1-2. Ke ditaba dife tšeo Dihlatse tša Jehofa di di tšeago di le bohlokwa kudu?

LEHONO go na le ditaba tšeo di amago batho ka moka lefaseng, e lego bogoši bja Jehofa le go kgethagatšwa ga leina la gagwe. Ka ge re le Dihlatse tša Jehofa, re rata go bolela ka ditaba tšeo. Eupša na bogoši bja Jehofa le go kgethagatšwa ga leina la gagwe ke dilo tše pedi tšeo di fapanego? Aowa.

² Ka moka ga rena re a bona gore leina la Modimo le swanetše go kgethagatšwa. Le gona re ithutile gore bogoši bja Jehofa, e lego tsela yeo a bušago ka yona, e di phala ka moka. Ditaba tše di bohlokwa, e bile re swanetše go di tšeela godimo.

3. Leina Jehofa le akaretša’ng?

³ Leina Jehofa le akaretša dilo ka moka ka Modimo wa rena, go akaretša le tsela yeo a bušago ka yona. Ge e ba re re taba ya gore leina la Jehofa le swanetše go kgethagatšwa e bohlokwa, gona go ra gore re swanetše go hlatsela le gore tsela yeo a bušago ka yona ke e kaone. Leina la Jehofa le sepedišana le tsela yeo a bušago ka yona, ka ge e le Mmuši Ramatlaohle.—Bona lepokisi leo le rego, “ Taba e Bohlokwa Kudukudu e Akaretša Eng?”

4. Psalme 135:13 e hlalosa leina la Modimo bjang, gona ke dipotšišo dife tšeo re tlago go di araba sehlogong se?

⁴ Ga go na leina leo le swanago le leina Jehofa. (Bala Psalme 135:13.) Ke’ng seo se dirago gore leina la Modimo le be bohlokwa ka tsela ye? Mathomong leina le le ile la senywa bjang? Modimo o le kgethagatša bjang? Gona rena re ka dira’ng go thuša go kgethagatša leina la Modimo? A re kweng dikarabo tša dipotšišo tše.

5. Ke’ng seo batho ba bangwe ba ka ipotšišago sona ge ba ekwa gore leina la Modimo le swanetše go kgethagatšwa?

⁵ Jesu o itše: “Leina la gago a le kgethagatšwe.” (Mat. 6:9) Jesu o itše go kgethagatšwa ga leina la Jehofa, ke se sengwe sa dilo tše bohlokwa tšeo re swanetšego go di rapelela. Jesu o be a era go re’ng? Go kgethagatša selo se itšego go bolela go se dira se sekgethwa goba go se hlwekiša. Batho ba bangwe ba ka ipotšiša gore: ‘Ka ge leina la Jehofa e šetše e le le lekgethwa e bile le hlwekile, ke ka baka la’ng re swanetše go le kgethagatša?’ Gore re hwetše karabo, re swanetše go kwešiša pele gore leina le akaretša eng.

6. Ke’ng seo se dirago gore leina le be bohlokwa?

⁶ Leina ga e no ba lentšu leo le ngwalwago pampiring goba leo le bitšwago ka molomo. Re tseba seo bjang? Ekwa seo Beibele e se bolelago. E re: “Leina le lebotse le phala mahumo a mantši kudu.” (Die. 22:1; Mmo. 7:1) Ke ka baka la’ng leina le le bohlokwa ka tsela ye? Ka gobane leina le re botša ka botumo bja motho, e lego seo batho ba se naganago ka motho yoo. Selo sa bohlokwa ga se tsela yeo leina leo le ngwalwago ka yona goba tsela yeo le bitšwago ka yona, eupša sa bohlokwa ke seo batho ba se naganago ge ba ekwa leina leo goba ge ba le bona.

7. Batho ba sentše leina la Modimo bjang?

⁷ Ge batho ba bolela maaka ka Jehofa, ge e le gabotse ba leka go dira gore batho ba nagane dilo tše mpe ka yena. Seo ke go senya Modimo leina. Leina la Modimo le ile la senywa ka lekga la mathomo tšhemong ya Edene. Re ka ithuta’ng tabeng ye?

