1-2. (a) Mebušo e mengwe e ile ya ganetša bahlanka ba Modimo bjang, gona ba ile ba arabela bjang? (b) Re ka thaba bjang le ge re tlaišwa? (Hlalosa le seswantšho sa letlakala la ka ntle.)

 GONA bjale modiro wa rena o thibetšwe dinageng tša ka godimo ga tše 30. Go tše dingwe tša dinaga tšeo, baetapele ba mmušo ba golegile bana babo rena le dikgaetšedi. Ke phošo efe yeo bana babo rena le dikgaetšedi ba e dirilego? Go ya ka Jehofa ga go seo ba se dirilego. Ba be ba no ithuta Beibele, ba abelana le batho ba bangwe dilo tšeo ba ithutago tšona e bile ba bokana mmogo. Le gona ba be ba gana go tšea lehlakore dipolotiking. Go sa šetšwe kganetšo yeo ba lebeletšanego le yona, bahlanka ba ba Jehofa ba be ba dula ba se na bosodi e bile ba mmotegela b ka mo go feletšego. Le gona ba thabišwa ke go dira sona seo!

² O ka ba o ile wa bona dinepe tša bana babo rena le dikgaetšedi bao ba nago le sebete, gomme wa hlokomela gore ba a semaela. Ba thabile ka gobane ba a tseba gore Jehofa o thabela go bona ge ba mmotegela. (1 Dikor. 29:17a) Jesu o itše: “Go thaba bao ba tlaišeditšwego toko. . . Thabang le hlalaleng ka ge moputso wa lena e le o mogolo.”—Mat. 5:10-12.

3. Go ya ka Ditiro 4:19, 20, baapostola ba ile ba arabela bjang ge ba be ba tlaišwa, gona ka baka la’ng?

³ Mathata ao bana babo rena le dikgaetšedi ba kopanago le ona, a swana le ao baapostola ba Jesu ba ilego ba a kgotlelela  ge ba be ba tlaišwa ka baka la go bolela ka Jesu. Ke gantši lekgotla le legolo la Bajuda le ba ‘laela gore ba kgaotše go bolela ka leina la Jesu.’ (Dit. 4:18; 5:27, 28, 40) Baapostola ba ile ba arabela bjang? (Bala Ditiro 4:19, 20.) Ba be ba tseba gore molaodi yo a phagametšego balaodi ka moka o ba ‘laetše gore ba bolele bathong le go nea bohlatse bjo bo feletšego’ ka Kriste. (Dit. 10:42) Ka gona baemedi ba bona e lego Petro le Johane, ba ile ba bolela ka sebete gore ba tlo kwa Modimo go e na le go kwa baahlodi bao, le gore ba ka se tlogele go bolela ka Jesu. Go be go no swana le ge eka ba ba botšiša gore, ‘Na le nagana gore melao ya lena e phagametše ya Modimo?’

4. Go ya ka Ditiro 5:27-29, ke mohlala ofe o mobotse woo baapostola ba o beetšego Bakriste ka moka ba therešo, gona re ka ba ekiša bjang?

⁴ Baapostola ba beile mohlala o mobotse woo Bakriste ba therešo ba ilego ba o latela go tloga ka nako yeo, e lego “go kwa Modimo e le mmuši go e na le go kwa batho.” (Bala Ditiro 5:27-29.) Baapostola ba ile ba bethwa ka ge ba be ba botega eupša ge ba etšwa lekgotleng le legolo la Bajuda, “ba be ba thabile gobane ba be ba tšwerwe e le ba ba swanelwago ke hlomphollwa ka baka la leina la [Jesu],” gomme ba ile ba tšwela pele ba bolela ditaba tše dibotse!—Dit. 5:40-42.

5. Re swanetše go araba dipotšišo dife?

⁵ Mohlala o baapostola ba re beetšego ona o dira gore re ipotšiše dipotšišo. Ka mohlala, ba ile ba kgona bjang go theetša Modimo gomme ba “ba ba ikokobeletša balaodi ba bagolo” ka nako e tee? (Baroma 13:1) Go ya le ka mantšu a Paulo, re ka ‘kwa [bjang] mebušo le balaodi’ gomme ka nako e tee ra botegela Modimo yo a phagametšego balaodi ka moka?—Tito 3:1.

