1. Bophelo bja moapostola Johane bo be bo le bjang mo e ka bago ka ngwaga wa 95 C.E.?

MO E KA BAGO ka ngwaga wa 95 C.E., moapostola Johane o ile a lebeletšana le maemo a thata kudu. O be a tšofetše, a golegilwe sehlakahlakeng sa Patimo, e bile mohlomongwe e le yena moapostola a nnoši yo a bego a sa phela ka nako yeo. (Kut. 1:9) O be a tseba gore bahlanogi ba be ba ruta dithuto tša maaka e bile ba baka dikarogano ka phuthegong. Go be go bonagala eka go se go ye kae go be go ka se sa ba le Bakriste ba therešo.—Juda 4; Kut. 2:15, 20; 3:1, 17.

2. Go ya ka Kutollo 7:9-14, Johane o ile a bona pono efe e kgahlišago ya dilo tšeo di bego di tla direga nakong e tlago? (Bona seswantšho sa letlakala la ka ntle.)

² Ge Johane a be a sa le maemong ao a thata, Modimo o ile a mmontšha pono e kgahlišago kudu ya dilo tšeo di bego di tla direga nakong e tlago. Ponong yeo, barongwa ba ile ba botšwa gore ba dule ba kakatletše diphefo tša masetlapelo a magolo, go fihla sehlopha se itšego sa bahlanka ba Modimo se swailwe la mafelelo. (Kut. 7:1-3) Sehlopha seo ke sa batho ba 144 000, bao ba tlago go buša le Jesu legodimong. (Luka 12:32; Kut. 7:4) Ke moka Johane o ile a bolela ka sehlopha se sengwe se segolo kudu. O itše: “Ka bona lešaba le legolo leo go sego motho yo a kgonago go le bala, le le tšwago ditšhabeng tšohle, melokong yohle, merafong yohle le malemeng ohle le eme pele ga sedulo sa bogoši le pele ga Kwana.” (Bala Kutollo 7:9-14.) Nagana kamoo Johane a ilego a thaba ka gona ge a be a ekwa gore nakong e tlago go be go tla ba le batho ba bantši kudu bao ba tlago go hlankela Modimo ka tsela e nepagetšego.

3. (a) Ke ka baka la’ng pono ya Johane e swanetše go matlafatša tumelo ya rena? (b) Re tlo ithuta’ng sehlogong se?

³ Ga go pelaelo gore pono yeo e ile ya matlafatša tumelo ya Johane.  Ruri pono ye e swanetše go matlafatša tumelo ya rena le go feta ka gobane e phethagala nakong ye yeo re phelago go yona! Lehono batho ba dimilione ba thomile go hlankela Jehofa e bile ba na le kholofelo ya go tlo phela ka mo go sa felego mo lefaseng. Sehlogong se re tlo ithuta kamoo Jehofa a ilego a utollela batho ba gagwe gore lešaba le legolo ke bomang, mengwageng ya ka godimo ga e 80 e fetilego. Le gona re tlo ithuta dilo tše tše pedi ka lešaba leo: (1) Gore ke le legolo kudu, (2) le gore ditho tša lona di tšwa lefaseng ka moka. Dintlha tše di swanetše go matlafatša tumelo ya bohle bao holofelago go ba ditho tša sehlopha seo sa lešaba le legolo.

4. Ke therešo efe ya ka Beibeleng yeo dikereke di sa e rutego, gona Barutwana ba Beibele ba be ba fapana bjang le dikereke tšeo?

⁴ Gantši dikereke ga di rute therešo yeo e lego ka Beibeleng ya gore nakong e tlago batho bao ba lokilego ba tlo phela ka mo go sa felego mo lefaseng. (2 Bakor. 4:3, 4) Lehono dikereke tše dintši tša bojakane di ruta gore batho ka moka bao ba lokilego ge ba ehwa ba ya legodimong. Eupša sehlopha se senyenyane sa Barutwana ba Beibele seo se thomilego go gatiša makasine wa Morokami go tloga ka 1879, sona se be se sa rute thuto yeo ya maaka. Barutwana bao ba Beibele ba be ba kwešiša gore Modimo o tla dira gore lefase e be Paradeise gape, gomme batho ba dimilione bao ba mo kwago ba tla phela ka mo go sa felego mo lefaseng, e sego legodimong. Eupša go tšere nako e telele gore ba kwešiše gabotse gore batho bao e be e tla ba bomang.—Mat. 6:10.

