1. Go ya ka Mateo 24:9, ke ka baka la’ng re se ra swanela go makala ge batho ba re hloile?

JEHOFA o re bopile gore re kgone go rata batho ba bangwe e bile re nyake gore ba bangwe ba re rate. Ka baka leo re kwa bohloko kudu e bile re a tšhoga ge motho yo mongwe a re hloile. Ka mohlala, kgaetšedi Georgina yo a dulago kua Yuropa o re: “Ge ke be ke na le mengwaga e 14, mma o ile a thoma go ntlhoya ka ge ke be ke hlankela Jehofa. Ke ile ka ikwa ke le noši e bile ka thoma go belaela ge e ba ruri ke le motho wa go loka.” * Ngwanabo rena Danylo o ngwadile gore: “Ge mašole a be a mpetha, a nthoga e bile a ntšhošetša ka gore a be a tla nkgobatša ka ge ke le yo mongwe wa Dihlatse tša Jehofa, ke ile ka ikwa ke tšhogile e bile ke se sa na seriti.” Re kwa bohloko kudu ge batho ba re hloya, eupša seo ga se re makatše. Jesu o ile a bolela gore batho ba be ba tlo re hloya.—Bala Mateo 24:9.

2-3. Ke ka baka la’ng balatedi ba Jesu ba hloilwe?

² Lefase le hloile balatedi ba Jesu. Ka baka la’ng? Ka gobane go swana le Jesu, ga re “karolo ya lefase.” (Joh. 15:17-19) Ka baka leo le ge re hlompha mebušo ya batho, ga re nyake go e rapela goba go rapela diswantšho tša yona. Re rapela Jehofa a nnoši. Le gona, re thekga taba ya gore Modimo ke yena a nago le tshwanelo ya go buša batho, eupša Sathane le ba “peu” ya gagwe ba ganetšana le taba yeo. (Gen. 3:1-5, 15) Re ruta batho gore Mmušo wa Modimo ke wona feela o tlago go re rarollela mathata a rena ka moka, le gore kgauswinyane Mmušo woo o tlo fediša batho ka moka bao ba o ganetšago. (Dan. 2:44; Kut. 19:19-21) Tšeo ke ditaba tše dibotse go batho bao ba lokilego, eupša go batho ba babe ruri ga di kgahliše.—Ps. 37:10, 11.

 ³ Le gona batho ba re hloile ka ge re phela ka go dumelelana le melao ya Modimo. Melao yeo ya Modimo e fapana kgole kudu le seo batho ba rego se lokile goba se fošagetše. Ka mohlala, lehono batho ba bantši ba phela ka tsela e gobogilego yeo e swanago le ya batho ba Sodoma le Gomora bao Modimo a ilego a ba fediša! (Juda 7) Ka ge re phela ka go dumelelana le melao ya Beibele, batho ba bantši ba a re kwera e bile ba re ga re amogele tsela yeo batho ba bangwe ba phelago ka yona!—1 Pet. 4:3, 4.

4. Ke dika dife tšeo di re thušago go kgotlelela ge batho ba re hloile?

⁴ Ke’ng seo se ka re thušago go kgotlelela ge batho ba re hloile e bile ba re roga? Re ka thušwa ke go ba le tumelo e tiilego ya gore Jehofa o tla re thuša. Go no swana le kotse, tumelo ya rena e ka kgona “go tima mesebe ka moka e tukago ya yo kgopo.” (Baef. 6:16) Eupša ga se ra swanela go no ba le tumelo feela, re swanetše go ba le lerato. Ka baka la’ng? Ka gobane lerato “ga le rumolege.” Le kgona go kgotlelela dilo ka moka tše mpe. (1 Bakor. 13:4-7, 13) Ga bjale a re boneng kamoo go rata Jehofa, go rata Bakristegotee le rena le go rata manaba a rena go re thušago go kgotlelela ge re hloiwa.

