1. Bahlanka ba Jehofa ba bontšha bjang gore ba a ratana?

BAHLANKA ba Jehofa lefaseng ka moka ke lapa letee gomme ba ratana kudu. (1 Joh. 4:16, 21) Ga se gantši ba bontšhago lerato leo ka ditsela tše dikgolo eupša gantši ba le bontšha ka go direlana dilo tše dintši tše dinyenyane. Ka mohlala, ba a kgothatšana e bile ba swarana gabotse. Ge re naganela bana babo rena re bontšha gore re “baekiši ba Modimo, [re] le bana ba ba rategago.”​—Baef. 5:1.

2. Jesu o ile a ekiša bjang lerato leo Tatagwe a nago le lona?

² Jesu o be a ekiša Tatagwe ka mo go feletšego. O itše: “Tlang go nna, lena bohle bao le lapišitšwego le go imelwa, ke tla le lapološa . . . , gobane ke wa moya o boleta e bile ke wa pelo e ikokobeditšego gomme le tla hweletša meoya ya lena tapologo.” (Mat. 11:28, 29) Ge re ekiša Kriste ka go ‘šetša mmotlana,’ Tagago rena wa legodimong o tla re amogela gomme ra thaba kudu. (Ps. 41:1) Sehlogong se re tlo ithuta  kamoo re ka bontšhago gore re naganela ba bangwe ka lapeng, ka phuthegong le tšhemong.

3. Monna a ka bontšha bjang gore o kwešiša mosadi wa gagwe le go mo naganela? (Bona seswantšho seo se lego mathomong a sehlogo.)

³ Banna ba swanetše go bea mohlala tabeng ya go naganela ditho tša malapa a bona. (Baef. 5:25; 6:4) Ka mohlala, Beibele e re ba dule le basadi ba bona “go ya ka tsebo.” Mantšu ao a ra gore ba swanetše go ‘ba naganela; le go ba kwešiša.’ (1 Pet. 3:7; mongwalo wa ka tlase) Go kwešiša ba bangwe le go ba naganela go a sepedišana. Ka mohlala, monna yo a kwešišago mosadi wa gagwe o a tseba gore ga ba swane ka dilo tše dintši eupša ga a mo nyatše goba a mo tšeela fase. (Gen. 2:18) Monna yoo o naganela maikwelo a mosadi wa gagwe e bile o a mo hlompha. Kgaetšedi yo mongwe kua Canada o re: “Monna wa ka o hlompha maikwelo a ka, ga a ke a re, ‘Ga se wa swanela go ikwa bjalo.’ Le gona o a ntheetša. Ge a nyaka go mphošolla, o dira bjalo ka tsela e botho.”

4. Monna o swanetše go bontšha bjang gore o naganela mosadi wa gagwe ge a dirišana le basadi ba bangwe?

⁴ Monna yo a naganelago mosadi wa gagwe ga a bapale ka lerato le basadi ba bangwe goba go bontšha go ba kgahlegela ka tsela ya go belaetša. Le gona ga a bapale ka lerato le basadi ba bangwe ge a diriša mekero ya poledišano goba a tsene Inthaneteng. (Jobo 31:1) O leka ka thata gore a botegele mosadi wa gagwe, e sego feela ka gobane a mo rata eupša ka gobane a rata Jehofa e bile a hloile se sebe.​—Bala Psalme 19:14; 97:10.

5. Mosadi a ka bontšha bjang gore o naganela monna wa gagwe?

⁵ Ge monna a ka ekiša hlogo ya gagwe e lego Jesu Kriste, seo se tla thuša mosadi wa gagwe gore a mo ‘hlomphe ka mo go tseneletšego.’ (Baef. 5:22-25, 33) Ge mosadi a hlompha monna wa gagwe, seo se tla mo thuša gore a naganele monna wa gagwe ge a dira mešomo e mengwe ya phuthego goba ge a na le mathata. Monna yo mongwe wa kua Brithania o itše: “Gantši ge go na le selo se itšego seo se ntshwentšego, mosadi wa ka o kgona go bona gore ke na le bothatanyana. Ke moka o diriša molao wa motheo wo o lego go Diema 20:5, le ge ka dinako tše dingwe a ka swanelwa ke go letela nako ya maleba gore ke mo ‘utollele’ seo se ntshwenyago, ge feela e le selo seo nka se bolelago le yena.”

