Gore o tsebe motho gabotse, o swanetše go ithuta ka dilo tšeo a ilego a di dira le mathata ao a ilego a feta go ona. Ka mo go swanago, ge e ba o nyaka go tseba Modimo gabotse o swanetše go ithuta ka dilo tšeo a di dirilego. Ge o dutše o ithuta ka yena, o tla makatšwa ke dilo tše dintši tšeo a ilego a di dira nakong e fetilego tšeo di re holago gona bjale, e bile di sa tlo re holago le nakong e tlago.

Jehofa Modimo ke Mmopi yo Mogolo, e bile “dika tša gagwe tše di sa bonagalego di bonwa gabotse go tloga tlholong ya lefase go ya pele, gobane di hlathwa ka dilo tšeo di dirilwego.” (Baroma 1:20) “Ke yena Modiri wa lefase ka matla a gagwe, Yo ka bohlale bja gagwe a theago ka go tia naga e enywago le Yo ka kwešišo ya gagwe a phurolotšego magodimo.” Dika tše tša Modimo di bontšha gore o na le taba le rena. (Jeremia 10:12) Dilo tšeo a di bopilego le tšona di bontšha gore o na le taba le rena.

Modimo o dirile gore re thabele bophelo ka go re bopa ka “seswantšho sa gagwe.” (Genesi 1:27) Seo se ra gore o dirile gore re kgone go ba le dika tša gagwe tše di kgahlišago. O re bopile ka tsela ya gore re kgone go kwešiša dilo tšeo a nyakago re di dira le tšeo a sa nyakego re di dira. Ge re lwela go phela ka tsela yeo Modimo a nyakago re phela ka yona, re thabela bophelo kudu le go kgotsofala. Go feta moo, Modimo o dirile gore re kgone go ba bagwera ba gagwe.

Tsela yeo Modimo bopilego lefase ka yona e bontšha gore o a re rata. Moapostola Paulo o boletše gore Modimo “[ga se a lesa] go nea bohlatse ka dilo tše botse tše a di dirilego, ka go [re] nea dipula go tšwa legodimong le dihla tše di enywago, a khoriša dipelo tša [rena] ka mo go feletšego ka dijo le lethabo.” (Ditiro 14:17) Modimo ga se a no re fa dilo tšeo re di hlokago gore re phele. Eupša o re file le dilo tše dingwe tše dintši tšeo di fapafapanego gore re ipshine ka bophelo. Dilo tše ka moka ke bohlatse bja gore Modimo o be a nyaka gore re phele gabotse.

 Jehofa o bopile lefase gore re phele mo go lona ka mo go sa felego. Beibele e re “lefase o le neile bana ba batho,” e bile ‘ga se a le bopela lefeela, o le hlametše go dulwa ke batho.’ (Psalme 115:16; Jesaya 45:18) Le tlo dulwa ke batho ba mohuta mang, gona ka nako e kaaka’ng? Psalme 37:29 e re: “Baloki bona e tla ba beng ba lefase, ba tla dula mo go lona ka mo go sa felego.”

Gopola gore Jehofa o ile a bopa monna wa mathomo le mosadi wa mathomo e lego Adama le Efa, gomme a ba bea paradeiseng mo lefaseng ‘gore ba e leme le go e hlokomela.’ (Genesi 2:8, 15) Modimo o ile a ba fa mešomo e mebedi e kgahlišago. O ile a re go bona: “Tswalang le ate le tlale lefase le be le le fenye.” (Genesi 1:28) Se se bontšha gore Modimo o be a nyaka gore Adama le Efa ba tle ba phele ka mo go sa felego mo lefaseng. Ka maswabi, ba ile ba kgetha go se kwe Modimo gomme ba se sa ba gare ga ‘batho bao ba lokilego’ bao ‘e tla bago beng ba lefase.’ Lega go le bjalo, seo ba se dirilego ga se sa fetoša morero wa Modimo ka lefase le batho. Eupša pele re ka bolela ka taba yeo, a re thomeng pele ka go bolela ka selo se sengwe seo Modimo a se dirilego.

Beibele e tsebja gape e le Lentšu la Modimo. Ke ka baka la’ng Jehofa a re file Beibele? Lebaka le legolo la gore a re fe Beibele ke gore re ithute ka yena. (Diema 2:1-5) Ke nnete gore Beibele ga e arabe dipotšišo ka moka tšeo re nago le tšona ka Modimo—ga go na puku yeo e ka kgonago go dira seo. (Mmoledi 3:11) Eupša dilo ka moka tšeo Beibele e bolelago ka tšona di re thuša gore re tsebe Modimo gabotse. Beibele e re thuša go mo tseba ge re ekwa ka tsela yeo a swarago batho ka yona. Le gona, e re thuša go tseba gore o kgahlwa ke batho ba mohuta mang le gore ga a kgahlwe ke ba mohuta mang. (Psalme 15:1-5) Go oketša moo, Beibele e re ruta kamoo Modimo a nyakago re mo hlankela ka gona, re itshwara ka gona le kamoo a lebelelago mahumo ka gona. E bile ge re ithuta ka dilo tšeo Morwa wa gagwe e lego Jesu Kriste a bego a di bolela le go di dira, re kgona go tseba gore Jehofa ke Modimo wa mohuta mang.—Johane 14:9.