8. Adama le Efa ba be ba tseba eng, gona re ka ipotšiša dipotšišo dife?

⁸ Adama le Efa ba be ba tseba gore leina la Modimo ke Jehofa, e bile ba be ba tseba dilo tše dintši tše bohlokwa ka yena. Ba be ba tseba gore Jehofa ke Mmopi, o ba file bophelo le paradeise e botse. Se sengwe gape ke gore ba be ba swanelana. (Gen. 1:26-28; 2:18) Eupša na ba be ba tla dula ba nagana ka dilo tše dibotse tšeo Jehofa a bego a ba diretše tšona? Na ba be ba tla dula ba rata le go leboga Jehofa? Dikarabo tša dipotšišo tšeo di ile tša bonagala ge lenaba la Modimo le be le ba leka.

9. Go ya ka Genesi 2:16, 17 le 3:1-5, Jehofa o ile a botša Adama le Efa eng, gona Sathane o ile a fetoša bjang seo Jehofa a bego a ba boditše sona?

 ⁹ Bala Genesi 2:16, 17 le 3:1-5. Sathane o ile a diriša noga go botšiša Efa potšišo ye: “A ke therešo gore Modimo o itše le se ke la ja tše di tšwago sehlareng se sengwe le se sengwe sa mo serapeng?” Potšišo yeo Sathane a ilego a e botšiša Efa, e ile ya dira gore Efa a thome go nagana dilo tše mpe ka Modimo. Ge e le gabotse, Modimo o be a ba boditše gore ba ka ja dienywa tša dihlare ka moka tšeo di lego moo tšhemong ya Edene, ka ntle le dienywa tša sehlare setee feela. Adama le Efa ba be ba na le dienywa tše dintši tša mehutahuta tšeo ba bego ba ka di ja. (Gen. 2:9) Ka nnete Jehofa ga a timane. Eupša Jehofa o be a thibetše Adama le Efa gore ba se je dienywa tša sehlare setee feela. Ka gona potšišo yeo ya Sathane e ile ya fetoša seo Modimo a bego a se boletše. Sathane o ile a dira gore go bonagale eka Modimo o a timana. Efa a ka ba a ile a ipotšiša gore: ‘Na go na le selo se sengwe se sebotse seo Modimo a ka bago a ntima sona?’

10. Sathane o ile a senya leina la Modimo bjang, gona seo se ile sa feleletša ka eng?

¹⁰ Ge Sathane a be a botšiša Efa potšišo yeo, ka nako yeo Efa o be a sa kwa Modimo. Efa o ile a araba Sathane ka go boeletša seo Jehofa a bego a ba boditše sona. Efa o ile a re Modimo o itše ba se ke ba ba ba kgwatha sehlare seo. O be a tseba gore Modimo o be a itše ge ba be ba ka se mo kwe, ba be ba tlo hwa. Eupša Sathane o ile a re go yena: “Le ka se hwe lehu.” (Gen. 3:2-4) Lekgeng le Sathane o ile a bolela thwii gore Modimo o be a ba boditše maaka. Ka gona Sathane o ile a ba Diabolo goba mothomeletši. Sathane o be a tloga a forile Efa, gomme Efa o ile a mo tshepa. (1 Tim. 2:14) O ile a tshepa Sathane kudu go feta go tshepa Jehofa. Seo se ile sa dira gore Efa a dire phetho ya bošilo kudu. O ile a kgetha go se kwe Jehofa. O ile a thoma go ja seenywa seo Jehofa a bego a itše ba se ke ba se ja. Ka morago ga moo, a se nea Adama.—Gen. 3:6.

11. Adama le Efa nkabe ba ile ba dira’ng, eupša ba ile ba palelwa ke go dira’ng?

¹¹ Nagana ka seo Efa a ka bago a ile a se botša Sathane. Nagana Efa a botša Sathane gore: “Ga ke go tsebe gore ke wena mang, eupša ke tseba Tate, e lego Jehofa, e bile ke a mo rata le go mo tshepa. O file nna le Adama dilo ka moka tšeo re nago le tšona. Go re’ng o bolela maaka ka yena? Tloga mo!” Ruri Jehofa o be a ka thabela go kwa mantšu ao a bontšhago gore morwedi wa gagwe o a mo tshepa! (Die. 27:11) Eupša Efa o be a sa rate Jehofa, Adama le yena o be a no swana le yena. Ka ge Adama le Efa ba be ba sa rate Jehofa, ba ile ba palelwa ke go mo emelela ge Sathane a be a bolela maaka ka yena.

