“Ka gona, dulang le phakgame, gobane ga le tsebe letšatši le ge e le iri.”—MATEO 25:13.

“Dulang le lebeletše, dulang le phakgame, gobane ga le tsebe gore nako e beilwego e neng.”—MAREKA 13:33.

Ga go na motho mo lefaseng yo a tsebago gore bofelo bo tlo tla neng. Eupša Modimo o ‘beile nako,’ ke gore ‘letšatši le iri’ tšeo bofelo bo tlo tlago ka tšona. (Mateo 24:36) Na se se ra gore ga go kgonege gore re tsebe ge bofelo bo le kgauswi? Ga go bjalo le gatee. Jesu o boditše barutiwa ba gagwe gore ba tla bona dilo tše itšego tšeo di tla bego di bontšha gore bofelo bo kgauswi.

Dilo tšeo e be e tla ba pontšho “ya bofelo bja tshepedišo ya dilo.” Jesu o itše: “Setšhaba se tla tsogela setšhaba gomme mmušo wa tsogela mmušo; go tla ba le tlhaelelo ya dijo le ditšhišinyego tša lefase lefelong le lengwe ka morago ga le lengwe.” (Mateo 24:3, 7) O ile a bolela le gore go be go tla ba le “leuba la malwetši.” (Luka 21:11) Na o bona dilo tšeo Jesu a boletšego ka tšona e sa le pele?

Lehono, batho ba tlaišwa ke dintwa, ditlala, ditšhišinyego tša lefase le malwetši a go fapafapana. Ka mohlala, ka 2004, go ile gwa ba le tšhišinyego e kgolo ya lefase Lewatleng la India. Tšhišinyego yeo e ile ya dira gore go be le tsunami yeo e ilego ya bolaya batho ba 225 000. Ka ngwaga o tee le dikgwedi tše sego kae, bolwetši bja COVID-19 bo ile bja bolaya batho ba dimilione tše 2.6 lefaseng ka moka. Jesu o boletše gore ditiragalo tša go swana le tše di tla bontšha gore bofelo bo kgauswi.

Ge Beibele e bolela ka nako ya pele ga bofelo e re ke ‘mehla ya bofelo.’ (2 Petro 3:3, 4) Timotheo wa bobedi 3:1-5 e hlalosa gore mehla ya bofelo e be e tla bonwa ka batho bao ba itshwarago gampe. (Bona lepokisi leo le rego “ Dilo Tšeo di Tlago go Direga Pele ga Bofelo.”) Na o bona batho bao e lego baithati, ba megabaru, ba bogale le bao ba se nago lerato la tlhago lehono? Batho ba bjalo ba bontšha gore re phela mehleng ya bofelo.

Mehla ya bofelo e tlo tšea nako e kaaka’ng? Beibele e re e tlo tšea “nako e kopana.” Ka morago ga moo, Modimo o tlo fediša “bao ba senyago lefase.”—Kutollo 11:15-18; 12:12.

Jehofa Modimo o šetše a beile letšatši le iri yeo a tlago go fediša dilo tše mpe mo lefaseng. (Mateo 24:36) Se se kgahlišago ke gore Modimo “ga a rate gore go fedišwe le ge e le mang.” (2 Petro 3:9) O nea batho sebaka sa gore ba ithute ka yena le go mo kwa. Ka baka la’ng? Ka gobane o nyaka gore re tle re phologe ge a fediša lefase gomme re tle re phele lefaseng leo a tla bego a le fetotše paradeise.

Modimo o kgonthišeditše gore batho ka moka ba ithuta seo ba swanetšego go se dira e le gore ba tle ba phele ka tlase ga Mmušo wa gagwe. Jesu o itše ditaba tše dibotse tša Mmušo wa Modimo di be di tla bolelwa “lefaseng ka moka.” (Mateo 24:14) Ka 2019, Dihlatse tša Jehofa di feditše diiri tše di fetago dibilione tše pedi lefaseng ka moka di bolela molaetša woo o neago batho kholofelo ya gore dilo di tlo loka e se kgale. Jesu o itše ditaba tše dibotse di be di tlo bolelwa lefaseng ka moka pele bofelo bo ka tla.

Nako ya gore batho ba buše e kgauswi le go fela. Ditaba tše dibotse ke gore o ka phologa ge lefase le fedišwa gomme wa tla wa phela lefaseng leo le fetotšwego Paradeise leo Modimo a re tshepišitšego lona. Sehlogo se se latelago se tlo bontšha gore o ka dira eng gore o tle o phele lefaseng leo le lefsa.