6. Ka moka ga rena re ka thuša bjang bana gore ba naganele batho ba bangwe, gona seo se tla ba hola bjang?

⁶ Ge batswadi ba naganelana, ba beela bana ba bona mohlala o mobotse. Batswadi ke bona ba swanetšego go ruta bana ba bona go naganela batho ba bangwe. Ka mohlala, ba swanetše go ruta bana ba bona gore ba se ke ba kitimakitima ka Holong ya Mmušo. Batswadi ba ka ruta bana ba bona gore ge e le nako ya go ja ge ba le moletlong, ba šuthelele batho ba bagolo gore e be bona ba solago pele. Le ge e le boikarabelo bja batswadi go ruta bana ba bona, bohle ka phuthegong ba ka thuša batswadi go ruta bana. Ka mohlala, ge ngwana a re diretše selo se sebotse go swana le go re bulela lebati, re swanetše go mo reta. Ge re ka mo reta, seo se tla mo thabiša gomme a bona gore “go na le lethabo le legolo go neeng go feta go amogeleng.”​—Ditiro 20:35.

7. Jesu o ile a naganela bjang monna yo e bego e le sefoa, gona re ka ithuta’ng go Jesu?

⁷ Ka letšatši le lengwe ge Jesu a be a le tikologong ya Dekapoli, batho ba ile “ba mo tlišetša monna wa sefoa yo a bego a bile a raregile leleme.” (Mar. 7:31-35) Go e na le gore Jesu a mo fodiše pele ga batho, o ile a “mo tšea a mo iša ka thokwana” ke moka a mo fodiša. Ke ka baka la’ng a ile a mo iša ka thokwana? Go ka direga gore monna yoo o be a na le dihlong ka baka la bogole bja gagwe. Ka ge Jesu a ile a lemoga seo, o ile a bona go le kaone gore a se mo fodiše pele ga batho. Ke nnete gore rena re ka se kgone go fodiša batho ka mohlolo. Eupša re ka kgona go naganela maikwelo a bana babo rena, e bile re swanetše go dira bjalo. Moapostola Paulo o ngwadile gore: “A re hlokomelaneng  gore re hlohleletšaneng leratong le medirong e mebotse.” (Baheb. 10:24) Jesu o be a kwešiša gore monna yoo o be a ikwa bjang, ka gona o ile a mo naganela. Ruri o re beetše mohlala o mobotse!

8, 9. Re ka bontšha bjang gore re naganela batšofadi le bao ba babjago? (Nea mehlala.)

⁸ Naganela batšofadi le bao ba babjago. Phuthego ya Bokriste e tsebja ka go ba le lerato, e sego feela ka gore e ruta therešo. (Joh. 13:34, 35) Lerato leo le dira gore re dire sohle seo re se kgonago gore re thuše batšofadi le bao ba babjago gore ba kgone go ya dibokeng le go botša batho ditaba tše dibotse. Re ba thuša gaešita le ge ba sa kgone go dira mo gontši tirelong ya Jehofa. (Mat. 13:23) Ka mohlala, Michael, yo a sepelago ka setulo sa digole, o leboga kudu thušo yeo a e hwetšago ka lapeng labo le go bana babo bao ba lego sehlopheng sa bona sa tirelo ya tšhemo. O re: “Ka ge ba nthekga, gantši ke kgona go ya dibokeng le tšhemong ka mehla. Ke rata kudu go botša batho ditaba tše dibotse ke diriša diteroli.”

⁹ Magae a mantši a Bethele a na le bana babo rena le dikgaetšedi bao ba tšofetšego le bao ba babjago. Bagolo bao ba eteletšego pele bao ba naganelago ba bangwe, ba bontšha bana babo rena ba lerato ka go ba rulaganyetša gore ba tšee karolo modirong wa go nea bohlatse ka go ngwala mangwalo goba ka go founa. Bill yo a nago le mengwaga e 86, yo a ngwalelago batho bao ba dulago ditikologong tša kgole mangwalo, o re: “Re leboga tokelo yeo re nago le yona ya go ngwala mangwalo.” Nancy, yoo a nago le mengwaga e ka bago e 90, o re: “Ga ke lebelele modiro wa go ngwala mangwalo e le feela go no tsenya mangwalo ka dienfelopong. Modiro wo ke tšhemo. Batho ba swanetše go tseba therešo!” Ethel yo a belegwego ka 1921, o re: “Ke phela ka dihlabi. Matšatšing a mangwe ke palelwa le ke go no apara.” Eupša le ge a ikwa ka tsela ye, o thabela go nea bohlatse a diriša founo e bile o na le maeto a go boela a mabotse. Barbara, yo a nago le mengwaga e 85, o re: “Ka ge ke babja, go ya tšhemong ka mehla ke bothata. Eupša go nea bohlatse ka founo go nthuša gore ke botše batho ba bangwe ditaba tše dibotse. Ke a leboga Jehofa!” Pele ngwaga o fela, sehlopha se sengwe sa batšofadi ba rena ba rategago legaeng le lengwe la Bethele se ile sa fetša diiri tše 1 228 tšhemong, sa ngwala mangwalo a 6 265 a go nea bohlatse, sa nea bohlatse ka founo ka makga a ka godimo ga a 2 000 gomme sa sepediša dikgatišo tše 6 315! Ruri re kgodišegile gore se se thabišitše Jehofa!​—Die. 27:11.

