Go fihla ga bjale re kgonne go araba potšišo e rego, Modimo ke Mang? Re thomile ka go ithuta ka Beibeleng gore leina la gagwe ke Jehofa le gore seka sa gagwe se segolo ke lerato. Le gona, re ithutile gore ke dilo dife tšeo a re diretšego tšona le tšeo a tlago go re direla tšona. Le ge go na le dilo tše dintši tšeo re ka ithutago tšona ka Modimo, o ka ipotšiša gore go dira bjalo go tla go hola bjang.

Jehofa o tshepiša gore “ge e ba o ka mo tsoma, yena o tla dira gore o mo hwetše.” (1 Dikoronika 28:9) Nagana ka mpho e bohlokwa yeo o tlo e hwetšago ge o ithuta ka Modimo, e lego “tswalano ya kgauswi le [yena].” (Psalme 25:14) Go gwerana le Jehofa ka tsela yeo go tlo go thuša bjang?

O tlo thaba e le ka kgonthe. Beibele e hlalosa Jehofa e le “Modimo yo a thabilego.” (1 Timotheo 1:11) Ge o ka ba mogwera wa gagwe gomme wa mo ekiša, o tlo thaba e le ka kgonthe, gomme seo se tlo dira gore o phele gabotse maikwelong, monaganong le mmeleng. (Psalme 33:12) Le gona, o tlo phela o thabile ge o ka se phele bophelo bjo bo tlo go gobatšago, ge o ithuta go ba le mekgwa e mebotse le go phedišana le batho ba bangwe gabotse. O tla dumelelana le seo mopsalme yo mongwe a se boletšego ge a be a re: “Ke kgahlwa ke go batamela Modimo.”—Psalme 73:28.

O tlo go hlokomela. Jehofa o ile a tshepiša bahlanka ba gagwe gore: “Ke tla nea keletšo leihlo la ka le le go wena.” (Psalme 32:8) Se se bontšha gore Jehofa o hlokomela yo mongwe le yo mongwe wa bahlanka ba gagwe. E bile o ba nea dilo tšeo ba di hlokago. (Psalme 139:1, 2) Ge o šetše o gwerane le Jehofa, o tlo lemoga gore ka mehla o a go hlokomela.

Modimo o go tshepiša bokamoso bjo bo kgahlišago. Go tlaleletša go dilo tšeo Jehofa Modimo a ka go neago tšona gore o thabele bophelo gona bjale, o go tshepiša le bokamoso bjo bo kgahlišago. (Jesaya 48:17, 18) Beibele e re: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Dinakong tše tšeo go lego thata go phela go tšona, re na le kholofelo yeo Modimo a re fago yona. Ke kholofelo e “kgonthišeditšwego le e tiilego” yeo e swanago le tshetledi goba tšhipi yeo e thušago sekepe gore se se gogolege nakong ya ledimo.—Baheberu 6:19.

A e no ba a mangwe a mabaka a bohlokwa a go re thuša gore re tsebe Modimo gabotse le go gwerana le yena. Gore o hwetše ditaba tše dingwe, bolela le yo mongwe wa Dihlatse tša Jehofa goba o tsene wepesaeteng ya jw.org/nso.