1, 2. Ke ka baka la’ng re swanetše go ahlaahla taba ya mabapi le kamoo re ka homotšago bao ba hwetšwego? (Bona seswantšho se se lego ka mo godimo.)

“MOKRISTE yo a bitšwago Susi o itše: “Ka morago ga mo e nyakilego e eba ngwaga morwa wa rena a hlokofetše, re be re sa dutše re ekwa bohloko bjo bo tseneletšego.” Mokriste yo mongwe yena o itše ge mosadi wa gagwe a be a hlokofala go sa letelwa, o ile a kwa “bohloko bjo bo sa hlalosegego mmeleng.” Se se kwešago bohloko ke gore Bakriste ba bangwe ba bantši ba diragalelwa ke se se swanago. Ba bantši ka phuthegong ba be ba sa letela gore baratiwa ba bona ba ka hlokofala pele Haramagedone e fihla. Go sa šetšwe gore o hlokofaletšwe ke motho yo o mo ratago goba gore o tseba motho yo mongwe yo a hwetšwego, o ka ipotšiša gore: ‘Batho bao ba hlokofaletšwego ba ka thušwa bjang go kgotlelela bohloko bjo ba bo kwago?’

² Mohlomongwe o kile wa kwa batho ba re dilo di tla loka ge nako e dutše e eya. Eupša na ruri nako ka boyona e tla homotša motho yo a kwelego bohloko? Mohlologadi yo mongwe o itše: “Nna ke lemogile gore seo motho yo a kwelego bohloko a se dirago ka nako ya gagwe ke sona se mo homotšago.” Ee, go swana le ntho, bohloko bja maikwelong bo ka fola ganyenyane-ganyenyane ge nako e dutše e eya ge e ba motho a dira se a ka se kgonago go ikalafa. Eupša ke’ng ka go lebanya seo se ka thušago bao ba hwetšwego gore ba fole bohlokong bjo ba bo kwago maikwelong?

3, 4. Ke’ng se se re kgodišago gore Jehofa o a tseba gore motho yo a hlokofaletšwego o hloka go homotšwa?

³ Ga go pelaelo gore yo a ka re homotšago go feta batho ka moka ke Tatago rena wa legodimong e lego Jehofa. (Bala 2 Bakorinthe 1:3, 4.) Jehofa, yoo a re beetšego mohlala o mogologolo wa kwelobohloko, o ile a kgodiša batho ba gagwe ka gore: “Ge e le nna ke Nna ke le homotšago.”​—Jes. 51:12; Ps. 119:50, 52, 76.

⁴ Tatago rena yo yo a tletšego dikgaugelo le yena o kile a hwelwa ke batho bao a ba ratago, e lego batho ba go swana le Aborahama, Isaka, Jakobo, Moshe le Kgoši Dafida. (Num. 12:6-8; Mat. 22:31, 32; Dit. 13:22) Lentšu la Modimo le re botša gore o fela pelo​—ya go—​tlo ba tsoša bahung. (Jobo 14:14, 15) Ba tlo thaba le go phela gabotse mmeleng. Le gona gopola gore Morwa wa Modimo​—, yoo a bego ‘a mo rata kudu,’ o ile—​a hwa gabohloko kudu. (Die. 8:22, 30) Ga go na mantšu ao a ka hlalosago bohloko bjoo Jehofa a swanetšego go ba a ile a bo kwa ge a be a bona Morwa wa gagwe a tlaišega!​—Joh. 5:20; 10:17.

5, 6. Jehofa a ka re homotša bjang?

⁵ Re ka ba le kgodišego e tiilego ya gore Jehofa o tla re homotša. Ka gona ge re hwetšwe, ga se ra swanela go dikadika go mmotša seo se lego ka dipelong tša rena ka thapelo. Ruri go a homotša go tseba gore Jehofa o kwešiša bohloko bjo re bo kwago le go re nea khomotšo yeo re tlogago re e hloka! Eupša o dira seo bjang?

⁶ Tsela e nngwe yeo Modimo a re thušago ka yona ke ka go re ‘homotša ka moya o mokgethwa.’ (Dit. 9:31) Matla a a Modimo a homotša kudu. Jesu o tshepišitše gore Tatagwe wa legodimong o be a tla akgofela go ‘nea bao ba mo kgopelago moya o mokgethwa.’ (Luka 11:13) Susi, yoo go boletšwego ka yena pejana, o re: “Go na le dinako tše dingwe tše dintši tšeo ka tšona re bego re wela fase ka matolo gomme re lopa Jehofa gore a re homotše. Nako le nako ge re dira bjalo, re be re ekwa khutšo ya Modimo e diša dipelo tša rena le menagano ya rena.”​—Bala Bafilipi 4:6, 7.

