1, 2. (a) Tsela yeo Jehofa a swarago batho ka yona e fapana bjang le tsela yeo batho bao ba nago le matla a go laola ba swarago ba bangwe ka yona? (b) Re tlo ithuta ka’ng sehlogong se?

GANTŠI batho ba go ba le matla a go laola ba rata go “buša” batho ba bangwe gaešita le go ba gatelela. (Mat. 20:25; Mmo. 8:9) Eupša Jehofa ga a swane le bona. Gaešita le ge e le Ramatlaohle, o dula a naganela batho. Le gona o na le botho. Jehofa o na le taba le maikwelo a rena e bile o tseba dilo tšeo re di hlokago. Ka ge “a gopola gore re lerole,” ga a re kgopele go dira dilo tšeo a tsebago gore re ka se di kgone.​—Ps. 103:13, 14.

² Ka Beibeleng go na le mehlala e mentši yeo e bontšhago kamoo Jehofa a naganelago bahlanka ba gagwe. Sehlogong se re tlo ithuta ka mehlala e meraro yeo e bontšhago seo. Sa pele, re tlo ithuta kamoo Jehofa a ilego a thuša Samuele yo monyenyane gore a botše Moperisita yo a Phagamego Eli molaetša wa kahlolo. Sa bobedi, re tlo ithuta kamoo Jehofa a ilego a se felele Moshe pelo ge a be dikadika go amogela kabelo ya go etelela Baisiraele pele. Sa boraro, re tlo ithuta kamoo Jehofa a ilego a bontšha go naganela Baisiraele ge a be  a ba ntšha Egipita. Ge re dutše re ithuta ka mehlala ye, bona seo o ka ithutago sona ka Jehofa mohlaleng o mongwe le o mongwe le kamoo o ka dirišago seo o ithutago sona bophelong bja gago.

3. Samuele o ile a diragalelwa ke selo sefe sa go makatša ge a be a robetše, gona seo se dira gore re ipotšiše potšišo efe? (Bona seswantšho seo se lego mathomong a sehlogo.)

³ Samuele o thomile go “hlankela Jehofa” taberenakeleng e sa le yo monyenyane kudu. (1 Sam. 3:1) Ka letšatši le lengwe ge Samuele a robetše go ile gwa direga selo sa go makatša. * (Bala 1 Samuele 3:2-10.) O ile a kwa lentšu le mmitša. Ka ge a be a nagana gore o bitšwa ke Moperisita yo a Phagamego Eli, o ile a kitimela go yena a re: “Ke nna yo, ka ge o mpiditše.” Eli o ile mmotša gore ga se yena a mmiditšego. Ka morago ga gore Samuele a kwe lentšu leo le mmitša gape ka makga a mangwe a mabedi, Eli o ile a lemoga gore Samuele o be a bitšwa ke Modimo. Ka gona Eli o ile a botša Samuele kamoo a swanetšego go araba ka gona ge lentšu leo le mmitša. Samuele o ile a dira bjalo. Ke ka baka la’ng Jehofa a sa ka a botša Samuele di sa tloga fase gore ke yena a mmitšago? Beibele ga e re botše, eupša go ka direga gore Jehofa o ile a dira bjalo ka ge a be a naganela Samuele. Go re’ng re re’alo?

4, 5. (a) Samuele o ile a dira’ng ge Jehofa a be a mo laela gore a yo nea Eli molaetša wa kahlolo? (b) Pego ye e re ruta’ng ka Jehofa?

⁴ Bala 1 Samuele 3:11-18. Molao wa Jehofa o be o laetše gore bana ba hlomphe batšofadi, kudukudu dikgošana. (Ek. 22:28; Lef. 19:32) Na o nagana gore go be go tla ba bonolo gore Samuele a tsoge mesong a kitimele go Eli gomme a mmotše molaetša wa kahlolo wa go tšwa go Jehofa? Aowa! Beibele e re Samuele “o be a boifa go botša Eli seo a se bonego.” Lega go le bjalo, Jehofa o ile a dira gore Eli a lemoge gore ke Yena a bitšago Samuele. Ka baka leo, Eli o ile a botša Samuele gore: “Hle, o se ke wa nkutela selo.” Samuele o ile “a mmotša mantšu ka moka” ao Jehofa a a boletšego.