5. Go rata Jehofa go ile gwa matlafatša Jesu bjang?

⁵ Bošegong bja pele ga ge manaba a Jesu a ka mmolaya, o ile a botša balatedi ba gagwe ba botegago gore: “Ke rata Tate, [ka baka leo] ke dira tšeo Tate a ntaetšego gore ke di dire.” (Joh. 14:31) Ka ge Jesu a be a rata Jehofa, seo se ile sa mo nea matla a gore a kgone go kgotlelela diteko tšeo di bego di tlo mo wela. Le rena re ka kgona go kgotlelela ge e ba re rata Jehofa.

6. Go ya ka Baroma 5:3-5, bahlanka ba Jehofa ba ikwa bjang ka go kgotlelela ge ba tlaišwa?

⁶ Ka mehla go rata Modimo go ile gwa thuša bahlanka ba gagwe gore ba kgotlelele ge ba tlaišwa. Ka mohlala, ge lekgotla le le phagamego la Bajuda le be le laela baapostola gore ba tlogele go ruta ba bangwe ka Modimo, go rata Modimo go ile gwa dira gore ba kgethe “Modimo [e le] mmuši yo ba swanetšego go mo kwa go e na le go kwa batho.” (Dit. 5:29; 1 Joh. 5:3) Le lehono go rata Modimo ka tsela yeo go thuša bana babo rena go kgotlelela, bao ba bantši ba bona ba tlaišwago ke mebušo e šoro le e matla. Go e na le gore re nyame, re bona e le tokelo ge lefase le re hloile.—Dit. 5:41; bala Baroma 5:3-5.

7. Re swanetše go dira’ng ge ba gabo rena ba re ganetša go hlankela Jehofa?

⁷ Go thata kudu go kgotlelela ge re ganetšwa go hlankela Jehofa, kudukudu ge re ganetšwa ke ba gabo rena. Ge ba gabo rena ba thoma go lemoga gore re nyaka go ithuta ka Jehofa, ba ka nagana gore go na le motho yo a nyakago go re ntšha tseleng. Ba bangwe ba ka no nagana le gore re hlakane hlogo. (Bapiša le Mareka 3:21.) Ba ka ba ba re tlaiša o šoro. Ga se ra swanela go makala ge ba re tlaiša ka gobane Jesu o ile a re: “Manaba a motho e tla ba batho ba lapeng la gabo.” (Mat. 10:36) Go sa šetšwe gore ba gabo rena ba re swara bjang, ga re nyake go ba tšea e le manaba a rena. Ge tsela yeo re ratago Jehofa ka yona e gola, re tla thoma le go rata batho ba bangwe kudu. (Mat. 22:37-39) Eupša re ka se tsoge ra tlogela go phela ka melao ya motheo ya Beibele e le gore re thabiše batho ba bangwe.

8-9. Ke’ng seo se ilego sa thuša kgaetšedi yo mongwe go dula a kgotleletše le ge a be a tlaišwa o šoro?

⁸ Georgina yo re boletšego ka yena pejana o ile a kgona go dula a kgotleletše le ge mmagwe a be a mo tlaiša o šoro. Georgina o re: “Nna le mma re ile ra thoma go ithuta Beibele le Dihlatse tša Jehofa re le mmogo. Eupša ka morago ga dikgwedi tše tshela ge ke be ke nyaka go ya dibokeng, mma o ile a thoma go ntlaiša. Ke ile ka lemoga gore o be a kopane le bahlanogi, e  bile o be a mpotša maaka ao ba bego ba mmotša ona. O be a bile a nthoga, a nkgoga ka meriri, a nkgamelela e bile a lahla dikgatišo tša ka. Ke ile ka kolobetšwa ka morago ga gore ke be le mengwaga e 15. Mma o ile a leka go ntlogediša go hlankela Jehofa ka go dira gore ke yo dula lefelong leo go dulago bafsa bao ba bangwe ba bona ba bego ba diriša dihlaretagi e bile ba dirile melato e megolo. Go thata kudu go kgotlelela ge o tlaišwa ke motho yo a swanetšego go go rata le go go hlokomela.”