6. (a) “Balaodi ba bagolo” bao go bolelwago ka bona go Baroma 13:1 ke bomang, gona re swanetše go dirišana le bona bjang? (b) Re tseba eng ka mebušo ka moka ya batho?

⁶ Bala Baroma 13:1. Temaneng ye, polelwana “balaodi ba bagolo” e šupa go batho bao ba bušago e bile ba na le matla a go laola  batho ba bangwe. Bakriste ba swanetše go ikokobeletša balaodi ba. Ba leka go dira gore go be le khutšo, gore batho ba kwe molao e bile ka dinako tše dingwe ba šireletša bahlanka ba Modimo. (Kut. 12:16) Ka gona re swanetše go ba nea tlhompho yeo ba e nyakago, re lefe makgetho le dikoleke. (Baroma 13:7) Eupša mebušo ye, e kgona go laola batho feela ka gobane Jehofa o dumeletše gore go be bjalo. Jesu o ile a bolela se gabotse ge a be a sekišwa ke Mmuši wa Moroma e lego Pontio Pilato. Ge Pilato a be a botša Jesu gore o na le matla a go mo lokolla goba go mmolaya, Jesu o ile a mmotša gore: “O ka be o se na matla go nna le gatee ge nkabe o se wa a newa a etšwa godimo.” (Joh. 19:11) Ka mo go swanago, le lehono mebušo ya dipolotiki yeo e lego gona e lekanyeditšwe, go no swana le ge wa Pilato le wona o be o lekanyeditšwe.

7. Ke neng moo re sa swanelago go theetša balaodi ba bagolo, gona ba swanetše go gopola eng?

⁷ Bakriste ba swanetše go kwa melao ka moka ya mmušo ge feela e sa ganetšane le melao ya Modimo. Eupša re ka se kgone go kwa batho bao ge e ba ba nyaka re dira dilo tšeo Modimo a sa di ratego goba ba gana re dira dilo tšeo Modimo a nyakago re di dira. Ka mohlala, ba ka nyaka gore banna ka moka ba bafsa ba tsenele bošole. c Goba ba ka thibela Beibele goba dikgatišo tša rena tšeo di theilwego Beibeleng gomme ba re ganetša re botša batho ba bangwe ditaba tše dibotse le go bokana gotee. Ge baetapele ba sa diriše bolaodi bja bona gabotse, go swana le ge ba tlaiša balatedi ba Kriste, ba tlo ikarabelela go Modimo. Jehofa o ba lebeletše!—Mmo. 5:8.

8. Phapano ke eng magareng ga lentšu “bogolo” le “bophagamo,” gona ke ka baka la’ng go le bohlokwa go tseba seo?

⁸ Lentšu “bogolo” le bolela gore motho o “kaone, goba o ka godingwana ga batho ba bangwe.” Eupša ga le bolele gore o “kaonekaone, goba boemo bja gagwe bo feta bja batho ka moka.” Yeo ke tlhaloso ya lentšu “bophagamo.” Le ge baetapele ba mebušo ba hlaloswa e le “balaodi ba bagolo,” eupša go na le molaodi yo mogolo yo a ba fetago ka moka ga bona. Jehofa Modimo o bitšwa “yo a phagamego.” ka makga a mane ka Beibeleng—Dan. 7:18, 22, 25, 27.

9. Moporofeta Daniele o boneng diponong tša gagwe?

⁹ Moporofeta Daniele o ile a bona dipono tšeo di bontšhago gabotse gore Jehofa o phagametše balaodi ba bangwe ka moka. Daniele o ile a thoma ka go bona dibata tše nne tše dikgolo tšeo di swantšhetšago mebušo ya nako e fetilego e lego mmušo wa Babilona, wa Bamede le Baperesia, wa Gerika le Roma, le mmušo wo o bušago lehono wa Maisimane le Maamerika. (Dan. 7:1-3, 17) Ke moka Daniele o ile a bona Jehofa Modimo a dutše sedulong sa bogoši sa legodimong. (Dan. 7:9, 10) Seo moporofeta yo wa go botega a se bonego gape e swanetše goba temošo go babuši ba lehono.