10. Re ka thuša bjang bana babo rena le dikgaetšedi gore ba holege ka botlalo ge ba le dibokeng?

¹⁰ Naganela bana babo rena le dikgaetšedi ge o le dibokeng. Ge re le dibokeng, re nyaka gore bana babo rena ba holwe ke diboka ka botlalo. Ge e ba re ba naganela, seo se tla ba thuša gore ba holege. Bjang? Tsela e nngwe ke ka go fihla kapela dibokeng e le gore re se ke ra šitiša ba bangwe go sa hlokagale. Ke nnete gore ka dinako tše dingwe go ka ba le maemo ao re sego ra a letela ao a ka dirago gore re se fihle ka nako dibokeng. Eupša ge e ba re tlwaetše go se fihle ka nako, re swanetše go fetoša mokgwa wo gore re naganele ba bangwe. Dula o gopola gore Jehofa le Morwa wa gagwe ke bona ba re memilego dibokeng. (Mat. 18:20) Ka gona, re swanetše go ba hlompha kudu ka go fihla ka nako dibokeng!

11. Ke ka baka la’ng bao ba nago le dikabelo dibokeng ba swanetše go diriša keletšo yeo e lego go 1 Bakorinthe 14:40?

¹¹ Go naganela bana babo rena go akaretša le go latela keletšo ya Beibele yeo e rego: “[Anke] dilo ka moka di dirwe ka bothakga le ka thulaganyo.” (1 Bakor. 14:40) Bana babo rena bao ba nago le dikabelo dibokeng ba kwa taelo ye ka go fetša dikabelo tša bona ka nako. Ge ba swara nako, seo ga se bontšhe feela gore ba naganela seboledi se se latelago, eupša se bontšha le gore ba naganela le phuthego. Ka mohlala, bana babo rena ba bangwe ba swanelwa ke go sepela maeto a matelele ge ba boele gae. Ba bangwe ba sepela ka dinamelwa tša batho bohle. Le gona ba bangwe ba na le  balekane bao e sego Dihlatse tša Jehofa bao ba nyakago gore ba boe kapela gae.

12. Ke ka baka la’ng re swanetše go hlompha bagolo le go ba rata? (Bona lepokisi leo le rego, “ Naganela Bao ba Etelelago Pele.”)

¹² Bagolo ba šoma ka thata ka phuthegong le tšhemong, ka gona re swanetše go ba hlompha le go ba rata. (Bala 1 Bathesalonika 5:12, 13.) Ga go pelaelo gore o leboga maiteko ao ba a dirago e le gore le wena o holege. Ka gona, dira sohle seo o ka se kgonago gore o dirišane le bona gabotse le go ba thekga ka gobane “ba hlokomela meoya ya [rena] gomme ba tla ikarabela ka seo.”​—Baheb. 13:7, 17.

13. Re ka ithuta’ng tseleng yeo Jesu a bego a swara batho ka yona?

¹³ Jesaya o ile a bolela e sa le pele ka Jesu gore: “Ga go lehlaka le le thinyegilego leo a tlogo le roba; ge e le thapo ya lebone yeo e kunyelelago a ka se e time.” (Jes. 42:3) Ka ge Jesu a rata batho, o ile a ba bontšha kwelobohloko ge a be a le mo lefaseng. O be a kwešiša maikwelo a bao ba nyamilego le bao ba ikwago ba fedile matla, a ba swantšha le “lehlaka le le thinyegilego” le “thapo ya lebone yeo e kunyelelago.” Ke ka baka leo a bego a ba swara ka botho e bile a sa ba felele pelo. Gaešita le bana ba be ba mo rata. (Mar. 10:14) Ke nnete gore re ka se kgone go kwešiša dilo go swana le Jesu goba go ruta batho go swana le yena. Eupša re ka kgona go naganela batho ba tšhemong, ge e le gabotse, re swanetše go dira bjalo. Re ka ba naganela ka tsela yeo re bolelago le bona ka yona, gore re bolela le bona neng le gore re tšea nako e kaakang re bolela le bona.