5. Barutwana ba Beibele ba be ba kwešiša’ng ka sehlopha sa ba 144 000?

⁵ Barutwana ba Beibele ba be ba kwešiša le gore go na le sehlopha se sengwe seo se bego se tla ‘rekwa mo lefaseng’ gore se yo buša le Jesu legodimong. (Kut. 14:3) Sehlopha seo e be e tlo ba sa Bakriste ba kolobeditšwego ba 144 000 bao ba hlanketšego Jehofa ka potego ge ba be ba sa le mo lefaseng. Eupša Barutwana ba Beibele ba be ba nagana’ng ka lešaba le legolo?

6. Barutwana ba Beibele ba be ba nagana’ng ka lešaba le legolo?

⁶ Ponong yeo Johane a ilego a e bona, o ile a bona sehlopha seo se bego se “eme pele ga sedulo sa bogoši le pele ga Kwana.” (Kut. 7:9) Mantšu a temana ye a ile a dira gore Barutwana ba Beibele ba phethe ka gore lešaba le legolo le tla phela legodimong go swana le ba 144 000. Ge e ba sehlopha sa ba 144 000 le sa lešaba le legolo di be di tla phela legodimong ka moka, gona dihlopha tše di be di tla fapana bjang? Barutwana ba Beibele ba be ba nagana gore lešaba le legolo ke Bakriste bao ba bego ba sa kwe Modimo ka mo go feletšego ge ba be ba sa le mo lefaseng. Gaešita le ge Bakriste bao ba be ba itshwere gabotse, go ka direga gore ba bangwe ba bona ba ile ba no tšwela pele e le ditho tša dikereke tša bojakane. Barutwana ba Beibele ba ile ba phetha ka gore Bakriste bao ba be ba fišega, eupša ba sa fišege ka mo go lekanego gore ba ka buša le Jesu. Le gona ba be ba nagana gore ka ge ba sehlopha sa lešaba le legolo ba be ba sa rate Modimo ka mo go lekanego, ba be ba tla swanelega go ema pele ga sedulo sa bogoši legodimong, eupša ba be ba ka se buše le Jesu.

7. Barutwana ba Beibele ba be ba nagana gore ke bomang bao ba bego ba tla phela mo lefaseng nakong ya Pušo ya Mengwaga e Sekete, gona ba be ba nagana gore go be go tla direga’ng ka batho bao ba botegago ba kgale?

⁷ Bjale, Barutwana ba Beibele ba be ba nagana gore ke bomang bao ba bego ba tla phela mo lefaseng? Ba be ba nagana gore ka morago ga gore ba 144 000 le lešaba le legolo ba ye legodimong, batho ba bangwe ba dimilione ba be ba tla phela mo lefaseng e le gore ba tle ba holwe ke Pušo ya Kriste ya Mengwaga e Sekete. Barutwana ba Beibele ba be ba sa nagane gore batho bao ba dimilione ba be ba tla hlankela Jehofa pele Pušo ya  Kriste e ka thoma. Go e na le moo, ba be ba nagana gore batho ba ba be ba tla rutwa ka Jehofa nakong ya Pušo ya Mengwaga e Sekete. Ka morago ga moo, bao ba phelago ka go dumelelana le melao ya Jehofa ba be ba tla šegofatšwa ka bophelo bjo bo sa felego, eupša bao ba bego ba sa kwe Jehofa ba be ba tla fedišwa. Le gona Barutwana ba Beibele ba be ba nagana gore mohlomongwe ba bangwe ba bao e bego e tla ba “dikgošana” mo lefaseng nakong ya Pušo ya Mengwaga e Sekete, ba be ba tla ya legodimong mafelelong a pušo yeo. Ba be ba nagana le gore “dikgošana” tšeo di be di tla akaretša le batho bao ba botegago ba kgale bao ba hwilego pele Jesu a etla mo lefaseng bao ba bego ba tla tsošwa nakong ya Pušo ya Mengwaga e Sekete.—Ps. 45:16.