10. Go ya ka Daniele 7:13, 14, 27, ke bomang bao Jehofa a ba neago bolaodi lefaseng, gona se se bolela eng ka Yena?

¹⁰ Bala Daniele 7:13, 14, 27. Modimo o tšea matla ka moka le bolaodi go mebušo ya batho gomme o bo nea ba bangwe bao ba swanelegago e bile ba na le matla. Na ke bomang bao? Ke “yo mongwe yo e kego ke morwa motho,” e lego Jesu Kriste, le “bakgethwa ba Yo a Phagamego,” e lego ba 144,000 bao ba tlago go buša “ka mo go safelego.” (Dan. 7:18) Jehofa ke “Yo a Phagamego,” ka gobane ke yena a nnoši a ka dirago phetho yeo.

11. Ke eng se sengwe seo Daniele a se ngwadilego seo se bontšhago gore Jehofa o phagametše babuši ka moka?

 ¹¹ Pono yeo Daniele a e bonego, e dumelelana le seo a se boletšego mathomong o itše: “Modimo wa magodimong o tloša dikgoši a bea tše dingwe.” O ngwadile le gore: “Yo Godimodimo ke Mmuši wa mebušo ya batho, le gore o o nea yo a nyakago go mo nea wona.” (Dan. 2:19-21; 4:17) Na go na le nako yeo Jehofa a ilego a tloša goba a bea babuši? Ee e gona!

12. Nea mohlala wa nakong yeo e fetilego wa kamoo Jehofa a ilego a tloša dikgoši maemong a ng wa ditau, Kgoši Dtšona. (Bona seswantšho)

¹² Jehofa o ipontšhitše gabotse gore o na le matla a phagamego kudu go fetiša “balaodi ba bagolo.” Nagana ka mehlala ye e meraro. Farao wa kua Egipita o ile a dira batho ba Modimo makgoba gomme a gana go ba lokolla. Eupša Modimo o ile a ba lokolla ke moka a bolaela Farao ka Lewatleng le Lehwibidu. (Ek. 14:26-28; Ps. 136:15) Kgoši Belshatsara wa Babilona o ile a dira monyanya gomme a “[iphagamišetša] Morena wa magodimong” a ba a “tumiša medingwana ya silifera le ya gauta” go e na le go tumiša Jehofa. (Dan. 5:22, 23) Eupša Modimo o ile a kokobetša monna yoo wa boikgogomošo. “Bjona bošegong bjoo,” Belshatsara o ile a bolawa gomme mmušo wa gagwe wa newa Bamede le Baperesia. (Dan. 5:28, 30, 31) Kgoši Heroda Agaripa wa pele wa Palestina o ile a bolaya moapostola Jakobo gomme a golega moapostola Petro ka maikemišetšo a go nyaka go tlo mmolaya. Eupša Jehofa o ile a thibela Heroda ka leano leo la gagwe. “Morongwa wa Jehofa o ile a mo otla,” ke moka a hwa.—Dit. 12:1-5, 21-23.

13. Nea mohlala wa kamoo Jehofa a ilego a fenya mebušo yeo e bego e ipopile ngatana e tee.

¹³ Jehofa o iponagaditše gape gore o na le matla a phagamego go feta mebušo e mentši e kopane. O ile a lwela Baisiraele ka go fediša dikgoši tše 31 tšeo di bego di ipopile ngatana e tee tša Bakanana, gomme a fediša le metse e mentši yeo e bego e le nageng ya kholofetšo. (Josh. 11:4-6, 20; 12:1, 7, 24) Jehofa o ile a thuša Baisiraele gape ka go fediša Kgoši Bene-hadada le babuši ba bangwe ba 32 ba Baasiria bao ba bego ba e lwa le Isiraele.—1 Dikg. 20:1, 26-29.

14-15. (a) Kgoši Nebukadinetsara le Kgoši Dario ba ile ba bolela eng ka bogoši bja Jehofa? (b) Mopsalme o ile a bolela eng ka Jehofa le setšhaba sa Gagwe?

¹⁴ Jehofa o be a dula a ipontšha gore ke Yo  a Phagamego ka dinako ka moka! Ge Kgoši Nebukadinetsara wa Babilona a be a ikgogomoša ka baka la ‘matla a gagwe a magolo le seriti sa gagwe se segolo gomme a se ke a ikokobeletša Jehofa e le yo a swanelwago ke go tumišwa, Modimo o ile a dira gore a lahlegelwe ke tlhaologanyo. Ka morago ga gore Nebukadinetsara a boelwe ke tlhaologanyo o ile a “tumiša Yo Godimodimo” gomme a lemoga gore “mmušo wa [Jehofa] ke wa go iša melokong le melokong.” O ile a oketša ka gore: “Ga go yo a ka thibelago seatla sa gagwe.” (Dan. 4:30, 33-35) Ka morago ga gore potego ya Daniele go Jehofa e lekwe le gore Jehofa a mo phološe ka moleteng wa ditau, Kgoši Dario o ile a re: “batho ba thothomele le go boifa pele ga Modimo wa Daniele. Ka ge e le Modimo yo a phelago e bile E le wa go iša mehleng ya neng le neng, mmušo wa gagwe o ka se ke wa fedišwa gomme pušo ya gagwe ke ya ka mo go sa felego.”—Dan. 6:7-10, 19-22, 26, 27.