12. Sathane o ile a dira bjang gore Efa a thome go nagana gore Modimo o be a mmotša maaka, gona Adama le Efa ba ile ba palelwa ke go dira’ng?

¹² Ka ge re kwele, Sathane o ile a thoma go senya Modimo leina ka go dira gore Efa a se ke a dumela gore Jehofa ke Tate wa go loka. Ke  moka Adama le Efa ba ile ba palelwa ke go emelela Jehofa ge Sathane a be a mo senya leina. Seo se ile sa dira gore go be bonolo gore Sathane a ba hlasele, gomme ba feleletša ba sa kwe Tatago bona. Sathane o sa diriša mekgwa yeo le lehono. O senya Modimo leina ka go bolela maaka ka yena. Go ba bonolo gore batho bao ba dumelago maaka a Sathane ba se dumele gore Jehofa ke yena a swanelegago go buša.

13. Hesekiele 36:23, e bontšha bjang gore molaetša o mogolo wa Beibele ke ofe?

¹³ Na Jehofa o tla no tlogelela leina la gagwe le senywa? Aowa, a ka se dire bjalo! Beibele ka moka ga yona e re botša seo Jehofa a ilego a se dira go bontšha gore dilo tše mpe tšeo di ilego tša bolelwa ka yena tšhemong ya Edene ga se nnete. (Gen. 3:15) Ge e le gabotse, molaetša ka moka wa ka Beibeleng re ka o akaretša ka tsela ye: Jehofa o kgethagatša leina la gagwe ka go diriša Mmušo wa gagwe woo kgoši ya wona e lego Morwa wa gagwe, le ka go dira gore mo lefaseng go boele go be le toka le khutšo. Beibele e re thuša go kwešiša seo Jehofa a se dirago go kgethagatša leina la gagwe.—Bala Hesekiele 36:23.

14. Tsela yeo Jehofa a ilego a arabela ka yona go seo se ilego sa direga kua Edene e ile ya kgethagatša bjang leina la gagwe?

¹⁴ Sathane o ile a dira sohle seo a ka se kgonago go leka go thibela Jehofa gore a se phethagatše morero wa gagwe. Eupša Sathane o ile a dula a palelwa. Beibele e bontšha seo Jehofa a ilego a se dira, e bile e bontšha le gore ga go na Modimo yo a swanago le Jehofa. Ke therešo gore ge Sathane le batho ba bangwe ba be ba sa kwe Jehofa, Jehofa o ile a kwa bohloko kudu. (Ps. 78:40) Eupša o ile a swaragana le taba ye ka bohlale le toka, e bile a sa fele pelo. Le gona o ile a bontšha gore ke Ramatlaohle ka ditsela tše dingwe tše dintši. Sa bohlokwa le go feta ke gore dilo ka moka tšeo a di dirago, o di dira ka lerato. (1 Joh. 4:8) Jehofa ga se a ka a tlogela go kgethagatša leina la gagwe.

15. Sathane o senya leina la Modimo bjang lehono, gomme seo se dira gore batho ba dumele eng?

¹⁵ Sathane o sa dutše a senya leina la Modimo lehono. O dira gore batho ba belaele ge e ba Modimo a na le matla, a lokile, a le bohlale e  bile a re rata. Ka mohlala, Sathane o leka go kgodiša batho gore ba dumele gore Jehofa ga se Mmopi. Le gona, ge e ba batho ba dumela gore Modimo o gona, Sathane o leka go ba dira gore ba dumele gore melao ya Jehofa ke e thata e bile e bontšha gore ga a re rate. E bile o ruta batho gore Jehofa o sehlogo ka gore o fiša batho diheleng. Ge ba dumela maaka ao, go ba bonolo gore ba se sa dumela gore Jehofa ke Mmuši wa bona. Sathane o tlo dula a bolela maaka ka Jehofa go ba go fihla Jehofa a mo fediša, e bile o tlo dula a leka go dira gore le wena o hlanogele Jehofa. Na Sathane o tla atlega go dira seo?