⁹ Georgina o ile a thušwa ke’ng gore a kgotlelele? O re: “Letšatšing leo mma a ntlhanogetšego ka lona ke be ke sa tšwa go fetša go bala Beibele ka moka ga yona. Ga bjale ke be ke tloga ke kgodišegile gore ke hweditše therešo, e bile ke ikwa gore Jehofa ke mogwera wa ka yo mogolo kudu. Ke be ke dula ke mo rapela e bile a ekwa dithapelo tšeo tša ka. Ge ke be ke dula lefelong leo mma a bego a nkišitše go lona, kgaetšedi yo mongwe o ile a mmema go tla legaeng la gagwe gomme re be re ithuta Beibele mmogo. Nakong yeo ka moka, ke be ke matlafatšwa ke bana babo rena le dikgaetšedi Holong ya Mmušo. Ba ile ba dira gore ke be karolo ya malapa a bona. Ke ile ka bona gore Jehofa o na le matla go feta batho bao ba re ganetšago go mo hlankela, go sa šetšwe gore ke bomang.”

10. Re ka kgodišega gore Jehofa Modimo wa rena o tlo re direla’ng?

¹⁰ Moapostola Paulo o ngwadile gore ga go na selo seo se ka kgonago “go re aroganya le lerato la Modimo leo le lego go Kriste Jesu Morena wa rena.” (Baroma 8:38, 39) Le ge re ka tlaišega ka nakwana, Jehofa o tla dula a na le rena gore a re kgothatše le go re matlafatša. Le gona mohlala wa Georgina o bontšha gore Jehofa o diriša bana babo rena le dikgaetšedi ka phuthegong go re thuša.

11. Lerato leo Jesu a boletšego ka lona go Johane 15:12, 13 le be le tla thuša barutiwa ba gagwe bjang? Nea mohlala.

¹¹ Bošegong bja pele ga ge Jesu a ka hwa, o ile a gopotša barutiwa ba gagwe gore ba ratane. (Bala Johane 15:12, 13.) O be a tseba gore ge ba ka ratana go tšwa pelong seo se tlo ba thuša gore ba dule e le ngatana e tee e bile sa ba thuša go kgotlelela ge lefase le ba hloya. Nagana ka mohlala wa phuthego ya kua Thesalonika. Bana babo rena ba phuthegong yeo ba ile ba tlaišwa go tloga ge phuthego yeo e be e thewa. Eupša ba ile ba re beela mohlala o mobotse wa go botega le go bontšhana lerato. (1 Bathes. 1:3, 6, 7) Paulo o ile a ba kgothaletša gore ba  tšwele pele ba bontšhana lerato “ka tekanyo e tletšego.” (1 Bathes. 4:9, 10) Lerato le be le tla ba thuša gore ba homotše bao ba nyamilego le go thekga bao ba fokolago. (1 Bathes. 5:14) Go bonagala ba ile ba latela keletšo yeo ya Paulo ka gobane lengwalong la bobedi leo a ba ngwaletšego lona ka morago ga ngwaga, o ile a re go bona: “Lerato leo ka moka ga lena le ratanago ka lona le a oketšega gare ga lena.” (2 Bathes. 1:3-5) Lerato leo ba bego ba na le lona le ile la ba thuša go kgotlelela mathata le go tlaišwa.