8. Barutwana ba Beibele ba be ba nagana gore go na le dihlopha dife tše tharo?

⁸ Ka gona, Barutwana ba Beibele ba be ba nagana gore go be go na le dihlopha tše tše tharo: (1) Sehlopha sa batho ba 144 000 bao ba tlago go buša le Jesu legodimong, (2) lešaba le legolo la Bakriste bao ba bego ba sa fišege gakaalo, bao ba bego ba tla ema pele ga sedulo sa bogoši sa Jesu legodimong, (3) le batho ba dimilione bao ba bego ba tla rutwa ka Jehofa mo lefaseng nakong ya Pušo ya Kriste ya Mengwaga e Sekete. * Eupša ka morago Jehofa o ile a thuša batho ba gagwe go kwešiša taba ye gabotse.—Die. 4:18.

9. (a) Ke ka tsela efe lešaba le legolo mo lefaseng le ka emago “pele ga sedulo sa bogoši le pele ga Kwana”? (b) Ke ka baka la’ng kwešišo ye ya Kutollo 7:9 e kwagala gabotse kudu?

⁹ Ka 1935, Dihlatse tša Jehofa di ile tša kwešiša gabotse gore lešaba le legolo leo Johane a le bonego ponong e be e le bomang. Di ile tša lemoga gore go be go sa hlokagale gore lešaba le legolo le ye legodimong e le gore le kgone go ema “pele ga sedulo sa bogoši le pele ga Kwana.” Eupša le be le tla dira seo ka tsela ya seswantšhetšo. Gaešita le ge lešaba le legolo le be le tlo phela mo lefaseng, le be le ka ema “pele ga sedulo sa bogoši” ka go amogela gore Jehofa ke Mmuši Ramatlaohle le ka go mo kwa. (Jes. 66:1) Le gona le ka ema “pele ga Kwana” ka go bontšha tumelo sehlabelong sa Jesu sa topollo. Ka mo go swanago, go Mateo 25:31, 32 go bolelwa gore “ditšhaba ka moka di tla kgobokanywa pele” ga Jesu sedulong sa gagwe sa bogoši sa letago. Ditšhaba tšeo di be di tla akaretša le batho ba babe. Go molaleng gore ditšhaba tše ka moka ga di legodimong, eupša di mo lefaseng. Kwešišo ye yeo e kaonefaditšwego ka 1935, e kwagala gabotse kudu. E hlalosa gore ke ka baka la eng Beibele e sa bolele gore lešaba le legolo le tla phela legodimong. Ke sehlopha setee feela seo se tlago go phela legodimong, e lego ba 144 000 bao ba tlago go ‘buša e le dikgoši mo lefaseng’ le Jesu.—Kut. 5:10.

10. Ke ka baka la’ng go le bohlokwa gore lešaba le legolo le ithute ka Jehofa pele Pušo ya Kriste ya Mengwaga e Sekete e ka thoma?

¹⁰ Ka gona, ga e sa le go tloga ka 1935, Dihlatse tša Jehofa di be di kwešiša gore lešaba le legolo leo Johane a le bonego ponong, ke Bakriste ba botegago bao ba nago le kholofelo ya go tlo phela ka mo go sa felego mo lefaseng. E le gore lešaba le legolo le tle le phologe masetlapelo a magolo, le swanetše go ithuta ka Jehofa le go mo hlankela pele Pušo ya Mengwaga e Sekete e ka thoma. Le gona le swanetše go bontšha tumelo e tiilego e le gore le tle le “atlege ka go phonyoga dilo tše ka moka tše di reretšwego go direga” pele Pušo ya Kriste ya Mengwaga e Sekete e ka thoma.—Luka 21:34-36.

11. Ke ka baka la’ng Barutwana ba bangwe ba Beibele ba ka ba ba ile ba nagana gore batho ba bangwe ba tlo tsošetšwa legodimong ka morago ga Pušo ya Kriste ya Mengwaga e Sekete?

¹¹ Go thwe’ng ka kgopolo ya gore batho ba bangwe bao ba botegago ba mo lefaseng ba tla tsošetšwa legodimong ka morago ga Pušo ya Kriste ya Mengwaga e Sekete? Taba ye e ile ya bolelwa mengwaga e mentši e fetilego ka go Morokami wa  Seisemane wa February 15, 1913. Motho o be a ka ipotšiša gore: ‘Go tla bjang gore batho bao ba botegago ba kgale ba newe moputso wa go phela ka mo go sa felego mo lefaseng, mola batho bao ba sa botegego gakaalo ba newa moputso wa go phela legodimong?’ Kgopolo ye e fošagetšego ya Barutwana ba Beibele e be e tlile ka baka la dikgopolo tše tše pedi: (1) Gore lešaba le legolo le be le tlo phela legodimong, (2) le gore lešaba le legolo e be e tla ba la Bakriste bao ba bego ba sa fišege gakaalo.