⁵ Go ka direga gore Eli ga se a ka a makala ge a ekwa molaetša woo. E be e se la mathomo a ekwa molaetša wa mohuta wo ka gobane “monna wa Modimo” yoo a sa bolelwego ka leina ka Beibeleng, o be a kile a mmotša molaetša o swanago. (1 Sam. 2:27-36) Pego ye ya Samuele le Eli e re ruta gore Jehofa o naganela batho e bile o bohlale.

6. Re ithuta dilo dife tseleng yeo Modimo a ilego a thuša Samuele?

⁶ Na o mofsa? Ge e ba go le bjalo, gona seo se diragaletšego Samuele se ka go thuša go bona gore Jehofa o kwešiša maikwelo a gago le mathata a gago. Mohlomongwe o ka ba o na le dihlong e bile o boifa go botša batho ba bagolo ka Modimo goba o ka ba o tšhaba go bolela gore o Hlatse ya Jehofa ka ge o boifa dithaka tša gago. Dula o gopola gore Jehofa o nyaka go go thuša. Ka gona mo rapele o mmotše dilo ka moka tšeo di lego pelong ya gago. (Ps. 62:8) Naganišiša ka bafsa ba bangwe ba ka Beibeleng ba go swana le Samuele. Boledišana le ba bangwe ka phuthegong bao ba ilego ba kgona go fenya diteko tša go swana le tša gago, e ka ba ba bagolo goba ba banyenyane. Ba ka go thuša ka go go botša kamoo Jehofa a ilego a ba thuša ka gona ka ditsela tšeo ba bego ba sa di letela.

7, 8. Jehofa o ile a bontšha bjang gore o be a naganela Moshe?

⁷ Ge Moshe a be a na le mengwaga e 80, Jehofa o ile a mo nea kabelo e kgolo. O ile a mo kgopela gore a yo ntšha Baisiraele Egipita. (Ek. 3:10) Moshe o be a feditše mengwaga e 40 e le modiši  kua Midiane, ka gona kabelo yeo e swanetše go ba e ile ya mo tšhoša. O ile a re: “Ke nna mang nka yago go Farao gomme ka ntšha bana ba Isiraele Egipita?” Modimo o ile a mo kgothatša ka gore: “Ke tla ba le wena.” (Ek. 3:11, 12) O ile a ba a mo kgodiša ka gore banna ba bagolo ba Isiraele “ba tla theetša lentšu la [gagwe].” Le ge Jehofa a be a mmoditše bjalo, Moshe o ile a re: ‘Bjale a re re ga ba theetše lentšu la ka?’ (Ek. 3:18; 4:1) Go be go bonagala eka Moshe o re seo Jehofa a se bolelago se ka se kgonege. Eupša Jehofa ga se a ka a mo felela pelo. Ge e le gabotse o ile a ba a mo nea matla a go dira mehlolo. Seo se ile sa dira gore Moshe e be motho wa mathomo ka Beibeleng wa go dira mehlolo.​—Ek. 4:2-9, 21.

⁸ Moshe o ile a no nyaka lebaka le lengwe. O ile a re ga a kgone go bolela. Jehofa o ile a re go yena: “Ke tla ba le wena ge o bolela, ka ba ka go ruta se o tlago go se bolela.” Na mantšu ao a ile a thuša Moshe go amogela kabelo ya gagwe? Ga go bonagale bjalo, ka gobane o ile a kgopela Jehofa gore a rome motho yo mongwe. Ge Jehofa a ekwa seo, o ile a mo galefela. Eupša ga se a ka a mo gapeletša go amogela kabelo yeo. O ile a mo naganela ke moka a kgetha Arone gore e be mmoleledi wa gagwe.​—Ek. 4:10-16.