7, 8. Ke ka baka la’ng re ka kgodišega gore Jesu o tla kgona go re homotša?

⁷ Kwelobohloko e tseneletšego ya Jehofa e bonagetše ka tsela e phethagetšego go seo Morwa wa gagwe e le go Jesu a se boletšego le go se dira ge a be a le mo lefaseng. (Joh. 5:19) Jehofa o be a rometše Jesu mo lefaseng gore a tle a homotše batho ba “dipelo tše di kwelego bohloko” le “bohle bao ba llago.” (Jes. 61:1, 2; Luka 4:17-21) Ke ka baka leo Jesu a bego a tsebja ka go ba le kwelobohloko e tseneletšego​—e lego go bona mohlako wa batho le go rata go ba thuša ka pelo ka moka.​—Baheb. 2:17.

⁸ Ge Jesu e be e sa le yo monyenyane, ga go pelaelo gore o ile a swanelwa ke go kwa bohloko bja go hwelwa ke ditho tša lapa goba bagwera. Go bonagala tatagwe yo a mo godišitšego e lego Josefa, a hwile ge Jesu e sa le yo mošemanyana. * Ka gona nagana ka Jesu, mohlomongwe e sa le mofsa goba a le mengwageng ya mathomong a bo-20, a swanetše go kgotlelela bohloko bja go hwelwa ke tate, gotee le go bona mmagwe, bana babo le dikgaetšedi ba ekwa bohloko.

9. Jesu o ile a bontšha bjang gore o na le kwelobohloko ge Latsaro a be a hwile?

⁹ Ge Jesu a be a bolela ditaba tše dibotse, o be a swara batho ka lerato le go ba bontšha kwelobohloko e tseneletšego. Ka mohlala, nagana ge mogwera wa gagwe e lego Latsaro a be a hwile. Gaešita le ge Jesu  a be a tseba gore o yo tsoša Latsaro bahung, o ile a kwa bohloko bjo bogolo bjoo Maria le Mareta ba bego ba bo kwa. O ile a kwa bohloko kudu moo a ilego a lla.​—Joh. 11:33-36.

10. Ke ka baka la’ng re ka kgodišega gore le lehono Jesu o re kwela bohloko?

¹⁰ Kwelobohloko ya Jesu le lešoko la gagwe di ka re homotša bjang lehono? Mangwalo a re nea khomotšo ka go re botša gore “Jesu Kriste ke yo a swanago maabane le lehono le ka mo go sa felego.” (Baheb. 13:8) Ka ge “Moemedi yo [yo] Mogolo wa bophelo” a tseba bohloko bja go hwelwa, “o kgona go thuša bao ba lekwago.” (Dit. 3:15; Baheb. 2:10, 18) Ka baka leo, re ka kgodišega gore Kriste o kwa bohloko ge re hwetšwe, o a kwešiša e bile o re nea khomotšo “ka nako e swanetšego.”​—Bala Baheberu 4:15, 16.

11. Ke mangwalo afe ao ka go kgethega o hwetšago a homotša?

¹¹ Ditemana tša Beibele tšeo di re botšago gore Jesu o ile a kwa bohloko kudu ge Latsaro a be a hwile ke mohlala wa ditemana tše dintši tše di homotšago tša ka Lentšung la Modimo. Le gona seo ga se re makatše ka gobane Beibele e re “dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” (Baroma 15:4) Ge e ba le wena o hlokofaletšwe ke motho yo o mo ratago, o ka homotšwa ke mangwalo a go swana le a a latelago:

• “Jehofa o kgauswi le ba dipelo tše di robegilego; o phološa ba meoya e nyamilego o šoro.”​—Ps. 34:18, 19.

• “Ge dikgopolo tša ka tše di mpherekanyago di be di ata ka go nna, dikhomotšo tša gago [Jehofa] di ile tša okobatša moya wa ka.”​—Ps. 94:19.

