Re ka Bontšha Bjang Gore re Rata Batho ba Bangwe?
Ka ge re le bana ba Adama, ka moka ga rena re lapa le tee. Le ge re tseba gore lapa le lengwe le lengwe le swanetše go ratana le go hlomphana, eupša malapa a mantši lehono ga a dire seo. Ka ge Modimo a re rata, o nyaka gore le rena re ratane le go hlomphana.
SEO MANGWALO A MAKGETHWA A SE BOLELAGO KA GO BONTŠHANA LERATO
“O rate wa geno ka mokgwa wo o ithatago ka wona.”—LEFITIKO 19:18.
“Tšwelang pele le rata manaba a lena.”—MATEO 5:44.
GO RATA BATHO BA BANGWE GO RA GO RENG?
Bona kamoo Modimo a hlalosago lerato ka gona ka Mangwalong a gagwe a Makgethwa, go 1 Bakorinthe 13:4-7.
“Lerato ga le fele pelo e bile le botho.”
Nagana ka se: O ikwa bjang ge batho ba bangwe ba sa go felele pelo e bile ba go bontšha botho, gomme ge o dirile diphošo ba sa go kwatele?
‘Lerato ga le hufege, goba ga le na mona.’
Nagana ka se: O ikwa bjang ge batho ba bangwe ba dula ba go belaela goba ba go jela mona?
Lerato “ga le nyake tša go ikhola.”
Nagana ka se: O ikwa bjang ge batho ba bangwe ba hlompha tsela yeo o lebelelago dilo ka yona, e bile ba sa go gapeletše gore o kwešiše tsela yeo bona ba naganago ka yona?
Lerato ‘ga le boloke pego ya bobe, goba go boloka sekgopi.’
Nagana ka se: Modimo o dula a ikemišeditše go lebalela batho bao ba itsholago. Psalme 103:9 e re: “[Modimo ] a ka se dule a nyaka diphošo ka dinako tšohle, le gona a ka se dule a befetšwe.” Ge motho yo re bego re mo diretše phošo a re lebalela, re a thaba. Ka gona, le rena re swanetše go dula re ikemišeditše go lebalela batho bao ba re direlago diphošo.—Psalme 86:5.
Lerato “ga le thabele go se loke.”
Nagana ka se: Ge re ka diragalelwa ke selo se sebe, re ka se thabe ge motho yo mongwe a re sega. Ka gona, le rena ga se ra swanela go thaba ge batho ba bangwe ba diragalelwa ke dilo tše mpe, le ge e ba batho bao ba kile ba re swara gampe.
E le gore Modimo a dule a re rata, le rena re swanetše go rata batho ba bangwe. Ga se ra swanela go lebelela gore ba na le mengwaga e mekae, ba tsena kereke efe goba ke ba morafo ofe. Tsela e nngwe yeo re ka bontšhago gore re rata batho, ke ka go thuša bao ba hlokago thušo. Sehlogo se se latelago se tla re botša gore re ka dira seo bjang.
You May Also Like
PHAFOGA!
Kamoo re ka Hwetšago Lethabo—Go ba le Lerato
Go bontšhana lerato go bohlokwa kudu bakeng sa go dira gore batho ba thabe.