12. Bana babo rena le dikgaetšedi ba ile ba bontšhana bjang lerato nageng e nngwe yeo go bego go na le ntwa?

¹² Nagana ka mohlala wa Danylo le mosadi wa gagwe. Ge toropo yeo ba bego ba dula go yona e be e hlaselwa ke ntwa, ba ile ba tšwela pele ba eya dibokeng, ba dira sohle seo ba ka se kgonago go ruta ba bangwe Beibele e bile ba abelana le bana babo bona le dikgaetšedi ka phuthegong dijo. Ke moka ka letšatši le lengwe mašole ao a bego a itlhamile ka dithunya a ile a tla legaeng la Danylo. Danylo o re: “A ile a ntaela gore ke tlogele go ba yo mongwe wa Dihlatse tša Jehofa. Ge ke be ke gana, a ile a mpetha gomme a dira eka a a nthuntšha eupša a no thuntšha ka godimo ga hlogo ya ka. Pele mašole ao a ka sepela a ile a ntšhošetša ka gore a tlo boa a kata mosadi wa ka. Eupša kapejana bana babo rena ba ile ba re nametša terene yeo e yago toropong e nngwe. Nka se tsoge ka lebala ka tsela yeo bana babo rena bao ba ilego ba re bontšha lerato. Ge re fihla toropong yeo re bego re eya go yona, bana babo rena ba moo ba ile ba re nea dijo e bile ba nthuša go hwetša mošomo le madulo! Ka baka leo le rena re ile ra kgona go nea bana babo rena ba bangwe madulo bao ba bego ba tšhabile mo go nago le ntwa.” Mehlala ya go swana le ye e bontšha gore ge re rata Bakristegotee le rena seo se ka re thuša go kgotlelela le ge re tlaišwa.

13. Moya o mokgethwa o ka re thuša bjang go tšwela pele re hlankela Jehofa le ge batho ba bangwe ba re hloile?

¹³ Jesu o ile a botša balatedi ba gagwe gore ba rate manaba a bona. (Mat. 5:44, 45) Na seo se bonolo? Aowa! Eupša re ka kgona go se dira ge re thušwa ke moya o mokgethwa. Dika tše di enywago ke moya wa Modimo di akaretša lerato, go se fele pelo, botho, boleta le boitshwaro. (Bagal. 5:22, 23) Dika tše di re thuša go kgotlelela ge re tlaišwa goba re hloiwa. Batho ba bantši ba ile ba tlogela go re tlaiša ka ge monna, mosadi, moagišani goba ngwana wa bona a ile a bontšha dika tšeo tše dibotse. Le gona ba  bantši ba batho bao ba bego ba re tlaiša ba ile ba fetoga bana babo rena le dikgaetšedi. Ka gona ge e ba o thatafalelwa ke go rata batho bao ba go hloilego ka ge o hlankela Jehofa, rapela gomme o kgopele moya o mokgethwa. (Luka 11:13) Le gona kgodišega gore go kwa Modimo ka mehla go a hola.—Die. 3:5-7.

14-15. Baroma 12:17-21 e ile ya thuša bjang Yasmeen go bontšha monna wa gagwe lerato le ge a be a mo ganetša go hlankela Jehofa?

¹⁴ Nagana ka mohlala wa kgaetšedi Yasmeen. Ge a be a thoma go ba yo mongwe wa Dihlatse tša Jehofa, monna wa gagwe o ile a nagana gore go na le motho yo a mo forilego ke moka a leka go mo thibela go tšwela pele a hlankela Jehofa. O ile a mo roga, a ba a bitša ba gabo bona, moruti le motho wa go dirišana le batemona gore ba tlo mo tšhošetša le go mmea molato wa gore o nyaka go thuba lapa la bona. Monna wa gagwe o ile a ba a roga bana babo rena nakong ya diboka! Yasmeen o be a dula a lla ka ge monna wa gagwe a be a mo tlaiša.

¹⁵ Ge Yasmeen a be a le Holong ya Mmušo, bana babo rena le dikgaetšedi ba be ba mo kgothatša le go mo matlafatša. Bagolo ba ile ba mo kgothaletša go diriša mantšu ao a lego go Baroma 12:17-21. (Bala.) Yasmeen o re: “Go be go se bonolo. Eupša ke ile ka kgopela Jehofa gore a nthuše e bile ka dira sohle seo nka se kgonago gore ke dire seo Beibele e se bolelago. Ka gona ge monna wa ka a lahlela ditšhila ka khitšhing ka boomo, ke be ke no hlwekiša. Ge a be a nthoga ke be ke no mo araba gabotse. Le gona ge a be a babja ke be ke mo hlokomela.”

16-17. O ithuta’ng mohlaleng wa Yasmeen?

