1. Ke ka baka la’ng Dihlatse tša Jehofa e le batho bao ba thabilego? (Bona seswantšho seo se lego ka mo godimo.)

DIHLATSE TŠA JEHOFA ke batho bao ba thabilego. Ge ba le gotee dibokeng, dikopanong goba ge ba kopane gore ba ithabiše, o tla kwa ba bolela ba thabile e bile ba sega. Ke ka baka la’ng ba dula ba thabile? Lebaka le legolo ke gore ba tseba Jehofa, yena “Modimo yo a thabilego.” Ba a mo hlankela e bile ba leka go mo ekiša. (1 Tim. 1:11; Ps. 16:11) Ka ge Modimo e le yena a re neago lethabo, o nyaka gore re dule re thabile e bile o re nea mabaka a mantši a gore re thabe.​—Doit. 12:7; Mmo. 3:12, 13.

2, 3. (a) Go thaba ke’ng? (b) Ke ka baka la’ng go ka ba thata gore re thabe?

² Go thwe’ng ka wena? Na o thabile? Na o ka thaba go feta kamoo o thabilego ka gona? Go thaba ke’ng? Ke go ikwa o kgotsofetše goba o ipshina ka bophelo. Beibele e re botša gore batho bao ba nago le tswalano e botse le Jehofa ke bona ba ka thabago e le ka kgonthe. Lega go le bjalo, lehono go ka ba thata gore motho a thabe. Ka baka la’ng?

³ Ga go bonolo gore motho a thabe ge a lebeletšane le maemo a thata a go swana le go hlokofalelwa, ge a lebeletšane le tlhalo,  a feletšwe ke mošomo goba ge wa leloko a kgaotšwe. Le gona go ka ba thata gore motho a dule a thabile ge ka lapeng go dula go na le dintwa e bile go sa boledišanwe. Selo se sengwe gape seo se ka dirago gore re se ke ra thaba ke ge re kwerwa ke batho bao re šomago le bona goba bao re tsenago le bona ka klaseng, ge re tlaišwa ka baka la bodumedi bja rena goba re golegilwe. Le gona go ka ba thata gore re thabe ge re babja, re swerwe ke bolwetši bja go se alafege goba re na le kgateletšego ya monagano. Eupša dula o gopola gore Jesu Kriste, yena ‘Morena yo Matla yo a thabilego,’ o be a rata go kgothatša batho le go dira gore ba thabe. (1 Tim. 6:15; Mat. 11:28-30) Thutong ya gagwe ya Thabeng, Jesu o boletše dika tše mmalwa tšeo di ka re thušago gore re thabe le ge re na le mathata.

4, 5. Re ka dira’ng gore re thabe le go dula re thabile?

⁴ Selo sa pele seo Jesu a se boletšego Thutong ya gagwe ya Thabeng se tloga se le bohlokwa. O itše: “Go thaba bao ba lemogago gore ba nyaka dilo tša moya, ka ge Mmušo wa magodimo e le wa bona.” (Mat. 5:3) Re bontšha bjang gore re nyaka dilo tša moya? Re bontšha seo ka go bala Beibele, go kwa melao ya Modimo le go dira gore go mo hlankela e be selo seo se tlago pele maphelong a rena. Go dira dilo tše go tla re thuša gore re thabe. Le gona go tla dira gore tumelo ya rena ya gore dikholofetšo tša Modimo di kgauswi le go phethagala e matlafale. E bile “kholofelo e thabišago” yeo re balago ka yona ka Beibeleng e tla re thuša go kgotlelela ge re na le mathata.​—Tito 2:13.

⁵ Re swanetše go matlafatša tswalano ya rena le Jehofa e le gore re dule re thabile go sa šetšwe mathata ao a re welago. Moapostola Paulo o ngwadile gore: “Ka mehla thabang Moreneng. Ke tla buša ke re thabang!” (Bafil. 4:4) E le gore re be bagwera ba bagolo ba Jehofa, re swanetše go ba le bohlale bja Modimo. Lentšu la Modimo le re: “Go thaba motho yo a hweditšego bohlale le yo a hwetšago temogo. Ke sehlare sa bophelo go bao ba bo swerego gomme bao ba bo kgomarelago ba tla tšewa e le bao ba thabilego.”​—Die. 3:13, 18.

6. Ke selo sefe se sengwe seo re swanetšego go se dira gore re dule re thabile?

⁶ Selo se sengwe gape seo se ka dirago gore re dule re thabile ke go tšwela pele re bala Beibele le go diriša seo re ithutago sona. Jesu o ile a bontšha bohlokwa bja go diriša seo re ithutago sona ka go bolela gore: “Ge e ba le tseba dilo tše, le a thaba ge e ba le di dira.” (Joh. 13:17; bala Jakobo 1:25.) Go diriša seo re ithutago sona go bohlokwa ge e ba re nyaka go iphepa moyeng le go dula re thabile. Eupša go kgonega bjang gore re dule re thabile le ge go na le dilo tše dintši tšeo di ka dirago gore re se ke ra thaba? A re boneng selo se sengwe gape seo Jesu a ilego a se bolela Thutong ya Thabeng.

