1. Re swanetše go lebelela bjang tokelo ya go rapela Jehofa?

 RE NEILWE tokelo e botse kudu ya go rapela Mmopi yo a dirilego magodimo le lefase. Nagana feela, o ka botša Jehofa seo se lego pelong ya gago ka nako e nngwe le e nngwe le ka leleme le lengwe le le lengwe. Re ka mo rapela re le sepetlele goba re le kgolegong, ka gobane re kgodišegile gore Tatago rena yo lerato o a re theetša. Re leboga tokelo ye kudu.

2. Kgoši Dafida o bontšhitše bjang gore o tšeela godimo tokelo ya go rapela?

² Kgoši Dafida o be a tšeela godimo tokelo ya gagwe ya thapelo. O ile a opelela Jehofa ka gore: “Anke thapelo ya ka e lokišetšwe bjalo ka seorelo pele ga gago.” (Ps. 141:1, 2) Mehleng ya Dafida seorelo se sekgethwa seo baperisita ba bego ba se diriša borapeding bja therešo, se be se lokišetšwa gabotse kudu. (Ek. 30:34, 35) Dafida o be a nyaka go naganišiša ka seo a tla bego a nyaka go se bolela ge a rapela Jehofa, go no swana le diorelo tšeo di lokišeleditšwego gabotse. Le rena ke seo re se nyakago, re nyaka gore dithapelo tša rena di thabiše Jehofa.

3. Re swanetše go rapela Jehofa bjang gona ka baka la’ng?

³ Ge re rapela Jehofa re swanetše go bontšha tlhompho e tseneletšego. Ga se ra swanela go bolela le yena okare re a bapala. Nagana ka dipono tše di kgahlišago tšeo Jesaya, Hesekiele, Daniele le Johane ba ilego ba di bona. Dipono tšeo di fapane eupša go na le seo di swanago ka sona. Ka moka ga tšona di bontšha Jehofa e le Kgoši yeo e hlomphegago kudu. Jesaya o ile a “bona Jehofa a dutše sedulong  sa bogoši se se phagamego.” (Jes. 6:1-3) Hesekiele o ile a bona Jehofa a nametše koloi e dikologilwe ke “letago la go swana le molalatladi.” (Hesek. 1:26-28) Daniele o ile a bona “Motala wa Mabaka” a apere diaparo tše tšhweu gomme go etšwa mollo sedulong sa gagwe sa bogoši. (Dan. 7:9, 10) Johane le yena o bone Jehofa a dutše sedulong sa bogoši gomme go dikologa sedulo sa bogoši go e na le molalatladi woo ka ponagalo o swanago le leswika leo le bitšwago emeralede. (Kut. 4:2-4) Ge re bona bogolo bja Jehofa re lemoga bohlokwa bja go mo rapela le go mmotšha tlhompho. Eupša re swanetše go rapela bjang?

4. Re ithuta’ng mantšung a mathomo ao Jesu a a boletšego thapelong ya mohlala go Mateo 6:9, 10?

⁴ Bala Mateo 6:9, 10. Thutong ya thabeng, Jesu o ile a ruta barutiwa ba gagwe tsela ya go rapela yeo e kgahlišago Jehofa. Ka morago ga gore Jesu a re “le swanetše go rapela ka tsela ye,” o ile a bolela ka dilo tše bohlokwa tšeo di sepedišanago le morero wa Jehofa e lego: Go kgethegatša leina la gagwe, go rapelela Mmušo wa gagwe wo o tlago go fediša manaba a gagwe le go tliša dilo tše dibotse tšeo a tlago go di direla batho nakong e tlago mo lefaseng. Ge re rapelela dilo tše re bontšha gore thato ya Modimo e bohlokwa go rena.