¹⁶ Yasmeen o ile a ba le mafelelo a mabotse ka ge a ile a bontšha monna wa gagwe lerato. O re: “Monna wa ka o ile a thoma go ntshepa kudu ka gobane o be a tseba gore ka mehla ke tlo bolela nnete. O ile a thoma go ntheetša gabotse ge re bolela ka ditaba tša bodumedi, le gona o ile a dumela gore re dire gore go be le khutšo ka lapeng la rena. Gona bjale ge ke eya dibokeng o mpotša gore ke di thabele. Bophelo ka lapeng la rena bo kaonafetše kudu e bile go na le khutšo. Ke holofela gore ka letšatši le lengwe monna wa ka o tla amogela therešo gomme a thoma go hlankela Jehofa gotee le nna.”

¹⁷ Mohlala wa Yasmeen o bontšha gore lerato “le tiišetša tšohle, . . . le holofela tšohle [e bile] le kgotlelela tšohle.” (1 Bakor. 13:4, 7) Lehloyo le na le matla e bile le kweša bohloko, eupša lerato le na le matla kudu go feta lehloyo. Lerato le kgona go dira gore batho ba fetoge. Seo se thabiša Jehofa kudu. Eupša le ge batho bao  ba re tlaišago ba sa fetoge, re ka no tšwela pele re thabile. Re ka dira seo bjang?

18. Ke ka baka la’ng re ka thaba le ge re hloilwe?

¹⁸ Jesu o ile a re: “Go thaba lena neng le neng ge batho ba le hloya.” (Luka 6:22) Ga re ikgethele go hloiwa. E bile ga re thabele go tlaišwa ka ge re hlankela Jehofa. Bjale ke ka baka la’ng re ka thaba ge re hloilwe? Nagana ka mabaka a a mararo. Sa pele, ge re kgotlelela Modimo o a thaba. (1 Pet. 4:13, 14) Sa bobedi, ge tumelo ya rena e lekwa e a tia. (1 Pet. 1:7) Sa boraro, re tlo hwetša moputso o mogologolo wa go tlo phela ka mo go sa felego.—Rom. 2:6, 7.

19. Ke ka baka la’ng baapostola ba ile ba thaba ka morago ga gore ba itiwe?

¹⁹ Ka moragonyana ga gore Jesu a tsošwe bahung, baapostola ba gagwe ba ile ba latswa lethabo leo a bego a boletše ka lona. Ba ile ba thaba ka morago ga gore ba itiwe le go laelwa gore ba tlogele go ruta batho ka Modimo. Ke ka baka la’ng ba ile ba thaba? Ka “gobane ba be ba tšerwe e le ba ba swanelwago ke go hlomphollwa ka baka la leina la [Jesu].” (Dit. 5:40-42) Ba be ba rata Mong wa bona kudu go feta go boifa go hloiwa ke manaba a bona. Le gona ba ile ba bontšha lerato leo ka go bolela ditaba tše dibotse “ba sa kgaotše.” Lehono bana babo rena ba bantši ba tšwela pele ba hlankela Jehofa ka go mmotegela le ge ba na le mathata. Ba a tseba gore Jehofa a ka se tsoge a lebala modiro wa bona le lerato leo ba le bontšhitšego leineng la gagwe.—Baheb. 6:10.

20. Re tlo ithuta’ng sehlogong se se latelago?

²⁰ Lefase le tla dula le re hloile go fihlela Modimo a le fediša. (Joh. 15:19) Eupša ga se ra swanela go boifa. Sehlogong se se latelago re tlo ithuta kamoo Jehofa ‘a matlafatšago bahlanka ba gagwe ba botegago le go ba šireletša.’ (2 Bathes. 3:3) Ka gona a re tšweleng pele re rata Jehofa, re rata Bakristegotee le rena e bile re rata batho bao ba re hloilego. Ge re ka latela keletšo ye re tla dula re le ngatana e tee e bile re na le segwera se sebotse le Modimo. Le gona re tla tumiša leina la Jehofa ra ba ra bontšha gore lerato le na le matla kudu go feta lehloyo.