa “o romela lentšu la gagwe gomme tša tologa.” (Ps. 147:15-18) Ee, Modimo wa rena yo-Matlaohle, yoo a kgonago go laola šobane le lehlwa, a ka go thuša go fenya mathata le ge e le afe ao a ka go welago.

¹⁶ Lehono, Jehofa o re hlahla ka Lentšu la gagwe e lego Beibele. Le gona “lentšu la gagwe le kitima ka lebelo” ka kgopolo ya gore o re nea tlhahlo ka nako yeo re bago re e hloka ka yona. Nagana kamoo o holegago ka gona ge o bala Beibele, ge o ithuta dikgatišo tša “mohlanka yo a botegago le wa temogo,” ge o bogela Kgašo ya JW, ge o tsena wepesaeteng ya jw.org, ge o boledišana le bagolo le ge o na le Bakristegotee le wena. (Mat. 24:45) Na dilo tše ka moka ga se tša go bontšha gore Jehofa o go nea tlhahlo ka lebelo?

¹⁷ Kgaetšedi Simone o ile a bona matla a Lentšu la Modimo. Ka ge a be a sa ikholofele, o be a  bile a nagana gore Modimo ga a mo amogele. Lega go le bjalo, dinakong tša ge a be a nyamile, o be a rapela Modimo a sa kgaotše, gomme a kgopela thušo go yena. Le gona o ile a dula a eba le thuto ya ka mehla ya motho ka noši. O re: “Maemong ka moka ao ke bilego go wona, ke ile ka kwa gore Jehofa o nnea matla le go ntlhahla.” Se se ile sa thuša Simone gore a dule a nagana ka dilo tše dibotse.

18. Ke ka baka la’ng o nagana gore Modimo o a go amogela, gona o na le mabaka afe a go goeletša ka gore, “Tumišang Jah!”?

¹⁸ Mopsalme yo o be a tseba gore Modimo o be a amogela batho ba gagwe ba bogologolo. Batho bao e be e le setšhaba se nnoši seo se bego se filwe “lentšu” la Modimo, “ditaelo tša gagwe le dikahlolo tša gagwe.” (Bala Psalme 147:19, 20.) Lehono ke rena feela re šegofaditšwego ka go bitšwa ka leina la Modimo mo lefaseng. Ka ge re tseba Jehofa le go phela ka go dumelelana le Lentšu la gagwe, re thabela tokelo ya go ba bagwera ba gagwe. Go swana le mongwadi wa Psalme 147, na ga o na mabaka a mantši a go goeletša ka gore, “Tumišang Jah!” le go kgothaletša ba bangwe go dira bjalo?