9. Ka ge Jehofa a ile a naganela Moshe le go se mo felele pelo, seo se ile sa mo thuša bjang go phetha kabelo ya gagwe?

⁹ Pego ye ya Moshe e re ruta’ng ka Jehofa? Ka ge Jehofa e le Ramatlaohle, nkabe a ile a no tšhošetša Moshe gore a mo kwe. Eupša ga se a ka a dira bjalo. Ka ge a na le botho o ile a leka go thuša Moshe yo a bego a ikokobeditše ka go se mo felele pelo. Na Jehofa o ile a atlega? Ee! Moshe o ile a ba moetapele yo a kgahlišago kudu, ka mehla a leka go naganela ba bangwe ge a dirišana le bona bjalo ka ge Jehofa le yena a ile a mo naganela.​—Num. 12:3.

10. Ge e ba re naganela ba bangwe go swana le Jehofa, re tlo holega bjang?

¹⁰ Re ithuta’ng tabeng ye? Ge e ba o le hlogo ya lapa, o le motswadi goba o le mogolo, o na le matla a itšego a go laola ba bangwe. Ka gona go  bohlokwa kudu gore o ekiše Jehofa ka go naganela ba bangwe, o ba bontšhe botho e bile o se ke wa ba felela pelo. (Bakol. 3:19-21; 1 Pet. 5:1-3) Ge o ka ekiša Jehofa le Moshe yo Mogolo e lego Jesu Kriste, gona batho ba ka se tšhabe go bolela le wena e bile ba tla ikwa ba lapologile ge ba na le wena. (Mat. 11:28, 29) Le gona o tla ba mohlala o mobotse kudu go ba bangwe.​—Baheb. 13:7.

11, 12. Ge Jehofa a be a ntšha Baisiraele Egipita, o ile a dira’ng gore ba ikwe ba šireletšegile?

¹¹ Go ka direga gore Baisiraele ba be ba feta dimilione tše tharo ge ba be ba tloga Egipita ka 1513 B.C.E. Ba be ba sepela le bana, batšofadi e bile go na le bao ba golofetšego. Ruri go be go nyakega Moetapele yo botho le yo a naganelago go ntšha setšhaba seo se segolo Egipita. Jehofa e bile Moetapele yo bjalo a diriša Moshe. Seo se ile sa dira gore Baisiraele ba ikwe ba šireletšegile ge ba tloga Egipita, le ge e be e le kgale ba dula moo.​—Ps. 78:52, 53.

¹² Jehofa o ile a dira’ng gore Baisiraele ba ikwe ba šireletšegile? O ile a dira gore ge ba etšwa Egipita ba sepele ba le bjalo ka “dihlopha tša bahlabani.” (Ek. 13:18) Seo se ile sa dira gore Baisiraele ba kgodišege gore Jehofa Modimo o be a na le bona. Le gona Jehofa o ile a dira gore ba bone gore o na le bona ka go ba hlahla “ka leru mosegare gomme bošego . . . a ba hlahla ka seetša sa mollo.” (Ps. 78:14) Ge e le gabotse Jehofa o be a ba botša gore: “Le se ke la tšhoga, ke na le lena. Ke tla le hlahla le go le šireletša.” Ruri go be go le bohlokwa gore Baisiraele ba tsebe seo, ka ge kgauswinyane ba be ba tlo lebeletšana le maemo a thata.

13, 14. (a) Jehofa o ile a bontšha bjang gore o be a naganela Baisiraele ge ba be ba le Lewatleng le Lehwibidu? (b) Jehofa o ile a bontšha bjang gore o na le matla a go feta a Baegipita?

¹³ Bala Ekisodo 14:19-22. Ipone o na le Baisiraele le kgakgetšwe magareng ga Lewatle le Lehwibidu le madira a Farao. Ke moka le sa gakanegile, Jehofa o dira mohlolo. O dira gore leru leo le bego le le etile pele le thibele Baegipita gore ba se sa le bona. Eupša ka lehlakoreng la lena go na le seetša se segolo. Ke moka o bona Moshe a otlolla seatla sa gagwe a šupa lewatle, gomme gwa tla phefo e matla ya ka bohlabela ya bula tsela ka lewatleng. Ka morago ga moo, wena, lapa la geno le diruiwa tša lena, le sepela tseleng e omilego ka lewatleng gotee le Baisiraele ka moka. Gateetee o bona selo sa go makatša. Moo go bego go na le meetse go omile, ga go na maraga e bile go a sepelega. Ka gona seo se dira gore le batho bao ba sa kgonego go sepediša ba kgone go tshela lewatle gabotse.