16. Ke’ng seo o ka se dirago, e lego seo Adama le Efa ba paletšwego ke go se dira?

¹⁶ Jehofa o dumelela batho bao ba belegwego ba na le sebe gore le bona ba kgethagatše leina la gagwe. Ge e le gabotse, o ka kgona go dira seo Adama le Efa ba paletšwego ke go se dira. Le ge o phela le batho bao ba senyago leina la Jehofa le go le goboša, o na le sebaka sa go mo emelela le go ba hlalosetša gore Jehofa ke yo mokgethwa, o lokile e bile o a re rata. (Jes. 29:23) O ka bontšha gore o nyaka go bušwa ke yena. O ka thuša batho go kwešiša gore ke Jehofa feela yo a swanelegago go buša, e bile ke Mmušo wa gagwe feela wo o ka dirago gore mo lefaseng go be le khutšo le lethabo.—Ps. 37:9, 37; 146:5, 6, 10.

17. Jesu o ile a dira’ng gore batho ba tsebe leina la Tatagwe?

¹⁷ Ge re emela leina la Modimo, re ekiša mohlala wa Jesu Kriste. (Joh. 17:26) Jesu o ile a dira gore batho ba tsebe leina la Tatagwe. O dirile seo bjang? Ka go le emela le go ruta batho gore ba tsebe gore Jehofa o bjang. Ka mohlala, o be a sa swane le Bafarisei bao ba bego ba re Jehofa o sehlogo, o nyaka dilo tšeo re ka se kgonego go di dira, o kgole le rena e bile ga a na kgaugelo. Jesu o ile a thuša batho go kwešiša gore Jehofa o a re naganela, ga a re felele pelo, o a re rata e bile o a re lebalela. Le gona o ile a thuša batho go tseba Jehofa ka go dula a ekiša dika tša gagwe tše dibotse letšatši le letšatši.—Joh. 14:9.

18. Re ka dira’ng go bontšha gore dilo tše mpe tšeo manaba a Jehofa a ilego a di bolela ka yena ga se nnete?

¹⁸ Go swana le Jesu, le rena re ka botša batho seo re se tsebago ka Jehofa, ra ba ruta gore o a re rata e bile o na le botho. Ge re dira bjalo,  re bontšha gore dilo tše mpe tšeo di ilego tša bolelwa ka Jehofa ke maaka. Re kgethagatša leina la Jehofa ka go thuša batho gore ba le tšee e le le lekgethwa. Le rena re ka ekiša Jehofa. Re ka kgona go mo ekiša gaešita le ge re belegwe re na le sebe. (Baef. 5:1, 2) Ge re bontšha batho gore Jehofa o bjang ka seo re se dirago le seo re se bolelago, re thuša go kgethagatša leina la gagwe. Re godiša leina leo ka go thuša batho gore ba tsebe nnete ka Modimo. * Le gona, re bontšha gore batho bao ba belegwego ba na le sebe ba ka kgona go botegela Modimo.—Jobo 27:5.

19. Jesaya 63:7 e re thuša bjang go tseba selo sa bohlokwa seo re swanetšego go se ruta batho?

¹⁹ Go na le selo se sengwe seo re ka se dirago go kgethagatša leina la Modimo. Ge re ruta batho Beibele, gantši re gatelela bogoši bja Jehofa, gore Jehofa o na le tshwanelo ya go buša dilo ka moka legodimong le lefaseng. Le gona seo ke therešo. Eupša le ge re ruta batho melao ya Modimo, selo se segolo seo re nyakago go ba thuša ka sona ke gore ba rate Jehofa, yena Tatago rena gomme ba mmotegele. Ka baka leo, re swanetše go ba thuša gore ba tsebe dika tša Jehofa tše dibotse le gore ke Modimo wa mohuta mang. (Bala Jesaya 63:7.) Ge re ka ruta batho ka tsela yeo, re tlo ba thuša gore ba rate Jehofa le go mo kwa ka gobane ba nyaka go mmotegela.

20. Re tlo ithuta’ng sehlogong se se latelago?

²⁰ Re ka dira’ng go kgonthišetša gore tsela yeo re phelago ka yona le tsela yeo re rutago ka yona, di tlo thuša batho go nagana dilo tše dibotse ka Jehofa ge ba ekwa leina la gagwe gomme ba gwerana le yena? Sehlogo se se latelago se tlo araba potšišo yeo.