LE GE batswadi ba rena ba mathomo e lego Adama le Efa ba ile ba se kwe Modimo, gomme ba fetišetša sebe le lehu go rena, seo ga se sa fetoša morero wa Modimo wa gore batho ba phele ka mo go sa felego. Ka Lentšung la gagwe e lego Beibele, Modimo o re botša gantšintši gore o tlo phetha seo a bego a se rerile.

• Psalme 37:29 e re: “Baloki bona e tla ba beng ba lefase, ba tla dula mo go lona ka mo go sa felego.”

• Jesaya 25:8 e re: “[Modimo] o tla metša lehu ka mo go sa felego, . . . o tla phumola megokgo difahlegong ka moka.”

• 1 Bakorinthe 15:26 e re: “Lehu ke lenaba leo le tlago go fedišwa mafelelong.”

• Kutollo 21:4 e re: “Lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”

Modimo o tlo “metša lehu” bjang goba go le fediša? Ka ge re šetše re kwele, Beibele e re “baloki ba tla . . . [phela] ka mo go sa felego” mo lefaseng. Eupša sa go makatša ke gore e bolela gape gore “lefaseng ga go motho yo a lokilego yo a dirago seo se lokilego.” (Mmoledi 7:20) Bjale e le gore Modimo a fediše lehu, na go tlo ra gore a lebale taba ya gore re badiradibe? Aowa! Re tseba bjang gore o be a sa bolele maaka ge a be a re baloki ba tlo phela ka mo go sa felego mo lefaseng? Re tseba seo ka gobane Beibele e re ‘a ka se ke a aketša.’ (Tito 1:2) Bjale, Modimo o tlo dira’ng gore batho ba tle ba phele ka mo go sa felego mo lefaseng?

Ka ge Jehofa Modimo a re rata, o dirile se sengwe gore a re phološe lehung. O re neile topollo. Topollo ke selo le ge e le sefe seo se lefiwago go fediša sekoloto goba go phethagatša toka. Ka ge ka moka ga rena re le badiradibe e bile re lebanwe ke lehu, Beibele e re botša thwii gore: “Ga go le o tee wa bona yo le ka mohla a ka kgonago go lopolla ngwanabo, goba go nea Modimo topollo bakeng sa ngwanabo; (tefo ya go lopolla moya wa bona e godimo kudu moo e dutšego e le bjalo go iša mehleng ya neng le neng).”—Psalme 49:7, 8.

Ge motho a hlokofala, o lefa kotlo ya sebe seo Adama le Efa ba re fetišeditšego sona; eupša motho yoo a ka se kgone go itopolla lehung goba go lopolla batho ba bangwe. (Baroma 6:7) Ka baka leo, motho feela yo a bego a ka re lopolla lehung ke yo a se nago sebe le yo a phethagetšego. Le gona motho yoo o be a tla be a hwela dibe tša rena, e sego tša gagwe. Motho yoo e be e tla ba mang?—Baheberu 10:1-4.

Modimo o ile a romela Morwa wa gagwe e lego Jesu gore a tle a belegwe mo lefaseng e le motho yo a se nago sebe. (1 Petro 2:22) Jesu o ile a re o tletše go “nea [bophelo bja gagwe] e le topollo bakeng sa ba bantši.” (Mareka 10:45) Ka go hwa ga gagwe, Jesu o ile a fenya lenaba la rena e lego lehu e le gore re tle re phele ka mo go sa felego.—Johane 3:16.

Beibele e boletše e sa le pele gore “go tla ba le dinako tše di hlobaetšago tšeo go lego thata go lebeletšana le tšona.” Lehono re phela dinakong tšeo. Seo ke bohlatse bja gore re phela “mehleng ya bofelo” bja lefase le le lebe. (2 Timotheo 3:1) Mehla ye e tla felela ge go fihla “letšatši la kahlolo le la tshenyego ya batho ba sa boifego Modimo.” (2 Petro 3:3, 7) Eupša batho bao ba ratago Modimo ba tlo phologa tshenyego yeo gomme Modimo a ba šegofatša ka “[bophelo] bjo bo sa felego.”—Mateo 25:46.

Go thwe’ng ka batho bao ba hlokofetšego? Modimo  o tlo ba tsoša bahung gore ba tle ba phele ka mo go sa felego. Jesu o ile a tsoša mohu ge a be a etetše motseng wa Naini. Ge a le moo, o ile a bona batho ba rwele setopo sa ngwana wa mohlologadi yo mongwe. Jesu o ile a “šokela” mohlologadi yoo gomme a tsoša morwa yoo wa gagwe bahung. (Luka 7:11-15) Moapostola Paulo o ile a ngwala gore: “Ke na le kholofelo go Modimo . . . ya gore go tla ba le tsogo ya ba lokilego gotee le ba sa lokago.” Taba ye ya gore bahu ba tlo tsoga e re bontšha gore Modimo o re rata kudu.—Ditiro 24:15.

Batho ba bantši ba tlo phela ka mo go sa felego. Beibele e re: “Baloki bona e tla ba beng ba lefase, ba tla dula mo go lona ka mo go sa felego.” (Psalme 37:29) Ka nako yeo, ba tlo thaba kudu ge ba bona seo moapostola Paulo a se ngwadilego mengwageng e ka bago e 2 000 e fetilego se direga. O ngwadile gore: “Wena Lehu, o fentšwe! Wena Lehu, o ka se sa bolaya!” (1 Bakorinthe 15:55, Bibele ya Taba ye Botse.) Ee, Modimo o tla be a fedišitše lenaba la rena e lego lehu!