Iri ya mathomo ya ge ngwana a sa tšwa go belegwa, ke nako ya bohlokwa kudu bophelong. Ke ka baka la’ng re re’alo? Ke ka baka la gore bomma bao ba kgonago go bontšha masea a bona lerato nakong ye ya bohlokwa, ba a thuša gore a tle a gole gabotse. *

Ke eng seo se dirago gore mma a rate lesea la gagwe leo le sa tšwago go belegwa? Moporofesara Jeannette Crenshaw o boletše ka go The Journal of Perinatal Education gore ge mma a sa tšwa go belega, mmele wa gagwe o tšweletša dihomoune “tšeo di dirago gore a rate lesea la gagwe ge a dutše a le kgoma, a le lebelela e bile a le nyantšha.” Dihomoune tše dingwe di dira gore mma “a thuše lesea la gagwe ge le hloka thušo” le gore a kgone go kwešišana le lona. Go tla bjang gore seo se direge?

Mmopi wa rena yo lerato e lego Jehofa Modimo, * ke yena a dirilego gore bomma ba kwešišane le masea a bona. Kgoši Dafida o boletše gore Modimo ke yena a mo ntšhitšego “ka popelong” ya mmagwe le go dira gore a ikwe a šireletšegile ge mmagwe a mo kukile. O ile a rapela ka gore: “Ke lahletšwe go wena go tšwa ka popelong; o bile Modimo wa ka go tloga ge ke le ka mpeng ya mma.”​—Psalme 22:9, 10.

NAGANA KA TABA ŠE: Ge e ba Modimo a bopile mma ka tsela ya gore a rate lesea la gagwe le go le kwešiša, na a ka palelwa ke go re hlokomela, mola ‘re le bana ba Gagwe’?​—Ditiro 17:29.

Jesu Kriste, yoo a tsebago Mmopi wa rena go re feta ka moka, o itše: “Na dithaga tše pedi ga di rekišwe ka tšhelete ya tšhipi ya theko e nyenyane? Lega go le bjalo, ga go le e tee ya tšona yeo e tlago go wela fase Tatago lena a sa tsebe. Eupša yona meriri ye ya dihlogo tša lena e badilwe ka moka. Ka gona, le se ke la boifa: Le ba bohlokwa go feta dithaga tše dintši.”​—Mateo 10:29-31.

Ba bantši ba rena ga re na taba le dinonyana, le ge e nngwe ya tšona e ka wela fase, ga re na taba. Eupša Tatago rena wa legodimong o hlokomela e nngwe le e nngwe ya tšona. Beibele e bontšha gore batho ba bohlokwa kudu go Modimo go feta dinonyana. Re ithuta’ng tabeng ye? Re ithuta gore ga se ra swanela go “boifa [goba go tshwenyega],” ka  gobane Modimo o na le taba le rena. Ee, Modimo o a re rata.

Seo Mangwalo a re botšago sona

• “Mahlo a Jehofa a gohle, a lebeletše ba babe le ba ba lokilego.”​—DIEMA 15:3.

• “Mahlo a Jehofa a lebeletše baloki, ditsebe tša gagwe di a ba kwa ge ba llela gore a ba thuše.”​—PSALME 34:15.

• “Ke tla thabela le go hlalalela botho bja gago, ka ge o bone mohlako wa ka; o tsebile ka tlalelo ya moya wa ka.”​—PSALME 31:7.

Na go tseba gore Modimo o na le taba le rena le gore o a re rata go ka re thuša bophelong? Ee, go ka re thuša. Ka mohlala, Hannah * wa kua Engelane o re:

“Gantši ke be ke nagana gore Jehofa ga a nthate le gore ga a arabe dithapelo tša ka. Ke be ke ipotša gore o dira seo ka gobane a bona ke se na tumelo, le gore o a nkotla ka ge a bona ke se bohlokwa. Ke be ke nagana gore ga a na taba le nna.”

Eupša gona bjale Hannah ga a sa nagana ka tsela yeo. Go tlile bjang gore a fetoše monagano? O re: “Ganyenyane-ganyenyane ke ile ka lemoga gore Modimo o a nthata le gore o na le taba le nna. Mengwageng e mentši e fetilego, ke ile ka kwa polelo yeo e theilwego Beibeleng yeo e bego e bolela ka sehlabelo sa Jesu. Polelo yeo e ile ya nthuša go bona gore Jehofa o a nthata. Ge ke bona gore Jehofa o arabile dithapelo tša ka, gantši ke be ke lla ka gobane seo se be se mpontšha gore ka nnete o a nthata. E bile go ithuta Beibele le go ya dibokeng tša Dihlatse tša Jehofa go nthutile dilo tše dintši ka Jehofa, gore ke Modimo wa mohuta mang le kamoo a ikwago ka gona ka rena. Gona bjale ke a bona gore Jehofa o na le taba le yo mongwe le yo mongwe wa rena. E bile ke a bona gore o a re rata le go re hlokomela.”

Mantšu a Hannah a a kgothatša. Ke eng seo se ka dirago gore o tshepe gore Modimo o a go kwešiša le gore o tseba kamoo o ikwago ka gona? Sehlogo se se latelago se tlo araba potšišo ye.