KE BATHO

Ekwa gore Beibele e Re’ng: Modimo “ga se a bopela lefase lefeela eupša o le hlametše go dulwa ke batho.”—JESAYA 45:18.

LEFASE

Ekwa gore Beibele e re’ng: “Moloko o a tloga gomme gwa tla o mongwe; eupša lefase le dula le le gona go iša mehleng ya neng le neng.”—MMOLEDI 1:4.

SEO SE RA GO RE’NG: Go ya ka Beibele lefase le ka se tsoge le fedišitšwe eupša le tla dula le na le batho. Bjale, ge re bolela ka bofelo bja lefase, re bolela ka eng?

NAGANA KA SE: Beibele e bapiša bofelo bjo bo tlago bja lefase le, le seo se diragetšego mehleng ya Noa. Ka nako yeo, lefase le be le “tletše bošoro.” (Genesi 6:13) Eupša, Noa o be a lokile. Ka gona, Modimo o ile a fediša batho ba babe ka moka ka meetsefula eupša a phološa Noa le lapa la gagwe. Ge Beibele e bolela ka seo se diragetšego mehleng ya Noa e re: “Lefase la nakong yeo le ile la senywa ge le be le apešwa ke meetse.” (2 Petro 3:6) Bjoo e be e le bofelo bja lefase la nako yeo. Bjale, go fedišitšwe eng? Ga se gwa fedišwa lefase eupša go fedišitšwe batho ba babe bao ba bego ba phela mo lefaseng. Ka gona, ge Beibele e bolela ka bofelo bja lefase, ga e bolele ka go fedišwa ga polanete ye. Go e na le moo, e bolela ka go fedišwa ga batho ba babe mo lefaseng le mebušo ya mo lefaseng.

MATHATA LE DILO TŠE MPE

Ekwa gore Beibele e re’ng: “Go se gokae yo kgopo o tla be a se sa le gona; wena o tla lebelela lefelo la gagwe, gomme yena o tla be a se gona. Eupša ba boleta bona e tla ba beng ba lefase, ba tla thaba kudu ka baka la go ata ga khutšo.”—PSALME 37:10, 11.

SEO SE RA GO RE’NG: Meetsefula a mehleng ya Noa ga se a fediša dilo tše mpe sa ruri. Ka morago ga meetsefula go ile gwa ba le batho ba babe gape bao ba bego ba thatafišetša ba bangwe bophelo. E se kgale, Modimo o tlo fediša dilo tše mpe ka moka. Go etša ge mopsalme a boletše: “Yo kgopo o tla be a se sa le gona.” Modimo o tlo diriša Mmušo wa gagwe go fediša dilo tše mpe. Mmušo wo o legodimong gomme o tlo buša batho bao ba kwago Modimo.

NAGANA KA SE: Na bao ba bušago lefase gona bjale, ba ka dumela go bušwa ke Mmušo wa Modimo? Beibele e bontšha gore ba ka se dumele. Ka botlaela, ba tlo lwa le Mmušo wa Modimo. (Psalme 2:2) Mafelelo e tla ba afe? Mmušo wa Modimo o tlo fediša mebušo ya batho gomme “wona o tla ema go iša mehleng ya neng le neng.” (Daniele 2:44) Eupša ke ka baka la’ng mebušo ya batho e swanetše go fedišwa?

Ekwa gore Beibele e reng: “Ga go matleng a motho yo a sepelago gore a laole dikgato tša gagwe.”—JEREMIA 10:23.

SEO SE RA GO RE’NG: Batho ba be ba sa bopelwa gore ba ipuše. Ka baka leo, ga ba kgone go buša batho ba bangwe le go rarolla mathata a bona.

NAGANA KA SE: Nyakišišo ya Britannica Academic e bontšhitše gore mebušo ya batho ga e kgone go “rarolla mathata ao batho ba nago le ona a go swana le bodiidi, tlala, malwetši, dikotsi tša tlhago, dintwa le mehuta ka moka ya bošoro.” E tšwetše pele ka gore: “Ba bangwe . . . ba dumela gore ke mmušo o tee woo o bušago lefase ka moka woo o ka rarollago mathata a ka moka.” Le ge mebušo ya lefase e be e ka kwana, batho ba mo lefaseng ba be ba sa tlo no bušwa ke batho bao ba belegwego ba na le sebe bao ba palelwago ke go rarolla mathata ao re boletšego ka ona ka mo godimo. Mmušo wa Modimo ke wona o nnoši o ka fedišago mathata a batho ka moka sa ruri.

Ka gona, go ya ka Beibele, bofelo bja lefase ga se selo seo batho ba ba lokilego ba swanetšego go se boifa. Go e na le moo, ke selo seo ba felago pelo ya gore se direge ka gobane lefase le leo le senyegilego le tlo tšeelwa legato ke Paradeise e botse!

Dilo tšeo ka moka di tlo direga neng? Sehlogo se se latelago se tlo araba potšišo ye go tšwa Beibeleng.