Paulo o ngwadile gore: “Gobane ka molao ke hwile mabapi le molao, gore ke phele go Modimo.”—Bagal. 2:19.

Seo Paulo a se ngwadilego se sepedišana le seo a bego a se dira diphuthegong tša kua Roma profenseng ya Galatia. Bakriste ba bangwe ba moo ba be ba šetše ba dira dilo tšeo ba bego ba di rutilwe ke barutiši ba maaka. Barutiši bao ba be ba rutile batho gore ba be ba swanetše go latela molao wa gore ba bolotšwe e le gore ba tle ba phološwe. Eupša Paulo o be a tseba gore go be go se sa hlokagala gore Bakriste ba latele molao woo. O ile a botša bana babo mabaka a kgodišegile gore dithuto tšeo ke tša maaka gomme a matlafatša tumelo ya bona ka go ba botša gore ba tla phologa ge feela ba ka dumela sehlabelong sa Jesu Kriste sa topollo.—Bagal. 2:4; 5:2.

Beibele e bontšha gabotse gore ge motho a ehwa, ga a sa tseba selo e bile ga go na seo a tlago go kgona go se dira. (Mmo. 9:5) Ge Paulo a be a re: “Ke hwile mabapi le molao,” o be a e ra gore molaong wa Moshe ga go sa na seo se mo amago. Le gona o be a kgodišegile gore tumelo yeo a nago le yona sehlabelong sa topollo e be e bontšha gore Modimo o a mo amogela.

Molao o ile wa dira gore maemo a Paulo a fetoge. Bjang? Paulo o ile a bolela gore “motho ga go bolelwe gore o lokile ka baka la mediro ya molao, eupša go bolelwa gore o lokile ka baka la go ba le tumelo go Kriste Jesu.” (Bagal. 2:16) Ke nnete gore molao wo o kgathile tema e bohlokwa kudu. Paulo o ile a botša Bagalatia gore molao “o ile wa okeletšwa bakeng sa go bonagatša dikarogo go fihlela go fihla peu yeo kholofetšo e dirilwego ka yona.” (Bagal. 3:19) Molao wo o bontšha gore batho bao ba nago le sebe ba ka se kgone go phela ka wona le gore ba hloka sehlabelo setee feela seo se phethagetšego. Ka gona molao o thušitše batho go bona gore Kriste ke yena “peu.” Ge re bontšha gore re na le tumelo go Jesu Kriste, Modimo o tla re lebelela re lokile. (Bagal. 3:24) Se ke seo se ilego sa diragalela moapostola Paulo ka gobane molao o ile wa mo thuša gore a be le tumelo go Jesu. Ka baka leo, Paulo o ile a hwa “mabapi le molao” gomme a phela “go Modimo.” Seo se bolela gore o be a se sa hlwa a ithekgile ka molao eupša a ithekgile ka Modimo.

Paulo o ile a botša Baroma molaetša o swanago. O itše: “Bana bešo, le lena le ile la dirwa ba hwilego mabapi le Molao ka mmele wa Kriste . . . Re lokolotšwe Molaong, ka baka la gore re hwile go seo re bego re swareletšwe ka sona.” (Baroma 7:4, 6) Mantšung ao a lego ditemaneng tše le ao a lego go Bagalatia 2:19, a bontšha gore Paulo o be a sa bolele ka go hwa ga modiradibe yoo a sa latelego Molao. Go e na le moo o be a bolela ka gore o lokologile. E lego seo se bolelago gore yena le batho ba bangwe ba be ba sa hlwe ba gapeletšega go phela ka Molao woo. Ba ile ba lokollwa ke go ba le tumelo sehlabelong sa Jesu sa topollo.