Ka morago ga gore Modimo a bope batho, o be a boledišana le bona a diriša barongwa le baporofeta. O ile a dira gore batho bao ba ngwale fase dilo tšeo a bego a ba botša tšona, le tšeo a tlago go re direla tšona. Le wena o ka tla wa bona dilo tše tše dibotse tšeo Modimo a re tshepišago tšona. Bjale o ka dira eng gore o tsebe ka dilo tše?

O ka hwetša molaetša wo Modimo a re botšago wona ka Mangwalong a Makgethwa. (2 Timotheo 3:16) Modimo o ile a diriša bjang baporofeta gore ba ngwale molaetša wa gagwe? (2 Petro 1:21) O ile a diriša moya wa gagwe o mokgethwa gore o ba thuše go tseba dilo tšeo a bego a nyaka gore ba di ngwale. Lehono re ka swantšha se le seo mong wa kgwebo a se dirago. Le ge a ka kgopela mongwaledi wa gagwe gore a mo ngwalele molaetša, re a tseba gore molaetša woo o tšwa go mong wa kgwebo. Ka mo go swanago, le ge Modimo a dirišitše batho gore ba ngwale molaetša wa gagwe, ke yena a ngwadilego Mangwalo a Makgethwa.

Modimo o nyaka gore batho ka moka ba bale molaetša wa gagwe le go o kwešiša ka gobane o bohlokwa. Lehono batho ba “ditšhaba tšohle, meloko yohle le maleme ohle,” ba ka kgona go bala molaetša wa Modimo ka Mangwalong a Makgethwa. (Kutollo 14:6) Ka thušo ya Modimo, batho ba kgona go bala Mangwalo a Makgethwa a feletše goba karolo ya ona, ka maleme a fetago a 3 000 go feta puku le ge e le efe yeo e lego gona mo lefaseng.