12-13. Batlotšwa le bao e lego ditho tša lešaba le legolo ba lemoga’ng ka moputso wa bona?

¹² Lega go le bjalo, go etša ge re šetše re bone, ga e sa le go tloga ka 1935 Dihlatse tša Jehofa di ile tša kwešiša gabotse gore lešaba le legolo leo Johane a le bonego ponong ke lona le tlago go phologa Haramagedone. Le tla ‘tšwa masetlapelong a magolo’ gona mo lefaseng, gomme la “goeletša ka lentšu le le hlabošago, [la] re: ‘Phološo e tšwa go Modimo wa rena yo a dutšego sedulong sa bogoši, le go Kwana.’” (Kut. 7:10, 14) Go oketša moo, Mangwalo a re botša gore bao ba tsošetšwago legodimong ba hwetša selo “se sengwe se sekaone,” goba ba na le kholofelo e kaone go feta batho bao ba bego ba botega ba kgale. (Baheb. 11:40) Kwešišo yeo re bilego le yona ka 1935 e ile ya tutueletša bana babo rena go thuša batho ka mafolofolo gore ba hlankele Jehofa e le gore ba tle ba phele ka mo go sa felego mo lefaseng.

¹³ Bao e lego ditho tša lešaba le legolo ba thabela kudu kholofelo yeo ba nago le yona. Ba kwešiša gore Jehofa ke yena a kgethago gore bahlanka ba gagwe bao ba botegago ba tla mo hlankela legodimong goba mo lefaseng. Batlotšwa le bao e lego ditho tša lešaba le legolo ba lemoga gore ga go na seo bona ba se dirilego gore ba tle ba hwetše moputso wa bona, eupša ba o hwetša feela ka baka la botho bja Jehofa ka ge a ile a neela sehlabelo sa topollo sa Jesu Kriste.—Baroma 3:24.

14. Ka morago ga 1935, ke ka baka la’ng ba bantši ba ile ba ipotšiša gore boporofeta bja mabapi le lešaba le legolo bo be bo tla phethagala bjang?

¹⁴ Ka morago ga gore kwešišo ya batho ba Jehofa e kaonefatšwe ka 1935, ba bantši ba be ba sa dutše ba ipotšiša gore batho bao ba nago le kholofelo ya go tlo phela mo lefaseng e tla ba bantši gakaakang. Ka mohlala, Ngwanabo rena Ronald Parkin o be a na le mengwaga e 12 ge go be go bolelwa gore ge e le gabotse lešaba le legolo e be e le bomang. O gopola gore: “Ka nako yeo go be go na le bagoeledi bao e ka bago ba 56 000 lefaseng ka moka gomme ba bantši ba bona goba mohlomongwe ka moka ga bona, e be e le batlotšwa. Ka gona go be go bonagala lešaba le legolo le se na ditho tše dintši.”

15. Lešaba le legolo le ile la tšwela pele le kgoboketšwa bjang?

¹⁵ Eupša mengwageng e latetšego, baromiwa ba ile ba romelwa dinageng tše dintši, gomme  palo ya Dihlatse tša Jehofa ya tšwela pele e oketšega. Ke moka ka 1968, Dihlatse tša Jehofa di ile tša thoma go ruta batho Beibele di diriša puku ya Therešo ye Išago Bophelong bjo bo sa Felego. Ka ge puku ye e be e hlalosa Beibele ka tsela e bonolo, se se ile sa dira gore batho ba bantši ba nyake go ithuta ka Jehofa. Pele mengwaga e mene e ka fela, batho ba ka godimo ga seripa sa milione ba ile ba kolobetšwa. Ka ge kereke ya Katholika e be e se sa na matla kua Latin America le dinageng tše dingwe, e bile modiro wa rena o se sa thibelwa dinageng tše dingwe tša ka Bohlabela bja Yuropa le dikarolong tše dingwe tša Afrika, batho ba bangwe ba dimilione ba ile ba kolobetšwa. (Jes. 60:22) Mengwageng e sego kae e fetilego, mokgatlo wa Jehofa o tšweleditše didirišwa tše dingwe tšeo di re thušago go ruta batho Beibele. Ga go pelaelo gore Jehofa o kgoboketša lešaba le legolo leo gona bjale le nago le ditho tša ka godimo ga tše 8 milione.

