O DIRA’NG ge o nyaka go tseba gore ke nako mang? O ka lebelela sešupanako sa gago. Ge mogwera wa gago a go botšiša gore ke nako mang, o ka re’ng? Go na le ditsela tše di fapafapanego tša go bolela nako. Ke dife?

A re re ke metsotso e 30 ka morago ga iri ya pele mosegare. O ka mo araba ka gore ke 1:30 goba ke 13:30. Mafelong a mangwe, nako yona ye e ka bolelwa e le metsotso e 30 go ya go iri ya bobedi.

Ka ge o bala Beibele, o ka ipotšiša gore batho ba mehleng ya ge Beibele e be e ngwalwa ba be ba bolela nako bjang. Go be go na le mekgwa e mmalwa yeo e bego e dirišwa. Mangwalo a Seheberu a diriša “mesong,” “mosegare,” “mosegare wa sekgalela” le “mantšiboa.” (Gen. 8:11; 19:27; 43:16; Doit. 28:29; 1 Dikg. 18:26) Lega go le bjalo, ka dinako tše dingwe go be go dirišwa nako ya go lebanya.

Mehleng ya ge Beibele e be e ngwalwa go be go tlwaelegile gore metse e letwe ke bahlapetši. Ba be ba e leta bošego. Mengwaga e mentši pele Jesu a belegwa, Baisiraele ba be ba aroganya bošego ka dinako tše tharo tšeo ba bego ba di bitša dinako tša go hlapetša. (Ps. 63:6) Baahlodi 7:19 e bolela ka “nako ya bošegogare ya go hlapetša.” Mehleng ya ge Jesu a be a le mo lefaseng, Bajuda ba be ba diriša mokgwa wa Bagerika le Baroma wa go ba le dinako tše nne tša go hlapetša tša bošego.

Diebangeding go bolelwa ka dinako tše tša go hlapetša ka makga a mmalwa. Ka mohlala, e be e le “lebakeng la tlhapetšo ya bone” ge Jesu a be a sepela godimo ga meetse a lebile sekepeng seo barutiwa ba gagwe ba bego ba le go sona. (Mat. 14:25) Papišong e nngwe Jesu o ile a re: “Ge e ba mong wa ntlo a ka be a tsebile nako yeo lehodu le bego le tla tla ka yona, o be a tla dula a phakgame a se dumelele gore ntlo ya gagwe e thubje.”​—Mat. 24:43.

Jesu o ile a bolela ka dinako tše tše nne ka moka ge a be a botša barutiwa ba gagwe gore: “Ka gona, dulang le phakgame gobane ga le tsebe nako yeo Mong wa ntlo a tlago ka yona, e ka ba mantšiboa goba bošegogare goba ge dikgogo di lla goba e sa le bosasa.” (Mar. 13:35) Ya pele ya dinako tše, e lego “mantšiboa,” e be e thoma ge letšatši le sobela go fihla mo e ka bago ka iri ya senyane bošego. Ya bobedi, e lego “bošegogare,” e be e thoma mo e ka bago ka iri ya senyane bošego go fihla bošegogare. Ya boraro, e lego “ge dikgogo di lla,” e be e thoma bošegogare go fihla mo e ka bago ka iri ya boraro mesong. E ka no ba e be e le ka nako ye moo mogogonope o ilego wa lla bošegong bjoo Jesu a swerwego ka bjona. (Mar. 14:72) Karolo ya bone ya bošego, e lego “e sa le bosasa,” e be e thoma mo e ka bago ka iri ya boraro mesong go fihla ge letšatši le hlaba.

Le ge batho bao ba phetšego mehleng ya ge Beibele e be e ngwalwa ba be ba se na dišupanako tšeo re di dirišago lehono, ba be ba na le tsela ya go bolela nako, e ka ba e le mosegare goba bošego.