• “Eka Morena wa rena Jesu Kriste le Modimo Tatago rena, bao ba re ratilego gomme ba re nea khomotšo e sa felego le kholofelo e botse ka botho bjo bogolo bja Modimo, ba ka homotša dipelo tša lena gomme ba le matlafatša.”​—2 Bathes. 2:16, 17. *

12. Tsela e nngwe ya bohlokwahlokwa yeo re ka homotšago bao ba hwetšwego ke efe?

¹² Tsela e nngwe yeo Jehofa a homotšago bao ba hwetšwego ke ka go diriša ditho tša phuthego. (Bala 1 Bathesalonika 5:11.) O ka kgothatša bjang le go homotša bao ba nago le “moya o nyamilego”? (Die. 17:22) O se ke wa lebala gore go na le “nako ya go homola le nako ya go bolela.” (Mmo. 3:7) Mohlologadi yo a bitšwago Dalene o re: “Batho bao ba hwetšwego ba nyaka go bolela seo ba se naganago le kamoo ba ikwago ka gona. Ka baka leo, selo sa bohlokwahlokwa seo o ka se direlago motho yo a hwetšwego ke go mo theetša​—le gona o se ke wa mo tsena ganong.” Junia, yoo buti wa gagwe a ipolailego, o oketša ka gore: “Le ge o ka se kwešiše ka botlalo bohloko bjoo bao ba hwetšwego ba bo kwago, ba homotšwa ke go bona gore o nyaka go kwešiša kamoo ba ikwago ka gona.”

13. Ke’ng seo re sa swanelago go se lebala ka bao ba hwetšwego?

¹³ Le gona o se ke wa lebala gore batho ga ba lle ka go swana ge ba hwetšwe. Ka dinako tše dingwe, ba bangwe ba kwa bohloko dipelong tša bona eupša ba palelwa ke go bolela kamoo ba ikwago ka gona. Lentšu la Modimo le re: “Pelo e kwa bohloko ge moya  o kwele bohloko gomme ga go yo a ka tsenatsenanago le lethabo la yona.” (Die. 14:10) Gaešita le ge motho a ka bolela kamoo a ikwago ka gona, ga se ka mehla go lego bonolo go ba bangwe gore ba kwešiše seo a lekago go se bolela.

14. Re ka hwetša kae mantšu a go homotša bao ba hwetšwego?

¹⁴ Ke therešo gore re ka no se tsebe seo re swanetšego go se bolela go homotša motho yo a hwetšwego. Lega go le bjalo, Beibele e re “leleme la ba bohlale le a fodiša.” (Die. 12:18) Ba bantši ba hweditše mantšu ao ba ka homotšago ba bangwe ka wona ka poroutšheng ya Ge Motho yo o mo Ratago a E-hwa. * Eupša gantši selo seo se thušago go di feta ka moka seo o ka se dirago ke go “[lla] le bao ba llago.” (Baroma 12:15) Gaby, yoo a hlokofaletšwego ke monna, o re: “Nna le megokgo re bagwera. Ke ka baka leo ke homotšegago ge bagwera ba ka ba lla le nna. Ka nako yeo, ga ke ikwe eka ke lahlilwe.”

15. Re ka homotša bjang bao ba hwetšwego ge e ba re thatafalelwa ke go dira seo re lebantše difahlego? (Bona le lepokisi le le rego, “ Mantšu a Lerato ao a Homotšago.”)

¹⁵ Ge e ba o thatafalelwa ke go homotša motho yo a hwetšwego le lebantše difahlego, go ka ba kaone gore o mo romele karata, e-mail, molaetša goba lengwalo la go mo homotša. O ka tsopola temana ya Beibele, goba wa ngwala ka seka se itšego se se kgahlišago sa mohu, goba tiragalo e itšego e kgahlišago yeo o e gopolago ka yena. Junia o re: “Go romelwa molaetša o mokopana o kgothatšago goba go laletšwa pokanong e itšego ke Bakristegotee go nthuša kudu. Dilo tše bjalo di mpontšha gore bana bešo ba a nthata le go tshwenyega ka nna.”