5. Na Jehofa o a re theetša ge re rapelela dilo tšeo di amago maphelo a rena?

⁵ Karolong ye e latelago ya thapelo, Jesu o bontšhitše gore re swanetše go rapelela dilo tšeo di amago maphelo a rena. Re ka kgopela Jehofa gore a re nee dijo, a re lebalele dibe tša rena, a re šireletše go meleko e bile a re hlakodiše go yo kgopo. (Mat. 6:11-13) Ge re kgopela Jehofa dilo tše, re bontšha gore re hloka thušo ya gagwe e bile re nyaka gore a re amogele.

6. Na re swanetše go rapela feela ka dilo tšeo go boletšwego ka tšona thapelong ya mohlala? Hlalosa.

⁶ Jesu o be a sa nyake gore barutiwa ba gagwe ge ba rapela ba ekiše mantšu a thapelo ya mohlala. Ka dinako tše dingwe ge  Jesu a be a rapela o be a bolela ka dilo tšeo di lego bohlokwa ka nako yeo. (Mat. 26:39, 42; Joh. 17:1-26) Le rena re swanetše go rapela ka dilo tšeo re tshwenyegago ka tšona. Ge e ba re swanetše go dira phetho, re ka rapela gore Modimo a re nee bohlale le kwešišo. (Ps. 119:33, 34) Ge re neilwe kabelo e thata re ka rapela Modimo gore a re thuše go kwešiša gore re ka e dira bjang. (Die. 2:6) Batswadi ba ka rapelela bana ba bona, le bana ba ka rapelela batswadi ba bona, le gona ka moka ga rena re ka rapelela dithuto tša rena tša Beibele le batho bao re ba rutago ditaba tše dibotse. Eupša dithapelo tša rena ga se tša swanela go no ba tša go kgopela.

7. Ke ka baka la’ng re swanetše go tumiša Jehofa ge re rapela?

⁷ Re swanetše go gopola go tumiša Jehofa ge re rapela. Ga go motho yo a swanelago ke go tumišwa go fetiša Modimo wa rena. O “lokile e bile o ikemišeditše go lebalela.” E bile ke Modimo yo a “gaugelago le yo a šokelago, yo a diegago go galefa le yo a tletšego botho le therešo.” (Ps. 86:5, 15) Re na le mabaka a mabotse a go tumiša Jehofa ka baka la dilo tšeo a di dirago le seo a lego sona.

8. Ke dilo dife tše dingwe tšeo re ka lebogago Jehofa ka tšona? (Psalme 104:12-15, 24)

⁸ Go na le dilo tše dingwe tšeo re swanetšego go di akaretša ge re tumiša Jehofa ka thapelo, ke ka go mo leboga ka dilo tše dibotse tšeo a re direlago tšona. Ka mohlala re ka mo leboga ka mebala ya go fapanafapana yeo re e bonago matšobeng, dijo tša go fapanafapana le bagwera ba babotse bao re nago le bona. Tatago rena yo lerato o re nea dilo tše le tše dingwe tše dintši e le gore re thabe. (Bala Psalme 104:12-15, 24.) Sa bohlokwa le go feta re mo leboga ka tlhahlo yeo a re neago yona gore re dule re na le segwera se sebotse le yena le kholofelo e botse yeo re tlago go e hwetša nakong e tlago.

9. Ke eng seo se ka re thušago gore re gopole go leboga Jehofa? (1 Bathesalonika 5:17, 18)

⁹ Go ka ba bonolo kudu go lebala go leboga  Jehofa ka dilo tšeo a re diretšego tšona. O ka thušwa ke eng go di gopola? O ka ngwala fase dilo tšeo o kgopetšego Jehofa gore a go thuše ka tšona, ke moka wa bona gore ke dife tšeo a šetšego a di arabile. Ka morago, rapela gore o mo leboge. (Bala 1 Bathesalonika 5:17, 18.) Nagana ka se: Re a thaba ge batho ba bangwe ba re leboga ka dilo tšeo re di dirilego. Ka mo go swanago ge re gopola go leboga Jehofa ka ge a arabile dithapelo tša rena seo se mo thabiša kudu. (Bakol. 3:15) Re na le lebaka lefe le lengwe gape la go leboga Jehofa Modimo?