16. Lešaba le legolo le tšwa kae?

¹⁶ Ge Johane a be a ngwala pono yeo a e bonego, o boletše gore lešaba le legolo le be le tla tšwa “ditšhabeng tšohle, melokong yohle, merafong yohle le malemeng ohle.” Moporofeta Sakaria le yena o ile a bolela e sa le pele ka selo se se swanago. O itše: “Mehleng yeo batho ba lesome bao ba tšwago bathong ba maleme ka moka ba tla itshwarelela morumong wa seaparo sa Mojuda,  ba re: ‘Re tla sepela le lena ka gobane re kwele gore Modimo o na le lena.’”—Sak. 8:23.

17. Dihlatse tša Jehofa di dira’ng go thuša batho ba ditšhaba ka moka le maleme ka moka gore ba tsebe Jehofa?

¹⁷ E le gore batho ba maleme ka moka ba kgoboketšwe, Dihlatse tša Jehofa di lemoga gore ditaba tše dibotse di swanetše go bolelwa ka maleme a mantši. Mokgatlo wa rena o na le mengwaga e ka godimo ga e 130 o fetolela dikgatišo tšeo di theilwego Beibeleng, eupša gona bjale re fetolela ka maleme a ka godimo ga a 900. Ga go pelaelo gore lehono Jehofa o dira mohlolo ka go kgoboketša lešaba le legolo go tšwa ditšhabeng tšohle. Ka ge Beibele le dikgatišo tšeo di theilwego go yona di hwetšagala ka maleme a mantši kudu, lešaba le le legolo le kgona go hlankela Jehofa ka botee gaešita le ge le etšwa lefaseng ka moka. Le gona ditho tša lešaba le legolo di tsebja ka go ratana le ka go ruta batho Beibele ka mafolofolo. Ruri seo se matlafatša tumelo ya rena!—Mat. 24:14; Joh. 13:35.

18. (a) Go ya ka Jesaya 46:10, 11, ke ka baka la’ng re sa makale gore Jehofa o phethagaditše boporofeta bja mabapi le lešaba le legolo? (b) Ke ka baka la’ng bao ba nago le kholofelo ya go tlo phela mo lefaseng ba sa ikwe eka ga ba bohlokwa?

¹⁸ Ruri go tseba ka boporofeta bja mabapi le lešaba le legolo go re thabiša kudu! Ga re makale gore Jehofa o phethagaditše boporofeta bjo ka tsela e kgahlišago. (Bala Jesaya 46:10, 11.) Ba lešaba le legolo ba leboga kholofelo yeo Jehofa a ba neilego yona. Ga ba ikwe eka ga ba bohlokwa ka ge ba se ba tlotšwa ka moya wa Modimo gore ba yo buša le Jesu legodimong. Ka Beibeleng re bala ka banna le basadi bao ba nago le tumelo bao ba ilego ba hlahlwa ke moya wa Modimo gaešita le ge e be e se ditho tša ba 144 000. Johane Mokolobetši ke yo mongwe wa bona. (Mat. 11:11) Mohlala o mongwe ke wa Dafida. (Dit. 2:34) Batho ba gotee le ba bangwe ba bantši ba tla tsošetšwa go phela lefaseng la paradeise. Le gona, bona ka moka gotee le lešaba le legolo ba tla hwetša sebaka sa go bontšha ge e ba ba botegela Jehofa le go thekga bogoši bja gagwe.

19. Go phethagala ga pono ya Johane ya mabapi le lešaba le legolo, go re thuša bjang go bona gore re swanetše go ruta batho ba bantši ditaba tše dibotse?

¹⁹ Ke la mathomo historing Jehofa a kgoboketša batho ba dimilione lefaseng ka moka gore ba mo hlankele gotee. Go sa šetšwe gore kholofelo ya rena ke ya go yo phela legodimong goba ke ya go tlo phela mo lefaseng, re swanetše go thuša batho ba bantši ka mo go ka kgonegago gore e be ditho tša lešaba le legolo la “dinku tše dingwe.” (Joh. 10:16) Go se go ye kae, Jehofa o tla tliša masetlapelo a magolo ao a tlago go fediša mebušo ka moka le madumedi a maaka ao e lego kgale a tlaiša batho. Ruri ditho ka moka tša lešaba le legolo di na le tokelo e kgolo kudu ya go tlo hlankela Jehofa mo lefaseng ka mo go sa felego.—Kut. 7:14.