16. Tsela e atlegago kudu ya go homotša bao ba hwetšwego ke efe?

 ¹⁶ O se ke wa tšeela fase bohlokwa bja go rapela ge o na le ngwanabo rena goba kgaetšedi yo a hwetšego goba go mmea dithapelong. Gaešita le ge o ka thatafalelwa ke go kgetha mantšu ge o rapela le yena nakong yeo e thata, go rapelela batho ba bjalo, gaešita le ka megokgo le ka lentšu la go thothomela, go ka ba homotša kudu. Dalene o gopola ka gore: “Ka dinako tše dingwe ge dikgaetšedi di tlile go nkhomotša, ke be ke di kgopela gore di nthapelele. Di be di dira bjalo, eupša ge di thoma go rapela di be di swara bothata. Lega go le bjalo, ka mehla ge di se na go thoma go rapela, mantšu a tšona a be a tia gomme di rapela go tšwa pelong. Tumelo ya tšona e tiilego, lerato la tšona le go tshwenyega ga tšona ka nna go matlafaditše tumelo ya ka kudu.”

17-19. Ke ka baka la’ng re sa swanela go kgaotša go homotša bao ba hwetšwego?

¹⁷ Tsela yeo batho bao ba hwetšwego ba llago ka yona ga e swane. Ka baka leo, dula o ba thuša. O se ke wa ba thuša feela matšatšing a sego kae a ge bagwera ba bona ba bantši le ba leloko ba sa le gona, eupša o ba thuše le dikgweding tše di sa tlago ge ba bantši ba tla be ba boetše magae le go swarega ka dilo tša bona. Beibele e re: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.” (Die. 17:17) Bakristegotee ke bona ba ka homotšago le go feta motho yo a hwetšwego go fihlela maemo a boela sekeng.​—Bala 1 Bathesalonika 3:7.

¹⁸ Gopola gore go na le dilo tšeo di ka tsošago bohloko bja go hwelwa, e lego dilo tša go swana le ge go fihla letšatši leo banyalani ba nyalanego ka lona, mmino o itšego, dinepe, ditiragalo tše itšego, goba gaešita le monkgo goba modumo o itšego, goba sehla se itšego sa ngwaga. Dilo tše dintši tšeo motho yo a bego a le lenyalong a tlago go thoma go di dira a nnoši, e lego dilo tša go swana le go ya kopanong goba Segopotšong—​di ka tsoša bohloko bjoo gape. Ngwanabo rena yo mongwe o re: “Ke be ke tseba gore ge letšatši leo nna le mosadi wa ka re nyalanego ka lona le fihla, ke tlo šulafalelwa kudu. Go be go se bonolo. Eupša bana babo rena le dikgaetšedi ba sego kae ba ile ba dira moletlwana le bagwera ba ka gomme ba ntaletša e le gore ke se lewe ke bodutu letšatšing leo.”

¹⁹ Lega go le bjalo, o se ke wa lebala gore bao ba hwetšwego ga ba nyake go homotšwa feela nakong ya ditiragalo tše di kgethegilego. Junia o re: “Gantši thušo le segwera tšeo di newago go sa letelwa di kgothatša kudu. Thušo e bjalo e bohlokwa kudu e bile e a matlafatša.” Ke therešo gore re ka se fediše bohloko bja go hwelwa goba go thiba sekgoba seo se butšwego ke motho yo a hlokofetšego, eupša re ka homotša bao ba hwetšwego ka go ba thuša ka ditsela tše di fapafapanego. (1 Joh. 3:18) Gaby o gopola ka gore: “Ke leboga Jehofa ka bagolo bao ba ilego ba nkema nokeng go fihla mafelelong dinakong tše bohloko tšeo ke bilego go tšona. Ba ile ba nthuša kudu moo ke ilego ka kwa gore Jehofa o nkgokaretše ka lerato.”

20. Ke ka baka la’ng dilo tšeo Jehofa a re tshepišitšego tšona di re homotša kudu?

²⁰ Ruri go a homotša go tseba gore Jehofa, yena Modimo wa khomotšo yohle, o tla fediša mahloko ka moka gomme a re homotša sa ruri ge “bohle bao ba lego mabitleng ba [tla be ba ekwa] lentšu la [Kriste] gomme ba [etšwa].” (Joh. 5:28, 29) Modimo o tshepišitše gore “o tla metša lehu ka mo go sa felego, gomme Mmuši Morena Jehofa o tla phumola megokgo difahlegong ka moka.” (Jes. 25:8) Ke moka, go e na le gore re tle re “[lle] le bao ba llago,” batho ka moka mo lefaseng ba tlo “[thaba] le bao ba thabago.”​—Baroma 12:15.