Lebaka le lengwe la gore Jehofa a re fe Beibele ke gore re tsebe seo re swanetšego go se dira gore re thabele bophelo. Ka Beibeleng, Jehofa o re botša seo re swanetšego go se dira gore malapa a rena a thabe, gore re kgotsofale le gore re kgotlelele mathata. Go etša ge re tlo kwa ka makasineng wo, Beibele e na le dikarabo tša dipotšišo tšeo batho ba bantši ba ipotšišago tšona, go swana le tša gore: Ke ka baka la’ng re tlaišega? Go tlo direga’ng nakong e tlago? Beibele e bontšha seo Modimo a se dirilego gore a kgone go phetha morero wa gagwe wa mathomong.

Go na le ditsela tše dingwe tše dintši tšeo di bontšhago gore Beibele ke puku e nnoši yeo e tšwago go Modimo. Modimo o dirišitše banna ba e ka bago ba 40 go ngwala Beibele. Banna bao ba e ngwadile ka mengwaga e fetago e 1 600. Lega go le bjalo, Beibele e na le sehlogo se setee ka gobane Mongwadi wa yona ke Modimo. (2 Timotheo 3:16) Go fapana le dipuku tše dingwe tša kgale, Beibele e sa le ka tsela yeo e bego e le ka yona. Seo se tiišetšwa ke dingwalwa tša kgale tša Beibele. Beibele e sa le gona le ge e le gore batho ba ile ba leka go thibela gore e se ke ya fetolelwa, ya phatlalatšwa le go balwa. Lega go le bjalo, lehono ga gona puku yeo e phatlaladitšwego le go fetolelwa go feta Beibele. Taba ya gore Beibele e sa le gona ke bohlatse bja gore “lentšu la Modimo wa rena le tla dula le le gona go iša mehleng ya neng le neng.”—Jesaya 40:8.

Modimo o re file mpho e kgolokgolo go tiišetša gore o tlo re direla dilo tšeo a re tshepišitšego tšona. Go etša ge go boletšwe pejana, Modimo o be a nyaka gore batho ba phele ka mo go sa felego mo lefaseng. Eupša Adama o ile a kgetha go se kwe Modimo gomme a dira sebe. Sebe seo se dirile gore yena le bana bao a bego a tlo ba le bona ba palelwe ke go phela ka mo go sa felego. Beibele e re: “Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Go se kwe ga Adama go ile gwa dira gore morero wa Modimo wa gore batho ba phele ka mo go sa felego o bonagale eka o paletšwe. Jehofa o ile a dira’ng ka morago?

Dilo tšeo Jehofa a ilego a di dira di bontšha gore ke Modimo wa mohuta mang. O ile a otla Adama le Efa ka baka la sebe seo ba se dirilego, eupša a lokišetša ditlogolo tša bona dilo tše di kgahlišago. Ka bohlale Jehofa o ile a hwetša tsela ya go rarolla bothata bjoo gomme di tloga fase a tsebiša gore o tlo bo rarolla bjang.  (Genesi 3:15) Modimo o be a tlo diriša Morwa wa gagwe e lego Jesu Kriste go ntšha batho sebeng le lehung. Seo se be se akaretša eng?

E le gore Jehofa a lokolle batho go ditlamorago tša go se kwe ga Adama, o ile a romela Jesu lefaseng gore a rute batho ka tsela e išago bophelong le “go nea moya wa gagwe gore e be topollo bakeng sa ba bantši.” * (Mateo 20:28; Johane 14:6) Jesu o be a tla kgona go re lopolla ka gobane o be a se na sebe go swana le Adama. Eupša go fapana le Adama, Jesu o ile a dula a ekwa Modimo go fihlela a ehwa. Ka ge Jesu a be a se a swanela go hwa, Jehofa o ile a mo tsoša gore a boele a yo phela legodimong. Jesu o dirile gore batho bao ba kwago Modimo ba tle ba phele ka mo go sa felego, e lego selo seo Adama a paletšwego ke go se dira. Beibele e re: “Gobane go etša ge ka go se kwe ga motho o tee ba bantši ba ile ba dirwa badiradibe, ka mo go swanago ka go kwa ga motho o tee ba bantši ba tla dirwa ba lokilego.” (Baroma 5:19) Modimo o tlo phethagatša tshepišo ya gore batho ba phele ka mo go sa felego a diriša sehlabelo sa Jesu Kriste.

Re ithuta mo gontši ka Jehofa tseleng yeo a ilego swaragana le mathata ao a bakilwego ke go se kwe ga Adama. Re a bona gore ga go na selo seo se ka thibelago Modimo go fetša seo a se thomilego, lentšu la gagwe le tla “atlega.” (Jesaya 55:11) Re leboga le lerato le legolo leo Modimo a re bontšhago lona. Beibele e re: “Re utolletšwe lerato la Modimo ka se, gobane Modimo o rometše Morwa wa gagwe yo a tswetšwego a nnoši lefaseng gore re hwetše bophelo ka yena. Lerato le ka tsela ye, ga se gore rena re ratile Modimo, eupša yena o re ratile gomme a romela Morwa wa gagwe e le sehlabelo sa poelanyo bakeng sa dibe tša rena.”—1 Johane 4:9, 10.

Modimo “[ga se a ka] a babalela gaešita le Morwa wa gagwe eupša [o ile] a mo gafa bakeng sa rena ka moka,” ka gona re kgodišegile gore ka botho Modimo o tlo “re nea dilo tše dingwe tšohle” tšeo a re tshepišitšego tšona. (Baroma 8:32) Ke dilo dife tšeo Modimo a re tshepišitšego tšona? Bala sehlogo seo se latelago gore o hwetše karabo.