14. Ke ka baka la’ng re swanetše go kgetha mantšu gabotse ge re bolela le batho tšhemong?

¹⁴ Re swanetše go bolela le batho bjang?  Lehono, batho ba bantši ba “a šokiša gomme [ba gašantšhitšwe]” ke boradikgwebo, boradipolotiki le baruti bao ba tletšego ka boradia le bao ba lego sehlogo. (Mat. 9:36) Ka baka leo, batho ba bantši ga ba sa tshepa motho e bile ga ba na kholofelo. Ka gona, go bohlokwa gore re ba bontšhe botho le go ba kwela bohloko ge re bolela le bona. Re ka dira seo ka go kgetha mantšu gabotse le ka go bolela ka segalo sa go ba kwela bohloko! Batho ba bantši ba theetša molaetša wa rena e sego feela ka gobane re tseba Beibele goba re kgona go hlalosa ditaba, eupša ba re theetša ka gobane ba bona gore re tloga re tshwenyegile ka bona e bile re a ba hlompha.

15. Re ka bontšha bjang gore re naganela batho ba tšhemong ya gabo rena?

¹⁵ Go na le ditsela tše dingwe tše dintši tšeo re ka bontšhago gore re naganela batho bao re ba botšago ditaba tše dibotse. Ka mohlala, ge re ba botšiša dipotšišo, re swanetše go dira bjalo ka tsela e botho le ka go ba hlompha. Mmulamadibogo yo mongwe o kile a šoma tšhemo yeo e bego e tletše ka batho bao ba nago le dihlong. Ka gona ge a be a ba botšiša dipotšišo, o be a phema dipotšišo tšeo di bego di tla ba dira gore ba lewe ke dihlong ge ba sa tsebe karabo. Ka mohlala, o be a phema dipotšišo tše bjalo ka gore: ‘Na o tseba leina la Modimo?’ goba, ‘Na o a tseba gore Mmušo wa Modimo ke’ng?’ Go e na le moo, o be a bolela selo sa go swana le gore, “Ke ithutile go tšwa Beibeleng gore Modimo o na le leina. Na nka go bontšha leina leo?” Ke nnete gore ditšo ga di swane le batho ba a fapana, ka gona ga se gore go na le molao wa gore re botšiše batho dipotšišo bjang. Eupša, ka mehla re swanetše go naganela ba bangwe le go ba hlompha, ka gona seo se bolela gore re swanetše go tseba batho ba tšhemong ya gabo rena gabotse.

16, 17. (a) Re ka bontšha bjang gore re naganela batho ge re kgetha nako yeo re yago dintlong tša bona ka yona? (b) Re ka bontšha bjang gore re naganela batho ka nako yeo re e fetšago re bolela le bona?

¹⁶ Re swanetše go etela baagišani ba rena neng? Ge re tsena ka ntlo le ntlo, re etela batho ba sa tsebe gore re tlo ba etela. Ka gona go bohlokwa kudu gore re ye dintlong tša batho ka nako yeo ba ka nyakago go bolela le rena! (Mat. 7:12) Ka mohlala, na batho ba tšhemong ya geno ba rata go tsoga mosegare mafelobekeng? Ge e ba go le bjalo, o ka thoma tšhemo ka go diriša teroli goba wa sepediša dikgatišo mafelong a batho bohle, goba wa dira maeto a go boela go batho bao o tsebago gore ba tla be ba tsogile ka nako yeo.

¹⁷ Re swanetše go bolela nako e kaaka’ng? Batho ba bantši ba dula ba swaregile, ka gona ke mo gobotse gore re bolele le bona nako e kopana, kudukudu leetong la pele. Go kaone gore re bolele nako e kopana go e na le go dula nako e telele. (1 Bakor. 9:20-23) Ge batho ba bona gore re a bona gore ba swaregile goba ga ba na nako, ba ka re botša gore re boe gape. Ge e ba re bontšha dika tšeo di enywago ke moya wa Modimo ge re le tšhemong, re tla ba “bašomigotee le Modimo.” Le gona Jehofa a ka ba a re diriša gore re thuše motho yo a itšego gore a tsebe therešo.—1 Bakor. 3:6, 7, 9.

18. Ge e ba re naganela ba bangwe, re tlo hwetša ditšhegofatšo dife?

¹⁸ Ka gona, anke re direng sohle seo re ka se kgonago go bontšha gore re naganela ba bangwe ka lapeng, ka phuthegong le tšhemong. Ge re dira bjalo, re tlo hwetša ditšhegofatšo tše dintši gona bjale le nakong e tlago. Psalme 41:1, 2 e re: “Go thaba le ge e le mang yo a šetšago mmotlana; letšatšing la masetlapelo Jehofa o tla mo hlakodiša. . . . Go tla bolelwa ka yena gore o thabile mo lefaseng.”