¹⁵ Mopsalme o itše: “Jehofa yena o sentše morero wa ditšhaba; O thibetše menagano ya merafo.” O ile a oketša ka gore: “Go thaba setšhaba seo Modimo wa sona e lego Jehofa, batho bao a ba kgethilego gore e be bohwa bja gagwe.” (Ps. 33:10, 12) Re na le lebaka le le kwagalago kudu la go dula re botegela Jehofa!

16. Re ka kgodišega gore ka “masetlapelo a magolo” go tlo direga’ng, gona ka baka la’ng? (Bona seswantšho)

¹⁶ Re badile ka seo Jehofa a se dirilego nakong e fetilego. Bjale re ka letela eng kgauswinyane? Re ka kgodišega gore Jehofa o tlo phološa bahlanka ba gagwe bao ba botegago nakong ya “masetlapelo a magolo.” (Mat. 24:21; Dan. 12:1) O tlo dira seo ge ditšhaba tšeo di ipopilego ngatana e tee tšeo di tsebjago e le Gogo wa Magogo di hlasela bahlanka ba gagwe bao ba botegago. Le ge batho ba ba ka akaretša mebušo e 193 yeo e lego karolo ya  ditšhaba tše dikopanego, ba ka se kgone go fenya Yo a Phagamego le madira a gagwe a legodimong! Jehofa o tshepišitše gore: “Ke tla ikgodiša, ka ikgethagatša ka ba ka itsebiša pele ga mahlo a ditšhaba tše dintši; ke moo di tlago go tseba gore ke nna Jehofa.”—Hesek. 38:14-16, 23; Ps. 46:10.

17. Beibele e bolela gore go tlo direga’ng ka dikgoši tša mo lefaseng le ka bao ba botegelago Jehofa?

¹⁷ Tlhaselo ya Gogo wa Magogo e tlo feleletša ka ntwa ya Haramagedone moo Jehofa a tlago go fediša “dikgoši tša lefase ka moka.” (Kut. 16:14, 16; 19:19-21) Ka mo go fapanego, ‘baloki ke bona ba tlago go dula mo lefaseng gomme bao ba se nago bosodi ba šala go lona.’—Die. 2:21.

18. Bakriste ba bantši ba therešo ba be ba dula ba ikemišeditše go dira’ng, gona ka baka la’ng? (Daniele 3:28)

¹⁸ Ka mengwaga e makgolokgolo Bakriste ba therešo ba ile ba bea tokologo ya bona le maphelo a bona kotsing, ka ge ba be ba rata Jehofa le go mo lebelela e le Mmuši wa bona yo mogolo. Bakriste bao ba therešo, ba be ba ikemišeditše go dula ba botegela Jehofa. Ba swana le Baheberu ba bararo bao ba ilego ba dula ba botegela Yo a Phagamego, yo a ilego a ba phološa letsheng la mollo.—Bala Daniele 3:28.

19. Jehofa o tlo ahlola batho ka mabaka afe, gona rena re swanetše go dira’ng gona bjale?

¹⁹ Mopsalme Dafida o ile a ngwala ka bohlokwa bja go dula re botegela Modimo. O itše: “Jehofa yena o tla ahlolela merafo. Nkahlole hle Jehofa, go ya ka toko ya ka le go ya ka potego ya ka.” (Ps. 7:8) O ile a ngwala le gore: “Anke potego le go loka tšona di ntšhireletše.” (Ps. 25:21) Tsela e botse ya go phela ke go dula re botegela Jehofa, go sa šetšwe diteko le ge e le dife tšeo re kopanago le tšona! Re tlo ikwa go swana le mopsalme yo a ngwadilego gore: “Go thaba bao ba se nago bosodi tseleng ya bona, bao ba sepelago molaong wa Jehofa.”—Ps. 119:1.