10. Go ya ka 1 Petro 2:21, ke ka baka la’ng re swanetše go leboga Jehofa?

¹⁰ Bala 1 Petro 2:21. Re swanetše go leboga Jehofa ka ge a rometše Morwa wa gagwe gore a tle a re rute. Ge re bala ka bophelo bja Jesu re ithuta ka dilo tše dintši ka Jehofa le gore re ka mo thabiša bjang. Ge re bontšha tumelo sehlabelong sa Jesu, re thabela go ba le segwera se sebotse le Jehofa le go ba le khutšo.—Baroma 5:1.

11. Ke ka baka la’ng re rapela Jehofa ka leina la Jesu?

¹¹ Re leboga Jehofa ka gobane re kgona go mo rapela re diriša Morwa wa gagwe. Jehofa o diriša Jesu go re nea dilo tšeo re mo kgopelago tšona. Jehofa o theetša le go araba dithapelo tša rena ge re diriša leina la Jesu. Jesu o ile a hlalosa gore: “Selo le ge e le sefe seo le se kgopelago ka leina la ka ke tla se dira, e le gore Tate a tagafatšwe ka Morwa.”—Joh. 14:13, 14.

12. Re na le lebaka lefe le lengwe la go leboga Jehofa ka Morwa wa gagwe?

¹² Jehofa o re lebalela dibe a diriša sehlabelo sa Jesu sa topollo. Beibele e hlalosa Jesu e le ‘moperisita yo a phagamego yo a dutšego ka letsogong la le letona la sedulo sa bogoši sa Yo Mogolo magodimong.’ (Baheb. 8:1) Jesu ke “mothuši [wa rena] go Tate.” (1 Joh. 2:1) Re leboga Jehofa kudu ka go re nea moperisita yo mogolo yo a kwešišago mafokodi a rena “le yo gape a re phophothelago”! (Baroma 8:34; Baheb. 4:15) Ga se ra phethagala, ka gona ka ntle le sahlabelo sa Jesu, re ka se kgone go batamela Modimo ka thapelo. Ke nnete gore re ka se kgone go hlalosa gabotse kamoo re lebogago ka gona mpho ye Jehofa a re filego yona e lego sehlabelo sa Morwa wa gagwe!

13. Jesu o ile a bontšha bjang gore o rata barutiwa ba gagwe bošegong bja pele ga ge a ka hwa?

¹³ Bošegong bja pele ga ge Jesu a ka hwa, o ile a rapelela barutiwa ba gagwe ka nako e telele a kgopela Tatagwe gore a “ba šireletše ka baka la yo kgopo.” (Joh. 17:15) Se se bontšha gore Jesu o be a ba rata! Le ge a be a tseba gore o tlo tlaišega kudu, eupša o be a sa tshwenyegile ka baapostola ba gagwe.

14. Re ka bontšha bjang gore re rata bana babo rena le dikgaetšedi?

¹⁴ Re ekiša Jesu ka go se inaganele re nnoši. Eupša re rapelela bana babo rena le dikgaetšedi ka mehla. Ge re dira seo re bontšha gore re kwa taelo ya Jesu ya gore re ratane. Le gona re bontšha Jehofa gore re rata bana babo rena le dikgaetšedi kudu. (Joh. 13:34) Ga re senye nako ya rena ka go rapelela bana babo rena le dikgaetšedi. Beibele e re: “Topo ya moloki e na le matla e bile e a šoma.”—Jak. 5:16.

15. Ke ka baka la’ng bana babo rena le dikgaetšedi ba hloka dithapelo tša rena?

 ¹⁵ Bana babo rena le dikgaetšedi ba hloka dithapelo tša rena ka gobane ba kopana le mathata a mantši. Re ka kgopela Jehofa gore a ba thuše go kgotlelela malwetši, dikotsi tša tlhago, go tlaišwa, dintwa le mathata a mangwe. Re ka rapelela le bana babo rena le dikgaetšedi bao ba šomago ka thata go thuša bao ba hlokago thušo. O ka ba o tseba ba bangwe bao ba nago le mathata. O ka ba bitša ka maina ge o rapela. Re ba bontšha lerato ge re kgopela Jehofa gore a ba thuše go kgotlelela mathata.