¹⁴ Bala Ekisodo 14:23, 26-30. Ge Baisiraele ba dutše ba tshela Lewatle le Lehwibidu, Farao yo a ikgogomošago o dira selo sa bošilo. O tsena ka lewatleng le madira a gagwe. Le lekgeng le, Moshe o otlollela seatla sa gagwe lewatleng, ke moka phefo e kgolo e dira gore meetse ao a kopane gape gomme a boele sekeng. Ke moka Farao le mašole a gagwe ba khupetšwa ke lewatle, gwa se be le yo a phologago.​—Ek. 15:8-10.

15. Pego ye e re ruta’ng ka Jehofa?

¹⁵ Pego ye e re ruta gore Jehofa ke Modimo wa thulaganyo, gomme seka seo se dira gore re ikwe re šireletšegile. (1 Bakor. 14:33) Le gona re kgona go bona gore Jehofa ke modiši yo lerato, yo a hlokomelago batho ba gagwe ka ditsela tše dintši. O ba rata kudu e bile o ba šireletša go manaba a bona. Ruri go tseba se go a re kgothatša, kudukudu ka ge bofelo bo le kgauswi!​—Die. 1:33.

16. Go ithuta ka tsela yeo Jehofa a ilego a phološa Baisiraele go ka re hola bjang?

¹⁶ Le lehono Jehofa o sa dutše a hlokomela batho ba gagwe ka moka. O ba thuša gore ba dule ba na le tswalano e botse le yena le go ba šireletša go manaba a bona. E bile o sa tlo tšwela pele a ba hlokomela le nakong ya masetlapelo a magolo  ao a lego kgauswi le go thoma. (Kut. 7:9, 10) Ka gona, go sa šetšwe gore ke ba banyenyane goba ke ba bagolo, ba a babja goba ba phetše gabotse, ba ka se tlo boifa selo nakong ya masetlapelo a magolo. * Ge e le gabotse, ba tlo dira se se fapanego! Ba tla gopola mantšu a Jesu ao a rego: “[Inamologang] le emišetše dihlogo tša lena godimo, gobane topollo ya lena e a batamela.” (Luka 21:28) Gaešita le nakong ya ge ba tlo hlaselwa ke Gogo, e lego ditšhaba tšeo di ipopilego ngatana e tee, tšeo di tla bego di le matla kudu go feta Farao, ba tla ba le tumelo ya gore Jehofa o tla ba šireletša. (Hesek. 38:2, 14-16) Ke ka baka la’ng batho ba Modimo ba tla ba le tumelo e bjalo? Ba a tseba gore Jehofa ga a fetoge. Le mo lekgeng le, o tla bontšha gore o hlokomela batho ba gagwe le gore ke Mophološi yo a naganelago ba bangwe.​—Jes. 26:3, 20.

17. (a) Go ithuta dipego tša Beibele tša mabapi le kamoo Jehofa a hlokomelago batho ba gagwe go ka re hola bjang? (b) Sehlogong se se latelago re tlo ithuta ka’ng?

¹⁷ Mehlala yeo re boletšego ka yona sehlogong se, e no ba e mengwe ya mehlala e mentši yeo e lego gona yeo e bontšhago gore Jehofa o botho e bile o naganela batho ba gagwe, o a ba hlahla e bile o a ba phološa. Ge o dutše o naganišiša ka dipego tše, leka go ithuta selo se itšego se sefsa mabapi le Jehofa ka go lebelela le dilo tše dinyenyane tšeo o sa kago wa nagana ka tšona. Go dira bjalo go tla go thuša gore o rate Jehofa kudu gomme tumelo ya gago go yena ya matlafala le go feta. Sehlogong se se latelago re tlo ithuta ka ditsela tšeo re ka ekišago Jehofa ka go bontšha gore re naganela ba bangwe, kudukudu ka lapeng, ka phuthegong le tšhemong.