Gantši lengwalo la Baheberu 4:12 le tsopolwa ka dikgatišong tša rena go bontšha gore Beibele e na le matla a go fetoša maphelo, gomme ke mo go swanetšego kudu go le diriša ka tsela yeo. Lega go le bjalo, go a hola go lebelela lengwalo la Baheberu 4:12 ka kgopolo yeo e nabilego. Paulo o be a kgothaletša Bakriste ba Baheberu gore ba dire dilo ka go dumelelana le merero ya Modimo. E mentši ya merero yeo e be e ngwadilwe ka mangwalong a makgethwa. Paulo o ile a diriša mohlala wa ge Baisiraele ba be ba lokollwa Egipita. Ba be ba na le kholofelo ya go tsena nageng “yeo e elago maswi le dinose,” moo ba bego ba tla thabela go khutša e le ka kgonthe.​—Ek. 3:8; Doit. 12:9, 10.

Woo e be e le morero wa Modimo wo a o boletšego. Lega go le bjalo, ka morago Baisiraele ba ile ba thatafiša dipelo tša bona gomme ba se sa ba le tumelo; ka gona ba bantši ba bona ba ile ba palelwa ke go tsena khutšong yeo. (Num. 14:30; Josh. 14:6-10) Lega go le bjalo, Paulo o ile a oketša ka gore go be go sa dutše go na le “kholofelo ya go tsena boikhutšong bja [Modimo].” (Baheb. 3:16-19; 4:1) Go molaleng gore “kholofelo” yeo ke karolo ya morero wa Modimo wo a o boletšego. Re ka bala ka morero woo gomme ra dira dilo ka go dumelelana le wona, go etša Bakriste ba Baheberu. E le go gatelela gore kholofelo ye e theilwe Mangwalong, Paulo o ile a tsopola dikarolo tša Genesi 2:2 le Psalme 95:11.

Ruri re swanetše go kgongwa ke taba ya gore “go sa na le kholofelo ya go tsena boikhutšong bja gagwe.” Re a dumela gore tebelelo yeo e theilwego Beibeleng ya go tsena boikhutšong bja Modimo e ka kgonega e le ka kgonthe, gomme re tšere megato ya go tsena go bjona. Ga se ra dira seo ka go katanela go boloka Molao wa Moše goba go dira selo se itšego gore re amogelwe ke Jehofa. Go e na le moo, ka tumelo re thabetše go dirišana le morero wa Modimo wo o utolotšwego gomme re sa tšwela pele re dira bjalo. Go oketša moo, ka ge go bontšhitšwe ka mo godimo, batho ba dikete lefaseng ka moka ba ithuta Beibele le seo morero wa Modimo o se bolelago. Ba bantši ba bona ba tutueletšega go fetoša tsela yeo ba bego ba phela ka yona, ba oketša tumelo ya bona gomme ba kolobetšwa. Tsela yeo ba kgomegago ka yona ke bohlatse bjo bo lego molaleng bja gore “lentšu la Modimo le a phela e bile ke le matla.” Morero wa Modimo wo go boletšwego ka wona ka Beibeleng, o šetše o kgomile maphelo a rena gomme o tla tšwela pele o e ba le matla maphelong a rena.