7. Go kgonega bjang gore batho bao ba kwelego bohloko ba thabe?

⁷ “Go thaba bao ba kwelego bohloko, ka ge ba tla homotšwa.” (Mat. 5:4) Re ka ipotšiša gore, ‘Go ka kgonega bjang gore batho bao ba kwelego bohloko ba thabe?’ Jesu o be a sa bolele ka motho yo mongwe le yo mongwe yo a kwelego bohloko. Gaešita le batho ba bantši bao ba dirago dilo tše mpe ba kwa bohloko goba ba nyamišwa ke go bona mathata ao a re welago ka ge re phela “mehleng ya bofelo” yeo “go lego thata go lebeletšana le [yona].” (2 Tim. 3:1) Lega go le bjalo, go nyama ga bona ga go ba dire gore ba be le tswalano e botse le Jehofa, ka baka  leo ga ba thabe. Eupša Jesu o be a bolela ka bao ba lemogago gore ba nyaka dilo tša moya. Batho bao ba kwa bohloko ka gobane ba bona batho ba bantši ba sa nyake go dumela go Modimo goba ba sa phele kamoo Modimo a nyakago ka gona. Le gona batho bao ba a lemoga gore ke badiradibe e bile ba bona dilo tše di kwešago bohloko tšeo di diregago mo lefaseng. Jehofa o kgona go bona batho ba bao ba kwelego bohloko e le ka kgonthe, gomme o ba homotša a diriša Lentšu la gagwe le go ba thuša gore ba thabe.​—Bala Hesekiele 5:11; 9:4.

8. Go ba boleta go ka dira bjang gore motho a thabe?

⁸ “Go thaba ba moya o boleta, ka ge ba tla ja bohwa bja lefase.” (Mat. 5:5) Go ba boleta go ka dira bjang gore motho a thabe? Ka morago ga gore batho ba ithute therešo, ba a fetoga. Go ka direga gore ba bangwe ba be ba le bogale, ba rata dintwa e bile ba le šoro. Eupša gona bjale ba apere “semelo se sefsa” gomme ba bontšha “lerato leo le bonagatšago lešoko, botho, boikokobetšo, boleta le go se fele pelo.” (Bakol. 3:9-12) Ke ka baka leo ba nago le khutšo, ba phelago gabotse le batho ba bangwe e bile ba thabile. Le gona Lentšu la Modimo le holofetša gore batho ba bjalo ba tla “ja bohwa bja lefase.”​—Ps. 37:8-10, 29.

9. (a) Jesu o be a era go re’ng ge a be a re ba boleta ba tla “ja bohwa bja lefase”? (b) Ke ka baka la’ng go ka thwe “bao ba swerwego ke tlala ya toko le bao ba e nyoretšwego” ba a thaba?

⁹ Ke ka kgopolo efe ba boleta ba tlago ‘go ja bohwa bja lefase’? Batlotšwa ba tla ja bohwa bja lefase ge ba tla be ba buša e le dikgoši le baperisita. (Kut. 20:6) Batho ba bangwe ba dimilione bao ba tlago go phela mo lefaseng bona ba tla ja bohwa bja lefase ka kgopolo ya gore ba tla dumelelwa go dula mo go lona ka mo go sa felego ba phethagetše, ba na le khutšo e bile ba thabile. Batho ba ke bona bao Jesu a boletšego ka bona gore: “Go thaba bao ba swerwego ke tlala ya toko le bao ba e nyoretšwego.” (Mat. 5:6) Ba tla hwetša toko ge Jehofa a fediša bobe ka moka mo lefaseng. (2 Pet. 3:13) Ka nako yeo, batho bao ba lokilego ba tla thaba e bile ba ka se sa kwešwa bohloko ke dilo tše mpe tšeo batho ba babe ba di dirago.​—Ps. 37:17.

10. Go ba le kgaugelo go bolela’ng?

¹⁰ “Go thaba bagaugedi [goba bao ba nago le kgaugelo], ka ge ba tla bontšhwa kgaugelo.” (Mat. 5:7) Go gaugela batho ba bangwe go bolela go ba le lerato, go ba boleta le go ba kwela bohloko, e lego go šokela batho bao ba tlaišegago. Lega go le bjalo, kgaugelo ga se feela maikwelo ao motho a nago le wona. Beibele e re ruta gore go ba le kgaugelo go akaretša go dira selo se itšego go thuša ba bangwe.

