Ga go pelaelo gore ge o le mathateng o tlo nyaka gore mogwera wa gago a go thuše. Tabeng yona yeo, batho ba bangwe ba re Modimo ga se mogwera wa bona ka gobane ba nagana gore ga a ba thuše ge ba le mathateng. Nnete ke gore Modimo o šetše a re diretše dilo tše dintši e bile o sa tlo dira se sengwe ka mathata ao a re welago. Ke dilo dife tšeo Modimo a tlago go re di direla tšona?

Jehofa Modimo o tlo fediša dilo tše mpe ka moka ka go tloša selo seo se di bakago. Ge Beibele e hlalosa seo se bakago dilo tše mpe e re: “Lefase ka moka le rapaletše matleng a yo kgopo.” (1 Johane 5:19) “Yo kgopo” ke Sathane Diabolo, yoo Jesu a itšego ke “mmuši wa lefase le.” (Johane 12:31) Sathane ke yena a bakelago batho mathata ka ge e le yena a ba laolago. Modimo o tlo dira’ng ka Sathane?

E se kgale Modimo o tlo diriša Jesu Kriste go “[fediša] yo a nago le mokgwa wa go baka lehu, e lego Diabolo.” (Baheberu 2:14; 1 Johane 3:8) Ge e le gabotse, Beibele e re Diabolo le yena o a tseba gore o šaletšwe ke “nako e kopana” ya gore a fedišwe. (Kutollo 12:12) Le gona, Modimo o tlo fediša dilo tše mpe ka moka le batho bao ba di bakago.—Psalme 37:9; Diema 2:22.

Ka morago ga gore Modimo a fediše dilo tše mpe mo lefaseng, o tlo dira seo a bego a se rerile go tloga mathomong. Selo seo ke sefe? Ke gore batho ba phele ka mo go sa felego paradeiseng mo lefaseng. Bophelo bo tlo ba bjang lefaseng la paradeise?

Go tlo ba le khutšo le tšhireletšego tšeo di sa felego. Beibele e re: “Ba boleta bona e tla ba beng ba lefase, ba tla thaba kudu ka baka la go ata ga khutšo.”—Psalme 37:11.

Go tlo ba le dijo tše dintši tšeo di nago le phepo. Beibele e re: “Go tla ba le mabele a mantši mo lefaseng; dintlheng tša dithaba go tla ba le motlalo wa mabele.”—Psalme 72:16.

Batho ba tlo ba le magae a mabotse le mešomo e thabišago. Beibele e re: “Ba tla aga dintlo ba dula go tšona; ba tla bjala dirapa tša merara ba ja dienywa tša tšona. . . . Ba tla thabela modiro wa diatla tša bona ka botlalo.”—Jesaya 65:21, 22.

Na o fela pelo ya go tlo phela maemong a bjalo? E se kgale batho ka moka ba tlo thabela go phela maemong ao.

Lehono motho yo mongwe le yo mongwe a ka lwala ke moka a hwa, eupša e se kgale seo se ka se sa direga. Ka ge Jesu a ile a re hwela, kgauswinyane Modimo o tlo diriša sehlabelo sa Jesu go dira gore “yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Sehlabelo seo se tlo hola batho bjang?

Batho ga ba sa tlo lwala. Beibele e re: “Ga go na modudi yo a tla rego: ‘Ke a babja.’ Batho bao ba dulago nageng e tla ba bao ba swaretšwego molato wa bona.”—Jesaya 33:24.

Batho ga ba sa tlo hwa. Beibele e re: “O tla metša lehu ka mo go sa felego, gomme Mmuši Morena Jehofa o tla phumola megokgo difahlegong ka moka.”—Jesaya 25:8.

Batho ba tlo phela ka mo go sa felego. Beibele e re: “Mpho yeo Modimo a e neago ke bophelo bjo bo sa felego ka Kriste Jesu Morena wa rena.”—Baroma 6:23.

Bao ba hlokofetšego ba tlo tsošwa bahung gomme ba phela gape. Beibele e re: “Go tla ba le tsogo ya ba lokilego gotee le ba sa lokago.” (Ditiro 24:15) Sehlabelo sa Jesu se tlo dira gore bao ba hwilego ba tle ba tsošwe bahung.

 Modimo o tlo dira bjang dilo tše ka moka?

Modimo o tlo dira gore lefase le fetoge e be paradeise gomme a direla batho dilo tše dibotse a diriša Mmušo wa gagwe wa legodimong. Modimo o kgethile Kriste Jesu gore e be Kgoši ya Mmušo woo. (Psalme 110:1, 2) Jesu o ile a botša balatedi ba gagwe gore ba rapelele Mmušo woo ka gore: “Tatago rena wa magodimong, . . . Mmušo wa gago a o tle.”—Mateo 6:9, 10.

Mmušo wa Modimo o tlo buša mo lefaseng gomme wa fediša bohloko le mathata ao a lego gona mo lefaseng. Ruri wo ke Mmušo woo batho ba tlo o thabelago, e bile ga go na mmušo woo o swanago wona! Ke ka baka leo ge Jesu a be a le mo lefaseng, a ilego a dira sohle seo a ka se kgonago go botša batho “ditaba tše dibotse tša Mmušo” woo. Le gona o ile a botša balatedi ba gagwe gore le bona ba dire se se swanago.—Mateo 4:23; 24:14.

Ka ge Jehofa Modimo a rata batho, o ba tshepišitše gore o tlo ba direla dilo tše tšeo di kgahlišago. Na seo ga se dire gore o nyake go ithuta ka yena le go ba mogwera wa gagwe? O tlo holega bjang ge o ka dira phetho ya go ithuta ka yena le go gwerana le yena? Sehlogo se se latelago se tlo hlalosa gore o ka holega bjang?