16. Ke ka baka la’ng re swanetše go rapelela bao ba re eteletšego pele?

¹⁶ Bao ba etelelago pele ka phuthegong ba leboga kudu ge re ba rapelela. Le gona dithapelo tšeo di a ba thuša. Moapostola Petro le yena o ile a ikwa ka tsela yeo. O ngwadile gore: “[Rapelelang] gotee le nna, gore ge ke ahlamiša molomo ke kgone go bolela ka bolokologi ge ke tsebatša sephiri se sekgethwa sa ditaba tše dibotse.” (Baef. 6:19) Lehono re na le bana babo rena ba bantši bao ba šomago ka mafolofolo go re etelela pele. Re bontšha gore re a ba rata ka go kgopela Jehofa gore a thekge mošomo wa bona.

17-18. Ke neng moo re ka kgopelwago go rapelela batho ba bangwe, gona ke eng seo re swanetšego go dula re se gopola?

¹⁷ Ka dinako tše dingwe re kgopelwa go rapelela batho ba bangwe. Ka mohlala, kgaetšedi yo a swerego thuto ya Beibele a ka kgopela kgaetšedi yo a sepelago le yena gore a rapele. Kgaetšedi yo a kgopetšwego go rapela a ka ba a sa tsebe morutwana gabotse, ka gona a ka kgopela go rapela mafelelong a thuto ya Beibele. Ka tsela yeo o tlo tseba seo a swanetšego go se bolela ge a rapela.

¹⁸ Ngwanabo rena a ka kgopelwa gore a rapele dibokeng goba sebokeng sa tšhemo. Bana babo rena bao ba nago le tokelo ya go rapela ba swanetše go tseba morero wa diboka. Ngwanabo rena ga se a swanela gore ge a rapela a eletše phuthego goba a dire  ditsebišo. Diphuthegong tše dintši kopelo le thapelo di akareditšwe ka metsotso e mehlano. Ka gona ge ngwanabo rena a rapela, ga se a swanela go diriša “mantšu a mantši,” kudu kudu mathomong a diboka.—Mat. 6:7.

19. Ke eng seo se tlago go re thuša gore re dule re itokišeleditše letšatši la Jehofa?

¹⁹ Ge letšatši la Jehofa le dutše le batamela, re swanetše go dira gore thapelo e be bohlokwa kudu maphelong a rena. Jesu o ile a bolela ka taba ye gore: “Ka gona, dulang le phakgame ka dinako tšohle le lopa gore le atlege ka go phonyokga dilo tše ka moka tše di reretšwego go direga.” (Luka 21:36) Ge re dula re rapela ka mehla tumelo ya rena e tlo tia kudu e bile re tlo dula re itokišeleditše letšatši la Jehofa.

20. Re ka dira’ng gore thapelo ya rena e swane le seorelo sa monkgo o bose?

²⁰ Ke eng seo re ithutilego sona? Re leboga kudu tokelo ya rena ya thapelo. Dilo tša bohlokwa kudu tšeo re swanetšego go di rapelela, e swanetše go ba tšeo di sepedišanago le thato ya Modimo. Re leboga le Morwa wa Modimo le Mmušo wa gagwe, e bile re rapelela le bana babo rena le dikgaetšedi. Re ka rapelela gape le dilo tšeo re di hlokago. Ge re naganišiša ka seo re tlago go se bolela ge re rapela, re bontšha gore re tšeela godimo tokelo ye e botse. Mantšu a rena a tla ba bjalo ka seorelo sa monkgo o bose o yago go Jehofa e bile “a mo kgahla.”—Die. 15:8.