11. Papišo ya mabapi le Mosamaria wa kgaugelo e re ruta’ng?

¹¹ Bala Luka 10:30-37. Papišo ya Jesu ya mabapi le Mosamaria wa kgaugelo e re hlalosetša gabotse seo se bolelwago ke go ba le kgaugelo. Mosamaria yoo o ile a gaugela monna yo a bego a gobetše le go mo kwela bohloko gomme a dira se itšego gore a mo thuše. Ka morago ga gore Jesu a bolele papišo yeo o ile a re: “Sepela gomme le wena o dire sona seo.” Ka gona, re ka ipotšiša gore: ‘Na ke dira seo Mosamaria wa kgaugelo a ilego a se dira? Na ge ba bangwe ba tlaišega ke ba kwela bohloko? Na go na le seo nka se dirago gore ke ba thuše? Ka mohlala, na nka thuša Bakriste bao ba tšofetšego, bahlologadi le bana bao batswadi ba bona e sego Dihlatse tša Jehofa? Na nka “[bolela] ka mo go homotšago le bao ba nyamilego”?’​—1 Bathes. 5:14; Jak. 1:27.

12. Go gaugela ba bangwe go re thuša bjang gore re thabe?

¹² Eupša go ba le kgaugelo go re thuša  bjang gore re thabe? Ge re bontšha batho ba bangwe kgaugelo, re ba nea selo se itšego. E bile Jesu o boletše gore ge re nea ba bangwe re tla thaba. Le gona re a tseba gore ge re dira bjalo re thabiša Jehofa. (Dit. 20:35; bala Baheberu 13:16.) Kgoši Dafida o boletše mabapi le motho yoo a bontšhago ba bangwe kwelobohloko gore: “Jehofa yena o tla mo šireletša a ba a mo phediša. Go tla bolelwa ka yena gore o thabile mo lefaseng.” (Ps. 41:1, 2) Ge e ba re kwela ba bangwe bohloko le go ba gaugela, Jehofa le yena o tla re gaugela gomme re tla dula re thabile.​—Jak. 2:13.

13, 14. Ke ka baka la’ng batho “bao ba sekilego pelong” ba thabile?

¹³ Jesu o itše: “Go thaba bao ba sekilego pelong, ka ge ba tla bona Modimo.” (Mat. 5:8) E le gore dipelo tša rena di dule di sekile, re swanetše go kgonthišetša gore dilo tšeo re di naganago le tšeo re di kganyogago di sekile, goba di hlwekile. Se se bohlokwa ge e ba re nyaka gore Jehofa a amogele borapedi bja rena.​—Bala 2 Bakorinthe 4:2; 1 Tim. 1:5.

¹⁴ Batho bao dipelo tša bona di sekilego ba ka kgona go ba le tswalano e botse le Jehofa, yoo a itšego: “Go thaba bao ba hlatswago diaparo tša bona tše telele.” (Kut. 22:14) Ke ka kgopolo efe ba “hlatswago diaparo tša bona”? Go Bakriste bao ba tloditšwego, go bolela gore Jehofa o ba lebelela ba hlwekile gomme o tla ba nea go se hwe legodimong ke moka ba tla thaba ka mo go sa felego. Go lešaba le legolo leo le nago le kholofelo ya go tlo phela ka mo go sa felego mo lefaseng, go bolela gore Jehofa o le dumelela go ba bagwera ba gagwe ka gobane o ba lebelela ba lokile. Beibele e re “ba hlatswitše diaparo tša bona tše telele ba di šweufatša mading a Kwana.”​—Kut. 7:9, 13, 14.

15, 16. Go kgonega bjang gore bao ba sekilego pelong ba ‘bone Modimo’?

¹⁵ Eupša go kgonega bjang gore bao ba sekilego pelong ba ‘bone Modimo’ mola Beibele e re ‘ga go motho yo a ka bonago Modimo gomme a phela’? (Ek. 33:20) Lentšu la Segerika leo le fetoletšwego e le “bona” le ka šupa go go bona selo ka leihlo la kgopolo, go kwešiša selo se itšego goba go se tseba. Ka gona go “bona Modimo” go bolela go kwešiša gore ke Modimo wa mohuta mang le go tseba dika tša gagwe. (Baef. 1:18) Jesu o ile a ekiša dika tša Modimo gabotse kudu moo a ilego a bolela gore: “Yo a bonego nna o bone le Tate.”​—Joh. 14:7-9.

¹⁶ Go oketša moo, re “bona Modimo” ge re lemoga kamoo a re thušago ka gona. (Jobo 42:5) Le gona re ka kgona go “bona” goba go naganišiša ka dilo tše di kgahlišago tšeo Jehofa a tshepišitšego go di direla bao ba dulago ba sekile e bile ba mmotegela.  Eupša batlotšwa bona ba tla bona Jehofa ka tsela ya kgonthe ge ba hweditše moputso wa bona wa go yo phela legodimong.​—1 Joh. 3:2.

