Bagalatia 5:22, 23, e bolela ka dika tše senyane. E re: “Dika tšeo di enywago ke moya ke lerato, lethabo, khutšo, go se fele pelo, botho, toko, tumelo, boleta le boitshwaro.” Ga se ra swanela go nagana gore tše ke tšona feela dika tše dibotse tšeo moya wa Modimo o ka re thušago gore re be le tšona.

Ditemaneng tša pele ga Bagalatia 5:22, 23, moapostola Paulo o ngwadile gore: “Mediro ya nama . . . ke bootswa, go se hlweke, boitshwaro bjo bo hlephilego, borapedi bja medimo ya diswantšho, go dirišana le meoya e mebe, bonaba, tshele, lehufa, go tlalelana ka bogale, diphenkgišano, dikarogano, dihlotswana tša bokgelogi, mona, botagwa, menyanya ya mašata le dilo tša go swana le tše.” (Bagal. 5:19-21) Ge Paulo a be a bolela ka mediro ya nama o feleleditše ka mantšu a rego “le dilo tša go swana le tše,” ka gona ga se a bolela dilo ka moka tšeo e lego “mediro ya nama,” go swana le yeo go boletšwego ka yona go Bakolose 3:5. Ka mo go swanago, ka morago ga gore a bolele dika tše senyane tšeo di enywago ke moya wa Modimo o itše: “Ga go na molao o ganetšanago le dilo tše bjalo.” Ka gona, Paulo ga se a bolela dika ka moka tše dibotse tšeo re ka bago le tšona re thušwa ke moya o mokgethwa.

Re kgona go kwešiša se gabotse ge re bapetša dika tšeo di enywago ke moya wa Modimo le dienywa tša seetša tšeo moapostola Paulo a boletšego ka tšona ge a be a ngwalela phuthego ya Efeso. O itše: “Dienywa tša seetša di na le mohuta o mongwe le o mongwe wa toko, toka le therešo.” (Baef. 5:8, 9) Ke therešo gore “toko,” toka le therešo ke tše dingwe tša “dienywa tša seetša,” e bile toko ke se sengwe sa “dika tšeo di enywago ke moya” wa Modimo.

Le gona, Paulo o ile a kgothaletša Timotheo gore a “phegelele toko, boineelo go Modimo, tumelo, lerato, kgotlelelo le boleta,” e lego dika tše tshela tše dibotse kudu. (1 Tim. 6:11) Ke tše tharo feela tša dika tšeo e lego tumelo, lerato le boleta, e lego tše dingwe tša “dika tšeo di enywago ke moya” wa Modimo. Timotheo o be a tseba gore o swanetše go ba le dika tše dingwe tše bjalo ka toko, boineelo go Modimo le kgotlelelo. E bile o be a tseba gore e le gore a be le dika tše o swanetše go thušwa ke moya wa Modimo.—Bapiša le Bakolose 3:12; 2 Petro 1:5-7.

Ka gona, go Bagalatia 5:22, 23, ga se gwa bolelwa dika ka moka tšeo Bakriste ba swanetšego go ba le tšona. Moya wa Modimo o ka re thuša gore re be le dika tše senyane tšeo di badilwego e le “dika tšeo di enywago ke moya” wa Modimo. Eupša go na le dika tše dingwe tšeo re swanetšego go ba le tšona ge segwera sa rena le Modimo se dutše se gola, e bile re “[apara] semelo se sefsa seo se bopilwego go ya ka thato ya Modimo tokong ya therešo le potegong.”—Baef. 4:24.