JESU o ile a botša balatedi ba gagwe e sa le pele gore puno e be e tla ba e kgolo mehleng ye ya bofelo. (Mat. 9:37; 24:14) Bohlatse bja seo re bo bona go seo se ilego sa direga tikologong ya Transcarpathia, kua Ukraine. Ditoropong tše tharo feela tša kgauswi le Transcarpathia, go na le diphuthego tše 50 le bagoeledi ba ka godimo ga 5 400. * Ruri go na le Dihlatse tša Jehofa tše dintši lefelong leo! Go badudi ba bangwe le ba bangwe ba bane ba ditoropong tšeo di kopane, o tee ke Hlatse ya Jehofa

Batho ba tšhemong yeo ba phela bjang? Ngwanabo rena yo a dulago moo yo a bitšwago Vasile, o re: “Batho ba mo ba hlompha Beibele, ba tšeela toka godimo, ba rata ditho tša malapa a bona le gona ba a thušana.” O oketša ka gore: “Ga se ka mehla ba dumelelanago le seo re ba rutago sona. Eupša ge o ba bontšha selo se sengwe ka Beibeleng, ba theetša ka kelohloko.”

Ke therešo gore bana babo rena le dikgaetšedi ba kopana le mathata a mangwe ge ba bolela ditaba tše dibotse tikologong ye, yeo e nago le bagoeledi ba bantši. Ka mohlala, phuthego e nngwe e na le bagoeledi ba 134 eupša tšhemong ya yona go na le dintlo tše 50 feela! Bagoeledi ba lebeletšana bjang le bothata bjo?

Bana babo rena ba bantši le dikgaetšedi ba diriša nako ya bona ba bolela ditaba tše dibotse mafelong ao go nyakegago bagoeledi ba oketšegilego. Ngwanabo rena yo a nago le mengwaga e 90 yo a bitšwago Ionash o re: “Go magae a mangwe le a mangwe a mabedi a tšhemong ye, le tee ke la Dihlatse tša Jehofa. Ke be ke šoma tšhemo yeo e sa abjago yeo e lego bokgole bja dikhilomithara tše 160 tikologong yeo go bolelwago Sehungary. Eupša ga bjale ka ge ke babja kudu, ke šoma feela tšhemo ya moo ke dulago gona.” Bagoeledi ba ikgafa kudu gore ba šome mafelong mangwe. Ionash o tšwela pele ka gore: “Ge ke be ke sa šoma tšhemo yeo e sa abjago, ke be ke tsoga ka iri ya bone mesong e le gore ke sware terene, gomme ke šoma tšhemo go fihla ka iri ya botshelela thapama ge terene e be e boela gae. Ke be ke dira bjalo gabedi goba gararo ka beke.” Na Ionash o ile a bona eka maiteko a gagwe ke a lefela? Aowa. O re: “Ke be ke thabišwa ke go nea bohlatse ka tsela yeo. Ke thabetše go thuša lapa leo le bego le dula kgole le phuthego gore le ithute ka Jehofa.”

Ke therešo gore ga se yo mongwe le yo mongwe ka diphuthegong tšeo yo a kgonago go ya mafelong a kgole. Eupša bagoeledi ka moka, go akaretša le bagoeledi bao ba tšofetšego ba leka ka matla gore ba šome ditšhemo tša gabo bona ka moka. Ka 2017 batho bao ba tlilego Segopotšong ditoropong tše tše tharo e bile ba fetago palo ya bagoeledi gabedi, goba palo yeo e ka bago seripagare sa badudi ba moo ka moka. Ruri ao e bile mafelelo a mabotse! Ka ntle le pelaelo, go sa šetšwe gore re hlankela re le kae, go sa dutše go na le “mo gontši mo [re ka] go dirago modirong wa Morena.”​—1 Bakor. 15:58.