17. Khutšo e re thuša bjang gore re thabe?

¹⁷ Jesu boletše gape gore: “Go thaba badirakhutšo.” (Mat. 5:9) Re tla thaba ge re ka ba ba pele ba go dira khutšo le batho ba bangwe. Morutiwa Jakobo o ngwadile gore: “Godimo ga moo, peu ya seenywa sa toko e bjalwa maemong a khutšo gare ga bao ba dirago khutšo.” (Jak. 3:18) Ge e ba o sa kwane gabotse le motho yo a itšego ka phuthegong goba wa leloko, kgopela Jehofa gore a go thuše go ba modirakhutšo. Ge o ka mo kgopela, o tla go nea moya wa gagwe o mokgethwa woo o tlago go go thuša go bontšha dika tša Bokriste, gomme o tla thaba kudu. Jesu o ile a bontšha gore go bohlokwa kudu gore e be wena wa pele yo a dirago khutšo ge a be a re: “Ka gona, ge o tliša mpho ya gago aletareng gomme ge o le moo wa gopola gore ngwaneno o na le se sengwe ka wena, tlogela mpho ya gago moo pele ga aletare, o tloge. Thoma ka go dira khutšo le ngwaneno, ke moka ge o boile, o iše mpho ya gago.”​—Mat. 5:23, 24.

18, 19. Ke ka baka la’ng Bakriste ba ka thaba le ge ba tlaišwa?

¹⁸ Jesu o itše: “Go thaba lena ge batho ba le goboša le go le tlaiša gomme ba aketša ka go bolela mohuta o mongwe le o mongwe wa selo se sebe ka lena ka baka la ka.” O be a era go re’ng? O tšwetše pele ka gore: “Thabang le hlalaleng ka ge moputso wa lena e le o mogolo magodimong, gobane ba tlaišitše baporofeta ba pele ga lena ka tsela yeo.” (Mat. 5:11, 12) Ge baapostola ba be ba itiwa e bile ba laelwa gore ba tlogele go botša ba bangwe ditaba tše dibotse, ba ile “ba tloga pele ga Sanhedrine ba thabile.” Re a tseba gore ba be ba sa thabele go itiwa. Eupša ba be ba thabile ka “gobane ba be ba tšerwe e le ba ba swanelwago ke go hlomphollwa ka baka la leina la [Jesu].”​—Dit. 5:41.

¹⁹ Lehono batho ba Jehofa ba kgotleletše ka lethabo ge ba tlaišwa ka gobane ba mo hlankela. (Bala Jakobo 1:2-4.) Go swana le baapostola, ga re thabe ge re tlaišega goba ge re tlaišwa. Eupša ge re ka dula re botegela Modimo le ge re tlaišwa, o tla re thuša gore re kgotlelele. Ka mohlala, ka August 1944, Henryk Dornik le ngwanabo ba ile ba išwa go e nngwe ya dikgolego tšeo batho ba bego ba tlaišetšwa go tšona. Lega go le bjalo, batho bao ba bego ba ba tlaiša ba ile ba re: “Go ka se kgonege gore re ba gapeletše go dira selo le ge e le sefe. Ba thabela go hwela tumelo ya bona.” Ngwanabo rena Dornik o itše: “Le ge ke be ke sa nyake go hwela tumelo, ke ile ka thabišwa ke gore ke tlaišega ke na le sebete e bile ke botegela Jehofa. . . . Go rapela Jehofa ka go tšwa pelong go ile gwa nthuša gore ke batamele kgauswi le yena, gomme o ile a nthuša kudu.”

20. Ke ka baka la’ng re thabela go hlankela “Modimo yo a thabilego”?

²⁰ Ge e ba Jehofa, yena “Modimo yo a thabilego,” a re amogela, re ka thaba le ge re tlaišwa, ge ba malapa a gabo rena ba re ganetša go hlankela Modimo, ge re babja goba re tšofetše. (1 Tim. 1:11) Le gona re a thaba ka gobane re tloga re kgodišegile gore Modimo wa rena “yo a ka se kego a aketša” o tlo phethagatša dilo ka moka tšeo a re tshepišitšego tšona. (Tito 1:2) Ge Jehofa a re direla dilo tšeo a re tshepišitšego tšona, re ka se sa gopola mathata ao re lebeletšanago le ona gona bjale. Ge e le gabotse, ga re kgone go tseba ka mo go feletšego kamoo Jehofa a tlago go re šegofatša ka gona le kamoo re tlago go thaba ka gona. Ruri re “tla thaba kudu ka baka la go ata ga khutšo.”​—Ps. 37:11.